Apòstel Pablo a skirbi e rumannan na Tesalónika lo siguiente: “Si un hende no ta obedesé loke nos ta bisa den e karta akí, mark’é.” (2 Tes. 3:14) Ántes, nos tabata bisa ku e instrukshon ei tabata pa ansianonan. Si vários biaha a duna un ruman konseho basá riba Beibel i e no ta hasi kaso di esei, ansianonan por a duna un diskurso di spièrtamentu na e kongregashon. Djei, otro rumannan lo evitá di pasa tempu ku esun ku a ser marká, ku eksepshon di na reunion i den sirbishi.

Pero, awor nos ta komprondé ku e konseho ku Pablo a duna ta referí na un desishon ku kada ruman individual mester tuma debí na sierto sirkunstansia. Pues, ansianonan no mester duna un diskurso di spièrtamentu na e kongregashon. Dikon a bin ku e kambio? Laga nos analisá loke Pablo tabata papiando di dje ora el a duna e konseho ei.

Pablo a skirbi ku algun den e kongregashon tabata “hiba un bida desordená.” Nan no tabata hasi kaso di konsehonan basá riba Dios su Palabra. Durante un di Pablo su bishitanan el a duna e òrdu akí: “Si un hende no ke traha, no lag’é kome tampoko.” Apesar di esei, ketu bai tabatin un par di kristian ku no kier a traha aunke ku nan tabata por. Pero loke sí nan tabata hasi ta kana mete den loke no ta nan asuntu. Awor, kon e otro kristiannan mester a trata un kristian asina, esta, un kristian ku tabata hiba un bida desordená?—2 Tes. 3:​6, 10-12.

Pablo a bisa: “Mark’é.” E palabra griego ta duna e idea akí: tuma bon nota di dje. Pablo a duna e instrukshon ei na henter e kongregashon i no na e ansianonan so. (2 Tes. 1:1; 3:6) Pues, si un kristian ripará ku un otro ruman no ta hasi kaso di e konsehonan di Beibel, e kristian por skohe di “stòp di anda” ku esun ku ta hiba un bida desordená.

Akaso esei ke men ku mester trata e ruman meskos ku un hende ku a ser saká for di e kongregashon? Nò, pasobra Pablo a bisa: “Sigui konseh’é manera ruman.” Pues un kristian lo pasa tempu ku e ruman ei na reunion i den sirbishi, pero fuera di e okashonnan ei lo e no pasa tempu kuné. Dikon? Pablo a bisa: “Pa e haña bèrgwensa.” Ora stòp di rekreá ku e ruman ku ta hiba un bida desordená, esei por pone ku e ruman ei lo sinti bèrgwensa di su kondukta i kambia.—2 Tes. 3:​14, 15.

Pero kon nos por sa ki ora nos tin ku marka un ruman? Promé, nos mester sa sigur si loke e ta hasiendo ta kai bou di loke Pablo a deskribí komo “hiba un bida desordená.” Pablo no tabata papia di rumannan ku ta tuma desishonnan diferente for di nos den asuntunan di konsenshi òf smak personal. Tampoko e no tabata papia di rumannan ku a hùrt òf ofendé nos. Mas bien, Pablo tabata papia di rumannan ku a haña konseho bon kla for di Beibel pero tòg ta disidí di desobedesé e konsehonan ei.

Si nos ripará ku un ruman ta desobedesé konsehonan di Beibel, a nos lo tuma e desishon pa nos mes di no pasa tempu kuné fuera di reunion i sirbishi. Mirando ku esaki ta un desishon personal, nos lo no papia esei ku niun hende ku no ta nos famia Testigu ku ta biba den mesun kas huntu ku nos. Ora e ruman kambia su kondukta, nos lo bolbe pasa tempu kuné manera normal.