1. Kon nos sa ku Yehova ta interesá den nos?

 YEHOVA sa ki ora su sirbidónan ta felis i ki ora nan ta tristu. (Sal. 37:18) Ta p’esei, e ta keda masha orguyoso ora e mira nos ta hasi tur nos bèst pa sirbié apesar di e dolónan inmenso ku nos tin den nos kurason! Pero mas ku esei, e tin masha gana di yuda nos i konsolá nos.

2. Kiko Yehova ta hasi pa esnan ku tin kurason kibrá, i kiko nos tin ku hasi pa benefisiá di su kuido?

² Salmo 147:3 ta bisa ku Yehova ta ‘mara e heridanan’ di hende ku tin kurason kibrá. Den e teksto ei, nos ta mira kon Yehova ta kuida esnan ku un kurason kibrá. Pero, kiko nos tin ku hasi pa benefisiá di e kuido ei di Yehova? Wèl, pensa riba e ilustrashon akí. Si nos ta leshoná, nos ta bai serka un doktor ku sa su trabou bon. Pero, nos tin ku hasi loke dòkter splika nos pa hasi. Den e artíkulo akí, nos ta bai mira kiko Yehova ta bisa esnan ku tin kurason kibrá pa hasi i kon pa sigui su konseho amoroso.

YEHOVA TA SIGURÁ NOS KU NOS TA BAL HOPI

3. Dikon algun hende ta sinti ku nan no ta bal nada?

³ Un ruman ku yama Helen a a konta: “M’a lanta den un famia ku no tabatin niun tiki amor. Mi tata tabata violento i tur santu dia e tabata keda ripití den nos kabes ku nos no ta sirbi pa nada.” Loke Helen a eksperensiá ei ta deskribí  e realidat di nos mundu. No tin amor, i komo resultado, hende ta trata otro malu. Esei a yega di pasa ku bo? Hende a yega di humiá bo ku palabra òf a laga bo sinti ku bo no ta bal nada? Si ta asina, ta di komprondé ku no ta fásil pa bo aseptá ku un persona di bèrdat ta stima bo.

4. Segun Salmo 34:18 ki siguransa Yehova ta duna nos?

⁴ “Yehova ta serka di hende ku tin kurason kibrá.” (Lesa Salmo 34:18.) Pues, asta si hende a trata bo malu, algu ku bo por tin sigur di dje ta ku Yehova sí stimá bo i ta balorá bo. I si bo ta sinti ku bo no ta bal nada, kòrda ku Yehova a mira bo bon kualidatnan i p’esei e mes a hala bo serka dje. (Huan 6:44) Anto komo ku e stima bo asina tantu, semper e ta kla pa yuda bo.

5. Kon Hesus a trata hende ku a sinti nan inferior, i kiko nos ta siña for di esei?

⁵ Nos por siña hopi tokante Yehova, si nos analisá kon Hesus a trata hende ora e tabata aki riba tera. Hesus tabata masha amabel ku hende ku tabata sinti nan inferior debí na e manera ku otro hende tabata trata nan. (Mat. 9:​9-12) Por ehèmpel, tabatin un señora ku tabatin un malesa penoso ku kier a kura. P’esei el a mishi ku Hesus paña. Hesus a konsol’é i a elogi’é pa su fe. (Mar. 5:​25-34) Hesus semper a imitá su Tata perfektamente. (Huan 14:9) Pues, bo por tin sigur ku Yehova ta balorá bo i ku e ta mira bo bon kualidatnan, bo fe i bo amor p’e.

