MEIMEI di dékada di 1930, mi tata ku mi mama, James ku Jessie Sinclair, a muda bai Bronx, un bario den New York City. Ei, nan a sera konosí ku Willie Sneddon, kende meskos ku nan a bini for di Eskosia. Djis despues di un par di minüt ku nan a sera konosí ku otro, nan a kuminsá kòmbersá tokante nan famianan. Esei tabata algun aña promé ku mi a nase.

Mama a konta Willie ku poko promé ku e Guera Grandi (Promé Guera Mundial), su tata i ruman hòmber grandi a hoga den Laman Nort ora nan boto di piskadó a dal den un mina. Willie a bisa: “Bo tata ta den fièrnu!” Willie tabata un Testigu di Yehova, i di e manera poko agradabel ei, mi mama a sera konosí ku e bèrdat.

Mi mama no a gusta niun tiki loke Willie a bisa pasobra mama tabata sa ku su tata tabata un bon hòmber. Pero Willie a bisa: “Lo bo sinti bo mihó si mi bisa bo ku Hesus tambe a bai fièrnu?” Mama a kòrda riba e kredo di misa, ku originalmente tabata bisa ku Hesus a baha na fièrnu i a resusitá riba e di tres dia. Pues el a puntra su mes: ‘Si fièrnu ta un lugá di kandela kaminda mal hende ta ser tormentá, dikon Hesus a bai einan?’ Esei a lanta mi mama su interes den e bèrdat. El a kuminsá asistí na e reunionnan di Kongregashon Bronx i a batisá na 1940.

Na e tempu ei, mayornan kristian no tabata haña masha animashon pa studia Beibel ku nan yunan. Den mi infansia, mi tata tabata kuida mi ora mi mama tabata bai reunion i sali den sirbishi den wikènt. Despues di algun aña, ami ku mi tata a kuminsá bai reunion huntu ku mi mama. Mi mama tabata masha aktivo den prediká e bon notisia i tabata dirigí vários estudio di Beibel ku hende interesá. De echo, pa un tempu, el a studia Beibel ku algun di su studiantenan den grupo pasobra nan tabata biba basta serka di otro. Mi tabata bai sirbishi kuné durante fakansi di skol. Asina mi a siña hopi di Beibel i tambe kon pa siña otro hende loke Beibel ta bisa.

Ta duel mi pa bisa ku tempu mi tabata chikitu mi no a ègt balorá e bèrdat. Mi no tabatin muchu interes den dje. Sinembargo, ora mi tabatin mas o ménos 12 aña, mi  a bira un publikadó no batisá i djei padilanti, mi tabata traha regularmente den sirbishi. Ku 16 aña di edat, mi a dediká mi bida na Yehova i a batisá dia 24 di yüli 1954, na un kongreso na Toronto, Canada.

Algun ruman den nos kongregashon tabata miembro di e famia di Bètel òf a yega di traha na Bètel un tempu. Nan tabata un bon ehèmpel pa mi. Nan manera di duna diskurso i splika e bèrdatnan di Beibel a impreshoná mi mashá. Aunke mi dosentenan di skol tabata ke pa mi bai universidat, mi meta tabata pa bai Bètel. P’esei, na e kongreso na Toronto mi a yena mi aplikashon pa Bètel. Mi a bolbe hasi esei na 1955 na un kongreso na Stadion di Yankee na New York City. Poko despues, tempu mi tabatin 17 aña di edat, mi a haña invitashon pa kuminsá sirbi na Bètel di Brooklyn dia 19 di sèptèmber 1955. Riba mi di dos dia na Bètel, mi a kuminsá traha den e departamento di kaft buki ku tabata keda na 117 Adams Street. Poko despues mi a kuminsá traha ku un mashin ku tabata kue un sekshon di 32 página di buki huntu i pon’é kla pa un otro mashin kose e bukinan.

Despues di a traha mas o ménos un luna den e departamento di kaft buki, nan a manda mi na e Departamento di Revista pasobra mi por a taip. Na e tempu ei, e rumannan tabata taip adrès di hende ku a sera un abonamènt pa E Toren di Vigilansia i Spièrta! riba plachi chikitu di metal. Algun luna despues, mi a kuminsá traha na e Departamento di Manda Literatura. Klaus Jensen, e superintendente di e departamento, a puntra mi si mi tabata dispuesto pa kompañá e shofùr di e trùk ku tabata hiba kaha di literatura waf pa manda nan ku barku rònt mundu. Tambe tabatin sakunan di revista ku nos mester a hiba pòstkantor  pa manda nan pa e kongregashonnan rònt Merka. Ruman Jensen a bisa ku e ta kere ku e trabou físiko ei lo ta bon pa mi. Mi tabata masha flaku mes i tabata pisa apénas 57 kilo. E biahenan ei pa waf i pòstkantor a yuda mi bira fuerte físikamente. Ruman Jensen tabata sa kiko tabata bon pa mi.

E Departamento di Revista tabata atendé tambe ku e pedidonan di revista pa e kongregashonnan. Pues mi a siña di e idiomanan di e revistanan ku Bètel na Brooklyn tabata imprimí i manda pa otro partinan di mundu. Nunka mi no a tende di e idiomanan ei, pero mi tabata kontentu di sa ku míles di revista tabata bai regionnan hopi leu. E tempu ei, mi no por a imaginá mi ku, añanan despues, lo mi a haña e privilegio di bishitá hopi di e lugánan ei.

