1, 2. Dikon Testigunan di Yehova ta tene nan mes na normanan haltu di bisti? (Wak e promé plachi.)

UN KORANT hulandes a bisa lo siguiente tokante un reunion di lidernan di iglesia: “Bo ta mira yen di paña kasual, foral ora ta hasi kalor. Esei sí no ta e kaso na e kongreso di Testigunan di Yehova.  . . . Hende hòmber, grandi i chikitu, ta bisti bachi ku dashi, anto e largura di saya di e mucha muhénan i e hende muhénan . . . ta desente, i tòg no chapo.” Sí, hopi biaha hende ta elogiá Testigunan di Yehova pa nan bistí “digno di rèspèt, ku modestia i sano huisio, . . . manera ta pas pa hende . . . ku ta bisa ku nan ta deboto na Dios.” (1 Tim. 2:9, 10, nota) Aunke aki apòstel Pablo tabata papia di hende muhé, e mesun rekisitonan ei ta konta pa ruman hòmbernan tambe.

² E normanan haltu di bisti akí ta importante pa nos komo e pueblo di Yehova, i nan ta importante tambe pa e Dios ku nos ta adorá. (Gén. 3:21) No kabe duda ku loke e Skritura ta bisa tokante aparensia i manera di bisti ta mustra nos ku e Soberano di universo tin normanan haltu di bistimentu pa su sirbidónan. P’esei, loke nos ta skohe pa bisti no mester ta basá solamente riba loke nos ta gusta. Nos mester tene kuenta tambe ku loke ta agradá Yehova.

3. Ki lès tokante bistimentu nos por saka for di e Lei ku Dios a duna e israelitanan?

 ³ Por ehèmpel, den e Lei ku Dios a duna e israelitanan tabatin regla ku tabata protehá nan di e estilo di bida inmoral di e nashonnan rònt di nan. E Lei akí tabata mustra ku Yehova ta odia paña ku no ta hasi un distinshon bisto entre hòmber i muhé; loke awendia hende ta yama moda unisèks. (Lesa Deuteronomio 22:5.) For di e instrukshonnan ku Yehova a duna tokante bistimentu, nos ta mira bon kla ku Dios no ta kontentu ku e estilonan di bisti ku ta hasi hende hòmber parse hende muhé i hende muhé parse hende hòmber, ni paña ku ta pone ku bo no por distinguí un hòmber for di un muhé.

4. Kiko por yuda kristiannan tuma bon desishon tokante bistimentu?

⁴ E Palabra di Dios tin prinsipionan ku por yuda kristiannan tuma bon desishon tokante bistimentu, sin importá unda nan ta biba i tambe ki kultura òf klima nan lugá di biba tin. Nos no tin nodi di haña un lista detayá ku ta bisa kua manera di bisti ta aseptabel i kua nò. Mas bien, nos ta laga prinsipionan di e Skritura guia nos, i esakinan ta laga espasio pa gustu personal. Laga nos konsiderá algun prinsipio di Beibel ku por yuda nos determiná “kiko ta e boluntat di Dios, ku ta bon, agradabel i perfekto” ora di disidí kiko pa bisti.—Rom. 12:1, 2.

5, 6. Ki efekto nos manera di bisti mester tin riba otro hende?

⁵ Dios a inspirá apòstel Pablo pa enfatisá e prinsipio importante ku nos ta haña na 2 Korintionan 6:4. (Les’é.) Nos aparensia ta bisa hopi di nos. Hopi hende ta basa nan impreshon i opinion di nos riba “aparensia di pafó.” (1 Sam. 16:7) P’esei, komo sirbidónan di Dios, nos ta komprondé ku ora nos ta skohe kiko pa bisti, nos no ta bisti algu ku nos ta gusta djis pasobra e ta kómodo. E prinsipionan di e Palabra di Dios mester motivá nos pa evitá di bisti paña muchu pèrtá, eskotá òf provokativo. Esei ta inkluí kualke paña ku ta laga hende mira òf ku ta asentuá partinan privá di nos kurpa. Niun hende no mester sinti nan inkómodo òf fòrsá pa bira kara ora nan mira kon nos ta bistí.

⁶ Ora nos ta nèchi, limpi i na un manera modesto bistí i nos aparensia ta na òrdu, tin mas chèns ku hende lo respetá nos komo sirbidónan di e Señor Soberano Yehova. Anto nan por ser atraí na e Dios ku nos ta sirbi. Ademas, nos bistí apropiá lo duna un bon impreshon di e organisashon ku nos ta representá. Komo resultado, tin mas chèns ku hende lo skucha nos mensahe ku ta salba bida.

7, 8. Ki ora ta mas importante ainda pa bisti paña apropiá?

