1. Kiko lo yuda nos disfrutá di studia profesia di Beibel?

 UN HÓBEN ku yama Ben a bisa: “Mi gusta profesia.” Abo tambe gusta profesia? Òf bo ta haña ku profesia ta laf i muchu difísil pa komprondé? Kisas lo bo kambia di idea ora ku bo haña sa dikon Yehova a laga skirbi profesia den Beibel.

2. Kiko nos lo trata den e artíkulo akí?

² Den e artíkulo akí, nos lo trata dos kos. Promé, nos ta bai mira dikon nos mester studia profesianan di Beibel i despues nos lo trata kon nos por hasi esei. Anto pa yuda nos mira dikon ta importante pa komprondé profesia, nos lo analisá dos profesia for di e buki di Dánièl.

3. Kiko nos mester hasi si nos ke komprondé profesia di Beibel?

³ Pa nos por komprondé profesia di Beibel nos mester di yudansa. Por ehèmpel, imaginá ku abo i un amigu ta bai un lugá. Bo amigu konosé e lugá hopi bon pero abo nò. E sa presis unda boso ta i sa bon na unda tur kaminda ta hiba. Sin duda bo ta kontentu ku bo amigu ta huntu ku bo pa yuda bo! Yehova ta manera e amigu ei. E sa presis kiko ta bai pasa den futuro. Pues pa nos por komprondé profesia di Beibel bon, nos mester ta humilde i pidi Yehova yudansa.—Dán. 2:28; 2 Ped. 1:19, 20.

4. Dikon Yehova a laga skirbi profesianan den Beibel? (Yeremías 29:11) (Wak e plachi.)

⁴ Meskos ku kualke bon mayor, Yehova ke pa su yunan tin un futuro felis. (Lesa Yeremías 29:11.) Pero kontrali na mayornan humano, Yehova sí por bisa kiko lo pasa  den futuro i loke e bisa semper ta kumpli. Yehova a laga skirbi e profesianan den su Palabra pa asina nos por sa tokante susesonan importante promé ku nan sosodé. (Isa. 46:10) Profesianan di Beibel ta regalonan di nos Tata den shelu ku ta stima nos mashá. Pero, kon bo por tin sigur ku loke Beibel ta primintí lo kumpli di bèrdat?

5. Kiko un hóben por siña for di Max?

⁵ Na skol, mayoria di biaha nos hóbennan ta rondoná ku personanan ku tin masha tiki òf niun rèspèt pa Beibel. Tin biaha e kosnan ku nan ta bisa i hasi por pone un Testigu hóben duda den su kreensianan. Esei ta loke a pasa ku Max. El a bisa: “Tempu mi tabata bai skol, m’a kuminsá duda si loke mi mayornan tabata siña mi realmente ta e bèrdat i si Beibel di bèrdat tabata di Dios.” Kiko su mayornan a hasi? Max a konta: “Aunke nan tabata preokupá, nan a keda trankil.” Max su mayornan a usa Beibel pa kontestá su preguntanan. Pero Max mes tambe a hasi algu. El a bisa: “Riba mi mes m’a studia profesianan di Beibel i loke ku m’a siña m’a konta otro hóbennan den kongregashon.” Ku ki resultado? Max a bisa: “Despues di esei mi tabata konvensí ku Beibel realmente ta di Dios.”

6. Kiko bo tin ku hasi si bo tin duda, i dikon?

⁶ Si meskos ku Max, bo a kuminsá duda si loke Beibel ta bisa ta bèrdat, no sinti bo malu. Pero, bo no por sinta man krusá; bo tin ku hasi algu! Duda ta manera frus. Imaginá ku algu ku bo tin di balor a kuminsá frusa. Si bo no hasi nada, ku tempu lo bo pèrd’é. Pa kita e frus, esta, e duda ku bo por tin, lo ta bon pa bo hasi bo mes e siguiente pregunta: ‘Ègt mi ta kere ku loke Beibel ta bisa tokante futuro lo sosodé?’ Si bo no tin sigur, e ora ei bo tin ku studia e profesianan di Beibel ku ya a kumpli. Ban wak kon bo por hasi esei.

7. Kiko a yuda Dánièl studia profesia? (Dánièl 12:10) (Wak e plachi.)

⁷ Dánièl a pone un bon ehèmpel tokante kon pa studia profesia. Pa kuminsá, e tabatin e motivashon korekto. El a studia profesia pasobra e tabata ke sa e bèrdat. Ademas, e tabata humilde. E tabata sa ku Yehova lo yud’é komprondé e profesianan si e keda su amigu i obedes’é. (Dán. 2:27, 28; lesa Dánièl 12:10.) Dánièl a mustra ku e tabata humilde pasobra el a sigui konfia ku Yehova lo a yud’é. (Dán. 2:18) Es mas, Dánièl a hasi bon investigashon. El a buska kontesta p’e preguntanan ku e tabatin den e partinan di Beibel ku tabata disponibel den su tempu. (Yer. 25:11, 12; Dán. 9:2) Kon abo por hasi meskos kuné?

