1. Kiko probablemente bo mayornan a siña bo tokante nos Kreador?

SI FOR di tempu bo a nase bo mayornan ta Testigu di Yehova, muy probablemente for di chikitu nan a siña bo ku Yehova ta e Kreador. Tambe nan a siña bo ku e tin un personalidat masha bunita i ku e ke hasi e tera un paradeis.—Gén. 1:1; Echo. 17:24-27.

2. Kiko algun hende ta pensa di esnan ku ta kere ku tin un Kreador?

² Hopi hende no ta kere ku tin un Dios te pa nan kere ku e ta e Kreador. Nan ta kere ku bida a kuminsá pa puru kasualidat anto ku djei poko-poko el a evolushoná di un supuesto forma di bida simpel pa un forma di bida mas kompliká. Anto hopi di e hendenan ei tin bon skol. Kisas nan ta asta bisa ku siensia a proba ku Beibel ta robes i ku ta hende sin skol, bobo i ku ta bai tras di tur kos ta kere ku tin un Kreador.

3. Dikon ta importante pa nos fortalesé nos fe?

³ Pero, bo ta kere ku e opinion di e hendenan bon siñá ei por pone bo kuminsá duda den nos Kreador? Esei lo dependé di bo kontesta riba e siguiente pregunta: Dikon bo ta kere ku Yehova ta e Kreador? Ta pasobra otro hende a bisa bo esei, òf ta pasobra abo mes a tuma tempu i a analisá e evidensianan pa bo mes? (1 Kor. 3:12-15) Ni maske kuantu tempu nos tin komo Testigu di Yehova, nos tur mester sigui fortalesé nos fe. Anto ora nos hasi esei, hendenan ku ta kontradisí Beibel lo no por usa “filosofia i engaño bano” pa gaña nos. (Kol. 2:8; Heb. 11:6) Ku esei na mente, den e artíkulo akí nos lo wak (1) kiko ta pone ku hopi hende no ta kere ku tin un Kreador, (2) kon nos por fortalesé nos fe den Yehova, nos  Kreador i (3) kiko nos tin ku hasi pa nos fe keda fuerte.

4. Segun Hebreonan 11:1 i nota, riba kiko berdadero fe ta basá?

⁴ Algun hende ta kere ku fe ke men kere den algu sin ku bo tin prueba. Pero segun Beibel, esei no ta berdadero fe. (Lesa Hebreonan 11:1 i nota.) Fe den e realidatnan invisibel, manera Yehova, Hesus i e Reino selestial, ta basá riba evidensia konvinsente. (Heb. 11:3) Un sientífiko ku a bira Testigu di Yehova a bisa: “Testigunan di Yehova no tin un fe siegu ku ta ignorá echonan sientífiko.”

5. Dikon hopi hende ta kere ku bida a kuminsá sin un Kreador?

⁵ Pero si tin evidensia konvinsente ku tin un Kreador, ta dikon anto tin asina tantu hende ku no ta kere ku ta Dios a krea tur kos? E kos ta ku algun hende nunka no a tuma tempu pa analisá e evidensianan pa nan mes. Robert, kende awor ta un Testigu di Yehova, a bisa: “Na skol nunka nan no a papia ku nos tokante kreashon, i ta p’esei mi a pensa ku e kos ei no ta bèrdat. Ta te ora mi tabatin 22 aña anto ku mi a papia ku Testigunan di Yehova mi a skucha e rasonamentu lógiko i konvinsente ku Beibel tin tokante kreashon.” *—Wak e kuadro “ Un Mensahe Importante pa Mayornan.”

6. Dikon hopi hende no ta kere ku tin un Kreador?

⁶ Algun hende ta bisa ku nan no ta kere ku tin un Kreador pasobra nan no ta kere den algu ku nan no por mira. Pero esei  no ta bèrdat. Por ehèmpel, aunke nan no ta mira bientu nan ta kere den dje pasobra nan ta mira sufisiente evidensia ku ta demostrá ku e ta eksistí. E sorto di fe ku Beibel ta menshoná tambe ta basá riba evidensia di “realidatnan” ku hende “no ta mira.” (Heb. 11:1) Pa analisá e evidensianan pa nos mes, nos mester ta dispuesto pa tuma tempu i hasi esfuerso, pero hopi hende no tin gana di hasi esei. Si un hende no tuma tempu pa analisá e evidensianan pa su mes, ta masha fásil p’e konkluí ku Dios no ta eksistí.

7. Ta tur hende bon siñá ta nenga ku Dios a krea tur kos? Splika.

⁷ Despues ku algun sientífiko a tuma tempu pa analisá e evidensianan, nan a rekonosé ku ta Dios a krea tur kos. * Kisas, meskos ku Robert, menshoná na  paragraf 5, algun di nan kisas simplemente a pensa ku no tin un Kreador pasobra nan no a siña tokante kreashon na universidat. Pero, hopi sientífiko a bin siña konosé i stima Yehova. I meskos ku e sientífikonan akí, nos tur mester fortalesé nos fe den Dios sin importá ki skol nos tin. Ta nos mes tin ku hasi esei, niun hende no por hasié pa nos.

