1. Dikon no ta fásil pa ta obedesidu?

 BO TA sinti ku, aunke bo stima Yehova, tòg tin biaha ta duru pa ta obedesidu? Rei David tambe a sinti asina. P’esei el a pidi Dios: “Lanta den mi e deseo di obedesé bo.” (Sal. 51:12) Pero dikon nos ta lucha pa ta obedesidu? Tin tres motibu. Promé, nos tur tin tendensia pa ta desobediente. Di dos, Satanas tur ora bai ta purba di pone nos rebeldiá, meskos ku el a hasi. (2 Kor. 11:3) I di tres, mundu tin un aktitut rebelde, “e spiritu ku awor ta obra den e yunan di desobedensia.” (Efe. 2:2) Pues pa obedesé Yehova i esnan ku el a duna outoridat, nos tin ku lucha duru kontra nos tendensia di peka, preshon di Satanas i di su mundu.

2. Kiko “kla pa obedesé” ke men? (Santiago 3:17)

² Lesa Santiago 3:17. Yehova a inspirá Santiago pa skirbi ku hende sabí ta “kla pa obedesé.” Pero kiko esei ke men? Ku nos mester ta dispuesto pa obedesé esnan ku Yehova a konfia ku un grado di outoridat. Klaru ku Yehova no ta ferwagt pa nos obedesé hende ku pidi nos hasi algu ku ta bai kontra Su mandamentunan.—Echo. 4:​18-20.

3. Dikon Yehova ta haña ku ta importante pa nos obedesé esnan ku tin outoridat riba nos?

³ Kisas nos ta haña ku ta mas fásil pa obedesé Yehova ku obedesé hende pasobra tur instrukshon ku Yehova duna ta perfekto. (Sal. 19:7) Pero, nunka esei ta e kaso  ku hende. Ma asina mes, Yehova a duna mayor-, gobièrnu- i ansianonan un grado di outoridat. (Pro. 6:20; 1 Tes. 5:12; 1 Ped. 2:​13, 14) Pues ora nos obedesé nan, en realidat, ta Yehova nos ta obedesé. Laga nos wak kon nos por obedesé hende ku Yehova a duna outoridat, asta ora nos ta lucha pa aseptá i sigui nan guia.

4. Dikon hopi yu ta desobedesé nan mayornan?

⁴ Awendia hopi mucha i hóben tin kustumber di ta “desobediente na mayornan.” (2 Tim. 3:​1, 2) Dikon esei ta asina? Algun di nan ta haña ku nan mayornan ta hipókrita. Dikon? Pasó nan mayornan ke pa nan hasi kos ku e mayornan mes no ta hasi. Tin ta haña ku e konsehonan di nan mayornan ta ouderwets, no ta funshoná òf ta muchu strèn. Abo tambe a yega di sinti asina? Hopi yu kisas ta lucha pa sigui Yehova su mandamentu di “obedesé boso mayornan den union ku Señor, pasobra esei ta hustu.” (Efe. 6:1) Kiko por yuda bo den esei?

5. Dikon Hesus ta e mihó ehèmpel di un yu ku a obedesé su mayornan? (Lukas 2:​46-52)

⁵ E mihó persona ku por yuda bo obedesé bo mayornan ta Hesus. (1 Ped. 2:​21-24) Dikon Hesus? Wèl, e tabata perfekto pero su mayornan nò. Pero, esei no a strob’é di onra i respetá nan, asta ora nan a hasi fout i no a komprond’é. (Éks. 20:12) Por ehèmpel, wak kiko a pasa ora e tabatin 12 aña. (Lesa Lukas 2:​46-52.) Kabes yen, Hose i Maria a bai lag’é atras na Herúsalèm. Eigenlijk ta nan mester a hasi sigur ku tur nan yunan tabata huntu ku nan promé ku nan a bai for di Herúsalèm. Pues e suseso a laga Hose i Maria masha preokupá. Ora ku por fin nan a haña Hesus, Maria a kulp’é pa tur loke a pasa. Hesus por a bisa ku esei no ta eerlijk. Na lugá di esei, na un manera respetuoso el a kontestá nan loke nan a puntr’é. Ma Hose i Maria “no a komprondé loke el a bisa nan.” Apesar di tur loke a pasa, Hesus “a keda sumiso na nan.”