⁷ Nos manera di bisti tin un efekto riba nos Dios santu, nos rumannan spiritual i hende den teritorio. P’esei, nos mester bisti paña ku ta duna onor na Yehova i na e mensahe ku nos ta prediká. (Rom. 13:8-10) Esaki ta e kaso foral ora nos ta partisipá den aktividatnan kristian, manera ora nos ta asistí na reunion òf ora nos ta prediká. Nos mester bisti ‘manera ta pas pa hende ku ta bisa ku nan ta deboto na Dios.’ (1 Tim. 2:10) Klaru ku algun paña ku ta apropiá na un lugá kisas no ta apropiá na otro lugá. P’esei e sirbidónan di Yehova rònt  mundu ta tene kuenta ku kustumbernan lokal pa nan no ofendé niun hende.

⁸ Lesa 1 Korintionan 10:31. Ora nos ta asistí na asamblea i kongreso, nos bistí mester ta apropiá i modesto en bes di reflehá e estilo ekstremo ku ta komun den mundu. Asta na momento di check in òf check out na un hotèl i tambe den nos tempu liber promé i despues di kada seshon di kongreso, nos ke evitá kualke paña ku ta muchu kasual òf slòns. Pues nos lo ta orguyoso di por identifiká nos mes komo Testigunan di Yehova. Sí, nos lo sinti nos liber pa duna testimonio ora nos haña un oportunidat.

9, 10. Dikon Filipensenan 2:4 por yuda nos skohe ki paña nos mester bisti?

⁹ Lesa Filipensenan 2:4. Dikon nos komo kristian mester tene kuenta ku e efekto ku nos pañanan tin riba nos rumannan? Un motibu ta ku Dios su pueblo ta traha duru pa apliká loke Beibel ta bisa: “Mata e inklinashonnan di boso kurpa pa loke ta fornikashon, impuresa, pashon.” (Kol. 3:2, 5) Nos lo no ke stroba nos rumannan di kumpli ku e konseho ei. Algun ruman ku ántes tabata hiba un bida inmoral kisas ainda ta bringa kontra nan tendensianan pekaminoso. (1 Kor. 6:9, 10) Nos lo no ke hasi nan lucha mas difísil, no ta bèrdat?

¹⁰ Ora nos ta huntu ku nos rumannan spiritual, nos manera di bisti mester yuda hasi e kongregashon un refugio di puresa moral. Esei ta konta pa tantu ora nos ta na reunion komo ora nos ta partisipá den aktividatnan sosial. Nos tin e libertat pa skohe loke nos ke bisti. Apesar di esei, nos tur tin e responsabilidat  di bisti paña ku ta motivá otro hende pa keda moralmente limpi i mantené Dios su normanan di santidat den nan pensamentu-, palabranan i kondukta. (1 Ped. 1:15, 16) Amor berdadero “no ta komport’é indesentemente, e no ta buska su mes interes.”—1 Kor. 13:4, 5.

11, 12. Kiko nos tin ku tene kuenta kuné ora nos ta pensa riba kiko pa bisti?

¹¹ Ora sirbidónan di Dios tin ku disidí kiko pa bisti, nan ta tene kuenta ku “tin un tempu stipulá pa tur kos.” (Ekl. 3:1, 17) Ta komprendibel ku diferente klima, kambio di temporada, nos sirkunstansianan di bida ta influensiá loke nos ta bisti. Pero Yehova su normanan no ta kambia ku wer.—Mal. 3:6.

¹² Ora wer ta kayente, kisas ta poko mas difísil pa skohe paña ku ta respetuoso, modesto i ku ta mustra ku nos tin sano huisio. Sin duda, nos rumannan lo apresiá ora nos ta evitá di bisti paña ku ta asina pèrtá òf lòs ku e ta saka nos kurpa. (Yòb 31:1) Ademas, asta ora nos ta relahá na laman òf na un pisina, nos trahe di baño mester ta modesto. (Pro. 11:2, 20) Asta si hopi hende den mundu ta bisti trahe di baño provokativo, nos ku ta sirbi Yehova sí ke bisti na un manera ku ta duna onor na e Dios santu ku nos ta stima.

13. Dikon nos tin ku tene kuenta ku e konseho hañá na 1 Korintionan 10:32 i 33 ora di skohe kiko pa bisti?

¹³ Tin un otro prinsipio importante ku ta yuda nos ora di skohe paña apropiá: Nos mester tene kuenta ku konsenshi di otro hende, sea nan ta nos rumannan spiritual òf nò. (Lesa 1 Korintionan 10:32, 33.) Pues nos mester tuma masha na serio nos responsabilidat di evitá di bisti paña ku por ofendé otro hende. Pablo a skirbi: “Laga kada un di nos agradá su próhimo pa su bon i pa fortales’é.” Anto el a duna e motibu akí: “Pasobra ni Kristu no a agradá su mes.” (Rom. 15:2, 3) Sí, loke tabata importante pa Hesus ta hasi Dios su boluntat i yuda hende, en bes di wak kiko tabata mas kumbiniente p’e. Pa e motibu ei, nos lo evitá kualke paña òf aksesorio ku nos ta gusta pero ku por stroba hende di skucha nos mensahe.

