DEN UN sentido, studiantenan diligente di Beibel ta manera hende ku ta buska oro. Nan tin ku traha duru i sigui buska den e Skritura pa haña e hoyanan di sabiduria. Kiko nos por siña for di e tres maneranan ku hende por haña oro?

Imaginá bo ta kana na oriya di un riu i bo ta mira loke ta parse un piedra masha chikitu ku ta lombra den solo. Bo ta sak abou i ta kontentu di haña un pipita di oro. E ta mas chikitu ku kabes di un lusafè i mas difísil pa haña ku un djamanta di alta kalidat. I klaru ku bo ta wak si tin mas ei banda.

Di mes manera, kasi sigur bo ta kòrda bon kla kon algun tempu pasá Testigunan di Yehova a yama na bo kas pa papia ku bo tokante e speransa ku tin den Beibel pa un mihó futuro. Podisé e momento ku bo a haña bo promé pipita di oro spiritual, na moda di papia, ta bibu ainda den bo mente. Kisas esei tabata e promé biaha ku bo a mira e nòmber di Dios, Yehova, den Beibel. (Sal. 83:18, NW) Òf kisas esei ta ora bo a siña ku bo por bira amigu di Yehova. (Sant. 2:23) Anto mesora bo tabata sa ku bo a haña algu mihó ku oro. I podisé lo bo tabata ansioso pa haña mas pipita di oro spiritual.

Tin biaha bo por haña bòshi di pipita di oro den un riu. Den un temporada, un buskadó di oro ku ta traha duru por haña den e forma akí vários kilo di oro ku ta bal míles di dòler.

Ora bo a kuminsá studia Beibel ku Testigunan di Yehova, kisas bo a sinti bo manera un buskadó di oro ku a haña un kantidat di pipita di oro i ku awor ta laba kita e santu for di nan. Probablemente, ora bo tabata meditá riba un versíkulo di Beibel tras di otro, bo a haña mas konosementu; esei sigur lo a enrikesé bo den sentido spiritual. Mas bo a komprondé e bèrdatnan bíbliko presioso ei, mas bo a siña kon bo por hala serka Yehova i kon bo por keda den su amor ku e speransa di haña bida eterno.—Sant. 4:8; Hudas 20, 21.

 Meskos ku un buskadó di oro ta sigui buska pipita di oro den riu, asina tambe kisas diligentemente bo tabata buska bèrdatnan spiritual di gran balor. I despues ku bo a siña e bèrdatnan básiko di Beibel, probablemente bo a sinti bo motivá pa dediká bo bida na Yehova i batisá.—Mat. 28:19, 20.

Un buskadó di oro por haña oro asta den baranka. Aunke e kantidatnan akí sa ta chikitu, algun baranka tin sufisiente oro aden ku nan por garna esakinan pa saka e oro for di nan. Na promé bista, kisas bo no ta mira e oro den e piedra. Dikon nò? Pasobra kada tòn di piedra di bon kalidat kisas ta kontené apénas un dies gram di oro. Sinembargo, pa un buskadó di oro, e esfuerso ei ta bale la pena.

Ta importante tambe pa sigui hasi esfuerso asta despues ku un hende siña e “kosnan fundamental tokante Kristu.” (Heb. 6:1, 2) Bo mester hasi esfuerso pa haña puntonan nobo i lèsnan práktiko for di bo estudio di Beibel. Pues, kiko bo por hasi pa garantisá ku bo estudio personal ta keda produktivo, maske bo tin hopi aña ta studia e Skritura?

Keda ku e gana di haña sa mas. Presta bon atenshon na detaye. Sigui hasi esfuerso i lo bo haña konosementu i guia balioso for di e Skritura. (Rom. 11:33) Pa bo haña mas konosementu di e Skritura, hasi bon uso di e hèrmèntnan di estudio den bo idioma. Ku pasenshi, buska e guia ku bo tin mester i e kontesta riba bo preguntanan. Puntra otro hende kua teksto- i artíkulonan a yuda nan i animá nan. Kompartí ku otro hende algun punto ku bo a haña interesante durante bo estudio di e Palabra di Dios.

Klaru ku bo meta prinsipal no ta djis pa haña mas konosementu. Apòstel Pablo a spièrta ku “konosementu ta hasi hende orguyoso.” (1 Kor. 8:1) P’esei, hasi esfuerso pa keda humilde i fuerte den fe. Adorashon Komo Famia i estudio personal riba un base regular lo yuda bo biba di akuerdo ku e normanan di Yehova i lo motivá bo pa yuda otro hende. Riba tur kos, lo bo ta felis pasobra bo a haña algu muchu mas mihó ku oro.—Pro. 3:13, 14.