6-7. Kiko por yuda yunan obedesé nan mayornan?

⁶ Abo sa haña ku ta duru pa obedesé bo mayornan ora nan hasi fout òf no ta komprondé bo? Kiko por yuda bo? Promé, tene kuenta kon Yehova ta sinti. Beibel ta bisa ku ora yunan obedesé nan mayornan, “esaki ta agradabel den bista di Señor.” (Kol. 3:20) Yehova sa ora bo mayornan no ta komprondé bo òf ta pone regla ku no ta fásil pa obedesé. Pero ora bo disidí di obedesé bo mayornan tòg, bo ta hasi Yehova felis i kontentu.

⁷ Di dos, tene kuenta kon bo mayornan ta sinti. Ora bo obedesé nan, bo ta hasi nan kontentu i ta gana nan konfiansa. (Pro. 23:​22-25) Ademas, lo bo sinti bo mas será ku nan. Por ehèmpel, Alexandre, un ruman di Bèlgika, a bisa: “Ora m’a kuminsá hasi loke mi mayornan tabata pidi mi, nos a bira mas será ku otro i mas felis.” b Di tres, tene kuenta ku si bo siña hasi bo esfuerso pa obedesé bo mayornan, esei lo yuda bo den futuro. Paulo, kende ta biba na Brazil, a bisa: “Siña hasi esfuerso pa obedesé mi  mayornan a yuda mi obedesé Yehova i hende ku tin outoridat.” Beibel ta bisa dikon ta asina importante pa bo obedesé bo mayornan. E ta bisa: “Pa bai bo bon i pa bo por tin bida largu riba tera.”—Efe. 6:​2, 3.

8. Dikon hopi hóben ta disidí di obedesé nan mayornan?

⁸ Hopi hóben a ripará ku kos ta bai bon ku nan ora nan ta obedesidu. Luiza, kende tambe ta di Brazil, tabata mira ku tur mucha di su edat tabatin telefòn. Pero e sí no tabatin mag di su mayornan, i e no por a komprondé esei. Mas despues, el a bin realisá ku eigenlijk su mayornan tabata proteh’é. Luiza a bin siña ku ora e obedesé su mayornan, esei no ta ten’é atras. E konsehonan ku nan ta dun’é ta pa su mes bon. Elizabeth, un ruman hóben di Merka, tin biaha te ainda ta lucha pa obedesé su mayornan. El a splika: “Ora mi no por kaba di komprondé dikon mi mayornan a pone un sierto regla, mi ta pensa riba tur e biahanan ku nan reglanan a protehá mi.” Monica, kende ta biba na Armenia, a bisa ku semper kosnan a bai mihó kuné ora el a obedesé su mayornan.

9. Kiko hopi hende ta pensa tokante leinan di gobièrnu?

⁹ Hopi hende ta haña ku ta bon ku tin gobièrnu i ku ta bon pa obedesé por lo ménos algun lei di e “outoridatnan superior” ei. (Rom. 13:1) Pero e mesun hendenan ei kisas tin difikultat pa obedesé lei ku nan no ta eens kuné òf ku segun nan ta un abusu. Por ehèmpel, wak e asuntu di belasting. Na un pais europeo, hopi hende ta haña ku “no tin nada malu pa keda sin paga belasting si bo ta pensa ku e ta inhustu.” P’esei den e pais ei, hendenan ta paga rònt di 65 porshento so di belasting ku nan debe gobièrnu.

10. Dikon nos ta obedesé asta leinan ku nos no gusta?

¹⁰ Beibel ta bisa ku gobièrnu humano ta kousa sufrimentu, ta den man di Satanas i ku lo no tarda mashá ku nan lo ser destruí. (Sal. 110:​5, 6; Ekl. 8:9; Luk. 4:​5, 6) Pero e ta bisa tambe ku “esun ku oponé outoridat ta bai kontra areglo di Dios.” E motibu pakiko Yehova ta permití gobièrnunan humano eksistí pa awor, ta pa evitá ku kosnan ta sali muchu fo’i man. I e ta ferwagt pa nos obedesé nan. P’esei, nos mester “duna tur hende loke nan tin derecho riba dje,” inkluso belasting, rèspèt i obedensia. (Rom. 13:​1-7) Kisas nos ta haña ku un lei no ta kumbiniente, ku e ta inhustu òf lo kosta nos hopi sèn. Pero nos ta obedesé outoridatnan pasobra ta Yehova a pidi nos hasi  esei. E úniko ora ku nos lo no obedesé nan, ta ora nan pidi nos hasi algu ku ta bai kontra Yehova su mandamentunan.—Echo. 5:29.

