1-2. (a) Kon algun gobièrnu ta trata Testigunan di Yehova, i kon nos rumannan ta reakshoná? (b) Dikon nos por ta felis asta ora nan ta persiguí nos? (Deskribí loke bo ta mira riba e plachi di portada.)

 NOS OBRA ta restringí òf prohibí na e momento akí den mas ku 30 pais. Anto den algun di e paisnan akí, outoridatnan a asta sera nos rumannan. Ta ki malu nan a hasi? For di Yehova su punto di bista, nada. Tur loke nan a hasi ta lesa i studia Beibel, prediká i tambe bai reunion. I nan a nenga di tuma parti den asuntunan polítiko. Apesar di oposishon fuerte, e fiel sirbidónan akí di Dios ta mantené nan integridat, b esta, nan ta keda fiel na Yehova. Ta p’esei nan ta masha felis.

² Bo a ripará ku e rumannan yen di kurashi ei semper tin un sonrisa riba nan kara? Nan ta felis pasobra nan a mantené nan integridat i nan sa ku Yehova ta kontentu ku esei. (Sal. 15:1, 2, nota) Hesus a bisa: “Felis ta esnan ku a ser persiguí pa motibu ku nan ta hasi loke ta hustu . . . Sea kontentu i bula di alegria, ya ku boso rekompensa . . . ta grandi.”​—Mat. 5:10-12.

3. Segun Echonan 4:19 i 20, kiko Hesus su apòstelnan a hasi, i dikon nan a hasi esei?

³ Nos rumannan ta pasa den mesun prueba i persekushon ku e apòstelnan di e promé siglo a haña nan kuné pasobra  nan tabata prediká tokante Hesus. Vários bes e huesnan di korte supremo hudiu a “taha nan di papia den nòmber di Hesus.” (Echo. 4:18; 5:27, 28, 40) Kiko e apòstelnan a hasi e ora ei? (Lesa Echonan 4:19, 20.) Nan tabata sa ku un persona ku tin mas outoridat ‘a manda nan prediká na e pueblo i duna testimonio kabal’ tokante Kristu. (Echo. 10:42) Pues, ku kurashi Pedro i Huan, ku tabata esnan ku a hiba palabra, a bisa ku nan lo obedesé Dios na promé lugá i no e huesnan ei. I nan a bisa ku nan lo no stòp di papia tokante Hesus. Den un sentido, nan a bisa e huesnan: ‘Boso tin hopi kaikai di kere ku boso tin mas outoridat ku Dios!’

4. Segun Echonan 5:27-29, kiko e apòstelnan a hasi, i kon nos por hasi meskos ku nan?

⁴ E apòstelnan a laga un bon ehèmpel ku tur berdadero kristian ta sigui fo’i e tempu ei padilanti, esta: “Obedesé Dios na promé lugá, i no hende.” (Lesa Echonan 5:27-29.) E apòstelnan a haña un halá di sota debí ku nan a keda fiel na Yehova. Pero nan a sali for di e korte supremo hudiu mashá kontentu. “Pasobra Dios a konsiderá nan digno di ser desonrá pa kousa di Hesus su nòmber,” i nan a sigui prediká.​—Echo. 5:40-42.

5. Ki pregunta nos tin ku kontestá?

⁵ Loke e apòstelnan ei a hasi ta lanta un par di pregunta: Kon nan por a obedesé Dios na promé lugá i na mes momento kumpli ku e mandato di “ta sumiso na outoridatnan superior”? (Rom. 13:1) Apòstel Pablo a bisa ku kristiannan mester ta “obediente na gobièrnu i outoridat.” Pero, kon nos por obedesé gobièrnu i na mes momento keda fiel na Dios komo nos Gobernante supremo?​—Tito 3:1.

6. (a) Ken ta e “outoridatnan superior” na Romanonan 13:1, i ki obligashon nos tin ku nan? (b) Kiko nos tin ku kòrda tokante tur e gobernantenan humano?

⁶ Lesa Romanonan 13:1. Den e versíkulo akí, “outoridatnan superior” ta  referí na gobernantenan humano ku tin poder i outoridat riba otro hende. Kristiannan ta obedesé nan. E outoridatnan ei ta mantené òrdu públiko, ta hasi sigur ku otro hende ta mantené nan mes na leinan i tin biaha asta ta sali na defensa di Dios su sirbidónan. (Rev. 12:16) P’esei nos tin ku duna e outoridatnan ei loke nan ta pidi, esta, belasting, pago, temor i onor. (Rom. 13:7) Sinembargo, e gobièrnunan akí tin outoridat solamente pasobra Yehova ta permití esei. Hesus a mustra esei bon kla ora ku e gobernador romano Ponsio Pilato tabata interog’é. Ora Pilato a bis’é ku e tabatin outoridat pa sea laga mat’é òf salb’é, Hesus a kontest’é: “Lo bo no tabatin ningun outoridat riba mi si no ta pasobra bo a risibí esei djariba.” (Huan 19:11) Meskos ku Pilato, awe tur polítiko i gobernante humano tin outoridat, pero limitá.

