“MI TABATIN 15 aña dia mi a batisá, i seis luna despues mi a kuminsá traha pionero ousiliar. Despues di un aña, mi a apliká pa traha pionero regular. Ora mi a kaba skol sekundario, mi a puntra si mi por bai sirbi kaminda tabatin nesesidat di mas predikadó di Reino. E tempu ei mi tabata biba serka mi wela kende no tabata un Testigu di Yehova. Mi tabatin gana di bai for di dje i for di mi pueblo mes tambe. Ki tristu mi a keda ora e superintendente di sirkuito a bisa mi ku mi teritorio asigná lo ta den mi pueblo mes. Mi a purba di no lag’é sa kon mi tabata sinti. Kabes abou mi a kana bai pa mi pensa riba loke el a bisa mi. Mi a bisa mi kompañera di sirbishi: ‘Mi ta parse Yonas aworakí. Pero al final, Yonas á bai Nínive. Pues, ami tambe lo sirbi kaminda mi ta asigná.’

Mi ta trahando kuater aña kaba den mi pueblo komo pionero, i mi ta mira ku tabata sabí bèrdat pa a sigui e instrukshon ku mi a haña. Mi aktitut negativo tabata e problema prinsipal. Awor mi tin hopi goso. Den un luna, mi a dirigí 24 estudio di Beibel. Danki na Yehova, asta mi a kuminsá un estudio di Beibel ku mi wela ku un tempu tabata oponé mi.”

Un studiante di Beibel na Fidji mester a skohe entre asistí na un kongreso òf bai ku su esposo na un fiesta di hasimentu di aña di un famia. Su esposo tabata di akuerdo pa e asistí na e kongreso. E studiante a bisa su esposo ku despues di kongreso lo e djòin e. Pero ora el a regresá kas di kongreso, el a sinti ku tabata mihó p’e evitá di hinka su mes den un situashon ku por a pon’é daña su relashon ku Dios, i p’esei e no a bai mas.

Na e fiesta, su esposo a bisa su famia ku su esposa lo djòin nan despues ku e asistí na su “reunion di Testigu.” E famia a kontest’é: “E no ta bini. Testigunan di Yehova no ta selebrá hasimentu di aña!” *

Al final, e esposo tabata masha orguyoso di su esposa ku a para firme pa su kreensianan i a sigui su konsenshi. Mas despues, e bon ehèmpel akí a dun’é un oportunidat pa papia ku su esposo i tambe otro hende tokante e mensahe di Beibel. Ku ki resultado? E esposo a aseptá un estudio di Beibel i a kuminsá asistí na reunion ku su esposa.