8-9. (a) Ki pregunta nos lo bai kontestá awor? (b) Dikon ta bon pa bo analisá kreashon?

⁸ Kon bo por fortalesé bo fe den e Kreador? Laga nos wak kuater manera.

⁹ Analisá kreashon. Ora bo opservá bestia, mata i strea bo ta hasi bo fe den e Kreador mas fuerte. (Sal. 19:1; Isa. 40:26) Mas bo analisá e kosnan ei, mas konvensí lo bo bira ku Yehova ta e Kreador. Generalmente nos publikashonnan tin hopi artíkulo ku ta splika tokante kreashon. Si bo ta haña ku nan ta difísil, no keda sin lesa nan. Purba di komprondé te kaminda ku bo por. Anto no lubidá di wak riba nos website, jw.org, e bunita vidionan tokante kreashon ku nos a haña na nos kongresonan regional den e añanan ku a pasa.

10. Duna un ehèmpel ku ta mustra kon kreashon ta proba ku tin un Kreador. (Romanonan 1:20)

¹⁰ Ora bo ta analisá kreashon, tuma bo tempu i wak kiko e kosnan ei ta siña bo tokante bo Kreador. (Lesa Romanonan 1:20.) Por ehèmpel, solo ta duna e kalor i lus ku ta nesesario pa tin bida riba tera. Pero, tambe e ta saka rayonan ultravioleta ku ta peligroso pa hende. P’esei nos mester haña protekshon for di e rayonan ei. Anto nos ta haña esei tambe. Kon? Nos planeta tin su propio sistema di protekshon. E ta un kapa di gas di ozòn ku ta filtra radiashon ku ta peligroso pa hende. Mas fuerte e rayonan ultravioleta bira, e kantidat di ozòn tambe ta oumentá. Bo no ta di akuerdo ku ta un persona mester a hinka henter e proseso di ozòn di nos planeta akí den otro? Anto ku e persona ei mester ta un Kreador inteligente i ku ta stima su kreashon?

11. Unda bo por haña informashon ku lo yuda bo hasi bo fe den e Kreador mas fuerte? (Wak e kuadro “ Algun Kos Ku Por Fortalesé Bo Fe.”)

¹¹ Den Guia pa Buska Informashon den Publikashonnan di Testigunan di Yehova i riba jw.org, bo por haña hopi informashon ku por yuda bo hasi bo fe den e Kreador mas fuerte. Bo por kuminsá ku e artíkulonan i vidionan di e seri “Kasualidat òf Diseño?” i “Un Persona A Diseñ’é?” Nan ta kòrtiku i ta mustra algun kosnan masha fasinante tokante bestia i mata. Tambe nan ta duna bo ehèmpel di kon sientífikonan a purba di kopia loke nan ta mira den naturalesa.

12. Kiko ta algun kos ku nos tin ku paga tinu riba dje ora nos ta studia Beibel?

¹² Studia Beibel. E sientífiko ku nos a menshoná na paragraf 4, no tabata kere promé ku tabatin un Kreador. Pero, ku tempu el a kuminsá kere esei. El a bisa: “Mi fe no tabata basá solamente riba loke mi a siña den siensia. E tabata basá tambe riba e echo ku mi a tuma tempu pa studia Beibel.” Kisas bo tin basta konosementu di Beibel kaba. Si esei ta e kaso, tòg bo tin ku hasi esfuerso pa sigui studia Beibel pa asina bo por haña mas fe den bo Kreador. (Hos. 1:8; Sal. 119:97) Ripará kon Beibel ta deskribí en detaye, susesonan históriko. Paga tinu kon e  profesianan i tur e bukinan ta na armonia ku otro. Si bo hasi tur eseinan, lo bo mira ku esun ku a krea nos ta un Kreador mashá sabí i ku t’e ta esun ku a inspirá Beibel. Anto tur e kosnan akí lo yuda ku bo fe den dje lo bira mas fuerte. *—2 Tim. 3:14; 2 Ped. 1:21.

13. Menshoná un di e konsehonan ku tin den Beibel.

¹³ Ora bo ta studia Beibel, ripará kon útil su konsehonan ta. Por ehèmpel, basta tempu pasá Beibel a spièrta ku amor pa plaka ta perhudisial i ku e ta kousa “hopi doló.” (1 Tim. 6:9, 10; Pro. 28:20; Mat. 6:24) Te ainda e spièrtamentu ei ta konta? Wak kiko e buki The Narcissism Epidemic a bisa: “Generalmente, hende materialista ta ménos felis i mas deprimí. Asta hende ku ke djis un tiki mas sèn ta infelis i nan tin mas problema ku salú.” Pues, te ainda e spièrtamentu di Beibel tokante amor pa plaka ta masha útil! Tin otro prinsipionan di Beibel ku a yuda bo? Mas nos pensa kon útil e konsehonan di Beibel ta, mas nos ta siña dependé riba e sabiduria ku nos Kreador ku stima nos a laga pa nos. (Sant. 1:5) Anto komo resultado di esei, nos lo tin un bida mas felis.—Isa. 48:17, 18.