11-12. Kiko Hose i Maria a hasi pa obedesé un lei, i ku ki resultado? (Lukas 2:​1-6) (Wak e plachi.)

¹¹ Hose i Maria tabata kla i dispuesto pa obedesé outoridatnan superior asta ora esei no a kumbiní nan. (Lesa Lukas 2:​1-6.) Nos por siña hopi for di nan. Ougusto, gobernante di Imperio Romano, a deklará ku lo tene un senso. Esei a nifiká ku Hose i Maria mester a hasi algu hopi difísil. Pa e tempu ei, Maria tabatin rònt di nuebe luna na estado i pa kumpli ku e dekreto, nan mester a bai Bètlehèm, un biahe di 150 kilometer. Foral pa Maria, e biahe ei lo no tabata niun tiki kómodo. Kisas nan por a preokupá si tur e subimentu i bahamentu di seru lo tabata safe pa Maria i e yu den su barika. Kiko si riba kaminda e haña doló di parto? Ta e futuro Mesías e tabatin den su barika! Esei lo tabata un motibu bálido pa desobedesé e lei di gobièrnu?

¹² Aunke Hose i Maria tabatin tur motibu pa preokupá, nan a obedesé. Yehova a keda kontentu ku nan a obedesé, i el a protehá nan. Maria a yega bon na Bètlehèm, duna lus na un yu salú i asta a yuda ku kumplimentu di un profesia di Beibel.—Mik. 5:2.

13. Kon nos obedensia por yuda nos rumannan?

¹³ Ora nos obedesé outoridatnan superior, esei lo ta bon pa nos mes i pa otronan. Kon asina? Pa kuminsá, nos ta evitá di haña kastigu pasobra nos a desobedesé un lei. (Rom. 13:4) Nos obedensia por duna Testigunan di Yehova un bon nòmber serka outoridatnan. Por ehèmpel, algun dékada atras sòldánan na Nigeria a drenta un Salòn di Reino meimei di reunion. Nan tabata buska hende ku no tabata ke paga belasting. Pero e sòldá na kabes a duna òrdu pa e otro sòldánan sali for di Salòn. El a bisa: “Testigunan di  Yehova semper ta paga belasting.” Pues, tur biaha ku bo obedesé lei, bo ta yuda mantené e bon reputashon ku Testigunan di Yehova tin. I kisas un dia e reputashon akí por yuda protehá bo rumannan.—Mat. 5:16.

14. Kiko a yuda Joanna pa ta “kla pa obedesé” outoridatnan superior?

¹⁴ Pero tòg, kisas no ta semper nos tin gana di obedesé outoridatnan superior. Joanna, un ruman na Merka, a bisa: “Algun di mi famianan a sufri inhustisia na man di outoridatnan. P’esei tabata masha difísil mes pa mi obedesé nan.” Pero, Joanna a mira ku e tabatin ku hasi esfuerso pa kambia su manera di pensa. Kiko el a hasi? Pa di promé, el a stòp di lesa kosnan riba Internet ku lo a lag’é haña mas rabia kontra outoridat. (Pro. 20:3) Di dos, el a pidi Yehova yud’é konfia den djE na lugá di spera pa gobièrnunan humano kambia. (Sal. 9:​9, 10) Di tres, el a lesa artíkulo den nos publikashonnan ku por a yud’é keda neutral. (Huan 17:16) Awor, Joanna ta respetá i obedesé outoridatnan. Esei ta lag’é sintié trankil i na pas.

