1, 2. (a) Ki reto mayornan ta haña nan kuné, i kiko por yuda nan enfrentá e reto ei? (b) Ki kuater punto nos lo konsiderá den e artíkulo akí?

“NOS ta kere den Yehova, pero esei no ke men ku nos yunan tambe lo bai kere den dje. Fe no ta algu ku hende ta heredá. Tiki tiki nos yunan ta kultiv’é.” Asina un pareha kasá na Fransia a bisa. Un ruman hòmber di Australia a skirbi: “E reto di mas grandi ku kisas bo por enfrentá ta di yuda bo yu kultivá fe. Bo mester probechá di tur informashon ku bo tin na bo alkanse. Podisé bo ta haña ku bo a kontestá pregunta di bo yu na un manera satisfaktorio. Pero despues e ta bolbe hasi e mesun pregunta. E kontestanan ku awe ta satisfasé bo yu kisas mañan lo no satisfasé su kuriosidat mas. Lo bo mester papia tokante e mesun temanan vários biaha.”

² Si bo ta un mayor, bo a yega di puntra bo mes si di bèrdat bo ta kapas pa siña bo yu i moldi’é pa e bira un hende ku tin fe? Eigenlijk, nos niun no por hasi esei riba nos mes. (Yer. 10:23) Pero nos por logra ora nos buska e guia di Dios. Ban analisá kuater kos ku por yuda bo stimulá bo yunan kultivá fe: (1) siña konosé nan bon, (2) siña nan di kurason, (3) usa ilustrashon efikas i (4) tene pasenshi i hasi orashon.

3. Kon mayornan por imitá e ehèmpel di Hesus ora di siña nan yunan?

³ Hesus no tabatin miedu di puntra su siguidónan kiko nan tabata kere aden. (Mat. 16:13-15) Imitá su ehèmpel. Ta bon pa bo animá bo yunan pa ekspresá nan mes ora boso ta den un ambiente relahá. Esei ta inkluí papia tokante kualke sintimentu di insiguridat, òf duda, ku nan por tin. Un ruman hòmber di 15 aña na Australia a skirbi: “Hopi biaha mi tata ta papia ku mi tokante mi fe i ta yuda mi rasoná. E sa puntra mi: ‘Kiko Beibel ta bisa?’ ‘Bo ta kere loke e ta bisa?’ ‘Dikon bo ta ker’é?’ E ke pa mi kontestá ku mi mes palabra i no djis ripití loke e òf mi mama bisa mi. Segun ku mi tabata krese, mi kontestanan mester a bira mas amplio.”

4. Dikon ta importante pa tuma bo yu su preguntanan na serio? Duna un ehèmpel.

⁴ Si bo yu tin duda den sierto siñansa, no reakshoná demasiado fuerte ni bira defensivo. Ku pasenshi, yud’é rasoná riba e asuntu. Un tata a bisa: “Tuma bo yu su preguntanan na serio. No pensa ku nan no ta importante, i no purba di keda sin papia riba un tema djis pasobra e por pone bo sinti bo inkómodo.” En realidat, ta bon pa bo mira e preguntanan sinsero di bo yu komo un indikashon ku e tin interes den e asuntu i ku e ke komprond’é. Hesus a hasi preguntanan di peso for di tempu e tabatin 12 aña. (Lesa Lukas 2:46.) Un hóben di 15 aña na Dinamarka a bisa: “Dia mi a bisa mi mayornan ku mi no tabatin sigur si nos tin e religion berdadero, nan a keda trankil, maske kisas nan lo por tabata preokupá pa mi. Nan a usa Beibel pa kontestá tur mi preguntanan.”

5. Asta si ta parse ku un yu tin fe den Dios, kiko mayornan por hasi?

⁵ Siña konosé bo yunan bon, esta, nan manera di pensa, nan sintimentunan i loke ta preokupá nan. Nunka asumí ku bo yu tin fe simplemente pasobra e ta bai reunion i sirbishi ku bo. Papia tokante kosnan spiritual ora bo ta hasi bo keasernan di tur dia. Hasi orashon ku bo yunan i pa nan. Purba di ta na haltura di kualke prueba di fe ku nan ta haña nan kuné, i yuda nan trata ku eseinan.