7. Ki ora nos no ta obedesé gobernantenan humano, i kiko nan tin ku kòrda?

⁷ Kristiannan ta tene nan mes na e leinan di gobièrnu ku no ta bai kontra Dios su leinan. Ora gobernantenan eksigí nos hasi algu ku Dios su lei ta prohibí òf ora nan prohibí nos di hasi algu ku Yehova ke pa nos hasi, nos no ta obedesé nan. Por ehèmpel, nan por eksigí pa hóbennan karga arma i defendé e pais. c Òf nan por prohibí Tradukshon di Mundu Nobo i nos publikashonnan òf prohibí nos di prediká i reuní. Sea kual sea e kaso, ora ku nan abusá di e outoridat ku Dios a duna nan, por ehèmpel persiguiendo Kristu su disipelnan, nan lo tin ku duna kuenta i rason na Dios. Nan tin ku tene kuidou pasobra Yehova ta wak delaster un kos ku nan ta hasi.​—Ekl. 5:8.

8. Kiko ta e diferensia entre “superior” i “supremo,” i dikon ta importante pa nos sa esei?

⁸ E palabra “superior” ta nifiká “mihó, importante òf rango haltu.” Pero e no ta meskos ku e palabra “supremo,” ku ta nifiká “esun di mas mihó, esun di mas importante òf esun di rango mas haltu.” Aunke Beibel ta bisa ku e gobièrnunan humano ta “outoridatnan superior,” tin un otro outoridat ku ta supremo, esun di rango mas haltu ku nan tur. Kuater biaha Beibel ta bisa ku Yehova ta “e Haltísimo,” esta, e Ser supremo.​—Dan. 7:18, 22, 25, 27.

9. Kiko Profeta Daniel a mira den e vishonnan?

⁹ Profeta Daniel a haña vishonnan ku a mustra bon kla ku Yehova tin mas outoridat ku tur otro gobernante. Promé, Daniel a mira kuater bestia grandi ku ta representá e potensianan mundial di pasado i di nos tempu, esta, Babilonia, Medo-Persia, Gresia, Roma i e potensia Angloamerikano. (Dan. 7:1-3, 17) Djei, el a mira Yehova sintá riba un trono den korte, den shelu. (Dan. 7:9, 10) Loke e profeta ei a mira despues ta un atvertensia pa gobernantenan di awendia.

10. Segun Daniel 7:13, 14 i 27, ken Yehova ta bai duna outoridat riba tera, i kiko esaki ta bisa tokante Yehova?

¹⁰ Lesa Daniel 7:13, 14, 27. Dios ta kita tur outoridat for di e gobièrnunan humano i ta duna esnan ku realmente meresé tur e outoridat ei i ku tin mas poder ku gobièrnunan humano. Ken? Un persona ku parse “un yu di hende,” esta,  Hesukristu, i na “e santunan di e Haltísimo,” esta, e 144.000 ku ta bai goberná “pa semper.” (Dan. 7:18) Ta bisto anto ku Yehova ta “e Haltísimo,” e Ser supremo. Dikon? Pasobra e ta e úniko ku tin outoridat pa hasi algu asina.

11. Kiko mas Daniel a skirbi ku ta mustra ku Yehova tin mas outoridat ku tur nashon?

¹¹ Loke Daniel a mira den e vishon ta konfirmá loke el a bisa mas promé. El a bisa ku “e Dios di shelu . . . ta kita reinan i ta pone reinan.” Anto el a skirbi tambe ku ta “e Haltísimo ta goberná e reino di hende, i ta duna esaki na esun ku e ke.” (Dan. 2:19-21; 4:17) Pero Yehova a yega di pone òf kita rei den pasado? Klaru ku sí!

12. Duna un ehèmpel ku ta mustra ku den pasado Yehova a yega di kita rei for di trono. (Wak e plachi.)

¹² Yehova a mustra bon kla ku e tin outoridat supremo riba tur e “outoridatnan superior.” Laga nos wak tres ehèmpel. Fárao di Egipto a hasi Yehova su pueblo katibu i a nenga bes tras bes di duna nan libertat. Pero, Yehova a libra su pueblo i a laga Fárao hoga den Laman Kòrá. (Éks. 14:26-28; Sal. 136:15) Rei Belsasar di Babilonia a tene un komementu i “a halsa [su] mes kontra e Señor di shelu” i “a alabá e diosnan di plata i di oro,” en bes di Yehova. (Dan. 5:22, 23) Pero, Dios a humiá e hòmber arogante ei. Riba e anochi ei mes, Belsasar a ser matá i su reino a kai den man di Media i Persia. (Dan. 5:28, 30, 31) Heródes Agripa I, rei di Palestina, a laga mata Apòstel Santiago i djei el a hinka Apòstel Pedro den prizòn ku intenshon di mata e tambe. Pero, Yehova a frustra Heródes su plan. “E angel di Yehova a dal Heródes ku un malesa,” i el a muri.​—Echo. 12:1-5, 21-23.

