1, 2. (a) Ki asignashon importante Sálomon a haña? (b) Dikon David tabata preokupá pa Sálomon?

SÁLOMON a haña instrukshon pa supervisá un di e proyektonan di mas importante di tur tempu, esta, konstrukshon di e tèmpel di Herúsalèm. E tèmpel lo mester tabata “sumamente magnífiko, famoso i glorioso den bista di tur e nashonnan.” Mas importante ainda, e tèmpel mester a bira “e kas di SEÑOR Dios.” Yehova a bisa ku Sálomon lo mester a dirigí e proyekto akí.—1 Kró. 22:1, 5, 9-11.

² Rei David tabatin konfiansa ku Yehova lo a apoyá Sálomon, pero Sálomon tabata “hóben i sin eksperensia.” Lo e tabatin e kurashi pa aseptá e proyekto pa konstruí e tèmpel? E echo ku e tabata yòn i sin eksperensia lo tabata un opstákulo p’e? Pa e por a logra esei, e mester a demostrá kurashi i aktua, òf pone man na obra.

3. Kiko Sálomon por a siña tokante kurashi for di su tata, David?

³ Kasi sigur Sálomon a siña hopi tokante kurashi di su propio tata. Tempu ku David tabata yòn, el a bringa kontra bestia salbahe ku a ataká e karnénan di su tata. (1 Sam. 17:34, 35) El a demostrá hopi kurashi ora el a konfrontá e gigante Goliat. Sí, ku yudansa di Dios i un piedra lizu, David a vense Goliat.—1 Sam. 17:45, 49, 50.

4. Dikon Sálomon tabatin mester di kurashi?

 ⁴ Pues, tabata masha importante anto ku despues David a animá Sálomon pa demostrá kurashi i konstruí e tèmpel! (Lesa 1 Krónikanan 28:20.) Si Sálomon no tabatin kurashi, miedu por a paralis’é, i si el a keda sin traha, esei lo tabata pió ku frakasá.

5. Dikon nos mester di kurashi?

⁵ Meskos ku Sálomon, nos mester di e yudansa di Yehova pa demostrá kurashi i pa kaba ku e trabou ku el a duna nos. Pa logra esei, nos lo analisá algun ehèmpel di sirbidónan di Dios di antigwedat ku a demostrá kurashi. I nos por pensa kon nos por demostrá kurashi i kumpli ku e trabou ku Yehova a duna nos.

6. Kiko ta impreshoná bo di e kurashi ku Yosef a demostrá?

⁶ Ban analisá e kurashi ku Yosef a demostrá ora ku e kasá di Potifar a tenta Yosef pa kometé inmoralidat seksual. Yosef mester tabata sa ku si e nenga, lo el a hañ’é ku konsekuensianan serio. Pero asta asina, en bes di entregá, el a demostrá kurashi i a dal paso desisivo.—Gén. 39:10, 12.

7. Splika kon Rahab a demostrá kurashi. (Wak e promé plachi.)

⁷ Un otro ehèmpel di un hende ku a demostrá kurashi tabata Rahab. Ora e spionnan israelita a bai na su kas na Yériko, e por a laga miedu poderá di dje i keda sin yuda nan. Pero ku konfiansa den Yehova, el a demostrá kurashi ora el a skonde e dos hòmbernan akí i a yuda nan skapa. (Hos. 2:4, 5, 9, 12-16) Rahab a aseptá ku Yehova ta e Dios berdadero, i el a konfia ku di un manera òf otro Yehova lo a duna e israelitanan e tera. E no a laga miedu di otro hende, ni di e rei di Yériko i su hòmbernan, paralis’é. En bes di esei, el a demostrá kurashi ku a yuda salba su mes i su famia.—Hos. 6:22, 23.