6. Ora mayornan inkulká e bèrdat den nan mes kurason, kon esei ta yuda nan pa ta bon maestro?

⁶ Komo un maestro, Hesus a yega na hende su kurason pasobra e tabata stima Yehova, Su Palabra i hende. (Luk. 24:32; Huan 7:46) Di mes manera, amor lo yuda mayornan yega na kurason di nan yunan. (Lesa Deuteronomio 6:5-8; Lukas 6:45.) Pues mayornan, sea diligente den studia Beibel i publikashonnan basá riba Beibel. Siña mas tokante kreashon i analisá artíkulonan den nos publikashonnan ku ta papia tokante e tópiko akí. (Mat. 6:26, 28) Ora bo ta studia, lo bo haña mas konosementu, mas apresio pa Yehova i lo bo ta mihó prepará pa siña bo yunan.—Luk. 6:40.

7, 8. Ora un mayor su kurason ta yen di bèrdatnan bíbliko, kiko lo ta e resultado? Duna un ehèmpel.

⁷ Ora bo kurason ta yen di bèrdatnan bíbliko, lo bo ta mas inkliná pa papia ku bo famia tokante nan. Hasi esaki tur ora, no solamente ora bo ta prepará pa reunion òf durante Adorashon Komo Famia. Ademas, e kòmbersashonnan akí no mester ta fòrsá, ma nan mester surgi den un forma natural i spontáneo, komo parti di bo kòmbersashonnan di tur dia. Un  pareha kasá na Merka ta papia di Yehova ora nan famia ta disfrutá di naturalesa òf di un plato delisioso. E mayornan a bisa: “Nos ta rekordá nos yunan di Yehova su amor i ku el a pensa adelantá tokante tur loke el a proveé pa nos.” Ora un pareha kasá na Suráfrika ta traha den kurá huntu ku nan dos yu muhénan, nan ta papia tokante kon maravioso ta ora simia ta sprùit i kon despues e ta krese bira un mata. E mayornan a bisa: “Nos ta purba di kultivá den nos yunan un rèspèt profundo pa bida i su diseñonan kompliká i maravioso.”

⁸ Tempu un tata na Australia su yu hòmber tabatin mas o ménos dies aña, el a probechá di e bishita ku nan a hasi na un museo pa yuda su yu fortalesé su fe den Dios i den kreashon. E tata a bisa: “Nos a mira un ekshibishon di kriatura di laman di antigwedat ku yama trilobiet i ammoniet. Tabata asombroso pa mira ku e bestianan akí ku a bai den ekstinshon tabata masha bunita, kompliká i perfekto, meskos ku bestia ku nos tin awe. Pues si un forma di bida simpel a evolushoná den un forma mas kompliká, dikon e kriaturanan antiguo akí tabata asina kompliká kaba? Esei tabata un lès ku a impreshoná mi mashá, i mi a konta mi yu esei.”

9. Dikon ta bon pa usa ilustrashon, i kon un mama a hasi bon uso di ilustrashon?

⁹ Hopi biaha Hesus a usa ilustrashon ku a pone hende pensa, yega na nan kurason i yuda nan keda kòrda e lès. (Mat. 13:34, 35) Mucha sa tin hopi imaginashon. Pues mayornan, purba di usa hopi ilustrashon ora boso ta siña boso yunan. Un mama na Hapon a hasi nèt esei. Tempu su dos yu hòmbernan tabatin ocho i dies aña, el a siña nan tokante e atmósfera di tera i kuantu interes Yehova tin den nos pa e manera ku el a kre’é. Pa e por a siña nan e lès ei, el a duna nan lechi, suku i kòfi i a pidi kada un pa traha un kòpi di kòfi p’e. E mama a bisa: “Nan a hasi nan bèst pa trah’é bon. Ora mi a puntra nan dikon nan a hasi asina tantu esfuerso, nan a bisa mi ku nan kier a trah’é nèt manera mi gust’é. Mi a splika nan ku asina tambe Dios a meskla e gasnan den nos atmósfera di tal manera ku nan ta nèt bon pa nos.” E ilustrashon ei tabata nèt bon pa nan edat ya ku el a yuda nan kapta e punto mihó ku djis un splikashon largu. Sin duda nan lo a keda kòrda e lès akí!