13. Duna un ehèmpel ku ta mustra ku Yehova a yega di derotá koalishon di gobernante.

¹³ Pero kiko awor di un koalishon di gobernante, esta, un grupo di gobernante? Wèl, Yehova a mustra tambe ku e tin poder supremo riba nan. El a bringa pa Israel i a yuda nan derotá un grupo di 31 rei kananeo i pa konkistá un pida grandi di Tera Primintí. (Hos. 11:4-6, 20; 12:1, 7, 24) Un otro biaha  Yehova a yuda Israel derotá Rei Bèn-Hadad di Siria, ku huntu ku 32 otro gobernante a bin bringa kontra Israel.​—1 Rei. 20:1, 26-29.

14-15. (a) Kiko Rei Nabukodonosor i Rei Darío a bisa tokante Yehova su soberania? (b) Kiko e salmista a bisa tokante Yehova i Su nashon?

¹⁴ Bes tras bes Yehova a demostrá ku e ta e Ser supremo. Por ehèmpel, el a laga Rei Nabukodonosor di Babilonia bira loko na momento ku e rei a broma tokante su ‘forsa, poder i gloria di su mahestat,’ en bes di rekonosé ku ta Yehova ta esun supremo. Despues ku Nabukodonosor a kura, el a alabá Dios Haltísimo i a rekonosé ku Yehova su Reino ta un Reino eterno i ku niun hende no por strob’é. (Dan. 4:30, 33-35) Despues ku Daniel a keda fiel na Dios i Yehova a reskat’é for di e kueba di leon, Rei Darío a bisa: “Hende mester teme i tembla dilanti di e Dios di Daniel. Pasobra E ta e Dios bibu, i e ta permanesé pa semper, i su reino ta un ku lo no wòrdu destruí, i su dominio lo ta pa semper.”​—Dan. 6:7-10, 19-22, 26, 27.

¹⁵ E salmista a bisa: ‘Yehova a laga e kòmplòtnan di e nashonnan frakasá.’ I el a agregá: ‘Felis ta e nashon ku tin Yehova komo su Dios; felis ta e pueblo ku el a skohe komo su propiedat.’ (Sal. 33:10, 12) Pues anto, nos tin bon motibu pa keda fiel na Yehova.

16. Di kiko nos por tin sigur di dje durante e “tribulashon grandi,” i dikon? (Wak e plachi.)

¹⁶ Nos a lesa tokante kiko Yehova a hasi den pasado. Pero kiko nos por ferwagt den futuro? Nos por tin sigur ku Yehova lo reskatá su fiel sirbidónan durante e “tribulashon grandi” ku ta djis tras di porta. (Mat. 24:21; Dan. 12:1) Lo e hasi esei ora ku Gòg di Magòg, un koalishon di nashon, lansa un atake violento rònt mundu kontra Dios su fiel sirbidónan.  Asta si e koalishon ei inkluí tur e 193 miembronan di Nashonnan Uní, nan ta nada kompará ku e Ser supremo i su ehérsito selestial. Yehova a primintí: “Lo mi engrandesé mi mes, santifiká mi mes i hasi mi mes konosí den bista di hopi nashon; i nan lo sa ku ami ta SEÑOR.”​—Eze. 38:14-16, 23; Sal. 46:10.

17. Ki futuro Beibel ta bisa ta spera e reinan di e tera i hende ku keda fiel na Yehova?

¹⁷ E atake di Gòg lo hiba na e bataya desisivo di Armagedon, ora Yehova destruí “e reinan di henter e tera habitá.” (Rev. 16:14, 16; 19:19-21) Di otro banda, “ta hende hustu so lo keda biba riba tera.” Sí, ‘ta hende íntegro so lo keda riba tera.’​—Pro. 2:21.

18. Kiko hopi kristian berdadero tabata dispuesto pa hasi, i dikon? (Daniel 3:28)

¹⁸ Atraves di historia, hopi kristian berdadero a riska nan libertat i asta nan bida pasobra nan stima nan Gobernador supremo, Yehova. Nan tabata determiná pa keda fiel na e Ser supremo meskos ku e tres hebreonan ku Yehova a salba for di fòrnu di kandela.​—Lesa Daniel 3:28.

19. Dikon ta importante pa nos keda fiel na Yehova?

¹⁹ E salmista David tabata sa kon importante ta pa keda fiel na Yehova. El a skirbi: ‘Yehova lo dikta sentensia kontra e pueblonan. O Yehova, husga mi; kòrda riba mi integridat i mi obranan di hustisia.’ (Sal. 7:8, nota) Anto el a bisa tambe: ‘Laga mi integridat i rektitut protehá mi.’ (Sal. 25:21) E mihó manera ku nos por hiba nos bida ta di sigui ta fiel na Yehova i nunka bira desleal na dje pase loke pase. Si nos hasi esei, nos lo sinti meskos ku e salmista ku a skirbi: ‘Felis ta hende ku ta mantené nan integridat, sí, ku ta obedesé lei di Yehova.’​—Sal. 119:1.