1. Kiko nos por puntra nos mes segun ku nos ta mira tur e kosnan ku Yehova a krea?

YEHOVA a krea e universo. Anto segun ku nos ta pensa kon grandi e universo ta, kisas nos por sinti meskos ku David ora el a bisa Yehova: “Ora mi kontemplá bo shelunan, e obra di bo dedenan, e luna i e streanan ku abo a establesé, ta kiko hende ta, ku bo ta kòrda di dje? I e yu di hende, ku bo ta hasi kaso di dje?” (Sal. 8:3, 4) Por ta, manera David, nos ta mira kon chikitu nos ta kompará ku e streanan den universo, anto bo no por kere ku Yehova ta presta atenshon na nos. Pero manera nos ta bai mira, Yehova a hasi mas ku djis presta atenshon na e promé hendenan ku el a krea, Adam ku Eva; el a duna nan un lugá den su famia.

2. Kiko tabata Yehova su propósito pa Adam ku Eva?

² Yehova a krea su yunan, Adam ku Eva, pa biba aki riba tera. Anto komo nan Tata, el a stima nan masha hopi mes. El a ferwagt pa nan kooperá i kumpli ku su propósito pa nan den su famia. El a bisa nan: “Sea fruktífero i multipliká, i yena e tera i hasi esaki someté na bo.” (Gén. 1:28) Su propósito pa nan tabata pa haña yu i kuida e tera. Si nan a keda obediente i a sigui kooperá ku Yehova su propósito, nan i nan desendientenan lo por a keda miembro di Yehova su famia pa semper.

3. Dikon nos por bisa ku Yehova a duna Adam ku Eva un lugá importante den Su famia?

³ Yehova a duna Adam ku Eva un lugá importante den Su famia. Anto David a papia tokante e lugá importante ku hende tin den Yehova su kreashon ora el a bisa na Salmo 8:5: “Bo a hasié un poko ménos ku e angelnan, i ta koron’é  ku gloria i mahestat.” Ta bèrdat ku Yehova no a duna hende e mesun poder, sabiduria i abilidat manera el a duna e angelnan. (Sal. 103:20) Pero, hende ta djis “un poko ménos” ku e angelnan poderoso. Bo por kere esei? Yehova a duna Adam ku Eva tur loke nan tabatin mester pa nan tin un bida maravioso.

4. Kiko a pasa ku Adam ku Eva ora nan a desobedes’é Yehova, anto kiko nos ta bai studia den e artíkulo akí?

 ⁴ Lamentablemente Adam ku Eva a desobedesé Yehova, i nan no por a sigui forma parti di su famia. I manera nos ta bai mira den e artíkulo akí, esei a trese hopi konsekuensia serio pa nan desendientenan. E propósito pakiko Yehova a krea hende no a kambia. Te ainda e ke pa hende obediente forma parti di su famia pa semper. Promé, nos lo bai mira loke Yehova a hasi pa mustra nos ku nos ta balioso p’e. Djei, nos lo bai wak kiko nos por hasi pa demostrá ku nos ke forma parti di su famia. Finalmente, nos lo wak e bendishonnan ku Dios su yunan aki riba tera lo disfrutá di dje pa semper.

5. Kiko nos por hasi pa mustra Yehova ku nos ta kontentu ku el a traha nos segun su imágen?

⁵ Yehova a traha nos segun su imágen. (Gén. 1:26, 27) Debí na esei, nos tin e kapasidat pa siña kon pa mustra e bunita kualidatnan ku e tin, manera kon pa ta hustu, kon pa mustra amor, kompashon i lealtat. (Sal. 86:15; 145:17) Segun ku nos ta demostrá e kualidatnan ei, nos ta glorifikando Yehova i nos ta mustrando e ku nos ta kontentu ku el a traha nos asina. (1 Ped. 1:14-16) Pero no ta esei so, ora nos komportá nos mes na un manera ku ta agradá Yehova, nos tambe ta bira felis. Debí ku Yehova a traha nos segun su imágen, el a duna nos tur loke nos lo tin mester pa nos bira e tipo di hende ku e ke pa forma parti di su famia.

