1. Dikon Hesus a pidi Yehova pa protehá su siguidónan?

 RIBA e anochi promé ku Hesus a muri, el a pidi su Tata algu spesífiko. El a pidi Yehova pa protehá su siguidónan. (Huan 17:15, 20) Klaru ku Yehova semper a kuida i protehá su pueblo. Pero, Hesus tabata sa ku Satanas lo a persiguí Su siguidónan severamente. I ta p’esei nan tabatin mester di Yehova su yudansa pa resistí e atakenan ei.

2. Segun Salmo 33:18-20, dikon nos no mester tin miedu di difikultat?

² Mundu di Satanas ta pone hopi preshon riba nos komo siguidónan di Kristu. Nos ta haña nos ku problema i difikultat ku ta desanimá nos i ku asta por pone nos lealtat na Yehova na prueba. Pero manera nos lo mira den e artíkulo akí, nos no tin nodi di tin miedu ni pèrdè kabes. E wowo di Yehova ta riba nos. Ku otro palabra, Yehova ta mira tur loke nos ta pasa aden i ta kla pa yuda nos. Laga nos wak e ehèmpel di Elías i Yòb ku ta mustra kon “wowo di SEÑOR ta riba esnan ku ta tem’é.”—Lesa Salmo 33:18-20.

3. Ki ora nos por sinti ku nos ta nos so?

³ Aunke nos tin hopi ruman den kongregashon, tòg de bes en kuando nos por sinti nos nos so. Por ehèmpel, komo hóben bo por sinti bo bo so ora ku bo mester para dilanti klas pa splika bo kreensianan òf ora bo bai un kongregashon nobo. Algun di nos por sinti nos tristu òf down anto kisas nos ta pensa ku ta nos so tin ku trata ku e sintimentunan ei. I kisas nos tin miedu di papia ku otro  hende tokante esei pasobra nos ta pensa ku nan lo no komprondé nos. Anto, tin biaha nos por asta sinti ku niun hende no ta wòri ku nos. Ora ku nos ta sinti nos nos so—sin importá e motibu—nos por sinti nos sin forsa, kibrá i anshá. Pero Yehova no ke pa nos sinti asina. Dikon nos por tin sigur di esei?

4. Dikon Profeta Elías a bisa: “Ami ta e úniko ku a skapa”?

⁴ Laga nos tuma por ehèmpel e hòmber fiel Elías. Ora Yézabèl a hura di mat’é, pa mas ku 40 dia Elías a hui pa su bida. (1 Rei. 19:1-9) Awor ku e tabata su so den un kueba, el a sklama na Yehova: “Ami ta e úniko [profeta] ku a skapa.” (1 Rei. 19:10) Pero, tabatin mas profeta den e pais. Abdías mes a logra skapa 100 profeta for di morto na man di Yézabèl. (1 Rei. 18:7, 13) Pero, dikon tòg Elías tabata sintié su so? Kisas el a pensa ku nan a mata tur e profetanan ku Abdías a skapa? Òf kisas ta pasobra niun hende no kier a sirbi Yehova apesar di tur loke a sosodé riba Seru Karmelo? Òf por ta el a kere ku niun hende no tabata sa den ki peliger e tabata òf ku niun hende no tabata wòri kuné? E relato no ta bisa nos presis kon Elías tabata sinti su mes, pero loke sí nos sa ta ku Yehova a komprondé dikon Elías tabata sintié su so i tabata sa presis kon pa yud’é.

