1. Segun 1 Tesalonisensenan 5:11, ki trabou nos tur por partisipá den dje?

 ABO a yega di bai e reunion di inougurashon di un Salòn di Reino? Si esei ta e kaso, klaru ku lo bo no por lubidá un okashon asina nunka! Bo tabata asina kontentu ku bo no por a stòp di yama Yehova danki. I bo tabata asina emoshoná ku kasi bo no por a kanta e promé kantika. Sin duda, tur e trabounan enbolbí den konstruí òf renobá un Salòn di Reino ta duna gloria na Yehova. Pero, tin un otro trabou ku nos tur por partisipá den dje i ku ta duna mas gloria na Yehova. Esei ta e trabou di animá tur hende ku ta asistí na Salòn di Reino. Ta di esei Apòstel Pablo a papia ora el a skirbi e palabranan di nos teksto sentral, 1 Tesalonisensenan 5:11.—Les’é.

2. Kiko nos lo trata den e artíkulo aki?

² Pa nos haña sa kon pa animá nos rumannan, nos por wak e ekselente ehèmpel di Apòstel Pablo. El a sinti pa su rumannan; el a pone su mes den nan sapatu. Den e artíkulo akí nos ta bai mira kon el a yuda su rumannan pa (1) perseverá apesar di prueba, (2) keda na pas ku otro i (3) fortalesé nan fe den Yehova. Laga nos wak kon nos por imit’é.—1 Kor. 11:1.

3. Kon Pablo a balansá trabou i sirbishi?

³ Kon bin Pablo por a pone su mes den sapatu di e rumannan ku tabata pasa den difikultat? Esei tabata pasobra e tabata stima nan i tambe pasobra e mes a pasa den tempunan difísil. Por ehèmpel, tabatin un biaha ku sèn a kaba kuné, i e mester a buska un trabou pa perkurá pa su mes i su kompañeronan. (Echo. 20:34) E tabata trahadó di tènt. Ora el a yega Korinto, el a bai traha ku Akila i Priskila. Nan tambe tabata trahadó di tènt. Pero asina mes, “tur sabat”  Pablo tabata prediká na e hudiu- i griegonan. Djei, ora Sílas i Timoteo a yega, el “a kuminsá dediká su mes kompletamente na prediká e palabra di Dios.” (Echo. 18:2-5) Niun ora so Pablo no a lubidá ku e kos di mas importante tabata pa sirbi Yehova. P’esei, e tabata un di e mihó hendenan pa animá su rumannan. El a traha duru tantu den sirbishi komo pa sostené su mes. El a kòrda nan pa no laga trabou i ansiedat pone nan neglishá “e kosnan mas importante,” esta, tur loke ta forma parti di nan adorashon na Yehova.—Flp. 1:10.

4. Kon Pablo i Timoteo a yuda nan rumannan trata ku persekushon?

⁴ Djis despues ku a forma e kongregashon na Tesalónika, e rumannan nobo ei a haña nan ku persekushon hopi fuerte. Un biaha, un grupo violento tabata buska Pablo ku Sílas. Pero komo ku nan no por a haña nan, nan a lastra “algun ruman hiba dilanti di e gobernantenan di e stat.” Nan a grita: “Tur e hòmbernan akí ta aktua kontrario na e dekretonan di Sésar.” (Echo. 17:6, 7) Bo por imaginá kuantu miedu e rumannan ei tabatin ora ku nan a mira ku hende di nan mes stat a lanta kontra nan? Nan por a kuminsá baha man den nan sirbishi na Yehova. Pero, Pablo no tabata ke pa esei pasa! P’esei, aunke e ku Sílas mester a bai for di einan, nan a hasi sigur ku e kongregashon lo a haña e yudansa ku nan tabatin mester. Pablo a rekordá e rumannan na Tesalónika: “Nos a manda Timoteo, nos ruman . . . pa fortalesé i konsolá boso en konekshon ku boso fe, pa e tribulashonnan akí no mester sagudí ningun di boso.” (1 Tes. 3:2, 3) Probablemente, Timoteo mes a pasa den persekushon na e stat Listra, kaminda e tabata biba. El a mira kon Pablo a animá e rumannan i kon Yehova a laga kosnan kana. Debí na esei, e por a sigurá e rumannan na Tesalónika ku tur kos lo bai bon pa nan tambe i ku nan no mester a preokupá.—Echo. 14:8, 19-22; Heb. 12:2.