6. Kiko bo tin ku hasi si bo ta sinti ku bo no tin balor?

⁶ Pero kiko si te ainda òf ratu ratu bo ta duda ku bo tin balor? Bai den Beibel. Lesa e versíkulonan ku ta sigurá bo ku  Yehova ta balorá bo i meditá riba nan. b (Sal. 94:19) No kompará bo mes ku niun hende i no keda focus riba e kosnan ku bo no por hasi. Kòrda ku Yehova ta rasonabel. E no ta ferwagt bo hasi loke bo no por hasi. (Sal. 103:​13, 14) Si un hende a yega di abusá di bo físikamente, verbalmente òf seksualmente, no kulpa bo mes pa loke e hende ei a hasi ku bo. No ta bo falta ni bo no a hasi nada pa meresé esei. Kòrda, Yehova lo tene e hende ei responsabel i no abo. (1 Ped. 3:12) Sandra a sufri maltrato kruel tempu e tabata chikitu. El a bisa: “Tur dia mi ta pidi Yehova yuda mi mira e bon kualidatnan ku e ta mira den mi.”

7. Kon bo por usa bo eksperensianan den bida pa yuda otro hende?

⁷ Aunke kisas bo no ta kere, Yehova por usa bo pa yuda otro hende. El a duna bo e onor di traha huntu kuné den e trabou di prediká. (1 Kor. 3:9) Debí na e kosnan ku bo a pasa aden, bo por pone bo mes den sapatu di e hende ku ta sufri. Helen, menshoná na paragraf 3, a haña yudansa for di Yehova i e rumannan i awor e ta mihó prepará pa yuda otro hende. El a bisa: “Ántes mi tabata sinti ku mi no ta bal nada, sí mané un ‘don nadie.’ Pero Yehova a yuda mi sinti ku mi ta stimá i e ta usa mi pa yuda otro hende.” Helen ta pionero regular i ta masha felis.

YEHOVA KE PA NOS ASEPTÁ KU EL A PORDONÁ NOS

8. Ki siguransa Yehova ta duna nos na Isaías 1:18?

⁸ Tin sirbidó di Yehova ku a kometé piká, sea promé òf despues di nan boutismo, i ku ketu bai ta sigui sinti nan malu tokante esei. Si esei ta bo kaso, kòrda ku Yehova stima bo masha hopi mes i ku el a pèrkurá e reskate pa bo por haña pordon pa bo pikánan. Anto bo por tin sigur ku e ke pa bo aseptá e regalo ei. Yehova ta sigurá nos ku unabes nos “drecha asuntu” c kuné, lo e pordoná nos pa semper. Nunka mas lo e bini bèk riba e piká ei. (Lesa Isaías 1:18.) Nos ta masha gradisidu ku Yehova no ta keda kòrda riba nos pikánan di ántes! Pero loke sí e ta keda kòrda ta e bon ku nos a hasi.—Sal. 103:​9, 12; Heb. 6:10.

9. Dikon nos no mester sigui pensa riba e pikánan ku nos a kometé den pasado?

⁹ Si bo pasado ta sigui molestiá bo, hasi esfuerso pa focus riba loke bo ta hasiendo aworakí i loke bo por hasi den futuro. Kòrda riba Apòstel Pablo. El a lamentá ku el a persiguí e kristiannan sin miserikòrdia. Pero e tabata sa tambe ku Yehova a pordon’é. (1 Tim. 1:​12-15) P’esei, e no a sigui pensa riba tur e pikánan ku el a kometé den pasado, ni tampoko riba e kosnan ku el a hasi pa bira un fariseo respetá. (Flp. 3:​4-8, 13-15) Al kontrario, el a traha duru den sirbishi i a sigui pensa riba su futuro. Meskos ku Pablo, bo no por kambia loke a pasa. Pero loke sí bo por hasi awor ta alabá Yehova, hasié kontentu i sigui pensa riba e bunita futuro ku el a primintí bo.

10. Kiko bo tin ku hasi si bo akshonnan di pasado a afektá otro hende?

¹⁰ Kisas bo ta sinti malu ku e kosnan ku bo a hasi den pasado a afektá otro hende.  Kiko bo por hasi? Pidi despensa di kurason i hasi loke bo por pa drecha e daño. (2 Kor. 7:11) Pidi Yehova yuda esnan ku a sufri debí na bo akshon. Lo e yuda tantu abo komo nan pa sigui sirbié i haña pas atrobe.

