1, 2. (a) Kon e profesia na Isaías 60:22 ta kumpliendo den e tempu di fin akí? (b) Ki nesesidatnan tin den e parti terenal di Yehova su organisashon?

“ESUN di mas chikitu lo bira un tribu, i esun di mas ménos lo bira un nashon poderoso.” (Isa. 60:22) E palabranan profétiko ei ta kumpliendo den e último dianan akí. Por ehèmpel, durante e aña di sirbishi di 2015 tabatin 8.220.105 predikadó di Reino aktivo den sirbishi. Nos Tata selestial ta bisa: “Na su debido tempu, ami, SEÑOR, lo pura hasi esaki.” Meskos ku un pasahero ta sinti ora un vehíkulo ta hisa velosidat, asina tambe nos ta sinti ku awor e trabou di hasi disipel ta bayendo mas lihé. Nos ta hasiendo tur loke nos por pa prediká ku zelo i siña hende tokante e bon notisia? Hopi ruman ta apliká pa sirbi komo pionero regular òf ousiliar. Ademas, ta un goso pa mira kuantu ruman ta bai sirbi kaminda tin nesesidat pa mas predikadó di Reino òf ta partisipá den otro aktividat teokrátiko.

² Na mes momento, nos ta mira ku tin mester di mas i mas hende pa yuda. Tur aña, mas o ménos 2.000 kongregashon ta ser formá. Si sinku ansiano lo tin ku sirbi den kada kongregashon nobo, tur aña 10.000 sirbidó ministerial lo mester kualifiká pa bira ansiano. Esaki ta nifiká ku míles di ruman  hòmber mester kumpli ku e rekisitonan pa bira sirbidó ministerial. Ademas, tantu ruman hòmber komo ruman muhé tin “hopi di hasi den e trabou di Señor.”—1 Kor. 15:58.

3, 4. Ki metanan spiritual bo por pone pa bo mes?

³ Lesa 1 Timoteo 3:1. E verbo griego pa “hasi esfuerso” ke men rèk pa kue algu ku bo no por yega na dje fásilmente. Ku e palabranan ei, apòstel Pablo a enfatisá ku ta rekerí esfuerso pa hasi progreso spiritual. Imaginá un ruman hòmber ku ta pensa riba su futuro den kongregashon. Kisas na e momento akí e no ta un sirbidó ministerial, pero e ta realisá ku e tin ku kultivá kualidatnan kristian. Pa kuminsá, e ta hasi hopi esfuerso pa kualifiká komo un sirbidó ministerial. Ku tempu, e ta spera ku e por kumpli ku e rekisitonan pa sirbi komo ansiano. Den tur dos kaso, e ta traha duru pa por kualifiká i kumpli ku e responsabilidatnan den kongregashon.

⁴ Asina tambe, rumannan ku ke sirbi komo pionero, bètelita òf boluntario den konstrukshon di Salòn di Reino ta hasi esfuerso pa logra nan meta. Ban analisá kon e Palabra di Dios ta animá nos tur pa hasi progreso den e bèrdat.

5. Kon hóbennan por usa nan energia den aktividatnan teokrátiko?

⁵ Hóbennan tin e energia pa hasi hopi den sirbishi na Yehova. (Lesa Proverbionan 20:29.) Algun ruman hóben na Bètel ta traha den e departamento di produsí Beibel i literatura basá riba Beibel. I hopi otro hóben ta yuda den konstrukshon i mantenshon di Salòn di Reino. Anto ora un desaster natural asotá un pais, hóbennan ta djòin e Testigunan ku mas eksperensia pa duna yudansa na e víktimanan. I hopi pionero yòn ta prediká e bon notisia na komunidatnan indígena i na hende di otro idioma.

6-8. (a) Kon un ruman hòmber yòn a kambia su punto di bista di su sirbishi na Dios, i ku ki resultado? (b) Kon nos por ‘purba i mira ku Yehova ta bon’?

