1. Kon hopi ruman ta purba di hasi mas den sirbishi?

SEGUN ku e fin ta yegando serka, nos tin hopi trabou pa hasi. (Mat. 24:14; Luk. 10:2; 1 Ped. 5:2) Nos tur ke hasi mas pa Yehova. P’esei, algun ruman ta purba di traha pionero, tin otronan ku ke sirbi na Bètel òf yuda ku proyektonan di konstrukshon. I tin hopi otro ruman ku ta hasi nan bèst pa sea bira sirbidó ministerial òf ansiano. (1 Tim. 3:1, 8) Nos tin sigur ku Yehova ta keda masha kontentu di mira ku su pueblo boluntariamente ke hasi mas p’e.—Sal. 110:3; Isa. 6:8.

2. Kon nos por sinti si nos no logra algun di nos metanan spiritual?

² Si basta tempu a pasa anto te ainda nos no a logra algun di nos metanan spiritual, nos por kuminsá sinti nos tristu i frustrá. Òf, tin algun privilegio ku nos djis no por haña debí na nos edat òf kualke otro sirkunstansia, anto esei por desanimá nos. (Pro. 13:12) Esei ta loke a pasa ku Melissa, * kende tabatin hopi gana di bai Bètel òf bai Skol pa Predikadó di Reino. El a bisa: “Debí na mi edat mi no ta bini na remarke pa e privilegionan ei mas. Tin biaha esei ta laga mi sinti hopi desanimá.”

3. Kiko ta algun kos ku rumannan tin ku hasi pa haña un sierto privilegio?

³ Algun hóben ta bon di salú, inteligente, kla pa tuma desishon i kla pa traha. Pero promé ku nan por haña un  sierto privilegio, kisas nan tin ku madurá un poko mas, bira mas responsabel, mas respetuoso i demostrá sierto kualidatnan. Si bo hasi esfuerso pa kultivá e kualidatnan nesesario, lo bo haña privilegio na e momento ku ménos bo a spera. Esei ta loke a pasa ku Nick. Ora ku e tabatin 20 aña, el a keda masha desapuntá pasobra e no a bira sirbidó ministerial. El a bisa: “Kisas mi no ta bon sufisiente.” Pero Nick no a entregá. Den e kongregashon el a duna tur di dje, i awe e ta miembro di Komité di Sukursal.

4. Kiko nos ta bai wak den e artíkulo akí?

⁴ Bo ta sinti bo desanimá pasobra te ainda bo no a logra algun di bo metanan? Si ta asina, deshogá bo kurason serka Yehova. (Sal. 37:5-7) Ademas, papia ku e rumannan ku eksperensia den bo kongregashon i pidi nan yuda bo sa kiko bo tin ku hasi pa bo por hasi mas pa Yehova. Despues, hasi bo bèst pa sigui nan konseho. Si bo hasi esei, chèns ta grandi ku bo por logra bo meta. Pero, kisas meskos ku Melissa, kende nos a menshoná anteriormente, e privilegio ei ku bo tin masha gana di haña no ta na bo alkanse na e momento akí. Kon bo por mantené bo goso? Pa kontestá e pregunta ei, nos ta bai mira den e artíkulo akí (1) loke por duna bo goso, (2) kon bo por mantené bo goso i (3) ki meta bo por pone pa duna bo mas goso.

5. Riba kiko nos tin ku enfoká si nos ke ta felis? (Eklesiástes 6:9)

⁵ Eklesiástes 6:9 ta splika nos kiko por duna nos goso. (Les’é.) Un persona ku ta disfrutá di loke su “wowo ta mira” ta satisfecho ku loke e tin su dilanti, manera su sirkunstansia. Pero di otro banda, un persona ku ta kore tras di su deseonan ta anhelá henter su bida pa algu ku e no por haña. Pues, kiko ta e lès? Si nos ke ta felis, nos tin ku enfoká riba loke nos tin i loke realmente nos por logra.

6. Kua di Hesus su ilustrashonnan nos ta bai trata awor, anto kiko nos ta bai siña for di dje?

⁶ Ta bèrdat ku nos por keda satisfecho ku loke nos tin aworakí? Algun hende ta kere ku nò, pasobra di naturalesa nos gusta siña kos nobo. Pero, e ta posibel. Nos por disfrutá di loke nos tin aworakí. Pa haña sa kon pa hasi esei, laga nos wak Hesus su ilustrashon tokante e talentonan ku nos por lesa na Mateo 25:14-30. Nos lo siña kon nos por ta felis ku e kosnan ku ya nos ta hasiendo pa Yehova i kon pa asta oumentá nos goso.