8. Kon e kurashi ku Hesus a demostrá a yuda e apòstelnan?

⁸ E fiel apòstelnan di Hesus tambe a pone un bon ehèmpel di kurashi. Nan a mira e kurashi ku Hesus a demostrá. (Mat. 8:28-32; Huan 2:13-17; 18:3-5) E ehèmpel ei a yuda nan kultivá kurashi. Ora e saduseonan tabata oponé e apòstelnan, nan no a stòp di siña hende tokante e nòmber di Hesus.—Echo. 5:17, 18, 27-29.

9. Kon 2 Timoteo 1:7 ta yuda nos haña sa ken realmente ta e fuente di kurashi?

⁹ Yosef, Rahab, Hesus i e apòstelnan tabata determiná pa hasi loke ta korekto. Nan tabatin kurashi pasobra nan a dependé kompletamente riba Yehova i no pasobra nan a konfia demasiado den nan mes. Nos tambe ta enfrentá sirkunstansianan kaminda nos lo tin ku demostrá kurashi. En bes di dependé riba nos mes, nos mester dependé riba Yehova. (Lesa 2 Timoteo 1:7.) Laga nos konsiderá dos área di nos bida kaminda nos mester tin kurashi: den nos famia i den kongregashon.

10. Dikon hóbennan kristian mester tin kurashi?

¹⁰ Hóbennan kristian ta enfrentá hopi situashon kaminda nan mester tin kurashi pa sirbi Yehova. Nan por siña for di e ehèmpel di Sálomon i sigui e manera ku el a demostrá kurashi ora e mester a tuma desishon sabí pa kaba ku e konstrukshon di e tèmpel. Aunke hóbennan kristian por i mester haña guia di nan mayornan, ta nan mes mester tuma desishon importante. (Pro. 27:11) Nan mester di kurashi pa nan por tuma desishon sabí tokante  bon asosiashon, dibertishon sano, kon pa keda moralmente limpi i boutismo. Nan tin mester di kurashi pasobra nan ta bai kontra e boluntat di Satanas, kende ta reprochá Dios.

11, 12. (a) Kon Moises a pone un bon ehèmpel ora el a demostrá kurashi? (b) Kon hóbennan por imitá e ehèmpel di Moises?

¹¹ Un desishon importante ku hóbennan mester tuma ta ki meta nan ta pone. Den algun pais, nan ta haña e preshon pa pone metanan ku ta enfoká riba enseñansa superior i un trabou ku ta paga bon. Den otro pais, kondishonnan ekonómiko por pone hóbennan sinti ku nan mester yuda proveé materialmente pa nan famia. Si bo haña bo mes den un di e situashonnan akí, wak e ehèmpel di Moises. Komo ku e yu muhé di fárao a lanta Moises, e por a pone meta pa haña prominensia òf bira riku. Moises lo mester a haña hopi preshon for di su famia egipsio, maestronan i konseheronan pa pone metanan asina. Pero, en bes di entregá, ku kurashi Moises a para firme pa adorashon puru. Unabes ku Moises a pone konfiansa den Yehova, el a laga tur e rikesa di Egipto atras. (Heb. 11:24-26) Moises a haña bendishon di Yehova, i sin duda lo e haña mas bendishon den futuro.

¹² Di mes manera, Yehova lo bendishoná hóbennan ku ta demostrá kurashi i ku ta traha pa pone metanan spiritual i interesnan di Reino promé den nan bida. Yehova lo yuda nan perkurá pa e nesesidatnan di nan famia. Den e promé siglo, e hóben Timoteo a enfoká riba metanan spiritual, i abo tambe por hasi meskos. *—Lesa Filipensenan 2:19-22.