5. Kon Yehova a yuda Elías komprondé ku e no ta su so?

⁵ Yehova a hasi hopi kos pa yuda Elías. Dos biaha Yehova a puntr’é: “Kiko bo ta hasi akinan, Elías?” (1 Rei. 19:9, 13) Hasiendo e pregunta ei, Yehova a duna Elías chèns pa deshogá su kurason. Tur dos biaha Yehova a skucha segun ku e tabata bisa kon e tabata sintié. Yehova a laga Elías mira ku e t’ei p’e i ku e ta un Dios poderoso. Tambe el a laga Elías sa ku ainda tabatin hopi israelita ku tabata leal na djE. (1 Rei. 19:11, 12, 18) Sin duda Elías a sintié hopi mas mihó despues ku el a  deshogá su mes na Yehova i a skucha loke Yehova tabatin di bis’é. Yehova a duna Elías vários asignashon importante. El a pidié pa ungi Házaèl komo rei di Siria, Yehú komo rei di Israel i Eliseo komo profeta. (1 Rei. 19:15, 16) E asignashonnan ei a yuda Elías focus riba kosnan positivo. Tambe Yehova a sòru pa Elías haña un amigu, Eliseo. Pero, kon Yehova lo yuda bo ora abo ta sinti bo bo so?

6. Kiko bo por bisa Yehova ora ku bo ta sinti bo bo so? (Salmo 62:8)

⁶ Yehova ta pidi bo pa papia kuné den orashon. E sa tur e problemanan ku bo ta pasa aden. E ta sigurá bo ku ki ora ku bo hasi orashon na dje, e ta skucha bo. (1 Tes. 5:17) E gusta skucha orashon di su sirbidónan. (Pro. 15:8) Kiko bo por bisa Yehova ora bo ta sinti bo bo so? Meskos ku Elías, deshogá bo kurason na Yehova. (Lesa Salmo 62:8.) Bis’é delaster un kos ku ta preokupá bo i kon bo ta sinti bo. Pidié yuda bo mira kiko bo tin ku hasi. Por ehèmpel, si bo ta un hóben i bo ta sinti bo bo so i tin miedu di prediká na skol, pidi Yehova duna bo kurashi i sabiduria pa splika bo kreensianan na e mihó manera. (Luk. 21:14, 15) Si bo ta sinti bo down òf deprimí, pidi Yehova yuda bo papia ku un ruman madurá i pa e ruman ei komprondé kon bo ta sinti bo. Deshogá bo kurason na Yehova, mira kon e ta kontestá bo orashonnan i aseptá yudansa di otronan. Anto e ora ei, lo bo sinti bo mas mihó.

7. Kiko bo ta siña for di e ehèmpel di Mauricio?

⁷ Yehova a duna nos tur asignashonnan hopi importante. Bo por tin sigur ku e ta mira i ta balorá tur loke bo ta hasi den kongregashon i den sirbishi. (Sal. 110:3) Ora ku nos ta okupá sirbiendo Yehova, esei lo yuda nos lucha kontra soledat. Kon asina? Wak e ehèmpel di un hóben ku yama Mauricio. * Djis despues ku el a batisá, un di su mihó amigunan a kuminsá bandoná e bèrdat. Mauricio a bisa: “Ora m’a mira kon tiki-tiki e tabata drif bai for di Yehova, esei a hasi mi hopi insigur. M’a kuminsá puntra mi mes si ami lo hasi meskos kuné i bandoná Yehova. M’a sinti mi mi so i a pensa ku niun hende no ta komprondé kon mi ta sinti mi.” Kiko a yuda Mauricio? El a bisa: “M’a kuminsá sali mas den sirbishi. Esei a yuda mi pensa mas riba otro hende i no riba loke ami tabata pasa aden. Mi no tabata sinti mi mi so ora mi tabata traha huntu ku e rumannan den sirbishi i esei a hasi mi felis.” Asta ora ku nos  no por prediká ku nos rumannan personalmente, nos por prediká ku nan via telefòn òf skirbi karta, i esei ta fortalesé nos hopi. Kiko mas a yuda Mauricio? El a agregá: “M’a kuminsá hasi mas den kongregashon. Mi tabata hasi mas esfuerso pa prepará i duna mi partinan bon. E partinan ei a yuda mi sinti ku mi ta balioso pa Yehova i pa mi rumannan.”

8. Kon nos pruebanan por laga nos sinti?

⁸ Nos ta biba den e último dianan i ta ferwagt ku nos lo haña nos ku hopi prueba. (2 Tim. 3:1) Aunke nos sa ku esei por sosodé, ora nos haña nos ku vários prueba, nan por kue nos fo’i base. Por ehèmpel, diripiente nos por haña nos ku problema ekonómiko, malesa grave òf pèrdida di un ser kerí den morto. Na momentonan asina nos por ta man na kabes, sin sa unda pa kue, foral si e pruebanan ei ta bini un tras di otro i na e mesun momento. Pero, nos mester kòrda ku Yehova sa tur loke nos ta pasa aden i e por yuda nos wanta kualke prueba ku kurashi.