11. Kiko nos por siña di Yónas? (Wak e plachi.)

¹¹ Siña for di bo erornan di pasado i laga Yehova usa bo na e manera ku e ke. Kòrda riba Profeta Yónas. Na lugá di bai Nínive manera Dios a mand’é, el a bai direkshon kontrali. Yehova a yud’é komprondé ku loke el a hasi no tabata bon i Yónas a siña su lès. (Yòn. 1:​1-4, 15-17; 2:​7-10) Yehova no a stòp di usa Yónas. El a dun’é chèns atrobe pa bai Nínive i e biaha akí Yónas a obedesé mesora. Aunke Yónas a lamentá loke el a hasi, e no a laga esei strob’é di aseptá e asignashon akí di Yehova.—Yòn. 3:​1-3.

YEHOVA TA USA SU SPIRITU SANTU PA KONSOLÁ NOS

12. Kon Yehova ta duna nos pas ora nos pasa den trouma? (Filipensenan 4:​6, 7)

¹² Yehova ta usa su spiritu santu pa konsolá nos ora nos pasa den trouma. Esei ta loke a pasa ku Ron i Carol ora ku lamentablemente nan yu hòmber a kita su mes bida. Nan a bisa: “Nos a yega di pasa den kos difísil, pero esaki tabata esun di mas pió. Tabatin hopi anochi ku nos no por a drumi. P’esei nos tabata hasi orashon na Yehova i di bèrdat nos a sinti e pas ku Filipensenan 4:6 i 7 ta papia di dje.” (Les’é.) Si bo ta pasando den un prueba hopi difísil i ta sinti bo hopi kibrá, konta Yehova presis kon bo ta sinti bo. Bo por papia kuné kuantu biaha ku bo ke i kon largu ku bo ke. (Sal. 86:3; 88:1) Sigui pidi Yehova pa su spiritu santu, i bo por tin sigur ku lo e skucha bo.—Luk. 11:​9-13.

13. Kon spiritu santu por yuda nos sigui sirbi Yehova fielmente? (Efesionan 3:16)

¹³ Bo a pasa den un prueba hopi duru ku a laga bo kibrá, na wèrki i sin forsa pa hasi nada? Si ta asina, spiritu santu por fortalesé bo pa sigui sirbi Yehova fielmente. (Lesa Efesionan 3:16.) Esei ta loke a pasa ku Ruman Flora. E ku su kasá tabata misionero ora ku su kasá a kòrta su orea i nan a divorsiá. El a bisa: “Su infieldat a kibra mi kompletamente i mi no por a pensa riba nada otro mas. Pues, m’a pidi Yehova duna mi su spiritu santu pa asina mi por sigui padilanti. Yehova a konsolá mi i a yuda mi trata ku e situashon aunke ku na prinsipio m’a pensa ku lo mi no por a dil kuné.” Flora a sinti ku Yehova a yud’é pa e haña mas konfiansa den dje, i e ta konvensí ku Yehova lo yud’é den tur su pruebanan. Flora a bisa ku e palabranan na Salmo 119:32 ta splika kon Yehova a yud’é. E versíkulo ei ta bisa: “Mi ta kla pa obedesé bo mandamentunan, pasobra bo ta duna mi kurason konfiansa.”—Nota.

14. Menshoná e kosnan ku nos tin ku hasi pa haña mas spiritu santu.

¹⁴ Despues di pidi pa spiritu santu kiko abo tin ku hasi di bo banda? Bo tin ku partisipá den aktividatnan ku lo permití bo haña mas spiritu santu, manera bai reunion i prediká. Ademas, lesa bo Beibel tur dia ya asina bo por yena bo mente ku Yehova su pensamentunan. (Flp. 4:​8, 9) Segun ku bo ta lesa, focus riba hende ku a pasa den prueba i mira kon Yehova a yuda nan perseverá. Sandra,  menshoná na paragraf 6, a sufri hopi debí na problemanan ku el a hañ’é kuné den su bida. El a bisa: “E relato di Yósef semper ta animá mi. Pasobra e no a laga e pruebanan i e inhustisianan ku el a eksperensiá afektá su amistat ku Yehova.”—Gén. 39:​21-23.