⁶ Sin duda, bo ta haña ku ta masha importante pa sirbi Dios di henter kurason. Pero kiko si bo ta sinti bo meskos ku Aaron a yega di sinti? Maske el a lanta den e bèrdat, el a atmití: “Mi tabata haña reunion i sirbishi laf.” E kier a sirbi Dios ku goso, pero a puntra su mes dikon e no tabata kontentu. Kiko el a hasi?

⁷ Aaron a kuminsá ku un rutina spiritual di lesa Beibel, prepará pa reunion i duna komentario. Ademas di esei, el a kuminsá hasi mas orashon. Segun ku su amor pa Yehova tabata krese, el a kuminsá hasi mas progreso spiritual. Desde e tempu ei, el a sinti un goso ku e por a traha pionero, yuda despues di desaster natural i prediká na otro pais. Awor Aaron ta ansiano i ta sirbi na Bètel. Kiko e ta pensa di e desishonnan ku el a tuma? E di: “M’a ‘purba i mira ku Yehova ta bon.’ Mi ta masha gradisidu pa su bendishonnan, i mi ta sinti mi motivá pa hasi mas den su sirbishi, i esaki ta resultá den mas bendishon.”

⁸ E salmista a kanta: “Esnan ku ta buska SEÑOR lo no tin falta di ningun kos bon.” (Lesa Salmo 34:8-10.) Sí, hende ku ta sirbi Yehova ku zelo lo no keda desapuntá. Nos kada un ta ‘purba i mira ku Yehova ta bon’ segun ku nos ta hasi tur loke nos por den su sirbishi. I ora nos sirbi Dios di henter nos kurason, nos ta eksperensiá un goso sin igual.

9, 10. Dikon ta importante pa ‘spera riba Yehova’?

⁹ Segun ku bo ta traha duru pa logra bo metanan, ‘spera riba Yehova.’ (Mik. 7:7) Yehova semper ta sostené su fiel sirbidónan maske e por permití nan warda pa haña sierto privilegio òf pa nan situashon drecha. El a primintí Abraham un yu hòmber, pero e patriarka mester a ehersé fe i warda ku pasenshi. (Heb. 6:12-15) Aunke Abraham mester a warda años pa Isak nase, e no a desanimá, i Yehova no a desapunt’é.—Gén. 15:3, 4; 21:5.

¹⁰ No ta fásil pa warda. (Pro. 13:12) Si nos keda pensa riba kosnan ku no a sali manera nos a deseá, nos lo por bira hopi desanimá. En bes di esei, ta sabí pa nos usa nos tempu pa traha riba e kualidatnan ku nos tin mester pa por haña responsabilidat den kongregashon. Ban wak den ki tres manera nos por hasi esei.

11. Ki kualidatnan kristian nos mester hasi esfuerso pa desaroyá, i dikon nan ta importante?

¹¹ Kultivá kualidatnan spiritual. Ora nos lesa e Palabra di Dios i meditá riba dje, nos por haña sabiduria, disernimentu, komprondementu, konosementu, i nos lo tin sano huisio i kapasidat di pensa. E kualidatnan ei ta masha importante pa esnan ku ta dirigí den e kongregashon. (Pro. 1:1-4; Tito 1:7-9) I segun ku nos ta lesa nos publikashonnan basá riba Beibel, nos lo por mira kiko Yehova ta pensa di vários asuntu. Tur dia nos tin ku tuma desishonnan ku tin di haber ku entretenimentu, bistimentu, atendementu  ku plaka i nos trato ku otro hende. Ora nos apliká loke nos ta siña for di Beibel, nos por tuma desishonnan ku ta agradá Yehova.