6. Kon e manera ku Yehova a traha e tera ta mustra ku e ta balorá hende?

⁶ Yehova a traha un hogar úniko pa nos. El a prepará e tera pa hende; esei tabata hopi promé ku el a traha Adam. (Yòb 38:4-6; Yer. 10:12) Debí ku Yehova ta bondadoso i generoso, el a duna nos masha hopi kos pa nos disfrutá di dje. (Sal. 104:14, 15, 24) Ratu-ratu e tabata asta para pensa riba loke el a krea, i e tabata “mira ku esaki tabata bon.” (Gén. 1:10, 12, 31) El a mustra hende ku nan ta balioso p’e dunando nan “dominio riba” e kosnan ku el a traha aki riba tera. (Sal. 8:6) Yehova ke pa hende perfekto disfrutá di su obranan i kuida nan pa semper. Bo tin kustumber di yama Yehova danki pa e speransa maravioso ei?

7. Kon Hosue 24:15 ta yuda bo mira ku hende tin boluntat liber?

⁷ Yehova a duna nos e regalo di boluntat liber. Nos por skohe kiko nos ke hasi ku nos bida. (Lesa Hosue 24:15.) Esei yama boluntat liber. Yehova ta keda masha kontentu ora nos skohe pa sirbié. (Sal. 84:11; Pro. 27:11) Tin hopi manera ku nos por hasi bon uso di nos boluntat liber. Ban wak kon Hesus a hasi esei.

8. Menshoná un manera ku Hesus a usa su boluntat liber.

⁸ Nos por imitá Hesus ora nos skohe pa pone interes di otro hende promé ku esun di nos. Tabatin un biaha ku Hesus i su apòstelnan tabata hopi kansá i tabata na kaminda pa un lugá ketu sperando di por sosegá. Pero esei no a pasa, pasobra tabatin un multitut di hende ku a haña sa unda  nan a bai i nan tabata wardando pa Hesus siña nan algu. Ma Hesus no a kunsumí. Mas bien el a sinti duele di nan. “El a kuminsá siña nan hopi kos.” (Mar. 6:30-34) Nos ta glorifiká Yehova ora nos ta imitá Hesus, sakrifikando nos tempu i energia pa yuda otro hende. (Mat. 5:14-16) Ademas, hasiendo esei nos ta mustrando Yehova ku nos ke forma parti di su famia.

9. Ki regalo Yehova a duna hende?

⁹ Yehova a duna hende e posibilidat di haña yu i e responsabilidat pa siña nan stima i sirbi Yehova. Si bo tin yu, bo ta yama Yehova danki pa e regalo ku el a duna bo ei? Aunke Yehova a bendishoná e angelnan masha hopi mes, tòg e no a duna nan e posibilidat di haña yu. P’esei, komo mayor, balorá e echo ku Yehova a duna bo e privilegio ei. Yehova a duna mayornan e responsabilidat di lanta nan yunan “den e disiplina di Yehova i inkulká su manera di pensa den nan.” (Efe. 6:4; Deu. 6:5-7; Sal. 127:3) Pa yuda mayornan, Dios su organisashon a perkurá vários publikashon, vidio, kantika i artíkulonan riba e website. Anto tur ta basá riba Beibel! Ta bisto anto ku Yehova i Hesus ta stima mucha. (Luk. 18:15-17) Ora mayornan dependé riba Yehova i hasi tur nan esfuerso pa kuida nan yunan, Yehova ta keda masha kontentu. Anto asina mayornan lo duna nan yunan e mihó chèns pa nan por forma parti di Yehova su famia pa semper!

10-11. Ki oportunidat Yehova a duna nos pa medio di e reskate?

¹⁰ Yehova a laga su Yu di mas presioso muri pa asina nos por bira parti di Su famia atrobe. Manera nos a mira den  paragraf 4, Adam ku Eva a pèrdè nan lugá den Yehova su famia, anto esei a konta pa nan yunan tambe. (Rom. 5:12) Adam ku Eva a skohe pa desobedesé Dios. Pues ora Yehova a saka nan for di su famia, nan tabata meresé esei. Pero, kiko di nan yunan? Yehova stima hende masha hopi mes, i p’esei el a perkurá un manera pa adoptá hende obediente den su famia. El a hasi esei mediante e sakrifisio di su Yu unigénito, Kristu Hesus. (Huan 3:16; Rom. 5:19) Debí na e sakrifisio ei, Yehova por a adoptá 144.000 hende fiel komo su yunan.—Rom. 8:15-17; Rev. 14:1.