13. Kon kurashi a yuda un ruman muhé alkansá su metanan?

¹³ Pa un ruman muhé di Alabama, Merka, por a pone metanan spiritual, e mester a kultivá kurashi. El a skirbi: “Tempu mi tabata yòn, mi tabata hopi tímido. Kasi mi no tabata papia ku e rumannan na Salòn di Reino, pió ainda yama na kas di hende deskonosí.” Ku yudansa di su mayornan i otro rumannan di su kongregashon, e ruman akí a logra su meta di bira pionero regular. El a bisa: “E mundu di Satanas ta mira siñansa avansá, fama, plaka i poseshon di hopi kos material komo bon metanan. Hopi biaha, e metanan ei no ta alkansabel i ta trese solamente strès i doló. Pues, ta mi sirbishi na Yehova a hasi mi felis i a laga mi sinti ku mi a logra algu.”

14. Den ki situashon asina un mayor kristian mester tin kurashi?

¹⁴ Mayornan kristian tambe mester tin kurashi. Por ehèmpel, kisas bo doño di trabou ta pidi bo regularmente pa traha overtaim i den wikènt. Pero esei ta e tempu ku bo a pone pa bo Adorashon Komo Famia, pa sirbishi di vèlt i pa bo asistí na reunion. Bo mester tin kurashi pa rechasá e ofertanan akí i pone un bon ehèmpel pa bo yunan. Òf tin biaha algun mayor di bo kongregashon ta laga nan yunan hasi sierto kosnan ku kisas abo no ke pa bo yu hasi. E mayornan ei kisas por puntra bo dikon bo no ta laga bo yu partisipá den aktividatnan asina. Lo bo tin kurashi pa splika ku takto e motibu pa bo desishon?

15. Kon Salmo 37:25 i Hebreonan 13:5 por yuda mayornan?

¹⁵ Nos ta demostrá kurashi ora nos yuda nos yunan pone metanan spiritual i kumpli ku nan. Por ehèmpel, kisas algun mayor ta duda pa animá nan yunan pa bira pionero, pa sirbi kaminda tin nesesidat pa mas predikadó di Reino, pa drenta sirbishi di Bètel òf pa yuda komo boluntario  ku proyektonan di konstrukshon. E mayornan por tin miedu ku nan yunan lo no por kuida nan ora nan bira grandi. Sinembargo, mayornan sabí ta demostrá kurashi i ta pone fe den e promesanan di Yehova. (Lesa Salmo 37:25; Hebreonan 13:5.) Un manera mas ku bo por demostrá kurashi i dependé riba Yehova ta ora bo yuda bo yu hasi meskos.—1 Sam. 1:27, 28; 2 Tim. 3:14, 15.

16. Kon algun mayor a yuda nan yunan pone metanan spiritual, i kon esaki a benefisiá e yunan?

¹⁶ Un pareha kasá na Merka a yuda nan yunan pone metanan spiritual. E esposo ta splika: “Promé ku nos yunan por a kana i papia, nos a papia ku nan tokante e goso di ta un pionero i di sirbi den kongregashon. Awor esaki ta nan meta. Ora nos yunan pone meta spiritual i logra nan, esei ta yuda nan resistí e preshon di e mundu di Satanas i ta yuda nan enfoká riba loke ta realmente importante, esta, un bon amistat ku Yehova.” Un ruman hòmber ku tin dos yu a skirbi: “Hopi mayor ta hasi masha esfuerso pa yuda nan yunan logra nan metanan den áreanan manera deporte, rekreashon i siñansa eskolar. No ta muchu mas mihó pa hasi esfuerso pa yuda nos yunan logra metanan ku por yuda nan mantené un bon relashon ku Yehova. Nos ta haña un gran satisfakshon, no solamente di wak nos yunan logra nan metanan spiritual, sino tambe di ta parti di nan proseso.” Bo por tin sigur ku Yehova lo bendishoná mayornan ku ta yuda nan yunan pone i logra nan metanan spiritual.

