1. Ki speransa Yehova a duna nos?

 YEHOVA a duna nos e bunita speransa di bida eterno. Algun di nos tin e speransa di biba den shelu komo kriatura inmortal. (1 Kor. 15:50, 53) Pero, mayoria di nos tin e speransa di biba felis i ku salú perfekto aki riba tera. (Rev. 21:3, 4) Sea ku bo speransa ta pa biba pa semper den shelu òf aki riba tera, bo speransa ta algu presioso pa bo.

2. Riba kiko nos speransa ta basá, i dikon nos por bisa esei?

² Ora Beibel usa e palabra “speransa,” e ta duna bo e idea di ta sigur ku algu bon ta bai sosodé. Nos tin sigur ku nos speransa lo bira realidat pasobra e ta bin di Yehova. (Rom. 15:13) Nos sa kiko Yehova a primintí. I tambe nos sa ku semper e ta kumpli ku su palabra. (Num. 23:19) Anto nos ta konvensí ku e ke i e por kumpli ku tur loke el a bisa ku e ta bai hasi. P’esei, nos speransa no ta basá riba fantasia òf nos mes deseo. Nò, e ta basá riba prueba i realidat.

3. Kiko nos ta bai trata den e artíkulo akí? (Salmo 27:14)

³ Kòrda ku bo tata den shelu stima bo masha hopi mes i e ke pa bo konfi’é. (Lesa Salmo 27:14.) Si bo speransa den Yehova ta fuerte, lo bo por wanta prueba ku kurashi i goso sin importá kiko pasa ku bo. Laga nos wak kon nos speransa por protehá nos. Pero promé, nos lo wak den ki sentido speransa ta manera un anker i un hèlm. I despues, nos lo wak kon nos por fortalesé nos speransa.

4. Dikon nos speransa ta manera un anker? (Hebreonan 6:19)

⁴ Den e karta ku Apòstel Pablo a skirbi e hebreonan, el a kompará speransa ku un anker. (Lesa Hebreonan 6:19.) Pablo tabata biaha hopi riba laman. P’esei, e tabata sa ku un anker lo evitá ku un barku lo drif bai. Por ehèmpel, tabatin un biaha ku e tabata riba un barku ora ku nan a haña nan ku mal tempu. El a mira kon e nabegantenan a tira anker den awa pa evitá ku e barku lo a dal den baranka. (Echo. 27:29, 39-41) Meskos ku un anker, nos speransa ta keda wanta nos serka di Yehova pa nos no drif bai ora nos haña nos ku problema ku por ta manera mal tempu. Ora nos ta pasando den momentonan difísil, nos speransa lo yuda nos keda trankil pasobra nos sa ku kos lo mehorá. Kòrda, Hesus a bisa ku nos lo haña nos ku persekushon. (Huan 15:20) Pues, ora nos meditá riba loke Yehova a primintí nos, esei lo yuda nos sigui sirbié fielmente.

5. Kon speransa a yuda Hesus enfrentá morto?

⁵ Laga nos wak kon speransa a yuda Hesus keda fiel apesar ku un morto kruel tabata sper’é. Riba e dia di Pentekòste di aña 33, Apòstel Pedro a sita un profesia di Salmonan ku ta deskribí e trankilidat i konfiansa ku Hesus tabatin. El a bisa: “Lo mi biba ku speransa; pasobra lo bo no laga mi alma den Graf, ni lo bo no permití e kurpa di bo fiel sirbidó putri. . . . lo bo yena mi ku alegria den bo presensia.” (Echo. 2:25-28; Sal. 16:8-11) Aunke Hesus tabata sa ku lo el a muri, e tabatin speransa firme ku Yehova lo a resusit’é i ku lo e por tabatin e goso di ta huntu ku su Tata atrobe den shelu.​—Heb. 12:2, 3.

6. Kiko un ruman a bisa tokante speransa?

⁶ E speransa ku nos tin a yuda hopi di nos rumannan wanta prueba. Laga nos wak kiko nos por siña for di Leonard Chinn, un ruman di Inglatera ku a keda fiel. Durante Promé Guera Mundial nan a ser’é pasobra el a nenga di bringa den guera. Pa dos luna nan ser’é den kashòt i despues di esei nan a fòrs’é pa hasi trabounan hopi pisá. El a konta despues: “Loke m’a pasa aden a yuda mi mira ku speransa ta importante pa yuda bo wanta prueba. Tantu loke Hesus, e apòstelnan i e profetanan a pasa aden komo e promesanan den Beibel, ta duna nos un bunita speransa pa futuro i ta duna nos forsa pa no entregá.” Pa Leonard, su speransa tabata manera un anker, i esei por ta asina den nos kaso tambe.