5. Kon e yudansa ku Bryant a haña di un ansiano a yud’é?

⁵ Kiko mas Pablo a hasi pa animá su rumannan? Ora e ku Bárnabas a bolbe bishitá e statnan Listra, Ikonio i Antiokia, nan a nombra ‘den kada kongregashon algun hòmber pa sirbi komo ansiano.’ (Echo. 14:21-23) Sin duda, e ansianonan ei a animá e rumannan den nan kongregashon meskos ku esnan djawe ta hasi. Wak kiko un ruman hòmber ku yama Bryant a bisa: “Ora m’a hasi 15 aña, mi tata a bai fo’i kas i mi mama a ser ekspulsá. M’a sinti mi bandoná i desanimá.” Kiko a yuda Bryant den e tempu difísil ei? El a bisa: “Un ansiano ku yama Tony semper tabata papia ku mi na reunion i na otro okashon. E tabata usa ehèmpel di otro ruman ku a pasa den prueba i ku tòg a keda felis. E tabata lesa Salmo 27:10 pa mi, i hopi biaha e tabata papia di Ezekías, kende a sirbi Yehova fielmente aunke su tata no tabata un bon ehèmpel.” Kon tur eseinan a yuda Bryant? El a bisa: “Danki na tur e animashonnan ku Tony a duna mi, m’a kuminsá traha pionero.” Pues ansianonan, sea atento na rumannan ku, meskos ku Bryant, tin mester di animashon.—Pro. 12:25.

6. Kiko Pablo a usa pa animá su rumannan?

⁶ Pablo a yuda su rumannan kòrda ku ta ku yudansa di Yehova “un nubia . . . grandi di testigu,” esta, hopi sirbidó fiel di pasado, a logra perseverá apesar di hopi prueba. (Heb. 12:1) Pablo  tabata sa ku e eksperensianan di e sirbidónan fiel ei lo a yuda su rumannan haña mas kurashi i keda enfoká riba “e stat di e Dios bibu.” (Heb. 12:22) Meskos ta pasa ku nos tambe. Nos ta haña hopi animashon ora nos lesa kon Yehova a yuda su sirbidónan di pasado manera Gídeòn, Barak, David, Sámuèl i hopi otro mas. (Heb. 11:32-35) Anto historia di bida di e rumannan di nos tempu tambe ta animá nos. Sede mundial ta haña masha hopi karta mes di rumannan ku ta bisa ku nan fe a bira mas fuerte despues ku nan a lesa historia di bida di un di nos rumannan.

7. Kiko bo ta siña for di e konseho di Pablo na Romanonan 14:19-21?

⁷ Un otro manera ku nos ta animá nos rumannan, ta di papia i hasi kos ku ta promové pas den e kongregashon. Nos lo no permití diferensia di opinion habri nos for di otro. I si algu no ta bai kontra un prinsipio di Beibel, nos lo no keda insistí riba nos derecho. Wak e siguiente ehèmpel. E kongregashon na Roma tabatin tantu kristian hudiu komo no-hudiu. Promé ku e hudiunan a bira kristian, nan tabata kumpli ku Lei di Moises. Pero komo ku Lei di Moises no tabata bálido mas, e restrikshonnan tokante sierto kuminda a kita. (Mar. 7:19) En bista di esei, algun hudiu ku a bira kristian no tabatin niun tiki problema pa kome tur tipo di kuminda. Pero, tabatin otro hudiu den e kongregashon ku sí tabatin problema ku esei. E situashon ei a trese divishon den e kongregashon. Pablo a kòrda nan kon importante ta pa mantené pas ora el a bisa: “Ta mihó pa no kome karni ni bebe biña ni hasi nada ku ta pone bo ruman trompeká.” (Lesa Romanonan 14:19-21.) Ku e palabranan ei, el a yuda nan mira ku e diskushonnan ei no tabata bon pa nan mes ni pa henter e kongregashon. Pablo mes tambe tabata dispuesto pa hasi kambio pa asina no laga otro ruman trompeká. (1 Kor. 9:19-22) Meskos ku Pablo, nos tambe ta animá nos rumannan i mantené pas den kongregashon ora nos no ta keda diskutí riba kosnan ku ta desishon personal.

8. Kiko Pablo a hasi ora un desakuerdo a menasá e pas den e kongregashon?

⁸ Pablo a pone un bon ehèmpel di kon pa mantené pas ora surgi un desakuerdo riba asuntunan importante. Por ehèmpel, algun ruman di promé siglo a insistí ku e kristiannan no-hudiu mester a ser sirkunsidá. Kisas nan tabatin e punto di bista ei pa evitá ku hende pafó di e kongregashon lo a kritiká nan. (Gal. 6:12) Pablo no tabata niun tiki eens ku esei. Pero na lugá di insistí pa kosnan bai manera e ke, e tabata humilde i a pidi yudansa di e apòstel- i ansianonan di Herúsalèm. (Echo. 15:1, 2) Asina ei el a yuda e rumannan mantené nan goso i e pas den e kongregashon.—Echo. 15:30, 31.

