“SI UN di boso nenga di bringa kontra Fransia òf Inglatera, boso tur lo muri!” Esei ta loke un ofisial nazi a grita un grupo di Testigu di Yehova durante Segundo Guera Mundial. Aunke tabatin sòldá pará einan kla pa tira, niun di e rumannan a kibra nan integridat. Nan a demostrá kurashi. Loke nan a hasi ta mustra e punto di bista di Testigunan di Yehova enkuanto guera. Nos ta nenga di bringa den e gueranan di e mundu akí. Asta ora nan menasá nos ku morto, nos ta keda neutral.

1. E ISRAELITANAN TABATA PERTENESÉ NA ÚN NASHON

Den pasado, Yehova a reuní su pueblo den ún nashon. El a yama e israelitanan su “propiedat presioso,” i el a asta bisa ku “for di tur pueblo Mi a skohe boso.” (Éks. 19:5, BPK) Ademas, Dios a duna nan un área spesífiko pa biba. Pues, ora Yehova a bisa nan pa bai bringa kontra un otro nashon, nan lo no a bringa ni mata nan rumannan, esta, otro sirbidó di Yehova. a

Awe, sirbidónan di Yehova ta bin “di tur nashon, tribu, pueblo i idioma.” (Rev. 7:9) Si nan bai guera, por sosodé ku nan ta bringa kontra, òf te asta mata nan rumannan.

 2. TA YEHOVA A DUNA E ISRAELITANAN ÒRDU PA BAI GUERA

Den pasado, Yehova a disidí ki ora i pa ki motibu e israelitanan mester a bai guera. Por ehèmpel, Dios a manda e israelitanan bai bringa kontra e kananeonan, kendenan tabata konosí pa adorashon di demoño, inmoralidat grosero i sakrifisio di mucha. Yehova tabata ke pa e israelitanan eliminá mal influensia for di e tera ku el a primintí di duna nan. (Lev. 18:24, 25) Despues ku e israelitanan a establesé den e Tera Primintí, tabatin biaha ku Dios a manda nan pa bai guera pa defendé Israel kontra nan enemigunan. (2 Sám. 5:17-25) Sinembargo, niun ora so Yehova no a permití e israelitanan disidí pa nan mes si nan mester a bai guera òf nò. Ora nan a disidí pa nan mes di bai guera tòg, e resultadonan tabata fatal.​—Num. 14:41-45; 2 Kró. 35:20-24.

Awe, Yehova no ta manda hende bai guera. Nashonnan ta bai guera pa kumpli ku nan mes deseo i no pa kumpli ku loke Dios ke. Kisas nan ta bai guera pa amplia nan teritorio, pa generá mas ganashi òf pa promové nan idea polítiko. Tambe tin esnan ku ta bai bringa den nòmber di Dios pa protehá nan religion òf pa eliminá enemigunan di Dios. Loke nan ta hasi ei sí ta bon? Wèl, kòrda ku Yehova mes lo protehá su berdadero adoradónan i destruí su enemigunan den un guera den futuro, esta, e bataya di Armagedon. (Rev. 16:14, 16) Den e bataya ei, niun di Yehova su adoradónan ku ta aki riba tera lo partisipá. Ta solamente su sirbidónan den shelu lo forma parti di su ehérsito.​—Rev. 19:11-15.

3. E ISRAELITANAN A SPAR BIDA DI ESNAN KU A DEMOSTRÁ FE

Den pasado, e israelitanan a mustra miserikòrdia na esnan ku a demostrá fe den Dios i a mata solamente esnan ku Yehova a manda nan pa eliminá. Ban wak dos ehèmpel. Den e kaso di Yériko, Yehova a manda su pueblo pa destruí e stat ei. Sinembargo, e israelitanan a spar bida di Rahab i su famia pa  motibu di su fe. (Hos. 2:9-16; 6:16, 17) Mas despues, den kaso di Gabaon, e israelitanan a spar henter e stat pasobra e gabaonitanan a demostrá rèspèt profundo pa Dios.​—Hos. 9:3-9, 17-19.