15. Dikon tin biaha ta difísil pa obedesé instrukshon di Yehova su organisashon?

¹⁵ Yehova ta pidi nos pa “obedesé esnan ku ta dirigí” e kongregashon. (Heb. 13:17) Nos lider Hesus ta perfekto, pero e rumannan ku e ta usa pa guia nos sí nò. P’esei tin biaha nos ta haña ku no ta fásil pa obedesé nan, foral si nan ta pidi nos hasi algu ku nos no tin gana di hasi. Un biaha, Apòstel Pedro no kier a sigui un instrukshon. Un angel a pidié kome bestianan ku, segun Lei di Moises, tabata impuru. Pedro a nenga di hasi esei, no un biaha so, sino tres biaha! (Echo. 10:​9-16) Dikon? Pasobra el a haña ku e instrukshon no tabata lógiko. E tabata kustumbrá di hasi kosnan di otro manera. Awor pensa un ratu, si pa Pedro tabata difísil sigui instrukshon di un angel perfekto, kuantu mas difísil lo ta pa nos sigui instrukshon di hòmbernan imperfekto.

16. Kiko Apòstel Pablo a hasi asta ora el a haña instrukshon ku p’e tabata irasonabel? (Echonan 21:​23, 24, 26)

¹⁶ Apòstel Pablo tabata “kla pa obedesé,” asta ora el a haña instrukshon ku p’e tabata irasonabel. Kiko a pasa? Algun kristian di orígen hudiu a tende rumor ku Pablo tabata prediká pa “legumai Lei di Moises” i tabata falta rèspèt pa Lei. (Echo. 21:21) P’esei e ansianonan na Herúsalèm a bisa Pablo pa bai ku kuater hòmber na e tèmpel i purifiká su mes seremonialmente. Asina ei, lo e laga tur hende mira ku e ta kumpli ku Lei. Pablo tabata sa ku e no a hasi nada robes pasó kristiannan no tabatin ku kumpli ku Lei. Pero asina mes, el a obedesé mesora. E siguiente dia, el a “bai ku e hòmbernan, i el a purifiká su mes huntu ku nan.” (Lesa Echo. 21:​23, 24, 26.) Ku su obedensia, Pablo a yuda e kongregashon keda uní.—Rom. 14:​19, 21.

17. Kiko bo a siña for di Stephanie?

¹⁷ Un ruman ku yama Stephanie tabatin un lucha pa aseptá un desishon ku sukursal a tuma. Stephanie ku su kasá tabata den un grupo di idioma estranhero. Pero sukursal a disidí ku lo stòp ku e grupo. Pues, e pareha mester a bai  un kongregashon di nan mes idioma. Stephanie a konta: “Mi no tabata niun tiki kontentu. Mi tabatin shen porshento sigur ku den mi idioma no tabatin nesesidat.” Apesar di su sintimentu, el a obedesé e instrukshon. El a sigui konta: “Ku tempu m’a mira e sabiduria di e desishon. Den nos kongregashon nobo, hopi publikadó ta nan so den e bèrdat. Pues nos a bira nan famia i ta animá nan. Mi ta studia ku un ruman ku tabata inaktivo. I awor mi tin mas tempu pa mi estudio personal. Mi konsenshi ta trankil pasó mi sa ku m’a hasi mi esfuerso pa obedesé.”

18. Dikon ta bon pa nos ta obedesidu?

¹⁸ Hesus “a siña obedensia for di e kosnan ku el a sufri.” (Heb. 5:8) Na mes manera, mayoria di biaha nos ta siña obedensia for di situashonnan difísil ku nos ta pasa aden. Por ehèmpel, kon a bai durante e pandemia di COVID-19? Bo a haña ku tabata duru pa obedesé e instrukshon pa no bai reunion na Salòn di Reino i no prediká di kas pa kas? Pero, bo obedensia a protehá bo, a yuda e kongregashon keda uní i a hasi Yehova su kurason kontentu. Awor, nos tur ta mihó prepará pa obedesé instrukshonnan ku nos lo haña durante e tribulashon grandi. Obedensia lo salba nos bida!—Yòb 36:11.

19. Dikon bo ke ta obedesidu?

¹⁹ Den e artíkulo akí, nos a mira ku obedensia ta hiba na hopi bendishon. Pero e motibu prinsipal pa kiko nos ta obedesé Yehova ta pasó nos stim’é i ke agrad’é. (1 Huan 5:3) Hamas nos lo por paga Yehova pa tur loke el a hasi pa nos. (Sal. 116:12) Pero loke sí nos por hasi ta obedesé e i esnan ku el a duna outoridat riba nos. Si nos hasi esei, nos ta demostrá ku nos ta sabí. Anto hende sabí ta hasi Yehova su kurason kontentu.—Pro. 27:11.