7. Duna un resúmen kòrtiku tokante Hesus su ilustrashon di e talentonan.

⁷ Den e ilustrashon, un hòmber tabata preparando pa bai di biahe. Promé ku el a bai, el a yama su esklabonan anto el a duna kada un di nan talentonan ku nan por a usa pa hasi negoshi kuné. * El a tene kuenta ku loke kada un di nan por a hasi. E hòmber a duna un di e esklabonan sinku talento. E otro el a duna dos talento, anto e último el a duna un talento. E promé dos esklabonan a traha hopi duru pa nan traha mas plaka pa nan doño. Pero, e di tres esklabo no a hasi nèt nèt nada ku e plaka ku el a haña, i debí na esei e doño a manda e esklabo ei bai.

8. Dikon e promé esklabo den e ilustrashon por tabata hopi felis?

 ⁸ Kasi sigur e promé esklabo a keda hopi kontentu ku su doño a dun’é sinku talento. Esei tabata hopi plaka anto esei a mustra ku su doño tabatin hopi konfiansa den dje. Pero, kiko awor di e dos esklabo? El a desanimá pasobra e no a haña mesun tantu talento ku e promé esklabo? Ban wak kiko el a hasi.

9. Kiko Hesus no a bisa tokante e di dos esklabo? (Mateo 25:22, 23)

⁹ Lesa Mateo 25:22, 23. Hesus no a bisa ku e di dos esklabo a rabia i a konsumí pasobra el a haña solamente dos talento. Anto Hesus no a bisa ku e esklabo a reklamá bisando komo si fuera: ‘Ta esaki so m’a haña? Mi ta mesun bon ku e esklabo ku a haña sinku talento! Awèl si mi doño no ta balorá mi, mihó mi djis dera su talentonan i hasi mi mes kosnan.’

10. Kiko e di dos esklabo a hasi ku su dos talentonan?

¹⁰ Meskos ku e promé esklabo, esun di dos a tuma su responsabilidat hopi na serio. El a traha duru pa su doño, i komo resultado el a duna su doño kuater talento bèk. E doño a rekompens’é pa tur su esfuerso, a keda masha kontentu kuné i a dun’é mas responsabilidat.

11. Kon bo por haña mas goso?

¹¹ Di mes manera, nos por haña mas goso si nos hasi tur nos esfuerso den kualke asignashon ku nos haña. Bo tin ku ‘dediká bo mes kompletamente’ na  e trabou di prediká i hasi tur loke bo por den e kongregashon. (Echo. 18:5; Heb. 10:24, 25) Prepará e material ku ta bai studia na e kongregashon bon pa bo por duna komentarionan animante. Tuma e asignashonnan ku bo a haña pa e reunion di den siman na serio. Si nan pidi bo pa yuda ku kualke tarea den kongregashon, sea puntual i konfiabel. Kòrda, niun asignashon no ta pèrdèmentu di tempu. Keda hasi bo esfuerso pa bo mehorá den bo asignashonnan. (Pro. 22:29) Mas esfuerso bo hasi pa Yehova, mas lihé bo progreso lo ta i mas goso lo bo tin. (Gal. 6:4) Ademas, lo bo haña ku ta mas fásil pa bo ta kontentu ora ku un otro ruman haña e privilegio ku abo kisas lo tabatin gana di dje.—Rom. 12:15; Gal. 5:26.

12. Kiko dos ruman a hasi pa nan haña mas goso?

¹² Bo ta kòrda e ruman ku yama Melissa ku a bisa ku e tabatin masha gana di bai Bètel òf Skol pa Predikadó di Reino? Aunke e no por a logra e metanan ei, el a bisa: “M’a hasi esfuerso pa mi hasi tur loke un pionero por hasi. Esei a duna mi hopi goso.” Awor kiko di Nick? Kiko el a hasi ora e no a bira un sirbidó ministerial? Aunke el a sintié desapuntá, el a bisa: “M’a enfoká riba e kosnan ku sí mi por a hasi. M’a bai sirbishi, duna komentario animante na reunion i asta m’a apliká pa Bètel. I e siguiente aña, nan a invitá mi.”

13. Kiko lo pasa si bo hasi tur bo esfuerso den e asignashonnan ku bo tin? (Eklesiástes 2:24)

¹³ Si bo hasi tur bo esfuerso den e asignashon ku bo tin aworakí, esei ke men ku lo bo haña mas responsabilidat den futuro? Kisas sí. Esei ta loke a sosodé ku Nick. Pero si no ta asina, manera tabata e kaso di Melissa, lo bo tin mas goso si bo hasi tur loke bo por pa Yehova. (Lesa Eklesiástes 2:24.) I lo bo tin mas goso ainda sabiendo ku bo a hasi nos Doño, Kristu Hesus, masha kontentu.

14. Kiko nos tin ku tene na mente ora nos pensa riba nos metanan spiritual?

¹⁴ Pues manera nos a mira, un hende mester enfoká riba loke e por hasi pa Yehova aworakí. Pero, esei no ta nifiká ku e no mester buska manera pa hasi mas pa Yehova. Nos por i mester pone metanan spiritual ku ta yuda nos bira mas ábil den nos sirbishi i ku ta yuda nos hasi mas pa nos rumannan. Nos lo logra esei ora nos enfoká riba sirbi otro en bes di nos mes.—Pro. 11:2; Echo. 20:35.

