1. Dikon ta bon pa nos konta otro kon nos a haña “e bèrdat”?

 “KON bo a haña e bèrdat?” E pregunta ei ta konosí pa bo? Esei ta un di e promé kosnan ku nos ta puntra un ruman ora nos sera konosí kuné. Nos gusta tende kon nos rumannan a haña e bèrdat, i nos gusta konta nan tambe kon nos a haña e bèrdat. (Rom. 1:11) Kòmbersashon asina ta laga nos kòrda kon balioso e bèrdat ta pa nos. Tambe nan ta yuda nos keda mas determiná pa “sigui kana den e bèrdat,” esta, sigui biba na un manera ku ta agradá Yehova.—3 Huan 4.

2. Kiko nos lo trata den e artíkulo akí?

² Den e artíkulo akí nos lo wak kiko ta hasi e bèrdat balioso i kon nos ta demostrá ku nos stima e bèrdat. Ora nos pensa riba esei, sin duda nos lo bira mas gradisidu ku Yehova a hala nos na e bèrdat. (Huan 6:44) Ademas, nos lo haña mas deseo pa kompartí e bèrdat ei ku otronan tambe.

3. Kua ta e motibu di mas importante pakiko nos ta stima e bèrdat?

³ Nos tin hopi motibu pa stima e bèrdat. Pero, esun di mas importante ta pasobra nos stima Yehova, e fuente di e bèrdat. For di Beibel, nos ta siña yen di kos bunita tokante Yehova. Por ehèmpel, e ta e Kreador todopoderoso ku a krea shelu i tera. Pero loke a impreshoná nos mas ta ku e ta un Tata ku ta stima nos i ku ta interesá den  nos. (1 Ped. 5:7) Nos sa ku Yehova ta un Dios “yen di kompashon i grasia, kende no ta rabia lihé i kende ta abundá den miserikòrdia i bèrdat.” (Éks. 34:6) Ademas, e stima hustisia. (Isa. 61:8) Ta duel e mashá di mira nos sufri, i e ta anhelá e momento ku e por kaba ku tur sufrimentu. (Yer. 29:11) Nos ta anhelá pa e hasi esei! Pa e motibunan ei, nos stima Yehova asina tantu.

4-5. Dikon Pablo a kompará nos speransa ku un anker?

⁴ Un otro motibu pakiko nos ta stima e bèrdat ta pasobra e ta mehorá nos bida. Por ehèmpel, e bèrdat ta duna nos speransa pa futuro. I pa ilustrá kon balioso e speransa ei ta Apòstel Pablo a skirbi: “Nos tin e speransa akí manera un anker pa nos alma; e ta sigur i tambe firme.” (Heb. 6:19) Meskos ku un anker ta tene un boto firme na su lugá ora tin mal tempu, asina tambe e speransa ku nos ta haña den Beibel ta yuda nos keda firme i kalmu ora nos haña nos ku difikultat.

⁵ Pablo tabata papia di e speransa di bai shelu ku e kristiannan ungí tin. Pero, loke el a bisa ta konta tambe pa e kristiannan ku tin speransa di biba pa semper aki riba tera. (Huan 3:16) Sin duda, e speransa di biba pa semper a duna nos bida propósito.

6-7. Kon loke Beibel ta siña tokante futuro a yuda Yvonne?

⁶ Laga nos wak loke a pasa ku un ruman ku yama Yvonne. E no a lanta den e bèrdat, i fo’i mucha e tabatin miedu di muri. E ta kòrda ku un biaha el a lesa un frase ku nunka mas e por a lubidá: “Tur hende tin nan dia di muri.” El a bisa:“E palabranan ei tabata pone ku mi no por a drumi. Mi tabata blo keda pensa tokante futuro: ‘Mañan ta mi dia? Ta asin’akí bida ta? Mi t’ei djis pa muri?’ Ami no kier muri!”

⁷ Mas despues, ora ku Yvonne a bira tiner, el a topa ku algun Testigu di Yehova. El a bisa: “M’a bin komprondé ku mi por biba pa semper den Paradeis aki riba tera.” Kon e bèrdat ei a yuda Yvonne? El a bisa: “Awor mi no ta keda lantá anochi mas ta preokupá tokante futuro òf tokante di morto.” E bèrdat ta hopi presioso pa Yvonne, i e gusta papia ku otro hende tokante su speransa pa futuro.—1 Tim. 4:16.