12. Kon miembronan di e kongregashon por demostrá ku nan ta konfiabel?

¹² Sea konfiabel. Sea nos ta ruman hòmber òf ruman muhé, nos tur mester hasi nos bèst pa kumpli ku kualke asignashon teokrátiko ku nos haña. Komo gobernador, Nehemías mester a nombra hende den puesto di responsabilidat entre e pueblo di Yehova. Ken el a nombra? El a skohe hende konfiabel i ku tabata teme Dios. (Neh. 7:2; 13:12, 13) Awe tambe, “loke ta ser ferwagt di un mayordomo ta pa e ta fiel.” (1 Kor. 4:2) Bon obra no ta keda skondí.—Lesa 1 Timoteo 5:25.

13. Kon bo por imitá e ehèmpel di Yosef si otro hende ta trata bo na un manera inhustu?

¹³ Laga Yehova refiná bo. Kiko bo por hasi si un otro hende ta trata bo na un manera inhustu? Kisas bo por aserk’é i drecha e asuntu mesora. Pero, tin biaha, ora bo defendé bo mes na un manera fuerte, bo ta hasi e problema mas grandi. E ruman hòmbernan di Yosef a trat’é malu, pero e no a karga renkor. Mas despues, otro hende a akus’é falsamente i a ser’é den prizòn. Pero el a laga Yehova gui’é durante e tempunan difísil ei. Kiko tabata e resultado? Beibel ta bisa: “E dicho di Yehova ta loke a refin’é.” (Sal. 105:19, NW) Ora e pruebanan ei tabata tras di lomba, Yosef a kualifiká pa risibí un asignashon spesial. (Gén. 41:37-44; 45:4-8) Ora bo haña bo ku problemanan difísil, pidi Yehova sabiduria. Ademas, papia i aktua na un manera trankil i akudí na dje pa haña fortalesa. Yehova lo yuda bo.—Lesa 1 Pedro 5:10.

14, 15. (a) Dikon nos tin ku “presta atenshon konstantemente” na e manera ku nos ta prediká? (b) Kon abo por adaptá na sirkunstansianan ku ta kambia? (Wak e promé plachi i e kuadro “ Bo Ta Dispuesto pa Purba un Otro Método?”)

¹⁴ Pablo a urgi Timoteo: “Sigui dediká bo mes na lesamentu den públiko, na dunamentu di konseho serio i siñansa.  . . . Presta atenshon konstantemente na bo mes i na e siñansa ku bo ta duna.” (1 Tim. 4:13, 16) Timoteo ya tabata un predikadó di Reino ku eksperensia. Pero su sirbishi lo tabata efikas solamente si el a “presta atenshon konstantemente” na su siñansa. E no por a asumí ku hende lo a sigui reakshoná faborablemente na e manera ku semper el a usa pa siña nan. Pa e por a yega na nan kurason, e mester a adaptá su manera di siña na nan nesesidatnan. Komo predikadó di Reino, nos mester hasi meskos.

¹⁵ Ora nos ta prediká di kas pa kas, hopi biaha nos no ta haña hende na kas. Den algun área, nos no por drenta den algun di e edifisionan di apartamento i zonanan residensial rondoná pa muraya. Si esei ta e kaso den bo teritorio, dikon no purba di prediká e bon notisia na otro maneranan?

16. Kon predikashon den áreanan públiko a resultá di ta efikas?

¹⁶ Predikashon den áreanan públiko ta un bon manera pa plama e bon notisia. Hopi Testigu ta haña esei un manera masha efikas pa prediká i ta haña hopi éksito. Nan ta apartá tempu pa papia ku hende na parada di bùs i stashon di trein, marshe, parke i otro áreanan públiko. Nan ta usa takto pa kuminsá papia ku un persona tokante algu ku a pasa den notisia, òf kisas nan ta duna su yunan un kòmplimènt òf podisé nan ta  puntr’é algu tokante su trabou. Segun ku e kòmbersashon ta sigui desaroyá, e publikadó ta menshoná un teksto di Beibel i ta animá e persona pa kontestá. Hopi biaha esei por pone ku nan ta sigui kòmbersá tokante temanan bíbliko.