9. Kiko Yòb a hañ’é kuné?

⁹ Wak kon Yehova a yuda Yòb. Den un periodo hopi kòrtiku, e hòmber fiel akí a hañ’é ku un sla tras di otro. Den un solo dia, el a haña sa ku el a pèrdè su bestianan, su kriánan i, pió ainda, su yunan. (Yòb 1:13-19) Poko tempu despues ora ku ainda e tabata den su ferdrit, el a haña un malesa doloroso ku tabata desfigur’é. (Yòb 2:7) Yòb su situashon tabata asina malu ku el a bisa: “Mi ta odia mi bida; mi no ke sigui biba.”—Yòb 7:16, NW.

10. Ki yudansa Yehova a duna Yòb pa wanta su pruebanan? (Wak plachi di portada.)

¹⁰ Yehova tabata atento na tur loke Yòb tabata pasa aden. Yehova tabata stima Yòb hopi i p’esei el a dun’é tur loke e tabatin mester pa por a keda fiel. Por ehèmpel, Yehova a kòrda Yòb ku E ta un Dios masha sabí i ku E ta stima tur su kriaturanan. El a papia di hopi bestia impreshonante. (Yòb 38:1, 2; 39:9, 13, 19, 27; 40:15; 41:1, 2) Yehova a usa Eliú pa konsolá Yòb. Eliú a kòrda Yòb ku Yehova semper ta rekompensá Su sirbidónan pa nan perseveransia. Pero Yehova a laga Eliú duna Yòb algun konseho tambe. Eliú a yuda Yòb pa stòp di pensa riba su mes so i pa realisá kon chikitu hende ta kompará ku Yehova, e Kreador di universo. (Yòb 37:14) Yehova a duna Yòb tambe un asignashon: hasi orashon pa su tres kompañeronan ku a peka. (Yòb 42:8-10) Kon Yehova por yuda nos ora nos ta pasa den prueba?

11. Kon Beibel ta konsolá nos ora nos haña nos ku prueba?

¹¹ Yehova no ta papia ku nos na e manera ku el a papia ku Yòb. E ta papia ku nos pa medio di Su Palabra, Beibel. (Rom. 15:4) Yehova ta konsolá nos dor di duna nos speransa pa futuro. Kon Beibel ta konsolá nos ora nos ta pasa den prueba? Yehova ta sigurá nos den Beibel ku no tin apsolutamente nada, ni sikiera prueba, ku por “separá nos for di [su] amor.” (Rom. 8:38, 39) Ademas, e ta garantisá nos ku e ta “serka di tur esnan ku ta sklama na dje” den orashon. (Sal. 145:18) E ta bisa ku si nos konfia den dje, nos por wanta kualke prueba  i sinti nos felis apesar di difikultat. (1 Kor. 10:13; Sant. 1:2, 12) Beibel ta yuda nos kòrda tambe ku kualke prueba ku nos ta haña nos kuné ta temporal i kòrtiku si nos kompará nan ku e bida eterno ku nos tin nos dilanti. (2 Kor. 4:16-18) Yehova ta primintí nos ku lo e destruí tur esnan ku ta kousa nos problemanan, esta, Satanas e Diabel i tur esnan ku ta imit’é. (Sal. 37:10) Abo a kuminsá siña for di kabes algun teksto ku lo yuda bo wanta e pruebanan ku lo bini den futuro?

12. Si nos ke risibí yudansa di Yehova su Palabra, kiko e ta ferwagt di nos?

¹² Yehova ta ferwagt pa tur dia nos saka tempu pa lesa, studia i meditá riba loke nos ta lesa for di Beibel. Anto ora nos pone na práktika loke nos ta siña, nos fe i nos amistat ku Yehova ta bira mas fuerte. Esei ta duna nos mas forsa pa wanta prueba. Si nos ta konfia den Beibel, Yehova lo duna nos su spiritu santu. Anto spiritu santu lo duna nos “e poder ku ta surpasá esun di hende” pa wanta kualke prueba.—2 Kor. 4:7-10.