8-9. (a) Kon e hòmber den Hesus su ilustrashon a demostrá ku el a balorá e tesoro ku el a haña? (b) Konta kon balioso e bèrdat ta pa bo.

⁸ E bon notisia tokante e Reino di Dios tambe ta forma parti di e bèrdat di Beibel. Hesus a kompará e bèrdat tokante e Reino ku un tesoro skondí. Na Mateo 13:44, el a bisa: “E Reino di shelu ta manera un tesoro skondí den un tereno. Un hòmber a hañ’é i skond’é, i e ta asina kontentu ku el a hañ’é ku e ta bai, bende tur loke e tin i kumpra e tereno ei.” Ripará ku e hòmber no tabata buska tesoro. Pero ora el a hañ’é, el a sakrifiká masha hopi kos. De echo, el a asta bende tur kos ku e tabatin. Dikon? Pasobra el a rekonosé ku e tesoro ei tabata bal hopi mas ku tur e kosnan ku e mester a sakrifiká.

⁹ Bo tambe ta mira e bèrdat asina? Klaru ku sí. Nos sa ku nada ku e mundu akí ofresé nos no ta di kompará ku e goso ku nos tin di sirbi Yehova aworakí i e speransa di biba pa semper bou di  e Reino. Nos amistat ku Yehova ta bal mas ku kualke kos ku nos mester sakrifiká. I nada no por hasi nos mas felis ku di por “agradá [Yehova] plenamente,” esta, den tur kos.—Kol. 1:10.

10-11. Kiko a pone ku Michael por a hasi kambionan grandi den su bida?

¹⁰ Algun di nos mester a hasi sakrifisio grandi pa por a haña Yehova su aprobashon. Tin di nos a bandoná karera prestigioso den e mundu. Otro a stòp di purba di bira riku òf di kore tras di plaka. Pero, algun di nos mester a kambia nos bida kompletamente ora nos a bin siña tokante Yehova. I ta esei ta loke Michael mester a hasi. E no a lanta den e bèrdat i fo’i hóben e tabata den karate. El a bisa: “Tabata masha importante pa mi tene mi kurpa den bon kondishon. Tin biaha mi tabata sinti ku niun hende no por hasi mi nada!” Pero, ora Michael a kuminsá studia Beibel, el a bin haña sa kon Yehova ta pensa tokante violensia. (Sal. 11:5) El a bisa tokante e pareha ku a studia kuné: “Nunka nan a bisa mi ku mi mester a stòp ku karate. Nan a djis sigui siña mi e bèrdatnan di Beibel.”

¹¹ Mas Michael a bin siña ken Yehova ta, mas el a stim’É. I algu ku ègt a yega na su kurason tabata e kompashon ku Yehova tabatin pa Su sirbidónan. Ku tempu Michael a bin realisá ku e mester tuma un desishon ku lo a kambia su bida hopi. El a bisa: “Mi tabata sa ku pa mi stòp ku karate lo tabata hopi duru. Pero, mi tabata sa tambe ku si mi hasi esei, lo mi hasi Yehova kontentu. I mi tabata konvensí ku kualke sakrifisio ku mi mester hasi pa sirbi Yehova lo ta bale la pena.” Michael a bin mira kon balioso e bèrdat ta, anto esei a motiv’é pa hasi kambionan grandi den su bida.—Sant. 1:25.

12-13. Kon e bèrdatnan di Beibel a kambia Mayli su bida?

¹² Pa resaltá e balor ku e bèrdat tin, Beibel ta kompar’é ku un lampi ku ta bria den skuridat. (Sal. 119:105; Efe. 5:8) Mayli di Azerbeidjan ta splika dikon e ta balorá e yudansa ku el a haña di Beibel. Su tata tabata mòslem i su mama tabata hudiu. El a bisa: “Aunke nunka m’a kuestioná si Dios ta eksistí, tòg tabatin un par di kos ku mi no tabata komprondé. Mi tabata puntra mi mes: ‘Dikon Dios a krea nos? Anto, dikon hende tin ku sufri henter nan bida pa despues bai kima den fièrnu pa semper?’ Dor ku hende tabata bisa ku tur kos ku pasa ta Dios su boluntat, mi tabata puntra mi mes tambe: ‘Dios ta esun ku ta kousa sufrimentu? Ta gusta e ta gusta mira nos sufri?’”