7. Kon nos speransa por bira mas fuerte ora nos pasa den prueba? (Romanonan 5:3-5; Santiago 1:12)

⁷ Ora bo pasa den prueba i mira kon Yehova a yuda bo, bo ta realisá ku bo tin su aprobashon. Anto esei ta hasi bo speransa mas fuerte. (Lesa Romanonan 5:3-5; Santiago 1:12.) Ta p’esei, e speransa ku nos tin awor ta mas fuerte kompará ku ora nos a drenta e bèrdat. Satanas ke pa nos kai den otro ora nos haña nos ku prueba. Pero, ku Yehova su yudansa nos por wanta kada prueba.

8. Kon nos speransa ta manera un hèlm? (1 Tesalonisensenan 5:8)

⁸ Beibel ta kompará nos speransa ku un hèlm tambe. (Lesa 1 Tesalonisensenan 5:8.) Un sòldá ta bisti un hèlm pa protehá su kabes ora su enemigu bin atak’é. Nos ta den un guera spiritual. P’esei, nos  tin ku protehá nos mente for di Satanas su atakenan. E ta bombardiá nos ku tentashon i diferente otro kos ku ta diseñá pa daña nos mente. Meskos ku un hèlm ta protehá kabes di un sòldá, asina tambe nos speransa ta protehá nos mente pa nos por keda fiel na Yehova.

9. Kon hende ta biba ora nan no tin speransa?

⁹ Nos speransa di bida eterno por yuda nos tuma bon desishon. Pero di otro banda, si nos pensa riba nos deseonan so, nos speransa por bira suak te ku nos ta lubidá mes riba dje. Laga nos wak kiko a pasa ku algun kristian ku tabata biba den e stat di Korinto. Nan a pèrdè fe den un promesa importante di Dios, esta, resurekshon. (1 Kor. 15:12) Pablo a bisa ku hende ku no ta kere den resurekshon ta biba pa awe so. (1 Kor. 15:32) Awendia, masha poko hende tin fe den Dios su promesanan, i p’esei mayoria di nan ta biba pa awe so i nan ke disfrutá di tur plaser. Pero, nos no ta asina pasobra nos ta konfia den Dios su promesanan pa futuro. Nos speransa ta manera un hèlm ku ta protehá nos mente i ta yuda nos evitá di pensa riba nos mes so i asina ei daña nos amistat ku Yehova.​—1 Kor. 15:33, 34.

10. Kon nos speransa por protehá nos di pensamentunan robes?

¹⁰ Nos speransa ta protehá nos mente pa evitá ku nos ta pensa ku no ta bale la pena hasi esfuerso pa agradá Yehova. Por ehèmpel, kisas nos ta pensa: ‘Tur otro hende ta bai haña bida eterno. Pero ami nò, pasó mi no ta sirbi pa nada. Mi no ta sinti ku mi ta sufisiente bon pa hasi loke Yehova ke.’ Pero kòrda ku Elifaz, un di Yòb su supuesto amigunan, a bisa algu similar. El a bisa: ‘Un simpel hende por ta puru?’ I wak kiko el a bisa di Dios tambe, esta, ku ‘Dios no ta konfia ni su angelnan; ni shelu no ta puru den su bista.’ (Yòb 15:14, 15) Esei sí ta mentira. Kòrda ken ta esun ku ke pa bo pensa asina. Satanas! E sa ku si bo keda pensa riba e kosnan ei, bo speransa ta bira suak. P’esei, saka e mentiranan ei for di bo mente i focus riba Yehova su promesanan. Nunka lubidá ku e kier pa bo biba pa semper i lo e yuda bo logr’é.​—1 Tim. 2:3, 4.

11. Dikon nos mester tin pasenshi segun ku nos ta warda pa Yehova kumpli ku su promesanan?

¹¹ No ta semper fásil pa nos mantené nos speransa fuerte. Tin biaha, segun ku nos ta warda pa Yehova kumpli ku su promesanan, nos por pèrdè pasenshi. Pero kòrda, debí ku Yehova semper a eksistí, su manera di mira tempu no ta manera nos ta mira tempu. (2 Ped. 3:8, 9) Lo e kumpli ku su promesanan na e mihó manera i lo e hasi esei na un momento ku kisas nos no ta ferwagt. Pero kiko por yuda nos keda warda ku pasenshi te ora ku e dia yega pa Yehova kumpli ku su promesanan?​—Sant. 5:7, 8.

