“BO TA un tata hopi kruel.” Asina un agente di KGB * a bisa mi. Anto el a agregá: “Bo a bandoná bo kasá ku ta na estado i bo yu muhé bebi. Ken ta bai duna nan di kome i kuida nan? Legumai bo religion i bai bo kas!” Mi a kontest’é: “Nò, mi no a bandoná mi famia. Ta abo a arestá mi! I pa kiko?” E agente a respondé: “Kualke otro krímen ta mihó ku ser un Testigu.”

E suseso ei a tuma lugá na aña 1959 den un prizòn na e siudat di Irkutsk na Rusia. Laga mi konta bo dikon ami ku mi kasá, Maria, tabata prepará pa “sufri pa kousa di hustisia” i kon nos a haña bendishon debí ku nos a keda fiel.—1 Ped. 3:13, 14.

Mi a nase na Ukrania na 1933 den un pueblito ku yama Zolotniki. Na 1937, mi tanchi ku su kasá, kendenan tabata Testigu, a bishitá nos for di Fransia i a duna nos e bukinan Gobièrnu i Liberashon, publiká pa Sosiedat Watchtower. Ora mi tata a lesa e bukinan ei, el a bolbe haña fe den Dios. Lamentablemente, na 1939 el a bira hopi malu, pero promé ku el a fayesé, el a bisa mi mama: “Esaki ta e bèrdat. Siña e muchanan e bèrdat.”

Na aprel 1951, e outoridatnan a kuminsá deportá míles di Testigu for di wèst di Union Soviétiko pa Siberia. Nan a saka ami ku mi mama i mi ruman hòmber chikí, Grigory, for di Wèst Ukrania. Despues ku nos a biaha mas ku 6.000 kilometer ku trein, nos a yega na e siudat di Tulun na Siberia. Mi ruman hòmber Bogdan a yega dos siman despues na un kampamentu ku ta keda serka di e siudat di Angarsk. Nan a sentensi’é na 25 aña di trabou fòrsá.

Ami, mi mama i mi ruman hòmber Grigory a prediká den e área den serkania di Tulun, pero nos mester tabata kreativo. Por ehèmpel, nos tabata puntra: “Tin un hende aki banda ku ke bende un baka?” Ora nos a haña un hende ku ke bende su baka, nos tabata konta e hende kon maravioso baka a ser kreá. No a dura muchu ku nos a kuminsá papia tokante e Kreador. Un korant di e tempu ei a skirbi ku e Testigunan ta puntra pa baka pero ta karné nan ta buska! I nos a haña hende ku ta manera karné! Tabata dushi pa studia Beibel ku hende humilde i hospitalario den e teritorio no asigná ei. Awe, tin un kongregashon na Tulun ku mas ku 100 publikadó.

Mi kasá, Maria, a haña e bèrdat na Ukrania durante Segundo Guera Mundial. Ora e tabatin 18 aña, un agente di KGB a kuminsá molesti’é i purba di fòrs’é pa e kometé inmoralidat kuné,  pero Maria a para firme i a rechasá su intentonan. Un dia, Maria a yega kas i a haña e agente drumí riba su kama. Maria a kore limpi bai. E agente tabata asina furioso ku el a menasá Maria ku lo e laga sera Maria komo ku e ta un Testigu, i asina a sosodé. Na 1952, nan a sentensiá Maria na dies aña di prizòn. El a sintié manera Yosef, kende a ser enkarselá pa motibu ku el a mantené su integridat. (Gén. 39:12, 20) E shofùr ku a hiba Maria di e sala di korte pa prizòn a bis’é: “No tene miedu. Hopi hende ta kai será, pero ta keda ku nan dignidat.” E palabranan ei a fortalesé Maria.

Di 1952 pa 1956, Maria mester a traha den un kampo di trabou fòrsá serka di e siudat di Gorkiy (ku awor yama Nizhniy Novgorod) na Rusia. E mester a ranka palu di mata asta den wer hopi friu. Su salú a bai atras, pero na 1956 el a ser librá i a bai Tulun.

Ora un ruman hòmber na Tulun a bisa mi ku tin un ruman muhé ta bai bini, mi a bai ku mi baiskel na e parada di bùs pa mi busk’é i yud’é ku su maletanan. Ora mi a sera konosí ku Maria, mi a gust’é mesora. Mi mester a hasi hopi esfuerso pa mi konkist’é, pero mi a logra sí. Nos a kasa na 1957, i un aña despues nos promé yu, Irina, a nase. Nos tabata kontentu, pero e goso ei no a dura mashá. Na 1959, nan a arestá mi pasobra mi tabata prent literatura bíbliko. Mi a pasa mitar aña mi so den un sèl. Pa mi por a keda kalmu durante e tempu ei, mi tabata hasi orashon konstantemente, mi tabata kanta kantika di Reino i mi tabata imaginá kon lo ta ora mi kuminsá prediká atrobe dia mi sali liber.