¹³ Mayli a sigui purba di buska kontesta pa su preguntanan. I ku tempu, el a kuminsá studia i a bira Testigu di Yehova. El a bisa: “E kontesta- i splikashonnan konvinsente ku m’a haña for di Beibel a kambia henter mi bida. M’a bira mas felis i m’a haña un pas.” Meskos ku Mayli nos tur ta alabá Yehova, “esun ku a yama [nos] for di skuridat na su lus maravioso.”—1 Ped. 2:9.

14. Kon nos por haña mas amor pa e bèrdat? (Wak tambe e kuadro “ Mas Komparashon.”)

¹⁴ Loke nos a trata te ku awor ta djis un par di komparashon ku ta mustra nos kon balioso e bèrdat ta. Sin duda, bo por pensa di mas. Lo ta bon pa durante bo estudio personal bo buska mas  komparashon ku ta mustra pakiko nos mester stima e bèrdat. Mas nos stima e bèrdat, mas nos lo buska manera pa demostrá e amor ei den nos bida.

15. Kon nos ta demostrá ku nos ta stima e bèrdat?

¹⁵ Un manera ku nos ta demostrá ku nos ta stima e bèrdat ta di regularmente studia Beibel i e publikashonnan ku ta basá riba dje. Klaru ku sin importá kuantu tempu nos tin den e bèrdat, semper nos tin mas kos di siña. E promé edishon di e revista akí a bisa: “E bèrdat ta manera un flor chikitu den e desierto di bida; e ta rondoná pa hopi mal yerba ku ta krese bira grandi i e ta kasi hoga den nan. Si bo ke hañ’é, bo mester ta alerta. . . . Si bo ke tiné, bo mester bùk pa kue. No keda kontentu ku djis ún flor di e bèrdat. . . . Sigui kue mas, sigui buska mas.” Ta bèrdat ku studia ta eksigí hopi esfuerso, pero e esfuerso ei ta bale la pena.

16. Ki método abo ta usa pa studia? (Proverbionan 2:4-6)

¹⁶ Mayoria di nos no gusta lesa ni studia.  Pero, Yehova ke pa nos sigui koba i sigui buska pa nos haña un mihó komprondementu di e bèrdat. (Lesa Proverbionan 2:4-6.) Ora nos hasi e esfuerso ei, semper nos lo tin benefisio. Un ruman hòmber ku yama Corey a bisa ku ora e lesa un versíkulo e ta purba di saka delaster un sous for di dje. El a bisa: “Mi ta lesa tur e notanan. Mi ta buska tur e tekstonan di referensia ku tin riba e versíkulo ei plùs mi ta hasi mas investigashon. E método akí ta yuda mi siña hopi kos.” Sea ku bo ta usa e método akí òf un otro, ora bo hinka tempu i esfuerso den studia bo ta demostrá ku bo ta stima e bèrdat.—Sal. 1:1-3.

17. Kiko ta nifiká biba e bèrdat? (Santiago 1:25)

¹⁷ Klaru ku djis studia e bèrdat no ta sufisiente. Nos tin ku hasi mas. Nos tin ku biba e bèrdat! Kiko esei ta nifiká? Esei ta nifiká ku nos tin ku pone na práktika e kosnan ku nos ta siña. Ta e ora ei so e bèrdat lo hasi nos realmente felis. (Lesa Santiago 1:25.) Pero kon nos por tin sigur ku nos ta biba e bèrdat? Un ruman a sugerí ku nos tin ku wak kiko ta e kosnan ku nos ta hasi bon i kiko nos tin ku mehorá. Apòstel Pablo a splik’é asin’akí: “Te asina leu ku nos a progresá, laga nos sigui kana na un manera ordená den e mesun kaminda akí.”—Flp. 3:16.

18. Dikon nos ta hasi nos esfuerso pa “sigui kana den e bèrdat”?

¹⁸ Djis pensa riba tur e kosnan bon ku ta sosodé ora nos hasi esfuerso pa “sigui kana den e bèrdat.” Ora nos sigui kana den e bèrdat, nos bida ta mehorá. I ademas di esei, nos ta hasi Yehova su kurason kontentu i nos ta hasi nos rumannan felis. (Pro. 27:11; 3 Huan 4) Sin duda, nos tur tin motibu pa stima e bèrdat i biba e bèrdat!