1. Kiko ta “nesesidat spiritual,” i kon e ta mará ku felisidat?

 BERDADERO felisidat no ta djis un sintimentu dushi ku ta bai i bini. Un hende por ta felis durante henter su bida. Kon e por logra esei? Hesus a bisa den e Sermon riba Seru: “Felis ta esnan ku ta konsiente di nan nesesidat spiritual.” (Mat. 5:3) E tabata sa ku hende a ser kreá ku “nesesidat spiritual,” esta, e deseo fuerte di konosé i adorá nan Kreador, Yehova Dios. Anto komo ku Yehova ta un “Dios felis,” tur hende ku ador’é tambe ta felis.​—1 Tim. 1:11.

2-3. (a) Ken mas Hesus a bisa ku por ta felis? (b) Kiko nos lo trata den e artíkulo akí, i dikon ta importante pa trata esei?

² Bo bida mester ta sin problema pa bo ta felis? Nò. Hesus a bisa algu interesante den e Sermon Riba Seru. El a bisa ku “esnan ku ta tristu” por ta felis apesar ku nan ta pasando den sirkunstansianan difísil òf ta kibrá debí na nan erornan. El a bisa tambe ku “esnan ku a ser persiguí pa motibu ku nan a hasi loke ta hustu” òf ku ser “insultá” pasobra nan ta su siguidónan por ta felis. (Mat. 5:4, 10, 11) Pero, kon un hende ku ta pasa den e kosnan ei por ta berdaderamente felis?

³ Loke Hesus tabata ke trese padilanti ta ku felisidat no ta dependé di nos sirkunstansia di bida. Mas bien, berdadero felisidat ta mará na si nos ta satisfasé nos nesesidat spiritual i hala serka Dios. (Sant. 4:8) Kon un hende por logra esei? Den e artíkulo akí, nos lo wak tres kos ku lo yuda nos ta berdaderamente felis.

4. Kiko ta e promé kos ku nos mester hasi pa nos ta berdaderamente felis? (Salmo 1:1-3)

⁴ PROMÉ: Pa nos por ta berdaderamente felis, nos tin ku kome den sentido spiritual, esta, lesa i studia Beibel. Hesus a kompará Beibel ku kuminda. Tantu hende komo bestia mester kome pa nan por keda na bida. Pero ta hende so por kome den sentido spiritual, esta, lesa i studia Beibel. Anto ta masha importante pa nos hasi esei. Ku rason anto Hesus a bisa ku “hende no mester biba di pan so, sino tambe di tur palabra ku ta sali for di boka di Yehova.” (Mat. 4:4) Pues, nos no mester laga ni ún dia pasa sin ku nos kome den sentido spiritual, ku otro palabra, sin lesa algu for di Beibel. E salmista mes a bisa: ‘Felis ta hende ku ta stima lei di Yehova mashá i ku ta les’é di dia i anochi.’​—Lesa Salmo 1:1-3.

5-6. (a) Kiko nos por siña for di Beibel? (b) Ku kiko lesamentu di Beibel por yuda nos?

⁵ Komo Yehova stima nos, e ta splika nos den Beibel loke nos tin ku hasi pa nos por tin un bida felis. Nos ta siña kiko e ke pa nos hasi ku nos bida, kon nos por hala serka dje, kon nos por haña pordon pa nos pikánan i ki speransa maravioso e ta primintí nos. (Yer. 29:11) Segun ku nos lesa Beibel, nos ta deskubrí e bèrdatnan akí i nan ta yena nos kurason ku alegria!

⁶ Nos sa tambe ku Beibel ta yen di konseho práktiko pa bida. Ora nos sigui e konsehonan ei, nos ta berdaderamente  felis. Si bo ta desanimá debí na problemanan di bida, tuma mas tempu pa lesa i meditá riba Beibel. Hesus a bisa: “Felis ta esnan ku ta tende e palabra di Dios i ta kumpli kuné!”​—Luk. 11:28.

7. Kon bo por disfrutá di bo lesamentu di Beibel?

⁷ Ora bo ta lesa Beibel, tuma tempu pa bo saboriá loke bo ta lesa. Imaginá ku un konosí di bo kushiná un di bo platonan faborito. Pero, debí ku bo tin purá òf bo tin muchu kos na bo kabes, bo ta manda e kuminda abou sin disfrutá di kada hap. Ora bo tayó bira bashí, bo ta realisá ku bo a kome muchu lihé i bo ta sinti duele ku bo no a tuma tempu pa saboriá e plato. Wèl, meskos por pasa ora bo lesa Beibel. Tin biaha bo por lesa Beibel asina lihé ku bo no ta disfrutá òf saboriá di su mensahe. P’esei, tuma tempu pa disfrutá di bo lesamentu di Beibel: visualisá e esena, imaginá kon kada stèm ta zona i pensa riba loke bo ta lesa. Si bo hasi tur esei, lo bo ta mas felis.