8. Dikon algun hende ta nenga di kere ku profesia di Beibel ta bèrdat, pero kiko nos tin ku hasi?

⁸ Analisá bo motivashon. Bo ke studia  profesia di Beibel pasobra realmente bo ke sa e bèrdat? Si ta asina, Yehova lo yuda bo. (Huan 4:23, 24; 14:16, 17) Pero, tin hende ta studia Beibel ku algu otro na mente. Nan ke purba di proba ku Beibel no ta di Dios. Nan ta pensa ku asina ei nan mes por disidí loke ta bon i malu i biba mané nan ke. Pues, nos mester tin e motivashon korekto pa studia profesia di Beibel. Anto pa hasi esei, tin un kualidat importante ku nos mester tin.

9. Ki kualidat nos mester pa komprondé profesia di Beibel? Splika.

⁹ Sea humilde. Yehova ta primintí ku lo e yuda hende humilde. (Sant. 4:6) Pues, si nos ke komprondé profesia di Beibel, nos mester ta humilde i pidi Yehova yudansa. I tambe, nos tin ku aseptá yudansa di e esklabo fiel i prudente ku Yehova ta usa pa duna nos kuminda n’e debido tempu. (Luk. 12:42) Yehova ta un Dios di òrdu i ta lógiko ku lo e usa ún kanal pa yuda nos komprondé e bèrdatnan den su Palabra.—1 Kor. 14:33; Efe. 4:4-6.

10. Kiko nos ta siña for di Esther?

¹⁰ Hasi bon investigashon. Kuminsá ku un profesia ku bo ta haña interesante. Esei ta loke un ruman ku yama Esther a hasi. E tabata interesá den e profesianan tokante e binida di Mesías. El a bisa: “Tempu mi tabatin 15 aña m’a kuminsá hasi investigashon pa konvensé mi mes ku a skirbi e profesianan ei promé ku Hesus a bini na tera.” Loke Esther a lesa tokante Ròlnan di Laman Morto a konvens’é. El a bisa: “Algun di nan a ser skirbí for di hopi promé ku Hesus a bini na tera. Mi no por a komprondé tur kos mesora, p’esei mi mester a lesa nan vários biaha pa mi por a komprondé.” Pero Esther ta kontentu ku el a hasi tur e esfuerso ei. Despues ku el a hasi bon investigashon tokante profesianan di Beibel, el a bisa: “Awor mi mes tin sigur ku tur loke tin den Beibel ta bèrdat!”

11. Dikon ta importante pa nos konvensé nos mes ku tur loke tin den Beibel ta bèrdat?

¹¹ Ora nos komprondé e profesianan di Beibel ku ya a kumpli, nos lo haña mas konfiansa den Yehova i den e guia ku e ta duna nos. Ademas, profesia di Beibel ta yuda nos focus riba nos bunita futuro. Ora nos studia nan nos por keda positivo asta si nos ta pasando den prueba. Ban analisá brevemente dos profesia di Dánièl ku ta kumpliendo aktualmente. Si nos komprondé nan bon, nan lo yuda nos tuma bon desishon den bida.

12. Kiko e pianan di “heru . . . mesklá ku klei moli” ta representá?

¹² Lesa Dánièl 2:41-43. Den e soño ku Dánièl a interpretá pa Rei Nabukodónosor, e pianan di e estatua ku e rei a mira tabata trahá di “heru . . . mesklá ku klei  moli.” Ora nos kompará e profesia ei ku otro profesia den e buki di Dánièl i Revelashon, nos ta komprondé ku e pianan ta representá Merka i Gran Bretaña. Nan ta traha huntu i ta e gobièrnunan di mas poderoso den nos tempu. Tokante e potensia mundial ei, Dánièl a bisa: “E reino lo ta fuerte i débil.” Dikon débil? Pasobra e pueblo, representá pa e klei moli, no ta laga e potensia mundial ei bira fuerte mané heru. b

13. Ki bèrdatnan importante nos ta siña for di e profesia akí?

¹³ Nos ta siña bèrdatnan importante for di e estatua ku Dánièl a deskribí, foral e pianan. Pa di promé, Potensia Mundial Angloamerikano a mustra ku e ta poderoso. Por ehèmpel, Merka i Gran Bretaña tabata entre e paisnan ku a gana Promé Guera Mundial i Segundo Guera Mundial. Pero ku tempu e potensia ei a kuminsá bira débil i kos lo a sigui asina debí ku e siudadanonan ta lanta kontra otro i kontra gobièrnu. Di dos, e potensia ei lo ta e último ku lo goberná promé ku Reino di Dios destruí tur gobièrnu humano. Aunke tin biaha algun pais ta oponé Potensia Mundial Angloamerikano, nan lo no remplas’é. Nos tin sigur di esei pasobra “e piedra,” ku ta simbolisá Reino di Dios, lo dal i garna e pianan, ku ta representá Potensia Mundial Angloamerikano.—Dán. 2:34, 35, 44, 45.

