1-2. (a) Kon Yehova ta sinti tokante un ruman ku ta kometé piká serio i no ke arepentí? (b) Kiko Yehova ta deseá?

 YEHOVA no ta tolerá piká. (Sal. 5:​4-6) E ta ferwagt pa nos obedesé su mandamentunan den Beibel. Klaru ku e sa ku nos ta imperfekto i ku nos no por obedes’é perfektamente. (Sal. 130:​3, 4) Apesar di esei, e no ta tolerá ‘hende malbado ku ta usa su bondat inmeresí komo èksküs pa kondukta sinbèrgwensa.’ (Hudas 4) De echo, Beibel ta bisa ku Yehova lo destruí “hende malbado” durante e guera di Armagedon.—2 Ped. 3:7; Rev. 16:16.

² Sinembargo, Yehova no ke pa niun hende ser destruí. Den e revista akí nos por a mira bon kla ku Yehova “ta deseá pa tur haña chèns di arepentí.” (2 Ped. 3:9) Meskos ku Yehova, ansianonan tin pasenshi ora nan ta purba di yuda un ruman yega na arepentimentu i drecha su amistat ku Yehova. Sa sosodé ku aunke ansianonan purba di yuda un ruman vários biaha, tòg e no ke kambia. (Isa. 6:9) Ki nan tin ku hasi e ora ei?

“SAKA E MALBADO”

 3. (a) Kiko Beibel ta bisa mester pasa ku un ruman ku no ke arepentí? (b) Dikon nos por bisa ku, den un sentido, e mes a skohe pa ser saká di kongregashon?

³ Si e ansianonan a hasi tur nan esfuerso, pero tòg e ruman  no ke arepentí, no ta keda nan nada otro ku sigui e instrukshon na 1 Korintionan 5:13: “Saka e malbado for di meimei di boso.” Den un sentido, e mes a skohe e resultado ei; e ta kosechando loke e mes a sembra. (Gal. 6:7) Dikon nos ta bisa esei? Pasó e no kier a kambia aunke e ansianonan a purba vários biaha di yud’é yega na arepentimentu. (2 Rei. 17:​12-15) Ku su akshonnan el a mustra ku e no ke obedesé Yehova su mandamentunan.—Deu. 30:​19, 20.

 4. Dikon ta anunsiá ku un hende no ta Testigu di Yehova mas?

⁴ Ora tin ku saka un ruman ku no a arepentí for di e kongregashon, lo hasi un anunsio na e kongregashon ku e no ta un Testigu di Yehova mas. a No ta hasi e anunsio ei pa humi’é, mas bien ta pa laga e kongregashon sa ku nan mester sigui loke Beibel ta bisa di “stòp di anda” kuné i pa “ni sikiera kome” kuné. (1 Kor. 5:​9-11) No ta pòrnada Yehova a duna e mandamentu ei. Apòstel Pablo a skirbi: “Un tiki zürdeg ta fermentá henter e mansa.” (1 Kor. 5:6) Si un ruman ku no arepentí keda den e kongregashon, otronan por sinti ku no tin pakiko di biba segun Yehova su normanan.—Pro. 13:20; 1 Kor. 15:33.

 5. Kon nos mester mira un sirbidó di Yehova ku a ser saká for di e kongregashon, i dikon?

⁵ Kon anto nos mester mira un sirbidó di Yehova ku a ser saká for di e kongregashon? Ta bèrdat ku nos lo no rekreá, pasa tempu ni sosialisá kuné. Pero esei no ke men ku no tin speransa p’e. Dikon? Pasó nos tin ku kòrda ku e ta un karné ku a dual for di e tou i e por bolbe atrobe. No lubidá ku e karné pèrdí ei a dediká su mes na Yehova. Ta djis ku na e momento akí e no ta biba segun su dedikashon i esei ta peligroso. (Eze. 18:31) Sinembargo, miéntras tin tempu i Yehova ke mustra miserikòrdia, nos ta spera ku e karné ei lo bolbe. Pues kon ansianonan por yud’é?

LOKE ANSIANONAN LO HASI

 6. Ora ku saka un ruman for di e kongregashon, kiko e ansianonan ta hasi?

⁶ Ora ku saka un ruman for di e kongregashon, kiko e ansianonan ta hasi? Akaso nan lo no wòri nan kabes mas kuné? Apsolutamente ku nò! Ora nan bis’é ku e no por sigui forma parti di e kongregashon, nan ta splik’é kiko presis e tin ku hasi pa bolbe serka Yehova. Pero no ta te ei e ansianonan ta yega. Den mayoria di kaso, nan ta bis’é tambe ku nan ke reuní kuné atrobe despues di un par di luna pa mira si su aktitut a kambia. Si despues dje par di luna ei, e aseptá pa reuní ku e ansianonan, ku kariño nan lo purba di yud’é yega na arepentimentu. Asta si na e momento ei ainda e no a arepentí, tempu tempu lo purba di reuní kuné atrobe.