14. Kon mayornan por entrená nan yunan pa glorifiká Dios ku nan manera di bisti?

¹⁴ Mayornan kristian tin e responsabilidat pa siña nan famia apliká prinsipionan di Beibel. Esaki ta inkluí ku nan ta hasi sigur ku tantu nan aparensia i manera di bisti komo esun di nan yunan ta modesto di manera ku nan por agradá Dios. (Pro. 22:6; 27:11) Mayornan mester pone un bon ehèmpel pa nan yunan i duna nan guia práktiko ku amor. Asina nan ta inkulká den nan yunan un rèspèt pa e Dios santu ku nan ta adorá. Ta bon tambe pa mayornan siña nan yunan unda i kon nan por haña paña apropiá pa bisti. Esaki ta nifiká no solamente loke nan ta gusta, sino tambe loke lo yuda nan kumpli ku nan privilegio di representá Yehova Dios.

15. Kiko mester guia nos ora di skohe paña?

¹⁵ Den e Palabra di Dios tin guia práktiko ku por yuda nos tuma desishon sabí ku ta trese gloria na Dios. Pero loke nos ta bisti ta dependé tambe di loke nos ta gusta i kuantu nos por afòrt. Ma nos paña semper mester ta na òrdu, limpi, modesto, apropiá pa kada okashon i segun kustumber lokal.

16. Dikon ta bale la pena hasi esfuerso pa bisti na un manera apropiá?

 ¹⁶ Nos mester atmití sí ku no ta semper fásil pa tuma desishon ku ta demostrá ku nos tin sano huisio, ku nos ta rasonabel i ku nos ta tene kuenta ku tur faktor. Hopi pakus ta ofresé paña ku ta promové sierto moda, pues por tuma mas tempu i esfuerso pa haña saya, shimis i blusa modesto òf flus i karson ku no ta muchu pèrtá. Ma nos rumannan sigur lo mira e resultado di nos esfuersonan sinsero pa haña paña nèchi ku ta apropiá i lo apresiá esei. Anto e satisfakshon ku nos ta haña ora nos duna gloria na nos kariñoso Tata selestial ta bal muchu mas ku kualke inkumbiniensia ku nos por haña nos kuné ora di bisti paña ku ta duna gloria na dje.

17. Ki faktornan un ruman tin ku tene kuenta kuné si e ke laga su barba krese?

¹⁷ Awor, kiko di rumannan ku ke laga nan barba krese? E Lei di Moises a rekerí pa hende hòmber laga nan barba krese. Sinembargo, kristiannan no ta bou di e Lei di Moises ni nan no tin ku ward’é. (Lev. 19:27; 21:5; Gal. 3:24, 25) Den algun kultura, si un ruman tin un barba nèchi kòrtá, esei lo ta aseptabel i kisas lo no kita atenshon for di e mensahe di Reino. De echo, algun ruman nombrá tin barba. Di otro banda, tin ruman ku no ta laga nan barba krese. (1 Kor. 8:9, 13; 10:32) Na otro lugá òf den otro kultura, hende hòmber no sa laga barba krese, i p’esei e no ta aseptabel pa kristiannan. De echo, si un ruman tin barba, kisas su aparensia por strob’é di ta ireprochabel i di duna gloria na Dios.—Rom. 15:1-3; 1 Tim. 3:2, 7.

18, 19. Kon Mikéas 6:8 ta yuda nos segun ku nos ta hasi esfuerso pa nos manera di bisti agradá Dios?

¹⁸ Ki kontentu nos ta ku Yehova no ta duna nos un lista detayá di regla tokante nos aparensia i manera di bisti. Mas bien, e ta laga nos usa nos boluntat liber, basando nos mes riba prinsipionan bíbliko, pa tuma bon desishon. Pues, asta ku nos aparensia i manera di bisti nos por mustra ku nos ta ‘kana ku modestia ku nos Dios.’—Mik. 6:8, NW.

¹⁹ Ku modestia nos ta hasi un evaluashon franko di nos mes pa wak si nos ta kumpli ku e normanan puru i santu di Yehova, ya ku nos ta dependé kompletamente di su guia. Ademas, modestia ta enserá ku nos ta mustra rèspèt pa e sintimentu- i opinionnan di otro hende. P’esei nos ta ‘kana ku modestia ku nos Dios’ ora nos ta biba segun su normanan elevá i ta mustra rèspèt pa konsenshi di otro hende.

20. Ki efekto nos aparensia i manera di bisti mester tin riba otro hende?

²⁰ Nos manera di bisti mester demostrá klaramente ku nos ta sirbidónan di Yehova. Tantu nos rumannan komo hende en general mester por mira ku nos ta representá nos Dios hustu. E tin normanan haltu, i gustosamente nos ta hasi esfuerso pa demostrá ku nos ta sigui nan. Rumannan ku ta bisti na un manera apropiá i ku tin bon kondukta ta atraé hende di kurason sinsero na e mensahe di Beibel ku ta salba bida, ta trese gloria na Yehova i ta hasié kontentu. E rumannan ei meresé elogio! Ora nos ta tuma desishon sabí enkuanto kiko pa bisti, nos ta sigui duna gloria na Esun ku ta bisti su mes “ku splendor i mahestat.”—Sal. 104:1, 2.