17. Duna ehèmpel di kon rumannan por demostrá kurashi den kongregashon.

¹⁷ Nos mester demostrá kurashi tambe den kongregashon. Por ehèmpel, ansianonan mester tin kurashi ora nan tin ku trata kasonan hudisial òf ora nan mester yuda rumannan ku tin un emergensia médiko debí na malesanan grave. Algun ansiano ta bishitá prizòn pa yuda prezunan den sentido spiritual. I kiko di ruman muhénan soltero? Awor tin mas oportunidat pa nan ekspandé nan sirbishi manera traha pionero, bai un área kaminda tin  mester di mas predikadó di Reino, traha den e programa di Diseño i Konstrukshon Lokal i apliká pa e Skol pa Predikadó di Reino. Algun asta por asistí na e Skol di Galaad.

18. Kon ruman muhénan di edat por demostrá kurashi?

¹⁸ Ruman muhénan di edat ta un bendishon pa e kongregashon. Nos ta stima e rumannan akí mashá! Algun di nan no por hasi mes tantu ku un tempu nan tabata hasi den e sirbishi di Yehova, pero ainda nan por demostrá kurashi i traha. (Lesa Tito 2:3-5.) Por ehèmpel, un ruman muhé di edat mester tin kurashi si un ansiano pidié papia ku un ruman muhé yòn tokante bistimentu modesto. E no tin nodi di skual e ruman muhé; mas bien, lo e por animá e ruman pa e konsiderá kon su bistimentu por influensiá otro hende. (1 Tim. 2:9, 10) E amor i interes di e ruman muhénan di edat por tin un resultado positivo den kongregashon.

19. (a) Kon ruman hòmbernan batisá por demostrá kurashi? (b) Kon Filipensenan 2:13 i 4:13 por yuda ruman hòmbernan kultivá kurashi?

¹⁹ Ruman hòmbernan batisá tambe mester demostrá kurashi i pone man na obra. Ruman hòmbernan ku ta dispuesto pa tuma mas responsabilidat den Yehova su organisashon ta un bendishon pa e kongregashon. (1 Tim. 3:1) Sinembargo, algun di nan por vasilá pa aseptá responsabilidat. Kisas un ruman hòmber a faya den pasado, i awor e ta sinti ku e no por ta un sirbidó ministerial òf ansiano. Òf un otro ruman por sinti ku e ta inkapas pa kumpli ku un asignashon. Si bo ta sinti bo asina, Yehova por yuda bo kultivá kurashi. (Lesa Filipensenan 2:13; 4:13.) Tene na mente ku na un dado momento Moises no a sintié kualifiká pa kumpli ku un asignashon. (Éks. 3:11) Pero Yehova a yud’é, i ku tempu el a kultivá kurashi pa e kumpli ku su trabou. Un ruman hòmber batisá por kultivá e mesun kurashi ku Moises tabatin si e buska yudansa di Dios den orashon i lesa Beibel tur dia. Ora e meditá riba relatonan kaminda sirbidónan di Dios a demostrá kurashi, esei tambe por yud’é. Humildemente e ruman hòmber por pidi un ansiano pa train e i hasi su mes disponibel pa yuda kaminda tin mester. Nos ta animá tur ruman hòmber batisá pa demostrá kurashi i traha duru pa e kongregashon!

20, 21. (a) Ki siguransa David a duna Sálomon? (b) Ki siguransa nos por tin?

²⁰ Rei David a kòrda Sálomon ku Yehova lo tabata kuné te ora e trabou di konstruí e tèmpel yega na su fin. (1 Kró. 28:20) Sálomon a graba e palabranan di su tata den su mente i kurason, i e no a laga e echo ku e tabata hóben i sin eksperensia bira un opstákulo p’e. El a demostrá hopi kurashi, a kuminsá traha, i ku yudansa di Yehova el a kaba e tèmpel magnífiko den shete aña i mei.

²¹ Meskos ku Yehova a yuda Sálomon, e por yuda nos pa nos demostrá kurashi i kumpli ku nos responsabilidatnan, tantu den nos famia komo den e kongregashon. (Isa. 41:10, 13) Ora nos demostrá kurashi den nos adorashon na Yehova, nos por tin sigur ku lo e bendishoná nos awor i den futuro. P’esei, tene kurashi i pone man na obra.