“NIUN di e gueranan di pasado . . . no ta nada na komparashon ku e guera ku na e momentonan akí ta tumando lugá na Europa.” Asina E Toren di Vigilansia di 1 di sèptèmber 1915 a deskribí e Promé Guera Mundial, den kua 30 pais tabata enbolbí. Debí na e guera ei, un Toren di Vigilansia mas despues a bisa: “E trabou di prediká [e Reino] a ser strobá un poko, spesialmente na Alemania i Fransia.”

Ora e Studiantenan di Beibel a haña nan konfrontá ku guera violento riba eskala mundial, nan no tabata komprondé muchu bon ku komo kristian nan mester a keda neutral. Sinembargo, nan tabata determiná pa deklará e bon notisia. Tuma por ehèmpel Wilhelm Hildebrandt. Komo ku e kier a hasi su parti den sirbishi, el a bestèl algun ehemplar di e tratado Mensuario di Studiantenan di Beibel na franses. E no a bai Fransia komo kòlportùr (predikadó di tempu kompleto), sino komo un sòldá aleman. E fransesnan a keda asombrá di mira e supuesto enemigu akí, bistí na unifòrm militar, duna nan un mensahe di pas.

Algun karta ku a sali den E Toren di Vigilansia a indiká ku vários otro Studiante di Beibel aleman a sinti nan motivá pa kompartí e bon notisia di Reino miéntras nan tabata den servisio militar. Ruman Lemke, kende tabata sirbi den marina, a bisa ku sinku otro tripulante di su barku tabata interesá den e bèrdat. El a skirbi: “Asta riba e barku akí, mi ta kosechando fruta pa e alabansa di Yehova.”

Georg Kayser a bai guera komo sòldá i regresá kas komo un sirbidó di e Dios berdadero. Kiko a sosodé? Di un manera òf otro el a haña un publikashon di e Studiantenan di Beibel, el a aseptá e bèrdat ku henter su kurason i a stòp di karga arma. Anto el a tuma un trabou kaminda e no mester a bringa, i despues di guera, el a sirbi pa hopi aña komo un pionero zeloso.

Maske e Studiantenan di Beibel no tabata komprondé muchu bon e prinsipio di keda neutral, nan aktitut i kondukta tabata na kontraste skèrpi ku e punto di bista i komportashon di hende ku sí tabata apoyá e guera. Miéntras ku e polítikonan i  lidernan religioso tabata hisa bandera, e Studiantenan di Beibel tabata apoyá e “Prens di Pas.” (Isa. 9:6) Maske algun di nan no a keda kompletamente neutral, nan tabatin e mesun konvikshon ku Konrad Mörtter tabatin, kende a bisa: “Mi a komprondé bon kla for di e Palabra di Dios ku un kristian no tin mag di mata.”—Éks. 20:13. *

Na Alemania, lei no a duna dispensashon di guera na hende ku a nenga di kumpli ku servisio militar pa motibu di konsenshi. Einan mas ku 20 Studiante di Beibel no tabata ke tin nada di haber ku guera. Algun di nan a ser klasifiká komo hende ku problema mental, manera Gustav Kujath, kende nan a pone den un instituto pa hende ku problema mental i a dun’é kalmante. Hans Hölterhoff, kende tambe a nenga di drenta servisio militar, a bai prizòn, kaminda el a nenga tur trabou ku tabatin di haber ku guera. E guardianan a mar’é te ora e no por a sinti su brasa- i pianan mas. Ora e no a entregá, nan a hasi manera nan tabata bai ehekut’é. Pero Hans a para firme!

Otro rumannan ku nan a manda yama pa servisio militar a nenga di karga arma i a pidi pa duna nan trabou den kua nan lo no tabatin ku bringa. * Asina Johannes Rauthe a hasi i nan a mand’é bai traha riba rail di trein. Konrad Mörtter mester a traha komo asistente médiko, i Reinhold Weber komo bruder. Anto August Krafzig tabata masha kontentu ku e trabou ku e mester a hasi a ten’é leu for di guera. E Studiantenan di Beibel akí i otronan a keda determiná pa sirbi Yehova pasobra nan a komprondé ku nan mester a stima Yehova i keda leal na dje.

Pa motibu di e kondukta di e Studiantenan di Beibel durante guera, outoridatnan aleman tabata vigilá nan. Durante e añanan ku a sigui, nan a haña nan ku míles di kaso den korte debí na nan trabou di prediká. Pa yuda nan, e sukursal na Alemania a forma un Departamento Legal na e Bètel di Magdeburg.

Pokopoko Testigunan di Yehova a bin komprondé mihó kiko ke men keda neutral. Ora Segundo Guera Mundial a dal aden, nan a keda neutral i no a drenta servisio militar. De echo, nan a ser konsiderá enemigu di Estado aleman i a ser persiguí kruelmente. Pero esei ta keda pa un otro artíkulo di e seri “For di Nos Archivo.”—For di nos archivo di Europa Sentral.