¹¹ A parte di nan, tin miónes di otro hende ku tambe ta hasiendo nan esfuerso pa obedesé Yehova i hasi su boluntat. Nan ta sperando pa forma parti di Yehova su famia despues di e prueba na final di e mil añanan. (Sal. 25:14; Rom. 8:20, 21) Ku e speransa ei na mente, for di awor kaba nan ta yama Yehova, kende ta nan Kreador, “Tata.” (Mat. 6:9) Esnan ku resusitá tambe lo haña e chèns pa siña loke Yehova ta ferwagt di nan. Anto esnan ku skohe pa hasi Dios su boluntat, ku tempu tambe lo por forma parti di Yehova su famia.

12. Ki pregunta nos ta bai kontestá aworakí?

¹² Manera nos a mira den e paragrafnan anterior, Yehova a dal e promé stap pa mustra nos na diferente manera ku nos ta balioso p’e. Ya kaba el a kuminsá adoptá e ungínan komo su yu, anto el a duna e “multitut grandi” e speransa di bida eterno den e mundu nobo. (Rev. 7:9) Pero, kiko nos por hasi for di awor pa mustra Yehova ku nos ke forma parti di su famia pa semper?

13. Kiko nos por hasi pa forma parti di Yehova su famia mundial? (Marko 12:30)

¹³ Mustra ku bo ta stima Yehova sirbiendo e ku henter bo kurason. (Lesa Marko  12:30.) Di tur e regalonan ku Yehova a yega di duna nos, kisas esun di mas mihó ta nos abilidat di por ador’é. Anto ora nos “kumpli ku su mandamentunan,” nos ta demostrá Yehova ku nos ta stim’é. (1 Huan 5:3) Mediante Hesus su mandamentu, Yehova a bisa ku e ke pa nos hasi hende disipel i batisá nan. (Mat. 28:19) Ademas, e ke pa nos stima otro. (Huan 13:35) Esnan ku obedesé Yehova lo forma parti di su famia mundial.—Sal. 15:1, 2.

14. Kon nos por demostrá ku nos ta stima otro hende? (Mateo 9:36-38; Romanonan 12:10)

¹⁴ Stima otro hende. Amor ta Yehova su kualidat di mas importante. (1 Huan 4:8) Asta promé ku nos a haña sa ken Yehova ta, ya kaba el a mustra nos ku e stima nos. (1 Huan 4:9, 10) I nos por imit’é ora nos ta stima otro hende. (Efe. 5:1) Un di e mihó maneranan ku nos por demostrá ku nos ta stima hende ta di yuda nan siña konosé Yehova miéntras ku ainda tin tempu pa hasi esei. (Lesa Mateo 9:36-38.) Hasiendo esei, nos lo ta yudando nan tambe pa haña un chèns di bira parti di Yehova su famia. Asta despues ku un persona batisá, nos tin ku sigui stim’é i respet’é. (1 Huan 4:20, 21) Kon nos por hasi esei? Esei ta di konfia nos ruman. Por ehèmpel, nunka nos lo no ke pensa ku nos ruman a hasi algu pa malu. En bes di esei, nos lo mustra onor na nos ruman, mirando e komo superior na nos.—Lesa Romanonan 12:10; Flp. 2:3.

15. Na ken nos tin ku mustra miserikòrdia i bondat?

¹⁵ Mustra miserikòrdia i bondat na tur hende. Si realmente nos ke yama Yehova nos Tata pa semper, nos tin ku sigui e konsehonan ku tin den su Palabra. Por ehèmpel, Hesus a siña ku nos tin ku mustra miserikòrdia i bondat na tur hende, asta na nos enemigunan. (Luk. 6:32-36) Tin biaha esaki no ta fásil. Pues, nos tin ku siña pensa manera Hesus a pensa i hasi loke Hesus a hasi. Ora nos hasi nos bèst pa obedesé Yehova i imitá Hesus, nos ta demostrando Yehova, nos Tata, ku nos ke forma parti di su famia pa semper.