17, 18. (a) Kon bo por haña mas konfiansa pa prediká den áreanan públiko? (b) Dikon ta bon pa imitá David su aktitut den alabá Yehova ora bo ta den sirbishi?

¹⁷ Si bo ta haña ta un reto pa prediká den áreanan públiko, no entregá. Eddie, un pionero na New York, tabata vasilá pa papia ku hende ku e no konosé. Pero ku tempu, el a haña mas konfiansa. Kiko a yud’é? El a bisa: “Durante nos Adorashon Komo Famia, ami ku mi kasá ta hasi investigashon pa wak kiko pa bisa ora hende ekspresá un opheshon òf opinion. Tambe nos ta pidi otro Testigu pa duna nos sugerensia.” Awor Eddie ta gusta prediká den áreanan públiko.

¹⁸ Segun ku bo ta bira mas ábil i ta haña mas konfiansa den prediká e bon notisia, bo progreso spiritual lo bira bisto. (Lesa 1 Timoteo 4:15.) Ademas, sin duda lo bo alabá bo Tata selestial meskos ku David, kende a kanta: “Lo mi bendishoná SEÑOR den tur tempu; su alabansa lo ta kontinuamente den mi boka. Mi alma lo gloria den SEÑOR; e humildenan lo tende i regosihá.” (Sal. 34:1, 2) I e chèns ta grandi ku komo resultado di bo sirbishi, hende humilde gososamente lo djòin bo den adorashon berdadero.

19. Dikon un fiel sirbidó di Yehova por ta kontentu asta si e ta den un sirkunstansia ku ta strob’é di sirbi Dios plenamente?

¹⁹ David a kanta tambe: “Tur bo obranan lo alabá bo, o SEÑOR, i bo santunan lo bendishoná bo. Nan lo papia di e gloria di bo reino, i papia di bo poder, pa hasi yunan di hende konosé bo echonan poderoso, i e mahestat glorioso di bo reino.” (Sal. 145:10-12) E palabranan ei sin duda ta reflehá e sintimentunan di tur fiel Testigu di Yehova. Pero kiko si bo no por hasi hopi den sirbishi pa motibu di malesa òf edat avansá? Kòrda semper ku segun ku bo ta kompartí e bon notisia ku e personanan ku ta kuida bo i otronan, bo sirbishi sagrado ta duna gloria na nos Dios maravioso. Si bo ta enkarselá pa motibu di bo fe, lo bo por papia tokante bo kreensianan te kaminda sirkunstansia ta permití, i esei ta hasi Yehova su kurason kontentu. (Pro. 27:11) Meskos ta konta tambe ora bo ta pega na bo rutina spiritual maske tin miembro di bo famia ku no ta Testigu. (1 Ped. 3:1-4) Sí, asta bou di sirkunstansia difísil bo por alabá Yehova i hasi progreso spiritual.

20, 21. Si nan a konfia bo ku mas trabou den e organisashon di Yehova, kon bo por bira un bendishon pa otro hende?

²⁰ Yehova siguramente lo bendishoná bo si bo sigui hasi progreso spiritual. Kisas bo por ahustá bo skèdjel òf estilo di bida pa bo por partisipá mas den sirbishi i kompartí e bèrdat presioso ku hende ku tin mester di un speransa. Ademas, bo progreso spiritual i bo spiritu di sakrifisio propio por resultá den hopi benefisio pa bo rumannan. I imaginá kuantu bo rumannan lo stima bo, apresiá bo i sostené bo ora nan mira kon duru bo ta traha den kongregashon.

²¹ Sea nos tin hopi aña òf djis un par di luna ta sirbi Yehova, nos tur por hasi progreso den e bèrdat. Pero kon kristiannan maduro por yuda rumannan nobo bai dilanti spiritualmente? Nos lo kontestá e pregunta ei den e siguiente artíkulo.