14. Dikon nos mester komprondé e profesia di e pianan di heru ku klei pa tuma bon desishon den bida?

¹⁴ Bo ta konvensí ku e profesia di e pianan di heru ku klei ta bèrdat? Si esei ta e kaso, lo e influensiá e manera ku bo ta hiba bo bida. Debí ku bo sa ku e mundu malbado akí lo ser destruí pronto, lo bo no bai traha mata kurpa pa bira riku ni pa haña mas kos material. (Luk. 12:16-21; 1 Huan 2:15-17) Tambe lo bo mira ku e trabou di prediká i di siña hende e bèrdat ta masha importante. (Mat. 6:33; 28:18-20) Despues di studia e profesia ei, hasi bo mes e siguiente pregunta: ‘E desishonnan ku mi ta tuma ta mustra ku mi ta konvensí ku pronto Reino di Dios lo destruí tur gobièrnu humano?’

15. Ken ta “e rei di nort” i “e rei di zùit” aworakí? (Dánièl 11:40)

¹⁵ Lesa Dánièl 11:40. Dánièl kapítulo 11 ta papia di dos rei, òf dos gobièrnu, ku ta lucha kontra otro pa poder. Ora nos kompará e profesia ei ku otro profesia den Beibel, nos ta komprondé ku awe “e rei di nort” ta Rusia i su aliadonan i ku “e rei di zùit” ta Potensia Mundial Angloamerikano. c

16. Kon “e rei di nort” ta trata e sirbidónan di Dios?

¹⁶ E sirbidónan di Dios ku ta biba den e paisnan ku ta bou di dominio di “e rei di nort” ta ser persiguí dor di e rei ei. Algun di nos rumannan ta ser batí i bentá den prizòn pa motibu di nan fe. Loke “e rei di nort” ta hasi no ta kibra nos rumannan. Mas bien nan fe den Yehova ta bira mas fuerte. Dikon nos ta bisa esei? Pasobra nan sa ku loke ta pasando ku nan ta kumplimentu di e profesia skirbí  den e buki di Dánièl. d (Dán. 11:41) Sa esei lo yuda nos fortalesé nos speransa i keda fiel na Yehova.

17. Ki retonan sirbidónan di Yehova ku ta biba den pais bou di dominio di “e rei di zùit” ta haña nan kuné awe?

¹⁷ Den pasado, “e rei di zùit” tambe a persiguí sirbidónan di Yehova. Por ehèmpel, durante e promé parti di siglo 20, hopi di nos rumannan a kai será i algun di nan yunan a ser saká for di skol debí ku nan a keda neutral. Pero awendia, e manera ku “e rei di zùit” ta pone nos lealtat na prueba, ta hopi mas sutil. Por ehèmpel, durante kampaña di elekshon, un kristian kisas por kuminsá simpatisá ku un partido polítiko òf un kandidato. Aunke ku lo e no bai vota, den su mente i kurason e ta spera ku un sierto partido gana elekshon. P’esei, pa nos ta kompletamente neutral, nos mester tene kuidou no solamente ku loke nos ta  hasi pero tambe ku loke nos ta pensa i haña!—Huan 15:18, 19; 18:36.

18. Kon nos mester sinti ora tin konflikto entre “e rei di nort” i “e rei di zùit”? (Wak e plachi.)

¹⁸ Hende ku no tin fe den profesianan di Beibel ta bira masha nèrvioso ora nan mira “e rei di zùit . . . den konflikto ku e rei di nort.” (Dán. 11:40) Tur dos tin sufisiente arma nuklear pa mata tur kos riba nos planeta. Pero nos sa ku Yehova lo no laga esei pasa. (Isa. 45:18) E konflikto entre “e rei di nort” i “e rei di zùit” mester fortalesé nos fe. E ta proba ku fin di e mundu akí ta hopi serka.

19. Kiko nos mester kòrda tokante profesianan di Beibel?

¹⁹ Nos no sa kon algun profesia di Beibel lo kumpli. Ni Dánièl mes no tabata komprondé nifikashon di tur kos ku el a skirbi. (Dán. 12:8, 9) Pero djis pasobra nos no sa kon un profesia lo kumpli, no ke men ku lo e no kumpli. Nos por tin sigur ku Yehova lo yuda nos komprondé loke ku nos mester sa, na e momento ku nos mester sa esei, meskos ku el a hasi den pasado.—Ámos 3:7.

20. Ki profesianan lo kumpli un bes akí, i kiko nos tin ku sigui hasi?

²⁰ Despues di e proklamashon di “pas i siguridat,” gobièrnunan lo ataká religion falsu i destruyé. (1 Tes. 5:3; Rev. 17:16, 17) Djei nan lo ataká sirbidónan di Yehova. (Eze. 38:18, 19) Anto e ora ei Armagedon lo kuminsá. (Rev. 16:14, 16) Nos por tin sigur ku e kosnan akí lo pasa un bes akí. Turesten, presta atenshon na profesia di Beibel i sigui yuda otronan hasi meskos. Anto asina ei nos ta sigui mustra gratitut na nos Tata den shelu ku stima nos.