9. Kon nos por imitá Pablo?

⁹ Si surgi un desakuerdo serio, nos por promové pas ora nos ta buska guia di esnan ku Yehova a asigná pa kuida e kongregashon. Ademas, mayoria di biaha nos ta haña guia basá riba Beibel den nos publikashonnan i den e instrukshonnan ku ta bini for di e organisashon. Si nos hasi esfuerso pa sigui e guia- i instrukshonnan na lugá di traha regla òf para ariba pa kosnan semper bai na nos manera, nos lo yuda promové pas den e kongregashon.

10. Kiko mas Pablo a hasi pa promové pas den e kongregashon?

 ¹⁰ Na lugá di papia riba e puntonan negativo di e rumannan, Pablo a enfoká riba nan puntonan positivo i asina a yuda promové pas den kongregashon. Por ehèmpel, na final di su karta ku el a skirbi na e romanonan, el a menshoná vários ruman pa nòmber i a agregá algu positivo di algun di nan. Nos ta imitá Pablo ora nos papia tokante e bon kualidatnan di nos rumannan. Asina ei, nos ta yuda ku nos rumannan lo bira mas será ku otro i stima otro mas.

11. Si surgi un desakuerdo, kiko nos por hasi pa por tin pas atrobe?

¹¹ Tin biaha, asta rumannan ku ta spiritualmente madurá por tin desakuerdo ku otro. Esei ta loke a pasa ku Pablo i su bon amigu Bárnabas. Pablo i Bárnabas mester a hasi un biahe komo misionero. Pablo no tabata ke pa Marko bai ku nan, pero Bárnabas sí tabata ke esei. Djei a surgi “un pleitu pisá entre nan,” i kada un a kue nan kaminda bai. (Echo. 15:37-39) Pero, Pablo, Bárnabas i Marko a hasi pas ku otro pasobra e pas i union di e kongregashon tabata e kos di mas importante pa nan tur tres. Mas despues, Pablo a papia bon di Bárnabas i Marko. (1 Kor. 9:6; Kol. 4:10) Nos tambe mester hasi esfuerso pa resolvé kualke problema òf diferensia di opinion ku nos tin ku nos rumannan i sigui focus riba e bon kualidatnan ku nan tin. Di e manera ei nos ta yuda promové pas i union den e kongregashon.—Efe. 4:3.

12. Kiko ta algun difikultat ku nos rumannan ta pasa aden?

¹² Ora ku nos animá nos rumannan, nos ta yuda nan fe den Yehova bira mas fuerte. Algun di nan tin ku soportá chèrchi di nan famianan ku no ta Testigu, nan koleganan di trabou òf di e muchanan di nan skol. Tin ta lucha ku problemanan grave di salú òf ta lucha pa pordoná un hende ku a hùrt nan. Tin ruman tin hopi aña ta sirbi Yehova i ta wardando hopi tempu pa e fin yega. Tur e kosnan akí por pone fe di un kristian na prueba. E kristiannan di promé siglo a pasa den e mesun situashonnan ei. Kiko Pablo a hasi pa fortalesé nan fe?

13. Kon Pablo a yuda e rumannan ku mester a soportá chèrchi pa motibu di nan fe?

¹³ Pablo a usa e Skritura pa fortalesé fe di su rumannan. Por ehèmpel, algun hudiu ku a bira kristian kisas no tabata sa kon pa kontestá nan famianan ku ketu bai tabata insistí ku hudaismo tabata mihó ku kristianismo. Pero, e karta ku Pablo a skirbi pa e hebreonan sin duda a fortalesé nan masha tantu mes. (Heb. 1:5, 6; 2:2, 3; 9:24, 25) Nan por a usa Pablo su rasonamentu pa kontestá nan opositornan. Awe, nos por hasi meskos ku Pablo. Algun di nos rumannan ta soportá chèrchi debí na nan fe. Pero, nos por yuda nan sa kon pa splika nan fe. I si nos hóbennan ta haña nan ku chèrchi pasobra nan ta kere den kreashon, nos por yuda nan defendé nan fe dor di yuda nan haña informashon den e foyetonan Bida Ta Obra di un Kreador? i El origen de la vida. Cinco cuestiones dignas de análisis.