16. Kiko nos por hasi pa protehá e reputashon di Yehova su famia?

¹⁶ Protehá e reputashon di Yehova su famia. Den un famia, ta normal ku un ruman hòmber chikitu ta imitá su ruman hòmber grandi. Anto si e ruman hòmber grandi ta sigui e konsehonan ku tin den Beibel, lo e ta un bon ehèmpel pa su ruman hòmber chikitu. Pero si e kuminsá hasi loke ta malu, kisas su ruman hòmber chikitu tambe lo hasi meskos. E mesun kos tambe por pasa den Yehova su famia. Si tin un ruman ku ántes tabata fiel na Yehova pero ku awor a bira sea un apóstata òf a kuminsá hiba un bida inmoral òf a kuminsá hasi kosnan robes, e otro rumannan den kongregashon por kuminsá imitá e ruman akí i hasi loke ta malu. Esnan ku ta hasi esei ta daña e reputashon di Yehova su famia. (1 Tes. 4:3-8) Nos tin ku evitá di sigui e mal ehèmpelnan ei i no laga nada hala nos for di nos Tata Yehova ku ta stima nos masha hopi mes.

17. Ki tipo di pensamentu nos tin ku evitá, i dikon?

¹⁷ Konfia Yehova i no kos material. Yehova a primintí nos ku si nos pone e Reino na promé lugá den nos bida, i obedesé Su normanan, lo e perkurá kuminda, paña i un dak riba nos kabes. (Sal. 55:22; Mat. 6:33) P’esei, nos lo evitá di pensa ku kos material ku e mundu akí ta ofresé nos lo duna nos kualke protekshon òf felisidat. Pasobra nos sa ku e úniko manera ku nos  por haña berdadero pas, ta hasiendo Dios su boluntat. (Flp. 4:6, 7) Asta si nos tin e sèn pa kumpra hopi kos, nos tin ku puntra nos mes: ‘Di bèrdat mi tin e tempu i energia pa kuida tur e kosnan ei? E kosnan ku mi tin ei, nan ta pegá na mi kurason?’ Nos tin ku kòrda ku Yehova a duna nos trabou pa hasi. Pues, nos no tin ku laga nada distraí nos. Sigur niun di nos lo ke ta manera e hòmber ku a nenga e chèns di sirbi Yehova i di bira un di su yunan adoptá, djis pasobra su kurason tabata pegá na un par di kos material.—Mar. 10:17-22.

18. Ki privilegio i ki bendishon hende obediente lo disfrutá di dje pa semper?

¹⁸ E mihó privilegio ku hende obediente lo disfrutá di dje ta di stima i adorá Yehova pa semper! Esnan ku tin e speransa di biba aki riba tera, tambe lo ta masha kontentu pa kuida e bunita tera ku Yehova a traha pa nos. Lo no dura hopi pa e Reino di Dios restorá e tera i tur kos riba dje. Hesus lo drecha tur daño ku Adam ku Eva a kousa ora nan a disidí di bandoná Yehova su famia. Yehova lo resusitá miónes di hende i duna nan e oportunidat pa biba pa semper riba un tera ku lo e hasi un paradeis. (Luk. 23:42, 43) Segun ku Yehova su famia tiki-tiki ta bira perfekto, kada un di nan lo tin e “gloria i mahestat” ku David a skirbi tokante dje.—Sal. 8:5.

19. Kiko nos tin ku keda tene na mente?

¹⁹ Si bo ta parti di e “multitut grandi,” bo tin un speransa masha maravioso. Yehova stima bo i ke pa bo ta parti di su famia. Pues, hasi tur loke bo por pa agrad’é. Tene Dios su promesanan bibu den bo mente i bo kurason. Sea gradisidu pa e privilegio ku bo tin di por adorá nos Tata selestial i balorá e speransa di por alab’é pa semper!