12. Splika kon speransa ta konektá ku fe. (Hebreonan 11:1, 6)

¹² Beibel ta konektá speransa ku fe. Fe den kiko? Wèl, esei ta fe ku Yehova ta eksistí i ku e ta “Esun ku ta rekompensá esnan ku ta hasi esfuerso pa busk’é.” (Lesa Hebreonan 11:1, 6.) Mas real Yehova ta pa nos, mas konfiansa nos lo tin ku lo e kumpli ku tur loke el a primintí. Hasiendo tur esei, nos lo mantené nos speransa fuerte i nos lo ta mas serka di Yehova, esta, Esun ku lo hasi nos speransa bira realidat. Laga nos wak kiko  nos por hasi pa hala mas serka di Yehova i asina mantené nos speransa fuerte.

13. Kiko nos tin ku hasi pa bira amigu di Yehova?

¹³ Hasi orashon na Yehova i lesa su Palabra. Ta bèrdat ku nos no por mira Yehova. Pero nos por bira su amigu sí. Nos por papia kuné den orashon i nos por tin sigur ku lo e skucha nos. (Yer. 29:11, 12) Anto nos por skucha Dios ora nos ta lesa su Palabra i meditá riba loke nos ta lesa. Kada bes ku nos lesa kon Yehova a yuda su sirbidónan fiel den pasado, nos speransa lo bira mas fuerte. Sí, tur kos den Beibel a ser skirbí “pa nos instrukshon, pa asina mediante nos perseveransia i e konsuelo for di e Skritura nos por tin speransa.”​—Rom. 15:4.

14. Dikon ta bon pa meditá riba loke Yehova a hasi pa otro hende?

¹⁴ Meditá riba kon Yehova ya kaba a kumpli ku su promesanan. Wak loke Dios a hasi pa Abraham ku Sara. Aunke nan a pasa e edat ku nan por a haña yu, tòg Yehova a primintí nan un yu. (Gén. 18:10) Ki efekto esei tabatin riba Abraham? Beibel ta bisa ku Abraham “tabatin fe ku lo el a bira tata di hopi nashon.” (Rom. 4:18) Esei por a parse imposibel fo’i punto di bista di hende. Pero, Abraham sí tabatin sigur ku Yehova lo kumpli ku Su promesa. Anto e no a keda desapuntá! Yehova a kumpli ku su promesa. (Rom. 4:19-21) Relatonan asina ta siña nos ku nos por semper konfia ku Yehova lo kumpli ku su promesanan, asta si for di nos punto di bista e kos por parse imposibel.

15. Dikon ta bon pa nos pensa riba tur loke Yehova a hasi pa nos kaba?

¹⁵ Pensa riba loke Yehova a hasi pa bo. Bo a ripará ku tin un par di promesa  den Beibel ku a kumpli den bo bida? Por ehèmpel, Hesus a primintí ku su tata lo perkurá loke bo tin mester pa biba. (Mat. 6:32, 33) Tambe el a bisa ku Yehova lo duna bo spiritu santu si bo pidié pa esei. (Luk. 11:13) Yehova a kumpli ku e promesanan ei. Probablemente tin mas promesa ku ta bin na bo mente ku Yehova a kumpli kuné den bo kaso. Por ehèmpel, el a primintí di pordoná bo, di konsolá bo i di duna bo loke bo tin mester pa boso keda amigu. (Mat. 6:14; 24:45; 2 Kor. 1:3) Ora bo meditá riba tur loke Yehova a hasi pa bo kaba, lo bo fortalesé bo speransa den loke el a bisa ku e ta bai hasi pa bo den futuro.

16. Dikon speransa ta un regalo presioso?

¹⁶ Nos speransa di bida eterno ta un regalo presioso di Dios. Nos ta ansioso pa e maravioso futuro ei yega pa kaba. Anto nos tin sigur ku e dia ei lo yega! Nos speransa ta manera nos anker. E ta yuda nos pa wanta prueba, persekushon i asta morto. E ta manera nos hèlm tambe. E ta protehá nos mente ya asina nos por rechasá loke ta malu i hasi loke ta bon. E speransa ku Beibel ta duna nos ta hala nos mas serka di Dios i ta konvensé nos kuantu Dios ta stima nos. Ora nos mantené nos speransa fuerte, lo bai bon ku nos.

17. Dikon nos por alegrá den nos speransa?

¹⁷ Den e karta ku Pablo a skirbi e kristiannan na roma, el a animá nan pa ‘alegrá den nan speransa.’ (Rom. 12:12) Pablo por a alegrá pasobra e tabatin sigur ku lo el a haña bida eterno den shelu si e keda fiel. Nos tambe lo por alegrá den nos speransa, pasobra nos tin sigur ku Yehova lo kumpli ku su promesanan. Anto esei ta kuadra ku loke un salmista a skirbi: ‘Felis ta hende . . . ku ta pone nan speransa den Yehova, nan Dios. . . . Semper E ta fiel.’​—Sal. 146:5, 6.