1. Den ki situashon Yosef a hañ’é, i kiko el a hasi?

 YOSEF a hañ’é ku un prueba difísil. Un muhé a bis’é: “Drumi ku mi.” E muhé ei tabata kasá di su doño, Potifar. Yosef a nenga di hasi di loke e muhé a bis’é. Kisas un hende lo puntra: ‘Dikon Yosef no a drumi kuné?’ Echo ta ku Potifar no tabat’ei. Ademas, Yosef tabata un katibu, i e muhé sigur por a hasi Yosef su bida imposibel si Yosef a rechas’é. Pero, Yosef a sigui rechasá e muhé tur e biahanan ku el a purba. Dikon? Yosef a bisa: “Kon anto mi por hasi e maldat grandi akí i peka kontra Dios?”—Gén. 39:7-12.

2. Kon Yosef por a sa ku adulterio ta un piká kontra Dios?

² Pero kon Yosef por a sa ku adulterio ta un “maldat grandi” den bista di Yehova? Ta bèrdat ku ta te un dos shen aña despues Lei di Moises a bisa: “No kometé adulterio.” (Éks. 20:14) Pero, loke Yosef tabata sa di Yehova tabata sufisiente p’e komprondé kon Yehova ta mira inmoralidat seksual. Por ehèmpel, e tabata sa ku Yehova su intenshon ta pa uni ún hòmber i ún muhé den matrimonio. I muy probablemente lo el a tende kon Yehova a intervení pa protehá onor di su bisawela Sara, ora ku na dos okashon un rei kier a drumi kuné. I ku Yehova a hasi algu meskos pa protehá Rebeka, kasá di Isak. (Gén. 2:24; 12:14-20; 20:2-7; 26:6-11) Ora Yosef a meditá riba e kosnan ei, el a bin komprondé kiko ta bon i kiko ta malu den bista di Dios. Debí ku e tabata stima Yehova,  el a stima Yehova su normanan hustu tambe. I e tabata determiná pa sigui nan.

3. Kiko nos lo trata den e artíkulo akí?

³ Kiko di abo? Bo stima loke ta hustu den bista di Dios? Sigur ku sí. Pero komo ku nos ta imperfekto, nos tin ku paga tinu pa loke mundu ta haña ku ta hustu no influensiá nos. (Isa. 5:20; Rom. 12:2) P’esei, laga nos wak kiko hustisia ta, i kon nos bida ta mehorá ora nos ta stima e hustisia ei. Djei, nos lo wak tres kos ku nos por hasi pa stima Yehova su normanan hustu asta mas.

4. Kiko hustisia no ta?

⁴ Ora Hesus tabata riba tera, el a skual e lidernan religioso. Dikon? Pasobra nan tabatin nan propio norma di hustisia. (Ekl. 7:16; Luk. 16:15) Awe hopi hende tambe tin nan mes norma di hustisia, esta, nan mes ta disidí kiko ta bon i kiko ta malu. Mayoria di biaha, nan ta pensa ku nan ta mas hustu ku otro hende òf nan ta kla pa kritiká òf husga. Yehova no gusta hende ku tin aktitut asina niun tiki. I loke nan ta hasi ei, no ta berdadero hustisia.

5. Segun Beibel, kiko hustisia ta? Duna algun ehèmpel.

⁵ Hustisia ta algu masha bunita. Ku poko palabra, e ta nifiká hasi loke ta bon den bista di Yehova Dios. E palabranan tradusí den Beibel komo “hustisia” ta duna e idea di biba di akuerdo ku e normanan di mas haltu ku tin: esnan di Yehova. Por ehèmpel, Yehova a bisa ku komersiantenan mester a usa un ‘peso hustu.’ (Deu. 25:15) P’esei, un kristian ku ke ta hustu den bista di Yehova lo ta onesto ora di hasi negoshi. Un hende ku ta stima loke ta hustu lo no gusta mira otro hende ser tratá na un manera inhustu. Anto pa “agradá [Yehova] plenamente,” semper lo e wak kiko Yehova ta pensa promé ku e tuma un desishon.—Kol. 1:10.