YEHOVA TA USA NOS RUMANNAN PA KONSOLÁ NOS

15. Ken por duna nos konsuelo, i kon nan por yuda nos? (Wak e plachi.)

¹⁵ Ora nos ta den doló, nos rumannan por ta “un fuente di gran konsuelo.” (Kol. 4:11) Yehova ta usa nan pa mustra nos kuantu e stima nos. Nos rumannan por ta un konsuelo pa nos ora nan ta pasa tempu ku nos, skucha nos, resa ku nos òf lesa un teksto di Beibel pa animá nos. d (Rom. 15:4) Kisas un di nan por kòrda nos kon Yehova ta mira e kosnan i esei lo yuda nos perseverá. Un otro manera ku nos rumannan por yuda nos tambe ta por ehèmpel, ora nan kushiná pa nos.

16. Kiko nos lo tin ku hasi pa haña yudansa di nos rumannan?

¹⁶ Kisas tin biaha nos tin ku pidi yudansa. Nos rumannan stima nos i ke yuda nos. (Pro. 17:17) Pero kisas nan no sa kon nos ta sinti ni ki nos mester. (Pro.  14:10) Si bo ta tristu, angustiá i kibrá, papia ku amigunan ku ta stima Yehova i ku bo ta konfia i bisa nan kon bo ta sinti. Bisa nan tambe ku ki nan por yuda bo. Bo por papia ku un òf dos ansiano ku bo ta bon kuné tambe. Algun ruman muhé ta sinti mas kómodo pa papia ku otro ruman muhé ku stima Yehova.

17. Kiko ta algun kos ku por stroba nos di haña animashon, i kon nos por lucha kontra nan?

¹⁷ Lucha kontra e deseo di ke ta bo so. Tin biaha bo por ta asina kibrá ku bo no tin gana di papia ni mira hende. Anto por sosodé ku bo rumannan por tuma bo na malu pa esei òf por bisa algu ku ta hùrt bo. (Sant. 3:2) No laga e tipo di kosnan ei pone ku bo ta hala pia for di bo rumannan. Yehova ta usa nan pa animá bo. Gavin ta un ansiano i ta lucha ku depreshon. El a bisa: “E kos ku ménos mi tin gana di hasi ta papia ku mi amigunan.” Pero Gavin ta hasi tur su esfuerso pa ta huntu ku otronan i hopi biaha esei ta lag’é sinti mas mihó. Un ruman ku yama Amy a bisa: “Debí na e kosnan ku m’a pasa aden, mi tin problema pa konfia hende. Pero komo Yehova ta stima i konfia mi rumannan, pokopoko mi ta siña pa hasi meskos. Esei ta hasi Yehova kontentu i ami tambe.”

YEHOVA SU PROMESANAN PA FUTURO TA KONSOLÁ NOS

18. Kiko Yehova lo hasi pa nos den futuro, i kiko e ta hasi pa nos for di awor?

¹⁸ Pronto Yehova lo bai kita tur tristesa i doló ku nos tin den nos kurason. (Rev. 21:​3, 4) E ora ei tur e kosnan doloroso ku nos a pasa aden “lo no keda tormentá [nos] kurason.” (Isa. 65:17) Pero manera nos a mira, for di awor Yehova ta marando nos heridanan. El a pèrkurá vários kos ku por konsolá i yuda nos. P’esei hasi sigur di aseptá su yudansa. No duda ni un momento ku Yehova ta ‘interesá den abo.’—1 Ped. 5:7.