10, 11. (a) Ki ilustrashon bo por usa pa yuda bo yu kultivá fe den Dios? (Wak e promé plachi.) (b) Den bo kaso, ki ilustrashon a duna bon resultado?

¹⁰ Bo por asta usa un reseta pa yuda bo yu kultivá fe den Dios. Kon? Despues ku bo kaba di traha un bolo òf algun kuki, splika bo yu pakiko ta importante pa sigui e reseta. Kaba, duna bo yu un fruta, kisas un apel, i puntr’é: “Bo tabata sa ku e apel akí tambe a kuminsá ku un ‘reseta’?”  Anto kòrta e apel na dos i dun’é un simia. Splik’é ku e reseta ta “skirbí” den e simia, pero den un idioma muchu mas kompliká ku e palabranan den un buki di reseta. Anto bo por puntr’é: “Ta un hende a skirbi e reseta di e bolo, tòg? Pues e ora ei, ta ken a skirbi e reseta muchu mas kompliká di e apel?” Pa un yu ku ta poko mas grandi, bo por splik’é ku e reseta pa e apel, de echo, pa henter e palu di apel, ta parti di e kódigo den e DNA. Tambe abo ku bo yu por wak huntu algun di e potrètnan ku tin na página 10 pa 20 den nos foyeto El origen de la vida. Cinco cuestiones dignas de análisis..

¹¹ Hopi mayor ta gusta kòmbersá ku nan yunan tokante e sekshon “¿Casualidad o diseño?” den ¡Despertad! Òf nan ta usa e artíkulonan akí pa saka informashon pa siña nan yunan chikitu ideanan simpel. Por ehèmpel, un pareha kasá na Dinamarka a kompará avion ku para. Nan di: “Avion parse para. Pero avion por pone webu i haña avion chikitu? Para tin mester di un lugá spesial pa baha? Anto ki diferensia tin entre e zonido di avion i e kantamentu di para? Pues ken ta mas sabí, hende ku a traha avion òf e Kreador di para?” Ora bo rasoná di tal manera ku bo yu i hasié pregunta, bo por yud’é desaroyá su “kapasidat di pensa” i kultivá fe den Dios.—Pro. 2:10-12, NW.

12. Kon ilustrashon por yuda un yu kultivá fe den Beibel?

¹² Ademas, ilustrashonnan efikas por yuda bo yu fortalesé su fe den e eksaktitut di Beibel. Por ehèmpel, wak Yòb 26:7. (Les’é.) Kon bo por mustr’é ku ta Dios a inspirá hende pa skirbi e teksto akí? Kisas bo por simplemente dun’é yen di detaye. En bes di hasi esei, trata na stimulá bo yu su imaginashon. Kòrda bo yu ku Yòb a biba hopi tempu promé ku hende a inventá teleskop i nave espasial. Pidi bo yu pa e splika kon difísil lo ta pa un hende kere kon un opheto masha grandi, manera nos planeta, por kologá na nada. Kisas e por usa un bala òf piedra pa mustra ku un opheto pisá mester di algu pa want’é. E lès akí por yuda bo yu komprondé ku Yehova a laga skirbi detayenan den Beibel hopi tempu promé ku hende por a komprobá nan.—Neh. 9:6.

13, 14. Kon mayornan por yuda nan yunan mira e balor di prinsipionan bíbliko?

¹³ Ta masha importante pa inkulká den bo yunan e balor di prinsipionan bíbliko. (Lesa Salmo 1:1-3.) Tin hopi manera pa hasi esaki. Por ehèmpel, bo por puntra bo yu: “Imaginá ku bo ta bai biba riba un isla aislá i bo tin ku skohe algun hende pa biba einan huntu ku bo. Ki kualidatnan kada hende mester tin pa tur hende por biba na pas ku otro i sali bon ku otro?” Tambe bo por papia kuné tokante e konseho sabí ku tin na Galationan 5:19-23.