Tempu mi tabata den prizòn, durante un interogashon, e investigadó a grita mi: “Un bes nos lo plècha boso manera raton riba flur!” Mi a kontest’é: “Hesus a bisa ku e bon notisia di e Reino LO ser prediká den tur nashon, i niun hende no por par’é.” Despues, e investigadó a kambia su strategia i a purba di persuadí mi pa legumai mi religion, manera mi a bisa den e introdukshon. Ora ku nan a ripará ku nada no a funshoná, nan a sentensiá mi na shete aña di trabou fòrsá den un kampo serka di e siudat di Saransk. Riba kaminda pa e kampo, mi a haña sa ku mi di dos yu muhé, Olga, a nase. Aunke ku mi kasá i mi yu muhénan tabata hopi leu, mi a haña konsuelo for di e echo ku ami ku Maria a keda leal na Yehova.

Un biaha pa aña Maria tabata bin bishitá mi na Saransk for di Tulun, un biahe di 12 dia ida i buèlta ku trein. Tur aña e tabata trese un par di buts nobo pa mi. Den e hilchi di e butsnan, Maria tabata skonde e edishonnan mas resien di E Toren di Vigilansia. Un di e biahanan ei e bishita tabata hopi spesial pasobra el a trese nos dos yu muhénan huntu kuné. Imaginá bo kon kontentu mi tabata ora mi a mira nan i por tabata huntu ku nan!

Na 1966, mi a ser librá for di e kampo di trabou fòrsá, i ami ku mi famia a muda bai na e siudat di Armavir, den serkania di Laman Pretu. Ei nos yu hòmbernan Yaroslav i Pavel a nase.

No a dura mashá ku e agentenan di KGB a kuminsá invadí nos kas en buska di literatura bíbliko.  Nan a buska tur kaminda, asta den e baki di kuminda di e bakanan. Na un okashon, e agentenan tabata papa sodá di e kalor, i nan unifòrm tabata tur na stòf. Maria a sinti duele di nan komo ku nan tabata djis sigui òrdu. El a basha un tiki djus pa nan i a trese un skeiru pa skeiru paña, un kònchi di awa i sèrbètè. Despues, ora e kapitan di e agentenan a yega, nan a kont’é di e bon trato ku nan a haña. Ora nan a bai, e kapitan a smail i yama nos ayó. Nos tabata kontentu di mira e bon resultado ora nos purba di “sigui vense malu ku bon.”—Rom. 12:21.

Apesar ku nan tabata listra nos kas, nos a sigui prediká na Armavir. Tambe nos a yuda fortalesé un grupo chikí di publikadó den e pueblito di Kurganinsk, ku a keda den bisindario. Mi ta masha kontentu pa sa ku awe tin seis kongregashon na Armavir i kuater kongregashon na Kurganinsk.

Atraves di añanan, tabatin biaha ku nos a debilitá spiritualmente. Pero nos tabata gradisidu na Yehova ku el a usa rumannan fiel pa korigí nos i fortalesé nos. (Sal. 130:3) Ademas, tabata un prueba grandi pa sirbi Yehova huntu ku agentenan di KGB ku a drenta den e kongregashon sin ku nos tabata sa. Nan a aparentá di ta zeloso i tabata aktivo den sirbishi. Algun di nan a asta haña puesto di responsabilidat den e organisashon. Pero ku tempu, nos a haña sa ken nan tabata di bèrdat.

Na 1978, tempu Maria tabatin 45 aña, el a bolbe sali na estado. Komo ku e tabata sufri di un malesa króniko di kurason, e dòkternan tabatin miedu ku lo el a muri i a purba di konvens’é pa hasi aborto. Pero Maria a nenga. Algun dòkter a disidí ku nan ta bai siguié tur kaminda den e hospital pa purba di pas’é un angua pa e duna lus prematuro. Pa Maria por a protehá e yu ku no a nase ainda, el a hui for di e hospital.

E agentenan di KGB a manda nos sali for di e siudat. Nos a muda bai na un pueblito den serkania di e siudat di Tallinn na Estonia, ku e tempu ei tabata parti di Union Soviétiko. Na Tallinn, kontrali na loke e dòkternan a kere, Maria a duna lus na nos yu hòmber, Vitaly, ku tabata bon di salú.

Despues, nos a muda di Estonia pa Nezlobnaya, ku ta keda na zùit di Rusia. Ku koutela nos a prediká den e pueblitonan den serkania, kaminda tabatin hende di diferente parti di e pais ku tabata bin bishitá. Nan tabata bini pa nan salú, pero algun di nan a bai bèk ku e speransa di bida eterno!