15. Kua ta algun di e metanan ku por yuda bo haña mas goso?

¹⁵ Ki meta lo bo por pone pa bo mes? Pidi Yehova yuda bo pensa kua ta e metanan ku realmente bo por alkansá. (Pro. 16:3; Sant. 1:5) Kiko bo ta pensa tokante e metanan menshoná na paragraf 1? Bo ta kere ku bo por traha pionero ousiliar òf regular, òf bai Bètel òf yuda ku proyektonan di konstrukshon? Òf, bo ta kere ku bo por siña un idioma nobo òf asta bai prediká na un otro pais? Bo por haña sa mas tokante e metanan akí den kapítulo 10 di e buki Organisá pa Hasi Boluntat di Yehova. Ademas, bo por papia ku bo ansianonan den bo kongregashon. * Segun ku bo ta hasi bo esfuerso pa yega  bo metanan, otro hende lo mira bo progreso i abo lo bira mas felis.

16. Kiko bo tin ku hasi si na e momento akí tin un meta ku bo no por logra?

¹⁶ Kiko si na e momento akí tin un di e metanan ei ku abo no por logra? Loke bo tin ku hasi ta pone un otro meta; unu ku sí bo por logra. Ban wak algun di e metanan ei.

17. Segun 1 Timoteo 4:13 i 15, kiko un ruman hòmber lo por hasi pa bira un mihó maestro?

¹⁷ Lesa 1 Timoteo 4:13, 15. Si bo ta un ruman hòmber batisá, bo por pone komo meta pa bira un mihó oradó òf maestro. Dikon? Pasobra, si bo hasi bo esfuerso pa bira un mihó lesadó, oradó i maestro, lo ta mas fásil pa bo yuda esnan ku ta skuchando bo. Purba di pone komo meta pa studia i apliká kada lès den e foyeto Dediká Bo Mes na Lesamentu i na Dunamentu di Siñansa. Pasa den kada lès un pa un, train nan na kas i hasi bo bèst pa apliká loke bo a siña ora bo ta duna parti. Buska konseho serka e konsehero asistente òf e otro ansianonan “ku ta traha duru pa kumpli ku nan tarea di papia i duna siñansa.” * (1 Tim. 5:17) No enfoká solamente riba komprondé e lèsnan ku tin den e foyeto, pero enfoká tambe riba kon pa yuda esnan ku ta skucha bo pa fortalesé nan fe òf motivá nan pa apliká loke nan ta siña. Ora bo hasi esei, abo lo tin mas goso i bo oyentenan tambe.

18. Kiko por yuda nos logra nos metanan den sirbishi?

¹⁸ Nos tur mester prediká i hasi disipel.  (Mat. 28:19, 20; Rom. 10:14) Lo bo ke siña hasi e trabou importante ei mas mihó? Awèl, pone metanan spesífiko segun ku bo ta pasa den e lèsnan den e foyeto Dunamentu di Siñansa. Lo bo por haña mas sugerensia práktiko den Nos Bida i Sirbishi Kristian—Material i Tarea pa Reunion i tambe e vidionan di sirbishi ku nos ta mira den nos reunion di den siman. Purba diferente sugerensia i wak kua di nan ta funshoná pa bo. Si bo sigui e tepnan ei, lo bo bira un mihó maestro i lo bo tin mas goso.—2 Tim. 4:5.

19. Kiko por yuda bo kultivá kualidatnan ku ta agradá Dios?

¹⁹ Ora bo ta pensando kua meta pa pone, no lubidá esun di mas importante, esun di kultivá kualidatnan ku ta agradá Dios. (Gal. 5:22, 23; Kol. 3:12; 2 Ped. 1:5-8) Kon bo por logra e meta ei? Por ehèmpel, ban bisa ku bo ke tin un fe mas fuerte. Den e kaso ei, kisas ta bon pa bo lesa artíkulonan den nos publikashonnan ku ta duna sugerensia práktiko pa yuda bo fortalesé bo fe. Tambe lo ta bon pa bo wak pidanan di e JW Broadcasting^® ku ta mustra kon algun ruman a mustra hopi fe ora nan a haña nan ku vários prueba. Djei, wak kon abo por imitá nan.

20. Kon nos por haña mas goso i sinti nos ménos desapuntá?

²⁰ Sin duda, nos tur ke hasi mas pa Yehova. Den su mundu nobo nos lo por sirbié perfektamente. Pero mientrastantu, si nos hasi tur nos esfuerso den loke nos por hasi p’e aworakí, nos lo tin mas goso i lo ta ménos desapuntá. I mas importante ainda, nos lo duna onor i alabansa na Yehova, nos “Dios felis.” (1 Tim. 1:11) P’esei, laga nos sinti goso den loke nos por hasi pa Yehova!