E rumannan na Bètel a traha mas ku un aña pa konstruí e emisora WBBR na Staten Island, New York City. Promé, nan mester a rosa e tereno i despues nan a traha un kas grandi pa e trahadónan i un edifisio apart pa e studio i transmisor di emisora. Ora ku nan a kaba ku eseinan, nan a kuminsá buska i harma tur e ekiponan pa nan por kuminsá transmití. Pero, nan a enfrentá vários problema.

E promé problema tabata e antèna prinsipal ku tabata 91 meter largu. Mester a usa dos mast, kada un di 61 meter haltu, pa karg’é. E promé biaha nan no a logra. Pero ku yudansa di Yehova, e di dos biaha sí nan a logra. Calvin Prosser, kende a traha riba e proyekto a bisa: “Si kosnan a logra bai bon e promé biaha, nos lo a bisa yen di orguyo: ‘Wak kiko nos a logra!’” Na lugá di esei, e rumannan a duna tur krédito na Yehova. Pero, tabatin mas problema na kaminda.

E tempu ei transmishon via radio ainda tabata algu nobo i kasi no tabatin e ekiponan nesesario pa kumpra. Pues e rumannan a haña un transmisor segunda mano ku un hende mes a traha. Na lugá di kumpra un mikrofon, nan a djis usa esun di un telefòn. Un anochi den febrüari, nan a disidí di tèst tur loke nan a hinka den otro. Komo nan mester a transmití algu, nan a disidí di kanta e kantikanan di Reino. Ernest Lowe, ku tabata einan, a konta algu prèt ku a pasa e dia ei. El a bisa ku miéntras ku nan tabata kanta, nan a haña un yamada di  Hues Rutherford, b kende tabata skucha e transmishon via radio na Brooklyn, ku tabata keda mas o ménos 25 kilometer leu.

Ruman Rutherford a bisa nan: “Stòp ku e bochincha ei! Boso ta kanta masha falsu mes!” Ku bèrgwensa e rumannan a stòp e transmishon mesora. Pero nan tabata sa awor ku tur kos tabata funshoná i nan tabata kla pa transmití.

Dia 24 di febrüari 1924 tabatin e promé transmishon ofisial. Ruman Rutherford a bisa ku lo usa e emisora pa hasi e trabou ku Kristu e Rei a duna nan. El a bisa tambe ku e meta di e radio ta pa “yuda tur hende komprondé Beibel i e importansia di e tempu ku nos ta biba aden.”

E promé transmishon ei tabata un gran éksito. Anto durante 33 aña a usa WBBR pa transmití programanan di nos organisashon.

Na yüli 1924, Studiantenan di Beibel tabatin un kongreso na Columbus, Ohio. A bini rumannan di diferente parti di mundu i nan a skucha diskurso na aleman, arabir, franses, griego, húngaro, ingles, italiano, lituano, polako, ruso, ukraniano i e idiomanan di Skandinavia. A transmití algun di e diskursonan via radio. Ademas, e rumannan a pidi e korant Ohio State Journal pa skirbi tur dia un reportahe tokante e kongreso.

Riba djaweps 24 di yüli, mas ku 5.000 ruman a bai prediká den e stat kaminda tabatin e kongreso. Nan a laga mas ku 30.000 buki i a kuminsá míles di estudio di Beibel. E Toren di Vigilansia a bisa ku e dia ei tabata “e dia di mas dushi di e kongreso.”

Algu otro a pasa durante kongreso riba djabièrnè 25 di yüli ku tambe tabata interesante. Den un di Ruman Rutherford su diskursonan, yen di kurashi el a lesa un dokumento ku a kondená e lidernan religioso. El a bisa ku e lidernan polítiko, religioso i komersial tabata stroba hende di siña e bèrdat tokante Dios su Reino ku Dios lo usa pa bendishoná humanidat. Ademas, el a  bisa ku tur e lidernan ei tabata robes pasobra nan tabata apoyá e Liga di Nashonnan, bisando ku Dios tabata usa esei pa goberná mundu. Studiantenan di Beibel lo tabatin mester di hopi kurashi pa prediká e mensahe ei.

Mas despues, un artíkulo den E Toren di Vigilansia a bisa ku e kongreso ei na Columbus a fortalesé fe di e rumannan. Nan a haña e kurashi ku nan tabatin mester pa prediká apesar di kualke oposishon. Leo Claus a bai e kongreso ei. El a bisa: “Nos a sali yen di ánimo pa prediká e mensahe ei den nos teritorio.”

Na òktober, Studiantenan di Beibel a kuminsá parti un tratado ku tabatin e mensahe ku Ruman Rutherford a lesa kontra e lidernan religioso. Den e pueblito Cleveland na Oklahoma, Merka, Ruman Frank Johnson a kaba di parti e tratadonan 20 minüt promé ku e rumannan mester a bin busk’é. Algun hòmber di e pueblito a rabia ku e tabata prediká i tabata busk’é. P’esei e no por a para warda e rumannan unda ku ta. El a disidí di bai skonde den un misa ei banda. Komo ku e misa tabata bashí, el a probechá laga un tratado den e pastor su Beibel i riba kada banki. El a hasi esei mas lihé ku e tabata por. Dor ku e tabatin tempu ainda, el a hasi meskos na dos otro misa.