Nos a purba di inkulká amor pa Yehova i e deseo pa sirbié den nos yunan. Hopi biaha nos tabata invitá rumannan ku tabatin bon influensia riba nos yunan pa bini nos kas. Un bishitante regular tabata mi ruman hòmber Grigory, kende a sirbi komo un superintendente biahero di 1970 pa 1995. Henter mi famia tabata disfrutá di su bishitanan pasobra e tabata un hende alegre i tabatin un bon sentido di humor. Ora nos tabata haña bishita na kas, hopi biaha nos tabata hunga wega di Beibel, i nos yunan a lanta ku un gran amor pa relatonan di Beibel.

 Na 1987, nos yu hòmber Yaroslav a muda bai e siudat di Riga na Letonia, kaminda e por a prediká ku mas libertat. Pero ora el a nenga servisio militar, el a ser sentensiá na un aña i mei di prizòn i a keda den nuebe diferente prizòn. E eksperensianan ku mi a kont’é di tempu ku mi tabata den prizòn a yud’é perseverá. Mas despues, el a bira pionero. Na 1990, nos yu hòmber Pavel, kende tabatin 19 aña e tempu ei, kier a traha pionero na Sakhalin, un isla nort di Hapon. Na promé instante, nos no tabata ke pa e bai. Tabatin solamente 20 publikadó riba henter e isla, i nos tabata biba mas ku 9.000 kilometer leu di e isla. Pero finalmente nos a bai di akuerdo pa e bai, i esei tabata un bon desishon. E habitantenan einan a respondé bon na e mensahe di Reino. Denter di algun aña, tabatin ocho kongregashon einan. Pavel a sirbi na Sakhalin te na aña 1995. Pa e tempu ei, nos yu hòmber di mas chikí, Vitaly, tabata e úniko yu ku tabata biba serka nos ainda. For di su infansia, e tabata gusta lesa Beibel. Ku 14 aña di edat, el a kuminsá traha pionero, i mi a traha pionero huntu kuné pa dos aña. Tabata un tempu masha dushi. Tempu Vitaly tabatin 19 aña, el a sali for di kas pa bai sirbi komo pionero spesial.

Na 1952, un agente di KGB a bisa Maria: “Legumai bo religion òf haña dies aña di kastigu di prizòn. Ora bo sali, lo bo ta bieu i bo so.” Pero kosnan a bai hopi diferente. Nos a sinti e amor di nos Dios leal, Yehova, di nos yunan i di hopi hende ku nos por a yuda haña e bèrdat. Ami ku Maria tabatin e goso di bishitá e lugánan kaminda nos yunan tabata sirbi. Nos yunan a yuda hopi hende siña di Yehova, i nos a mira kon gradisidu e rumannan tabata pa esei.

Na 1991, e aktividatnan di Testigunan di Yehova a haña rekonosementu legal. E desishon ei a trese bida den e trabou di prediká. Nos kongregashon a asta kumpra un bùs pa asina tur wikènt nos por a kore bai den e stat- i pueblitonan den bisindario.

Mi ta kontentu ku Yaroslav ku su kasá, Alyona, i Pavel ku su kasá, Raya, ta sirbi na Bètel, miéntras ku Vitaly ku su kasá, Svetlana, ta den e trabou di sirkuito. Irina, nos yu muhé mayó, ta biba na Alemania ku su famia. Su kasá, Vladimir, i nan tres yu hòmbernan tur ta sirbi komo ansiano. Nos yu muhé Olga ta biba na Estonia i ta yama mi regularmente. Lamentablemente, mi kasá stimá, Maria, a fayesé na 2014. Mi no por warda pa mir’é atrobe ora Dios resusit’é. Awor mi ta biba den e siudat di Belgorod, i e rumannan akinan ta un gran apoyo pa mi.

Mi añanan den sirbishi na Yehova a siña mi ku nos mester hasi sakrifisio pa asina mantené nos integridat, pero e pas mental ku Yehova ta duna nos a kambio ta un regalo di gran balor. E bendishonnan ku ami ku Maria a haña debí ku nos a keda fiel tabata muchu mas tantu ku nos por a imaginá. Promé ku e kaida di Union Soviétiko na 1991, tabatin poko mas ku 40.000 publikadó. Awe, tin mas ku 400.000 publikadó den e paisnan ku ántes tabata parti di Union Soviétiko. Awor mi tin 83 aña, i ainda mi ta sirbi komo ansiano. Yehova semper a duna mi e forsa pa perseverá. Sí, Yehova a bendishoná mi rikamente.—Sal. 13:5, 6.