6. Dikon nos por konfia Yehova su normanan di bon i malu? (Isaías 55:8, 9)

⁶ Den Beibel nos ta lesa ku Yehova ta “e habitashon di hustisia,” esta, e berdadero fuente di hustisia. (Yer. 50:7) Komo Kreador, Yehova ta e úniko ku tin derecho di pone norma di kiko ta bon i kiko ta malu. Debí ku nos ta imperfekto, tin biaha ta difísil pa nos komprondé dikon Yehova ta bisa ku algu ta bon òf malu. Yehova ta perfekto i sa presis kiko ta bon i kiko ta malu. (Pro. 14:12; lesa Isaías 55:8, 9.) Nos ta trahá den Dios su imágen, p’esei nos por hasi loke ta korekto den su bista. (Gén. 1:27) Anto sin duda, nos gusta hasi esei. Nos stima Yehova asina tantu ku nos ke hasi nos esfuerso pa imit’é.—Efe. 5:1.

7. Splika dikon ta nesesario pa tin normanan establesí.

⁷ Ta bon pa nos biba segun Yehova su normanan di bon i malu. Dikon? Imaginá kiko lo pasa si kada banko pone su propio balor di plaka òf si kada kontratista stipulá pa su mes kiko ta midí di un meter. Esei sí lo ta un káos! Anto si personal médiko no tene nan mes na normanan spesífiko di kuido, pashènt por muri. Ta bisto, ku ora sigui normanan establesí, esei ta un protekshon. Di mes manera, Yehova su normanan di loke ta bon i malu ta protehá nos.

8. Ki bendishon ta spera hende ku ta stima hasi loke ta hustu?

 ⁸ Yehova ta bendishoná tur hende ku ta hasi esfuerso pa biba segun su normanan. El a primintí: “E hustunan lo heredá e tera, i lo biba den dje pa semper.” (Sal. 37:29) Djis imaginá kon uní, felis i na pas hende lo ta si nan tur ta sigui Yehova su normanan. Ta un bida asina Yehova ke pa bo tin! Pues, nos tin bon motibu pa stima loke ta bon den bista di Yehova. Pero, ban wak tres kos ku nos por hasi pa stima e hustisia ei mas.

9. Kiko por yuda nos stima loke ta bon den bista di Yehova?

⁹ Unu: Stima e Persona ku a pone e normanan ku bo ke sigui. Pa nos stima loke ta bon den bista di Yehova, nos tin ku stima Yehova mas. Mas nos stima Yehova, mas nos lo ke biba segun su normanan hustu. Pensa riba Adam ku Eva. Si nan a stima Yehova di bèrdat, hamas nan lo a desobedes’É.—Gén. 3:1-6, 16-19.

10. Kiko Abraham a hasi pa komprondé Yehova mihó?

¹⁰ Klaru ku nos niun no ke hasi e fout ku Adam ku Eva a hasi. Pa evitá esei, nos mester sigui hasi esfuerso pa siña konosé Yehova mihó, balorá su bunita kualidatnan i purba di komprondé su manera di pensa. Si nos hasi esei, nos amor pa Yehova lo krese mas. Wak Abraham. El a ègt stima Yehova. Asta ora tabata difísil p’e komprondé Yehova su desishon, e no a rebeldiá. Na lugá di esei, el a hasi esfuerso pa siña konosé Yehova mihó. Por ehèmpel, ora el a haña sa ku Yehova a disidí di destruí Sódoma i Gomora, el a bira preokupá ku “e Hues di henter mundu” lo a destruí e hustu huntu ku e malbado. Komo ku e no por a imaginá su mes esei, humildemente el a hasi Yehova un par di pregunta. I ku pasenshi Yehova a kontest’é. Na final di e kòmbersashon ei, Abraham a bin komprondé ku Yehova ta wak kurason di kada hende i ku nunka lo e kastigá hende inosente huntu ku e malbadonan.—Gén. 18:20-32.