Frank a kore bai bèk na e lugá kaminda el a palabrá ku e rumannan. El a bai skonde tras di un pòmp di gasolin, hasiendo sigur pa e hòmbernan di e pueblito no hañ’é. Nan a pasa den outo, pero nan no a mir’é. Djis despues, e rumannan ku no tabata prediká muchu leu fo’i unda Frank tabata a pasa busk’é i nan a bai for di einan.

Un di e rumannan a bisa: “Segun ku nos tabata bai for di e pueblito, nos a pasa dilanti di e tres misanan. Tabatin mas o ménos 50 hende pará pafó di kada misa. Algun di nan tabata lesando e tratado i otronan tabata mustrando e pastor e tratado. Wèl, nos a skapa na wowo di angua! Anto, nos a gradisí Yehova ku el a protehá nos i a duna nos e sabiduria pa evitá ku e enemigunan ei di e Reino lo a atrapá nos.”

Den otro paisnan tambe, Studiantenan di Beibel a prediká ku kurashi. Por ehèmpel, den e parti nort di Fransia, Ruman Józef Krett a prediká na imigrantenan polako ku tabata traha den mina. E tabatin ku duna un diskurso ku e tema: “Pronto Lo Tin Resurekshon di e Mortonan.” Ora ku e habitantenan di e stat a haña e invitashon, un pastor a bisa su parokianonan pa no bai. Wèl, nèt lo kontrali a pasa. Mas ku 5.000 hende a bai skucha e diskurso, inkluso e pastor mes! Ruman Krett a pidi e pastor pa splika su kreensianan, pero el a nenga. Ruman Krett a parti tur e publikashonnan ku e tabatin pasó e hendenan tabatin hamber i set pa Dios su Palabra.—Ámos 8:11.

Na Afrika, Claude Brown a introdusí e bèrdat na e pais ku awor yama Gana. Ei el a duna vários diskurso i a parti hopi publikashon. Esei a pone ku e bèrdat a plama masha lihé den e pais ei. John Blankson, kende tabata studia pa bira botikario, a skucha un di Ruman Brown su diskursonan. Mesora el a ripará ku el a haña e bèrdat. El a konta:  “E bèrdat a hasi mi masha felis. . . . M’a papia ku hopi hende na mi skol tokante e bèrdat.”

John a komprondé ku e siñansa di Trinidat no ta den Beibel. Pues, un dia el a bai na un misa anglikano i a puntra e pastor tokante esei. E pastor a kore kuné i a grita: “Bo no ta kristian. Bo ta di Diabel. Bai fo’i djaki!”

Wèl, ora John a yega kas, el a skirbi e pastor un karta i a pidié pa trata e siñansa di Trinidat den públiko. Ora e pastor a haña e karta, el a manda John bai na ofisina di e dosente prinsipal di e skol pa botikario. Ei, e dosente a puntra John si ta e mes a skirbi e karta pa e pastor.

John a kontestá: “Sí Mener.”

E dosente a eksigí John pa skirbi pidi e pastor despensa. Esaki ta loke John a skirbi:

“Mener, mi dosente a manda mi pa pidi bo despensa den un karta. Mi ta dispuesto pa hasi esei basta bo atmití ku bo ta plama siñansa falsu.”

E dosente no por a kere loke el a lesa. El a puntra: “John, ta esei bo ke skirbi?”

“Sí Mener. Ta esei so mi por skirbi.”

“Nos lo bai kita bo fo’i skol. Bo no por spera di keda na e skol akí si bo ta papia asina ku e pastor di e religion ku gobièrnu ta apoyá.”

“Pero, Mener, . . . bo ta duna nos lès. Ora nos no komprondé algu, nos por hasi bo pregunta, tòg?”

“Sí, boso por.”

“Wèl, Mener, ta esei ta loke a pasa. E mener ei tabata siña nos Beibel i m’a hasié un pregunta. Awor, si e no por kontestá e pregunta, mi no ta mira dikon mi mester skirbi pidié despensa.”

Al final, John Blankson a keda na e skol sin ku e mester a manda pidi despensa.

Resumiendo e aktividatnan di 1924, E Toren di Vigilansia a bisa: “Nos por bisa meskos ku David: ‘Bo ta duna mi forsa pa bringa den bataya.’ (Sal. 18:39) E aña akí tabata hopi animante pasó nos a mira kon Yehova a yuda nos kumpli ku su trabou. Su fiel sirbidónan a prediká e bon notisia ku goso.”

E rumannan kier a prediká mas via radio. P’esei, mas despues den e aña nan a kuminsá plania pa traha un emisora mas. Nan a konstruyé na Chicago i su nòmber a bira WORD, ku tradusí na papiamentu ta ‘PALABRA.’ E nòmber ei tabata kuadra ya ku a traha e radio ku e meta pa prediká tokante e Palabra di Dios na radio. Nan lo a usa un transmisor hopi potente ku por a manda señal hopi leu, te na e partinan nort di Canada.

Na 1925, Yehova a yuda e rumannan haña un mihó komprondementu di Revelashon kapítulo 12. Debí na e komprondementu nobo ei, algun hende a stòp di sirbi Yehova. Pero hopi otro ruman tabata kontentu pa haña un mihó komprondementu di loke a pasa den shelu i kiko esei lo a nifiká pa Dios su sirbidónan aki riba tera.