Na 1961, mi a haña asignashon pa traha den e Ofisina di Tesoreria bou di supervishon di Grant Suiter. Despues di un par di aña einan, nan a yama mi pa bai na e ofisina di Nathan Knorr, kende e tempu ei tabata dirigí nos obra mundial. El a bisa mi ku un ruman hòmber ku tabata traha den su departamento tabata bai asistí na e Skol di Ministerio di Reino pa un luna, i despues lo el a bai traha den e Departamento di Sirbishi. Mi a haña e asignashon pa remplasá e ruman ei i traha huntu ku Don Adams. Pa kasualidat, Don tabata e ruman ku a aseptá mi aplikashon di Bètel na e kongreso di 1955. Ademas, tabatin dos otro ruman hòmber ku tabata traha den e departamento ei kaba, Robert Wallen i Charles Molohan. Nos kuater a traha huntu pa mas ku 50 aña. Ta un goso pa traha ku rumannan spiritual i fiel asina!—Sal. 133:1.

Na komienso di aña 1970, mi a haña asignashon pa kada ún òf dos aña mi bishitá vários sukursal di Sosiedat Watch Tower pa  algun siman i hasi loke e tempu ei tabata konosí komo bishita di zona. Esaki a enserá bishitá e famia di Bètel i e misioneronan pa animá nan i kontrolá e dokumentonan di e diferente sukursalnan rònt mundu. Tabata un goso pa konosé rumannan ku a gradua di e promé klasnan di e Skol di Galaad i ku ainda tabata sirbi fielmente den nan asignashon den otro pais. Pa kumpli ku mi asignashon, mi a bishitá mas ku 90 pais, i mi a disfrutá mashá di e privilegio ei.

Tur miembro di e famia di Bètel na Brooklyn tabata asigná na kongregashonnan den e área di New York City. Ami a haña asignashon pa bai un kongregashon na Bronx. E promé kongregashon den e bario ei a krese i a splet. E kongregashon original a bin yama Kongregashon Upper Bronx, i einan ami tabata bai.

Meimei di dékada 1960, un famia Testigu di Letonia ku a haña e bèrdat den zùit di Bronx a muda bin biba den e teritorio di nos kongregashon. Livija, e yu muhé mayó, a bira pionero regular asina ku el a kaba skol sekundario. Algun luna despues, el a muda bai Massachusetts pa sirbi kaminda tabatin mester di mas predikadó di Reino. Mi tabata skirbié pa kont’é tokante nos kongregashon, i e tabata skirbi mi tokante kon dushi su sirbishi na Boston tabata.

Algun aña despues, Livija a haña asignashon pa bira pionero spesial. Komo ku e kier a hasi mas tantu posibel den sirbishi na Yehova, el a apliká pa Bètel i a haña invitashon pa bai na 1971. A parse manera Yehova kier a bisa mi algu. Nos a kasa dia 27 di òktober 1973 i tabatin e privilegio di tin Ruman Knorr pa duna nos diskurso di matrimonio. Proverbionan 18:22 ta bisa: “Esun ku haña un esposa ta haña algu bon, i ta risibí fabor for di SEÑOR.” Ami ku Livija tin mas ku 40 aña huntu den sirbishi na Bètel, i te awe nos ta apoyá un kongregashon den e mesun área di Bronx.

Tabata un plaser pa traha huntu ku Ruman Knorr. E tabata traha duru pa e bèrdat i tabatin masha apresio pa e misioneronan rònt mundu. Hopi di nan tabata e promé Testigunan den e paisnan na kua nan tabata asigná. Tabata masha tristu pa mira Ruman Knorr sufri di kanser na 1976. Un biaha, tempu ku e tabata na kama, el a pidi mi pa lesa p’e algun informashon ku tabata den proseso pa ser di prent. El a pidi mi yama Frederick Franz pa e tambe bin tende mi lesa. Despues mi a bin haña sa ku komo ku Ruman Franz su bista a bai atras, Ruman Knor pa basta tempu kaba a bin ta lesa e tipo di materialnan ei p’e.

Ruman Knorr a fayesé na 1977, pero pa e rumannan ku tabata konos’é i stim’é, tabata un konsuelo pa mira ku el a finalisá su bida riba tera fielmente. (Rev. 2:10) Despues di esei, Ruman Franz a kuminsá dirigí nos obra.

 Pa e tempu ei, mi tabata hasi trabou di sekretario pa Milton Henschel, kende a traha pa dékadanan largu ku Ruman Knorr. Ruman Henschel a bisa mi ku awor mi responsabilidat di mas importante na Bètel tabata pa yuda Ruman Franz den kualke manera ku e tabatin mester. Regularmente mi tabata lesa e publikashonnan p’e tende promé ku nan a ser di prent. Ruman Franz tabatin masha bon memoria i tabatin e abilidat remarkabel pa konsentrá kompletamente riba loke mi tabata lesa. Tabata un goso pa yud’é di e manera ei te ora ku el a finalisá su bida riba tera na desèmber 1992.

E 61 añanan ku mi a sirbi na Bètel a pasa masha lihé mes. Mi mayornan a keda fiel na Yehova te dia nan a fayesé. Mi ta anhelá pa duna nan un bon biní den un mundu muchu mas mihó. (Huan 5:28, 29) Nada ku e sistema bieu akí tin di ofresé no por ser kompará ku e privilegio spesial di traha huntu ku rumannan fiel pa sirbi nos hermandat mundial. Ami ku Livija di bèrdat por bisa ku atraves di tur nos añanan den sirbishi di tempu kompleto, ‘e goso di Yehova ta nos fortalesa.’—Neh. 8:10.

E trabou di kompartí e mensahe di Reino lo sigui pase loke pase, i e no ta dependé di niun hende den e organisashon di Yehova. Ta un goso i privilegio pa por a traha huntu ku hopi ruman fiel atraves di añanan. Mayoria di e rumannan ungí ku mi a traha kuné ya no ta riba tera mas. Pero mi ta masha gradisidu di por a traha estrechamente ku rumannan spiritual asina den sirbishi na Yehova.