14. Aunke Pablo tabata okupá ku e trabou di prediká, kiko el a hasi?

¹⁴ Pablo a animá su rumannan pa demostrá nan amor mediante “bon obra.” (Heb. 10:24) El a yuda su rumannan no ku palabra so, ma ku echo tambe. Por ehèmpel, ora e rumannan na Hudea tabata  pasa hamber, el a trese algun di e kosnan ku nan tabatin mester. (Echo. 11:27-30) Aunke ku e tabata okupá ku e trabou di prediká i di siña hende e bèrdat, semper el a buska manera pa yuda su rumannan ku tabata pober. (Gal. 2:10) Asina ei, Pablo tabata yuda su rumannan bira mas konvensí ku semper Yehova lo perkurá pa nan. Nos tambe por fortalesé fe di nos rumannan ora nos usa nos tempu, energia i abilidat pa yuda nan ora un desaster sosodé. Tambe nos por yuda nan ora nos kontribuí regularmente na e obra mundial. Di e manera ei, nos ta yuda nos rumannan konfia ku Yehova nunka lo bandoná nan.

15-16. Kon nos por yuda un ruman ku a fria òf ku a bira suak den sentido spiritual?

¹⁵ Pablo no a stòp di animá e rumannan kende nan fe a debilitá. Pablo tabatin kompashon pa e rumannan akí, el a papia ku nan na un manera positivo i ku hopi kariño. (Heb. 6:9; 10:39) Por ehèmpel, den e karta ku el a skirbi na e hebreonan, mayoria di biaha e no a papia di boso, mas bien di “nos,” pa indiká asina ku e tambe tin ku apliká e konsehonan ku e tabata duna. (Heb. 2:1, 3) Meskos ku Pablo, nos no ta stòp di yuda nos rumannan ku a fria òf ku a bira suak den sentido spiritual. Mas bien, nos ta mustra nan ku nos ta interesá den nan. I di e manera ei, nos lo animá nan i laga nan sinti ku di bèrdat nos ta stima nan. Ta bon pa nos kòrda ku e manera kariñoso i trankil ku nos ta papia por animá nan mas di loke nos ta pensa.

¹⁶ Pablo tabata ke laga su rumannan keda kòrda ku Yehova no a lubidá tur e bon kosnan ku nan a hasi. (Heb. 10:32-34) Nos tambe por hasi algu asina ora  nos ta trata di yuda un ruman ku a fria òf ku a bira suak den sentido spiritual. Nos por pidié konta nos kon el a haña e bèrdat òf anim’é pa pensa riba momentonan ku el a sinti kon Yehova a yud’é. Nos por usa e oportunidatnan ei pa sigurá e ruman ku Yehova no ta lubidá tur e amor ku e ruman a mustra den pasado i ku Yehova nunka lo bandon’é. (Heb. 6:10; 13:5, 6) E tipo di kòmbersashonnan ei por animá e ruman stimá ei pa sigui sirbi Yehova.

17. Kiko nos por sigui hasi pa animá nos rumannan?

¹⁷ Meskos ku un hende ku ta den konstrukshon ku tempu ta haña mas eksperensia, asina tambe nos por mehorá e manera ku nos ta animá nos rumannan. Por ehèmpel, nos ta yuda nos rumannan haña forsa pa perseverá ora nos konta nan eksperensia di otro ruman ku a pasa den situashon similar. Nos ta promové pas ora nos ta papia bon di otro ruman, ora nos ta evitá di bisa òf hasi kos ku por kita e pas di e kongregashon i ora nos ta resolvé kualke desakuerdo ku surgi. Ademas, nos ta animá nos rumannan ora nos ta papia ku nan tokante e bèrdatnan di Beibel, duna nan yudansa práktiko i yuda esnan ku a fria òf a bira suak den sentido spiritual.

18. Kiko bo ta determiná pa sigui hasi?

¹⁸ E rumannan ku ta haña chèns pa por traha riba un proyekto di konstrukshon ta sinti nan masha kontentu i felis di por a partisipá den esei. Nos por sinti meskos ora nos ta hasi esfuerso pa yuda fortalesé fe di nos rumannan. Edifisionan ku ta ser konstruí ku tempu ta bai atras. Pero, ora nos ta hasi esfuerso pa animá nos rumannan, e resultado di nos trabou sí lo dura pa semper. P’esei, laga nos ta determiná pa “sigui animá otro.”—1 Tes. 5:11.