8. Kon e “esklabo fiel i prudente” ta kumpli ku nan responsabilidat? (Wak tambe e nota.)

⁸ Hesus a duna “e esklabo fiel i prudente” e responsabilidat di perkurá kuminda spiritual pa nos na e debido tempu, i nos ta bon alimentá. b (Mat. 24:45) Beibel ta e ingrediente prinsipal di tur loke e esklabo fiel ta prepará. (1 Tes. 2:13) Kuminda spiritual ta yuda nos haña sa kon Yehova ta pensa. Ta p’esei, nos ta lesa E Toren di Vigilansia, Spièrta! i otro artíkulonan riba jw.org. Tambe nos ta prepará pa tur nos reunionnan i ta wak e programa di JW Broadcasting^® tur luna, si e ta disponibel na nos idioma. Ora nos probechá kome e abundansia di kuminda spiritual disponibel, esei lo yuda nos hasi e di dos kos pa nos ta berdaderamente felis.

9. Kiko ta e di dos kos ku lo yuda nos ta berdaderamente felis?

⁹ DI DOS: Pa nos ta berdaderamente felis, nos mester biba segun Yehova su normanan. E salmista a skirbi: ‘Felis ta tur hende ku tin rèspèt profundo pa Yehova, sí, hende ku ta kana den kaminda di Dios.’ (Sal. 128:1) Ora nos tin rèspèt profundo pa Yehova, nos lo evitá di hasi kosnan ku no ta agrad’é. (Pro. 16:6) P’esei, nos ta sigui hasi esfuerso pa sigui Yehova su normanan di loke ta bon i loke ta malu, kual el a laga skirbi den Beibel. (2 Kor. 7:1) Nos lo ta berdaderamente felis si nos hasi kosnan ku Yehova gusta i keda leu for di kosnan ku e no gusta.​—Sal. 37:27; 97:10; Rom. 12:9.

10. Segun Romanonan 12:2, kiko nos mester hasi?

¹⁰ Lesa Romanonan 12:2. Kisas un hende sa ku Yehova tin outoridat di disidí loke ta bon i loke malu, pero e mester ta dispuesto tambe pa obedesé e normanan ei. Laga nos wak un ehèmpel. Kisas un hende sa ku gobièrnu tin derecho di pone límite di velosidat, pero e no ta dispuesto pa obedesé e leinan ei. Komo resultado, e ta kore mas duru ku ta permití. Pues, ku nos kondukta nos ta demostrá ku nos ta kompletamente konvensí ku obedesé e normanan di Yehova ta e mihó manera di biba. (Pro. 12:28) Esei ta loke David tambe a pensa, p’esei el a bisa di Yehova: ‘Bo ta mustra  mi e kaminda ku ta hiba na bida. Den bo presensia, mi ta masha kontentu; na bo man drechi, mi ta felis pa semper.’​—Sal. 16:11.

11-12. (a) Ora nos ta preokupá òf desanimá, kiko nos tin ku tene kuidou kuné? (b) Kon Filipensenan 4:8 por yuda nos ora di skohe entretenimentu?

¹¹ Ora nos ta preokupá òf desanimá, nos ta haña gana di distraí nos mente un ratu. No tin nada malu den esei, pero nos mester tene kuidou pa nos no hasi kosnan ku Yehova no gusta.​—Efe. 5:10-12, 15-17.

¹² Den e karta ku Apòstel Pablo a skirbi na e kristiannan na Filipo, el a animá nan pa sigui pensa riba tur loke ta “hustu, . . . puru, . . . ku ta promové stimashon [i] tin birtut.” (Lesa Filipensenan 4:8.) Aunke ku Pablo no tabata papia akinan spesífikamente di entretenimentu, loke el a skirbi mester guia nos ora di skohe entretenimentu. Den bo mente, purba di formulá Filipensenan 4:8 na e siguiente manera: ‘Mi por konsiderá e kantika akí puru? E pelíkula, buki i video games ta digno di elogio?’ Asina ei bo por determiná si loke bo ke distraí bo mente kuné ta algu ku ta agradá Yehova òf no. Nos ke biba segun Yehova su normanan haltu. (Sal. 119:1-3) Ora nos ta respetá su normanan, nos lo tin un konsenshi limpi i nos lo por hasi e di tres i último kos ku lo duna nos berdadero felisidat.​—Echo. 23:1.