 7. Kon ansianonan ta imitá Yehova su kompashon ora di yuda un karné ku a ser saká for di e kongregashon? (Yeremías 3:12)

⁷ Ansianonan ke hasi tur nan esfuerso pa imitá Yehova su kompashon. Por ehèmpel ora e israelitanan a peka, Yehova no a sinta warda pa nan arepentí anto e ora ei bai yuda nan. Na lugá di esei, el a manda su profetanan asta promé ku e israelitanan a mustra  señal di arepentimentu. Anto manera nos a mira den e di dos artíkulo dje revista akí, Yehova a bisa Oséas pa pordoná su esposa Gómer i tum’é bèk aunke ku Gómer ainda tabata hiba un bida di piká. Di e manera ei, Yehova a mustra su pueblo ku e tabatin masha kompashon. (Osé. 3:1; Mal. 3:7) Ansianonan ke imitá Yehova su kompashon. P’esei di kurason nan ke yuda un karné bolbe serka Yehova i nan lo no hasi difísil p’e hasi esaki.—Lesa Yeremías 3:12.

 8. Kon e relato di e yu pèrdí ta yuda nos komprondé Yehova su kompashon i miserikòrdia? (Lukas 15:7)

⁸ Bo ta kòrda kiko e tata di e yu pèrdí a hasi? Asina ku el a mira su yu ta bini, “e tata a kore bai serka dje, bras’é i sunch’e tiernamente.” (Luk. 15:20) Niun kaminda nos no ta lesa ku e tata a warda pa e yu bin pidié pordon. Mas bien, e tata ta esun ku a kore bai serka su yu pasó e stim’é. Ta asina Yehova ta sinti pa su sirbidónan ku a bandon’é. Ansianonan ke hasi tur nan esfuerso pa demostrá e mesun aktitut ei ku Yehova. Nan ke pa e karnénan pèrdí ei “bin kas bèk.” (Luk. 15:​22-24, 32) Ora un pekadó bolbe, tin goso tantu den shelu komo riba tera!—Lesa Lukas 15:7.

 9. Kiko Yehova ke pa su sirbidónan ku a kometé un piká serio i no a arepentí hasi?

⁹ Te asina leu, nos a komprondé ku Yehova no ta tolerá pa un ruman ku kometé un piká serio i no ke arepentí keda den e kongregashon. Pero, e no ta stòp di purba di yud’é. E ke p’e bolbe. Na Oséas 14:4 nos ta lesa kon Yehova ta sinti ora su sirbidónan arepentí. Aunke ku nan a bira infiel, el a bisa: “Lo mi kura nan. Di mi propio boluntat, lo mi stima nan, pasobra mi no ta rabiá mas ku nan.” Ku e sintimentunan ei di Yehova na mente, ansianonan ta atento na kualke señal ku ta indiká ku e karné a kuminsá arepentí. Pero e bunita palabranan na Oséas 14:4 tambe lo konvensé e karné ku a bandoná Yehova ku Yehova stim’é ketu bai i ke p’e bolbe.

10-11. Kon ansianonan lo purba di yuda e karnénan ku pa hopi aña no ta forma parti di e kongregashon?

¹⁰ Kon ansianonan lo purba di yuda e karnénan ku pa hopi aña no ta forma parti di e kongregashon? Kisas algun di nan pa hopi tempu kaba no ta praktiká e piká ku a pone ku mester a saka nan for di e kongregashon. Den algun kaso, podisé nan no ta kòrda mes ki nan a hasi. Loke sea e kaso, ansianonan lo purba di buska nan i bishitá nan. Durante e bishitanan ei, e ansianonan lo ofresé pa hasi orashon ku nan i ku kariño lo purba di animá nan pa bolbe na e kongregashon. Ta di komprondé ku si nan tin hopi aña pafó dje kongregashon, nan lo tin ku siña konosé Yehova i e bèrdatnan di Beibel di nobo. P’esei, si nan bisa ku nan ke bin bèk na e kongregashon, e ansianonan por hasi areglo pa un ruman studia Beibel ku nan, asta si ainda nan no a ser restorá. Den tur kaso, ansianonan ta esnan ku lo hasi areglo pa un estudio di Beibel.

¹¹ Ansianonan ta purba di imitá Yehova su amor pa hende. P’esei nan lo hasi tur nan esfuerso pa buska e karnénan ku a bandoná Yehova i animá nan pa bolbe serka dje. Asina ku un karné demostrá ku el a kambia su aktitut i kondukta, e por wòrdu restorá.—2 Kor. 2:​6-8.

12. (a) Den ki sirkunstansianan ansianonan mester paga bon tinu promé ku nan restorá un hende? (b) Dikon nos no mester pensa ku hende ku kometé sierto tipo di piká hamas i nunka por haña Yehova su miserikòrdia? (Wak e nota.)