11. Kon Abraham a demostrá ku e tabata stima i konfia Yehova?

¹¹ E kòmbersashon ku Abraham tabatin ku Yehova tokante Sódoma i Gomora sigur a yud’é masha hopi mes. Sin duda, el a haña mas amor i rèspèt pa Yehova. Añanan despues, Abraham a hañ’é ku un situashon ku lo a pone su konfiansa den Yehova na prueba. Yehova a pidié pa sakrifiká su yu stimá, Isak. Pero komo ku Abraham tabata konosé Yehova mihó, e biaha akí sí e no a hasi Yehova niun pregunta. El a hasi loke Yehova a pidié. Sinembargo, kisas su kurason tabata kibrá. Sin duda, lo el a pensa riba tur e kosnan ku el a siña tokante Yehova. E tabata sa ku Yehova nunka lo hasi algu inhustu òf kruel. Segun Apòstel Pablo, Abraham lo a rasoná i pensa ku Yehova por a resusitá Isak. (Heb. 11:17-19) Yehova a primintí ku Isak lo bira tata di un nashon. Anto te na e momento ei, Isak no tabatin ni ún yu. Debí ku Abraham a stima Yehova, el a konfia ku semper Yehova lo hasi loke ta korekto. Aunke loke Yehova a pidié tabata hopi difísil, su fe den Yehova a yud’é obedesé.—Gén. 22:1-12.

12. Kon nos por imitá Abraham? (Salmo 73:28)

 ¹² Kon nos por imitá Abraham? Wèl, nos mester sigui siña konosé Yehova mihó. Asina, nos amor pa Yehova lo krese i nos lo hala mas serka dje. (Lesa Salmo 73:28.) Ademas, nos lo entrená nos konsenshi pa pensa manera Yehova ta pensa. (Heb. 5:14) Anto ora un tentashon presentá, nos lo por resistié. Nos lo no ke ni pensa pa hasi algu ku lo kibra Yehova su kurason i daña nos amistat kuné. Pero kiko mas nos por hasi pa demostrá ku nos ta stima Yehova su normanan hustu?

13. Kon nos por sigui hustisia? (Proverbionan 15:9)

¹³ Dos: Hasi esfuerso tur dia pa stima Yehova su normanan hustu mas i mas. Si nos ke hasi un múskulo mas fuerte, nos tin ku hasi ehersisio tur dia. Meskos tambe, si nos ke haña mas amor pa Yehova su normanan hustu, nos tin ku hasi esfuerso. Esei ta algu ku nos tin ku hasi tur dia. Yehova ta rasonabel i nunka lo e spera mas di nos ku loke nos por hasi. (Sal. 103:14) El a sigurá nos ku “e ta stima esun ku ta sigui hustisia,” esta, esun ku ta hasi esfuerso pa hasi loke ta bon den bista di Dios. (Lesa Proverbionan 15:9.) Meskos ku nos ta hasi esfuerso pa logra un meta spiritual, asina tambe nos lo tin ku hasi esfuerso pa sigui stima Yehova su normanan hustu. Pero no ansha, ku pasenshi Yehova lo yuda bo sigui hasi progreso.—Sal. 84:5, 7.

14. Kiko e “harnas di hustisia” ta, i dikon nos tin mester di dje?

¹⁴ Ku masha amor Yehova ta kòrda nos ku si nos biba segun su normanan hustu, esei lo no ta pisá. (1 Huan 5:3) Al kontrario, nan ta protehá nos, i nos mester di esei tur dia. Bo ta kòrda ora Apòstel Pablo a papia tokante e armadura spiritual? (Efe. 6:14-18) Kua parti a protehá e kurason? E “harnas  di hustisia,” ku ta representá Yehova su normanan hustu. Meskos ku un harnas literal ta protehá un hende su kurason, asina tambe Yehova su normanan ta protehá e persona ku nos ta di paden. P’esei, sòru pa semper bo tin bo harnas di hustisia bistí.—Pro. 4:23.

15. Kiko ta nifiká bisti e harnas di hustisia?

¹⁵ Kiko ta nifiká bisti e harnas di hustisia? Esei ta nifiká tene kuenta ku Yehova su normanan den nos desishonnan di tur dia. Por ehèmpel, promé ku bo skohe kiko bo ta bai papia, ki músika bo ta bai skucha, ki bo ta bai wak riba Internet òf televishon i kiko bo ta bai lesa, puntra bo mes: ‘Kiko mi ta bai hinka den mi kurason? E ta algu ku Yehova lo gusta? Òf, e ta tira un lus positivo riba kosnan ku Yehova ta odia manera inmoralidat, violensia, golosidat i egoismo?’ (Flp. 4:8) Si nos desishonnan ta di akuerdo ku Yehova su boluntat, nos kurason lo ta protehá.

16-17. Kon Isaías 48:18 ta yuda nos mira ku nos por biba segun Yehova su normanan pa semper?