13. Kiko ta e di tres kos ku lo hasi nos berdaderamente felis? (Huan 4:23, 24)

¹³ DI TRES: Hasi sigur ku nos adorashon na Yehova ta na promé lugá den nos bida. Komo ku Yehova ta nos Kreador, e meresé pa nos ador’é. (Rev. 4:11; 14:6, 7) E kos di mas importante den nos bida mester ta pa adorá Yehova na e manera ku e ta aprobá, esta, “ku spiritu i ku bèrdat.” (Lesa Huan 4:23, 24.) Nos ke pa spiritu santu guia nos adorashon na Dios pa e ta kuadra ku e bèrdatnan di Beibel. Nos adorashon na Yehova ta bini na promé lugá, asta si nos ta biba na un pais kaminda nos obra ta restringí òf prohibí. Aktualmente mas ku 100 ruman ta será djis pasobra nan ta Testigu di Yehova. c Apesar di esei, nan ta felis pasó nan ta hasi tur loke nan por pa hasi orashon, studia i papia ku otro hende tokante nos Dios i su Reino. Ora hende insultá i persiguí nos, nos por ta felis pasó Yehova lo yuda nos perseverá i lo rekompensá nos.​—Sant. 1:12; 1 Ped. 4:14.

14. Kiko a pasa Jovidon, i dikon?

¹⁴ Ora ku nos hasi e tres kosnan ku nos a menshoná ariba, nos lo ta berdaderamente felis. Eksperensia di algun ruman ta komprobá esei. Wak loke a pasa ku Jovidon Bobojonov di Tadjikistan tempu e tabatin 19 aña. Komo ku el a nenga di drenta servisio militar, riba 4 di òktober 2019 sòldánan a sekuestr’é for di su kas, ser’é pa lunanan i a trat’é manera un kriminal. Medionan di komunikashon di vários pais a papia di e inhustisia akí. Nan a bisa ku sòldánan a batié pa purba di pon’é hura lealtat militar i bisti e unifòrm. Despues di esei, korte a  deklar’é kulpabel i a mand’é kampo di labor. El a keda einan te ora ku e presidente di Tadjikistan a dun’é grasia i a duna òrdu pa lag’é liber. Durante tur e tempu ei, Jovidon a keda leal i felis. Kon el a logra esei? Semper el a keda konsiente di su nesesidat spiritual.

15. Ora Jovidon tabata den prizòn, kon el a kome den sentido spiritual?

¹⁵ Aunke ku den prizòn Jovidon no tabatin Beibel ni niun di nos publikashonnan, tòg el a sigui kome den sentido spiritual. Kon el a logra esei? E rumannan tabata trese ko’i kome p’e, anto riba e saku di kompra nan tabata skirbi e teksto di dia. Asina ei, e por a lesa i meditá riba Beibel tur dia. Despues ku el a sali liber, el a duna e siguiente konseho: “Ta masha importante pa rumannan ku ainda no a haña nan ku pruebanan difísil, hasi bon uso di nan libertat pa haña mas konosementu di Yehova lesando Beibel i nos publikashonnan.”

16. Kiko Jovidon a skohe pa focus riba dje?

¹⁶ Jovidon a biba segun Yehova su normanan. Na lugá di yena su mente ku deseonan robes i hasi kosnan ku tabata malu, el a focus riba Yehova i riba loke  Yehova gusta. Jovidon a atmirá e bunitesa di Yehova su kreashon. Tur mainta, kanto di para tabata lant’é. Anochi, e tabata atmirá luna i e streanan. El a bisa: “E regalonan ei di Yehova a laga mi sinti mi felis i animá.” Ora nos ta gradisidu pa Yehova su provishonnan spiritual i físiko, nos lo tin un kurason felis, i e alegria ei lo duna nos forsa pa perseverá.

17. Kon 1 Pedro 1:6 i 7 por yuda un ruman ku ta den un situashon paresido na Jovidon?

¹⁷ Ademas, Jovidon a pone adorashon na Yehova na promé lugá. E tabata sa kon importante ta pa keda fiel na e Dios berdadero. Hesus a bisa: “Ta Yehova bo Dios bo tin ku adorá, i ta na e so bo tin ku rindi sirbishi sagrado.” (Luk. 4:8) Komandantenan militar i sòldánan a purba di stòp Jovidon di sirbi Yehova. Pero, el a hasi orashon tur dia i tur anochi, pidiendo Yehova yud’é pa no entregá i pa keda fiel. Apesar di tur e tratonan inhustu, Jovidon a keda fiel. Aworakí, e por alegrá pasobra e tin algu ku e no tabatin promé ku nan a sekuestr’é, batié i ser’é: un fe ku a ser di tèst.​—Lesa 1 Pedro 1:6, 7.

18. Kiko nos tin ku hasi pa nos sigui ta felis?

¹⁸ Yehova sa kiko nos mester pa nos ta berdaderamente felis. Si nos hasi e tres kosnan ku nos a analisá den e artíkulo akí, nos lo ta felis apesar di situashonnan difísil. Anto e ora ei nos tambe por bisa: ‘Felis ta e pueblo ku su Dios ta Yehova!’​—Sal. 144:15.