Awe, e nashonnan ku ta bai guera no ta spar bida di esnan ku ta demostrá fe. I hopi bes nan ta mata hende ku no tin nada di haber ku e guera.

4. E ISRAELITANAN MESTER A TENE NA YEHOVA SU REGLANAN DI GUERA

Den pasado, Yehova tabata ferwagt pa su sòldánan tene nan mes na su reglanan ora nan tabata bai guera. Por ehèmpel, tabatin biaha ku Yehova tabata instruí nan pa ora nan yega un stat enemigu nan “ofres’é pas” promé. (Deu. 20:10) Ademas, Yehova a instruí su sòldánan pa tene nan kampamentu limpi, i tambe pa tene nan mes na su leinan moral haltu. (Deu. 23:9-14) Ora e nashonnan rònt di Israel tabata gana un guera, hopi biaha nan tabata violá e muhénan di e nashon enemigu. Pero Yehova a prohibí e israelitanan pa hasi esei. De echo, si despues di e guera nan kier a kasa ku un muhé di e nashon enemigu, nan mester a warda un luna.​—Deu. 21:10-13.

Awe, mayoria di nashon a firma akuerdo internashonal ku ta inkluí reglanan tokante guera. Pero, aunke ku e akuerdonan ei mester protehá hende inosente, lamentablemente nashonnan no ta tene nan mes na nan.

5. DIOS A BRINGA PA SU PUEBLO

Den pasado, Yehova a bringa pa e israelitanan i hopi biaha el a hasi milager ku a yuda nan gana bataya. Por ehèmpel, Yehova a yuda e israelitanan konkistá e stat Yériko. Kon el a hasi esei? Di akuerdo ku Yehova su instrukshon, e israelitanan “a dal un gritu duru i e muraya a basha bou.” Esei a hasi ku nan por a konkistá e stat mas fásil. (Hos. 6:20) Anto kon nan a gana e bataya kontra e amoreonan? Yehova “a tira piedra grandi for di shelu riba nan . . . tabatin mas tantu ku a muri di e piedranan di hagel ku esnan ku e yunan di Israel a mata ku spada.”​—Hos. 10:6-11.

KRISTIANNAN BERDADERO TA HASI PAS KU OTRONAN

Manera nos a mira kaba, nos situashon ta hopi diferente for di esun di e israelitanan. Sinembargo, e sinku puntonan ku nos a trata no ta e úniko motibunan pakiko nos no ta bai guera. Tin mas motibu. Por ehèmpel, wak kiko Dios a bisa di esnan ku lo siña di dje den e último dianan. El a bisa: “Nunka mas nan lo train pa guera.” Pues, ta klaru ku nan lo no partisipá den nan tampoko. (Isa. 2:2-4) Ademas, Kristu a bisa ku su disipelnan lo “no ta parti di mundu.” Pues, nan ta keda kompletamente neutral i no ta mete den niun konflikto di mundu.​—Huan 15:19.

Kristu a pidi su siguidónan pa hasi mas. El a instruí nan pa evitá tur loke ku ta hiba na renkor, rabia i guera. (Mat. 5:21, 22) Ademas, el a bisa nan pa “hasi pas” i stima nan enemigunan.​—Mat. 5:9, 44, nota.

Kiko awor di kada un di nos? Ta klaru ku nos lo no bai guera. Pero, tin un ruman den kongregashon ku bo no por wanta òf soportá? Si ta asina, bo tin ku hasi esfuerso pa ranka e sintimentu ei for di bo kurason.​—Sant. 4:1, 11.

Nos no ta mete den e konfliktonan di mundu. Mas bien, nos ta hasi esfuerso pa promové pas i amor entre nos rumannan. (Huan 13:34, 35) P’esei, laga nos ta determiná pa keda neutral miéntras nos ta spera riba e dia ku Yehova lo eliminá guera pa semper.​—Sal. 46:9.