 ¹² Tin algun sirkunstansia ku ansianonan mester paga bon tinu promé ku nan restorá un hende. Nan lo ke hasi sigur ku realmente el a arepentí foral si, por ehèmpel, el a abusá di mucha, tabata apóstata òf a plania pa sali for di su matrimonio dor di kisas kometé adulterio. (Mal. 2:14; 2 Tim. 3:6) Dikon nan lo ke hasi esei? Pasó nan mester protehá e tou. Pero na mes momento nos lo no ke lubidá ku si un pekadó arepentí  di kurason i a stòp ku su mal kondukta, Yehova lo asept’é bèk. Pues aunke tin algun sirkunstansia ku e ansianonan lo ke paga bon tinu si un hende realmente a arepentí, nan lo no bai asina leu di pensa ku hende ku kometé sierto tipo di piká hamas i nunka por haña Yehova su miserikòrdia. b—1 Ped. 2:10.

LOKE E KONGREGASHON POR HASI

13. (a) Kon nos ta trata un ruman ku a ser korigí? (b) Kon nos ta trata un hende ku a ser saká for di e kongregashon?

¹³ Manera nos a mira den e artíkulo anterior, tin biaha nos por tende un anunsio ku Ruman Tal i Tal a ser korigí. Den e kaso ei, nos por sigui asosiá kuné pasó nos sa ku el a arepentí i a stòp ku su mal kondukta. (1 Tim. 5:20) Ketu bai e ta forma parti di e kongregashon i mester di animashon di su rumannan pa sigui hasi loke ta korekto. (Heb. 10:​24, 25) Pero e kos ta diferente ora ku saka un ruman for di e kongregashon. Den e kaso ei, nos lo “stòp di anda” kuné i lo “ni sikiera kome ku un hende asina.”—1 Kor. 5:11.

14. Kon un kristian tin ku usa su konsenshi bíblikamente entrená pa disidí kon pa trata un hende ku a ser saká for di e kongregashon? (Wak e plachi.)

¹⁴ Akaso e instrukshon ku tin na 1 Korintionan 5:11 ke men ku nos mester ignorá un hende ku a ser saká for di e kongregashon kompletamente? Apsolutamente ku nò. Klaru ku nos lo no bai sosialisá kuné. Pero komo kristiannan, nos por usa nos konsenshi bíblikamente entrená pa disidí si nos lo invit’é pa reunion. Por ehèmpel, e por ta un famia yegá òf un persona ku tabata nos bon amigu di ántes. Awor, kon nos tin ku trat’é si e bini? Ántes nos lo no a kumind’é. Pero awor aki tambe kada kristian mester usa su konsenshi bíblikamente entrená pa disidí si e ta bai kumind’é òf nò. Kisas algun di nos lo opta di dun’é un  bon biní. Sinembargo, asta den e kaso ei nos lo no tin un kòmbersashon largu kuné ni sosialisá kuné.

15. Na ken 2 Huan 9-11 ta referí? (Wak e kuadro “ Ta di Mesun Piká Huan i Pablo Tabata Papia?”)

¹⁵ Algun ruman por puntra nan mes: ‘Pero warda, no ta Beibel mes ta bisa ku si mi kumindá un hende asina mi ta bira kómplise den su maldat?’ (Lesa 2 Huan 9-11.) Wèl, ora nos bai lesa e versíkulonan rònt di e teksto ei nos ta mira ku nan ta referí na apóstata i hende ku ta plama siñansa falsu i ku ta promové kondukta ku Beibel ta bisa ta robes. (Rev. 2:20) Ansianonan lo no bishitá un hende asina. Ta klaru ku nos sa ku lo e por bini na su sano huisio. Ma miéntras esei no pasa, nos lo no kumind’é ni invit’é bin reunion.

IMITÁ YEHOVA SU KOMPASHON I MISERIKÒRDIA

16-17. (a) Kiko Yehova ke pa esnan ku bandon’é hasi? (Ezekiel 18:32) (b) Kon ansianonan por traha huntu ku Yehova?

¹⁶ Den e revista akí nos a siña ku Yehova no ke destruí niun hende! (Lesa Ezekiel 18:32.) Mas bien e ke pa tur esnan ku a bandon’é rekonsiliá kuné; sí pa nan drecha nan amistat kuné. (2 Kor. 5:20) P’esei, atraves di historia, semper Yehova a roga su sirbidónan ku a bandon’é pa bolbe serka dje. Anto ansianonan den kongregashon ta traha huntu ku Yehova pa yuda nan yega na arepentimentu.—Rom. 2:4; 1 Kor. 3:9.

¹⁷ Tin hopi goso den shelu kada biaha ku un di Yehova su karnénan pèrdí bolbe serka dje. Pero esun ku tin mas tantu goso ta nos Tata den shelu, Yehova. Mas nos pensa riba su kompashon, miserikòrdia i bondat inmeresí, mas nos amor pa nos dushi Tata, Yehova, lo krese.—Luk. 1:78.