¹⁴ Esei por siña bo yu dos lès importante. Di promé, e normanan di Dios ta promové berdadero pas i union. Di dos, Yehova ta eduká nos for di aworakí pa prepará nos pa biba den e mundu nobo. (Isa. 54:13; Huan 17:3) Bo por skohe un eksperensia for di nos publikashonnan pa resaltá e puntonan akí, kisas unu for di e seri “Beibel Ta Kambia Bida di Hende” den E Toren di Vigilansia. Òf si tin un ruman di bo kongregashon ku a hasi kambionan grandi pa e agradá Yehova, bo por invit’é pa bini serka boso i pidié p’e konta su historia. E eksperensianan ei ta yuda bo yu mira e balor di prinsipionan bíbliko.—Heb. 4:12.

15. Kiko mester ta bo meta prinsipal ora bo ta siña bo yunan?

 ¹⁵ E punto ta: Ora bo ta siña bo yunan, no bira monótono. Purba di usa bo imaginashon. Yuda nan rasoná, i tene kuenta ku nan edat. Siña nan na un manera interesante i ku ta yuda nan fortalesé nan fe. Un tata a yega di bisa: “Nunka kansa di purba maneranan nobo pa splika un tópiko ku boso a yega di papia ariba kaba.”

16. Ora di siña bo yunan, dikon ta importante pa bo tene pasenshi? Duna ehèmpel.

¹⁶ Dios su spiritu por yuda bo yunan kultivá un fe fuerte. (Gal. 5:22, 23) Meskos ku fruta literal, ta tuma tempu pa fe krese. Pues, bo mester tene pasenshi i perseverá ora bo ta siña bo yunan. Un tata na Hapon ku tin dos yu a bisa: “Ami ku mi kasá a duna nos yunan hopi atenshon. For di tempu nan tabata hopi chikitu, tur dia mi tabata studia ku nan pa 15 minüt, eksepto riba dia di reunion. Diessinku minüt no tabata muchu pa nos ni pa nan.” Un superintendente di sirkuito a skirbi: “Tempu mi tabata tiner, mi tabatin hopi pregunta òf duda den mi pensamentunan, pero mi no tabata ekspresá nan tur. Segun ku tempu a pasa, mi a haña kontesta riba hopi di nan durante e reunionnan, Adorashon Komo Famia òf estudio personal. P’esei ta importante pa mayornan sigui siña nan yunan.”

17. Dikon e ehèmpel di mayornan ta importante, i kon un pareha kasá a pone un bon ehèmpel pa nan yu muhénan?

¹⁷ Klaru, algu ku ta masha importante ta bo ehèmpel di fe. Bo yunan ta opservá kiko bo ta hasi, i sigur esei lo tin un bon efekto riba nan. Pues komo mayor, sigui fortalesé bo propio fe. Laga bo yunan mira kon real Yehova ta pa bo. Ora tin algu ta preokupá un pareha kasá na Bermuda, nan ta hasi orashon huntu ku nan yunan pa Yehova guia nan, i nan ta animá nan yunan pa nan tambe hasi orashon riba nan mes. Nan a bisa: “Tambe nos ta bisa nos yu muhé di mas grandi pa e ‘konfia kompletamente den Yehova, keda okupá den sirbishi i no preokupá demasiado.’ Ora e mira e resultado, e sa ku Yehova ta yuda nos. Esaki ègt a fortalesé su fe den Dios i den Beibel.”

18. Kiko mayornan mester keda kòrda?

¹⁸ Klaru ku ta kada mucha mes mester kultivá su fe. Komo mayor, bo por planta i muha, pero ta Dios so por pon’é krese. (1 Kor. 3:6) Pues, pidi Yehova pa duna bo su spiritu, i hasi hopi esfuerso pa siña bo yunan presioso, pasobra asina bo ta duna Yehova bon motibu pa bendishoná bo.—Efe. 6:4.