13. Kon e kuminda spiritual ku e “esklabo fiel i prudente” ta duna nos por yuda nos wanta prueba?

¹³ Ku yudansa di Yehova, e “esklabo fiel i prudente” a produsí hopi artíkulo, vidio i músika ku ta yuda nos tin un fe mas fuerte i pa sigui ta alerta. (Mat. 24:45) Nos tin ku hasi bon uso di tur e kosnan ku Yehova ta duna nos. Un ruman muhé na Merka resientemente a bisa ku e ta masha gradisidu pa tur e kumindanan spiritual ku Yehova ta duna nos. El a bisa: “Mi tin 40 aña ta sirbi Yehova i durante tur e tempu ei, bes tras bes mi integridat a ser poné na prueba.” E ruman akí a hañ’é ku vários prueba severo. Su opa a muri den un aksidente kousá pa un shofùr fuma. Su mayornan a muri despues di un malesa hopi grave i dos biaha e mes a hañ’é ta lucha ku kanser. Kiko a yud’é wanta tur e kosnan ei? El a splika: “Yehova semper a kuida mi. Anto e kuminda spiritual ku e ta duna mi pa medio di e esklabo fiel i prudente a yuda mi wanta e pruebanan ei. P’esei mi por bisa meskos ku Yòb: ‘Te na mi morto lo mi no bandoná mi integridat.’”—Yòb 27:5.

14. Kon Yehova ta usa nos rumannan den tempunan difísil? (1 Tesalonisensenan 4:9)

 ¹⁴ Yehova ta train su pueblo pa stima i konsolá otro durante tempunan difísil. (2 Kor. 1:3, 4; lesa 1 Tesalonisensenan 4:9.) Meskos ku Eliú, nos rumannan ke yuda nos keda fiel ora nos ta pasando den difikultat. (Echo. 14:22) Por ehèmpel, ora Diane su esposo a hañ’é ku problema grave di salú, e kongregashon a hasi vários kos pa yuda nan keda fuerte spiritualmente. Diane a bisa: “No tabata niun tiki fásil. Pero, nos por a sinti kon Yehova tabata yuda nos masha tantu mes durante e lunanan difísil ei. E rumannan di nos kongregashon tabata yuda nos ku vários kos. Nan bishitanan, yamadanan di telefòn i brasanan a yuda nos perseverá. Komo ku mi no tabata stür, e rumannan tabata hasi sigur ku mi por a bai reunion i sali den sirbishi ora mi tabata por.” Sin duda nos ta sinti nos masha felis pasobra den kongregashon nos tin rumannan ku ta stima nos masha tantu mes.

15. Dikon nos por ta konvensí ku nos por wanta kualke prueba?

¹⁵ Di un manera òf otro, nos tur lo bai haña nos ku prueba. Pero manera nos a mira den a artíkulo akí, ora nos ta pasa den prueba, nos lo no ta nos so. Meskos ku un tata, Yehova semper ta atento na loke nos ta pasa aden. E ta banda di nos, ta skucha nos orashonnan i ta kla pa yuda nos. (Isa. 43:2) Nos por ta konvensí ku nos por wanta kualke prueba pasobra Yehova a duna nos tur loke nos tin mester pa perseverá: orashon, Beibel, hopi kuminda spiritual i nos rumannan stimá.

16. Kon nos por sigui haña Yehova su amor i kuido?

¹⁶ Nos ta gradisidu ku nos Tata den shelu ta kuida i protehá nos. Manera Salmo 33:21 ta bisa: “Nos kurason ta regosihá den dje.” Ora nos hasi bon uso di tur loke Yehova ta duna nos, nos ta mustra kon gradisidu nos ta. I si nos sigui hasi esfuerso pa obedes’é i hasi loke ta bon den su bista, lo e kuida i protehá nos pa semper!—1 Ped. 3:12.