14. Kiko un estudio di Beibel lo siña bo tokante Yehova?

¹⁴ Studia ku e meta pa konosé Yehova mihó. (Huan 17:3) Segun ku bo ta studia Beibel, e kualidatnan di Yehova lo bira bisto i lo bo ripará ku t’e mesun kualidatnan akí bo a tuma nota di dje ora ku bo tabata analisá kreashon. Ora bo siña tokante e kualidatnan akí di Yehova, lo bo ta konvensí ku Yehova Dios di bèrdat ta eksistí, e no ta un fantasia. (Éks. 34:6, 7; Sal. 145:8, 9) Anto segun ku bo ta siña konosé Yehova mas i mas mihó, bo fe den dje lo bira mas fuerte, lo bo stim’é mas tantu i bo amistat kuné lo bira mas será.

15. Dikon ta bon pa bo papia tokante bo fe?

¹⁵ Papia ku otro hende tokante bo fe den Dios. Segun ku bo ta hasi esei, bo fe lo bira mas fuerte. Ki bo tin ku hasi si un persona bisa bo ku e tin duda si Dios ta eksistí anto bo no sa kiko pa kontest’é? Purba di haña kontesta pa e pregunta den un di nos publikashonnan anto kompartié kuné. (1 Ped. 3:15) Bo por pidi un publikadó ku mas eksperensia tambe pa yuda bo. Sea ku e hende aseptá e konseho ku Beibel ta duna òf nò, sa ku e echo ku bo a buska informashon no tabata pèrdèmentu di tempu. Pasobra, loke bo a buska lo hasi bo fe mas fuerte. Debí na esei, hende ku ta parse mas sabí lo no por gaña bo ku no tin un Kreador.

16. Kiko lo pasa si nos no sigui fortalesé i mantené nos fe?

¹⁶ Asta si nos tin añanan sirbiendo Yehova, nos mester sigui fortalesé i mantené nos fe. Dikon? Pasobra si nos no hasi esei, nos fe por bira suak. Kòrda, fe ta basá riba evidensia di realidatnan ku nos no ta mira. Anto masha lihé nos ta lubidá kosnan ku nos no ta mira. Ta p’esei Pablo a yama falta di fe “e piká ku fásilmente ta stroba nos.” (Heb. 12:1) Pero, kon nos por evitá ku esei por sosodé ku nos?—2 Tes. 1:3.

17. Kiko por yuda nos pa mantené un fe fuerte?

¹⁷ Promé, keda roga Yehova pa su spiritu  santu i no stòp. Dikon? Pasobra fe ta un di e aspektonan di e fruta di spiritu santu. (Gal. 5:22, 23) Sin yudansa di spiritu santu, nos no por fortalesé ni mantené nos fe den nos Kreador. Si nos sigui pidi Yehova pa su spiritu santu, lo e duna nos esei. (Luk. 11:13) Nos por asta pidié: “Duna nos mas fe.”—Luk. 17:5.

18. Ki privilegio nos tin? (Salmo 1:2, 3)

¹⁸ Di dos, studia Beibel regularmente. (Lesa Salmo 1:2, 3.) Ora ku a skirbi e salmo ei, ta masha poko israelita tabatin e Lei di Dios kompleto skirbí. Pero e rei i e saserdotenan si tabatin akseso na nan. I kada shete aña tabata sòru pa tur “hòmber, muhé i mucha,” i e estranheronan ku tabata biba na Israel, bin skucha lesamentu di e Lei. (Deu. 31:10-12) Den tempu di Hesus, ta djis un par di hende so tabatin algun ròl di e Skritura, mayoria di e ròlnan tabata den snoa. Pero awe kosnan ta diferente, pasobra mayoria di hende por lesa Beibel en parte òf kompleto. Esei ta un gran privilegio. Kon nos por mustra ku nos ta kontentu ku nos tin Beibel?

19. Kiko nos tin ku hasi pa nos fe keda fuerte?

¹⁹ Nos ta mustra ku nos ta kontentu di tin Beibel ora ku nos ta les’é regularmente. Nos no mester laga nos lesamentu di Beibel pa ora ku nos haña un chèns. Mas bien, nos mester traha un programa pa nos lesa i studia Beibel. Si nos hasi sigur pa studia Beibel regularmente, esei lo yuda nos mantené nos fe fuerte.

20. Kiko nos mester ta determiná pa hasi?

²⁰ Kontrali na “hende sabí i intelektual” di e mundu akí, nos fe ta basá riba evidensia ku tin den Beibel. (Mat. 11:25, 26) Beibel ta splika nos dikon situashon di mundu ta bai di malu pa pió i loke Yehova lo bai hasi tokante esei. P’esei, laga nos ta determiná pa fortalesé nos fe i yuda mas tantu hende ku nos por haña fe den nos Kreador. (1 Tim. 2:3, 4) Anto laga nos sigui warda riba e tempu ora tur hende riba tera lo bisa e palabranan di Revelashon 4:11: “Bo ta digno, Yehova, nos Dios, di risibí alabansa pa bo gloria . . . pasobra ta abo a krea tur kos.”