▪ Den e artíkulo ei nos a siña ku eigenlijk tur persona, tantu hende komo angel, ta enbolbí den ún kuestion masha importante. Esei ta e santifikashon di Yehova su gran nòmber. Den e kuestion ei tin e asuntu di Yehova su soberania, esta, ku Yehova su manera di goberná ta mihó. I tambe e asuntu di si hende lo keda fiel na Dios òf nò.

Dikon awor nos ta bisa ku e kuestion prinsipal ta e santifikashon di Yehova su nòmber? Laga nos trata tres motibu.

Promé, Satanas a daña Yehova su nòmber, esta, Su reputashon. E pregunta ku Satanas a hasi Eva den hòfi na Éden a insinuá ku Yehova no ta generoso i ku Su restrikshonnan no ta rasonabel. Despues, Satanas a kontradisí loke Dios a bisa. Ku otro palabra, el a hasi mané Yehova ta un gañadó. Asina ei el a daña òf a kalumniá Yehova su nòmber i a bira “Diabel,” ku ta nifiká “kalumniadó.” (Huan 8:44) Eva a kere Satanas su mentiranan i p’esei el a desobedesé Yehova, mustrando asina ku e no ke Dios komo su gobernador. (Gén. 3:1-6) Te awe, Satanas ta sigui plama mentira tokante e klase di persona ku Yehova ta. Anto hende ku kere e mentiranan ei tin mas chèns di desobedesé Yehova. Pues, ta di komprondé ku pa Dios su sirbidónan, e kalumnia di Yehova su nòmber ta e inhustisia di marka mayó. E ta e motibu prinsipal pakiko tin asina tantu sufrimentu i maldat.

Di dos, pa benefisio di tur su kreashon, Yehova ke santifiká, esta, limpia su nòmber. Esei ta e kos di mas importante p’e. P’esei el a bisa: “Lo mi santifiká mi nòmber.” (Eze. 36:23) Den e orashon di Nos Tata, Hesus a bisa: “Bo nòmber sea santifiká.” Asina ei Hesus a indiká kiko mester ta e kos di mas importante den orashon di tur fiel sirbidó di Yehova. (Mat. 6:9) Den Beibel, bes tras bes nos ta mira kon importante ta pa duna gloria na Yehova su nòmber. At’akí un par di ehèmpel: “Duna Yehova e onor ku su nòmber meresé.” (1 Kró. 16:29; Sal. 96:8) “Ku kantika, alabá su nòmber glorioso.” (Sal. 66:2) “Lo mi onra bo nòmber pa semper.” (Sal. 86:12) Un di e poko biahanan ku Yehova mes a papia fo’i shelu tabata na e tèmpel di Herúsalèm. Hesus a pidié: “Tata, glorifiká bo nòmber.” Yehova a kontest’é: “Mi a glorifik’é, i lo mi bolbe glorifik’é.”—Huan 12:28. a

Di tres, Yehova su propósito semper lo ta mará na su nòmber, òf reputashon. Imaginá ku nos ta na fin di Reinado di Mil Aña di Kristu ora e prueba final a pasa kaba. Kiko hende i angel lo pensa tokante santifikashon di Yehova su nòmber? Pa haña sa esei, nos tin ku kòrda riba e dos asuntunan ku tambe ta inkluí den santifikashon di Yehova su nòmber.  Nan ta: si hende lo keda fiel na Dios òf nò i si Yehova su manera di goberná ta mihó. Akaso e tempu ei hende lo tin ku sigui proba ku nan por keda leal na Yehova? Nò. Nan ta perfekto, nan a pasa e prueba final i a risibí bida eterno kaba. Awor, tokante e di dos asuntu, akaso e tempu ei ainda lo tin persona ku ta duda ku Yehova su manera di goberná ta mihó? Nò. Pa e tempu ei, tur persona tantu den shelu komo riba tera lo aseptá Yehova su gobernashon. Pero, despues di tur esei, semper santifikashon di Yehova su nòmber lo ta e kos di mas importante?

Ta bèrdat ku pa e tempu ei Yehova su nòmber lo ta kompletamente santifiká, liber di tur kalumnia. Pero, Yehova su nòmber lo keda e kos di mas importante den bida di tur su sirbidónan. Dikon? Pasobra nan lo sigui mira Yehova hasi kosnan maravioso. Pensa riba esaki: Hesus humildemente lo duna tur gobernashon bèk na su Tata. Anto e ora ei, Yehova lo bira “tur kos pa tur hende.” (1 Kor. 15:28) Despues di esei, tur hende riba tera lo disfrutá di “e glorioso libertat di e yunan di Dios.” (Rom. 8:21) I e ora ei, Yehova lo kumpli kompletamente ku su propósito di uni su yunan riba tera i esnan den shelu den un solo famia.—Efe. 1:10.

Despues di tur e kosnan ei, kiko Yehova su famia den shelu i riba tera lo sinti? Nos lo sinti un deseo fuerte pa alabá Yehova su bunita nòmber. Bou di inspirashon, e salmista David a bisa: “Alabá sea Yehova Dios . . . Laga Dios su nòmber glorioso ser alabá pa semper.” (Sal. 72:18, 19) Pa tur eternidat, nos lo sigui haña mas i mas motibu nobo i fasinante pa hasi esei.

Bon mirá, Yehova su nòmber ta bisa nos ki tipo di persona e ta. E promé kos ku ta bini na nos mente ora nos pensa riba su nòmber ta su amor. (1 Huan 4:8) Semper nos lo kòrda ku ta debí na su amor el a krea nos, duna nos e reskate i a demostrá ku su manera di goberná semper ta mihó. I pa semper nos lo sigui mira kuantu Yehova ta stima nos. Pa tur eternidat nos lo sigui hala mas serka di nos Tata i sigui alabá su bunita nòmber.—Sal. 73:28.