¹⁶ Bo a yega di puntra bo mes si aña aden, aña afó lo bo por biba segun Yehova su normanan hustu? Wèl, wak e komparashon ku Yehova a usa na Isaías 48:18. (Les’é.) Einan Yehova a primintí ku bo hustisia por bira “manera ola di laman.” Imaginá ku bo ta para na laman ta wak kon e olanan ta bin kantu un tras di otro. Akaso na e momento ei lo bo preokupá ku lo yega e dia ku e olanan lo stòp di bin kantu? Nò. Pasó, bo sa ku semper e olanan a bin kantu i lo sigui hasi esei.

¹⁷ Pero, kiko bo tin ku hasi pa bo hustisia ta manera ola di laman? Promé ku bo tuma un desishon, puntra bo mes: ‘Kiko Yehova ke pa mi hasi?’ Anto hasi esei! Sin importá kon difísil e desishon ei ta, bo Tata semper lo t’ei pa yuda bo sigui hasi loke ta korekto tur dia!—Isa. 40:29-31.

18. Dikon nos no mester husga otro hende a base di nos mes normanan?

¹⁸ Tres: Laga husgamentu den man di Yehova. Nos ta hasi hopi esfuerso pa biba segun Yehova su normanan hustu. Pero, nos tin ku tene kuidou pa nos no kuminsá husga otro hende ni pensa ku nos ta mas hustu ku nan. Ni tampoko nos lo no menospresiá otro hende, pasó nos no tin derecho di husga nan a base di nos mes normanan. Kòrda ku ta Yehova ta “e Hues di henter mundu.” (Gén. 18:25) E no a duna nos e trabou di husga. Hesus a bisa: “Stòp di husga, pa boso no ser husgá.”—Mat. 7:1. *

19. Kon Yosef a demostrá ku el a konfia Yehova su manera di husga?

¹⁹ Laga nos pensa atrobe riba Yosef. E no a husga otro hende, ni sikiera esnan ku a trat’é malu. Su rumannan a maltrat’é, bend’é komo katibu i a konvensé nan tata ku el a muri. Añanan despues, el a reuní ku nan. Awor ku e tabata un gobernante poderoso, e por a husga su rumannan ku man duru i tuma vengansa. Su rumannan tabatin miedu ku lo el a hasi esei, aunke ku tabata duel nan di kurason loke nan a hasi. Pero Yosef a bisa nan: “No tene miedu;  t’ami ta na lugá di Dios anto?” (Gén. 37:18-20, 27, 28, 31-35; 50:15-21) Yosef tabata humilde i a laga husgamentu den man di Yehova.

20-21. Kon nos por evitá di pensa ku nos ta mas hustu ku otronan?

²⁰ Meskos ku Yosef, laga husgamentu den man di Yehova. Nos no por lesa kurason. P’esei, nos no mester pensa ku nos sa pa ki motibu nos rumannan ta aktua sierto manera. Ta Yehova so por analisá, òf “pisa e motibunan.” (Pro. 16:2) E stima tur sorto di hende, sin importá nan background òf kultura. Anto e ta animá nos pa “habri [nos] kurason hanchu.” (2 Kor. 6:13) Pues, nos no mester husga nos rumannan mas bien stima nan.

²¹ Nos no ta husga hende ku no ta forma parti di e kongregashon tampoko. (1 Tim. 2:3, 4) Si un famia di nos no ta den e bèrdat, nos no mester husg’é bisando: “Ken! Esei? Nunka lo e bin den e bèrdat!” Esei lo ta arogante di nos parti. Te ainda Yehova ta duna “hende [na] tur kaminda” chèns pa arepentí. (Echo. 17:30) No lubidá esaki: ‘Pensa ku bo ta mas hustu ku otro hende ta un forma di inhustisia.’

22. Dikon bo ta determiná pa stima hustisia?

²² Ora nos stima Yehova su normanan hustu, nos lo ta felis i lo ta un bon ehèmpel pa otronan. Esei lo pone nan stima nos mas i stima Yehova tambe mas. Nunka nos no mester pèrdè “hamber i set pa hustisia.” (Mat. 5:6) Bo por ta konvensí ku Yehova ta mira kuantu esfuerso bo ta hasi tur dia pa sigui su normanan hustu, i esei ta hasié masha kontentu. Aunke e mundu akí dia pa dia ta senk mas den inhustisia, nos no mester pèrdè speransa. Kòrda ku semper Yehova ta “stima e hustunan.”—Sal. 146:8.