1. Deskribí un persona konfiabel.

 UN PERSONA konfiabel ta papia bèrdat i ta hasi esfuerso pa kumpli ku su promesanan. (Sal. 15:4) Hende sa ku nan por konta kuné. Nos tur ke pa nos rumannan mira nos komo un hende konfiabel. Pero, kiko por yuda nos gana nan konfiansa?

2. Kon nos por demostrá ku nos ta konfiabel?

² Bo no por obligá hende konfia bo; bo mester gana nan konfiansa. Konfiansa ta manera plaka: difísil pa haña, pero fásil pa pèrdè. Sin duda, Yehova a gana nos konfiansa. Semper nos por konfi’é pasobra ‘tur loke Dios hasi ta konfiabel.’ (Sal. 33:4) I e ta ferwagt pa nos tambe ta konfiabel. (Efe. 5:1) Laga nos wak ehèmpel di algun sirbidó di Yehova ku a imitá nan Tata selestial i a demostrá di ta konfiabel. Tambe nos lo papia di sinku kualidat ku lo yuda nos pa ta konfiabel.

3-4. Kon Profeta Daniel a demostrá ku e ta konfiabel, i kiko nos tin ku puntra nos mes?

³ Profeta Daniel tabata un ekselente ehèmpel di un hende konfiabel. Ora nan a hib’é koutiverio na Babilonia, el a demostrá di ta konfiabel. Su reputashon komo un hende konfiabel a krese ora Yehova a yud’é interpretá e soñonan di Rei Nabukodonosor. Un biaha, Daniel mester a bai bisa un mensahe ku niun rei lo no kier a skucha: Yehova no tabata kontentu ku Rei Nabukodonosor. Daniel  tabatin mester di kurashi pasobra Nabukodonosor tabata konosí pa ta un persona agresivo. (Dan. 2:12; 4:20-22, 25) Añanan despues, Daniel a proba un biaha mas ku e ta konfiabel. El a splika en detaye un mensahe misterioso ku a aparesé riba muraya den e palasio na Babilonia. (Dan. 5:5, 25-29) I mas despues, Darío di Media i su funshonarionan di alto rango tambe a ripará ku Daniel tabatin un “spiritu ekstraordinario.” Nan tur a rekonosé ku Daniel tabata un hòmber konfiabel “i den dje no por a haña negligensia ni korupshon.” (Dan. 6:3, 4) Sí, asta gobernantenan ku no tabata adorá Yehova a mira ku Daniel tabata konfiabel.

⁴ Pensando riba Daniel, ta bon pa bo puntra bo mes: ‘Kon otro hende ku no ta Testigu di Yehova ta mira mi? Nan ta konsiderá mi komo un persona konfiabel i ku ta kumpli ku mi responsabilidatnan?’ Ta masha importante pa nos hasi nos mes e preguntanan ei pasobra ora nos ta konfiabel nos ta onra Yehova.

5. Kiko a yuda Hananías pa ta un persona konfiabel?

⁵ Na 455 P.K., despues ku a rekonstruí e murayanan di Herúsalèm, Gobernador Nehemías a buska hòmbernan konfiabel pa kuida e stat. Un di nan tabata Hananías, komandante di Fòrti. Beibel ta bisa ku e tabata “un hòmber sumamente konfiabel [ku] tabatin masha rèspèt  pa e Dios berdadero.” (Neh. 7:2) Amor pa Yehova i temor pa desagrad’é a motivá Hananías pa tuma na serio kualke asignashon ku el a haña. E mesun kualidatnan akí lo yuda nos pa ta konfiabel den nos sirbishi na Yehova.

6. Kon Tikiko a demostrá Apòstel Pablo ku e tabata un amigu konfiabel?

⁶ Laga nos wak e ehèmpel di Tikiko, un ruman ku Apòstel Pablo tabata konfia. Ora Apòstel Pablo tabata bou di aresto na kas, e por a konta ku Tikiko. El a bisa ku e tabata un “fiel sirbidó.” (Efe. 6:21, 22) Pablo a pidi Tikiko pa hiba karta pa e rumannan na Efeso i Kolósas i pa animá i konsolá nan tambe. Pablo tabatin pleno konfiansa ku Tikiko lo a kumpli ku e tareanan ei. Tikiko ta laga nos pensa riba e hopi ruman hòmbernan fiel i konfiabel ku ta perkurá loke nos tin mester den sentido spiritual.—Kol. 4:7-9.

7. Kon ansiano i sirbidó ministerial den bo kongregashon ta demostrá ku nan ta konfiabel?

⁷ Awe nos ta masha kontentu ku nos tin ansiano i sirbidó ministerial konfiabel. Meskos ku Daniel, Hananías i Tikiko, nan ta tuma nan responsabilidatnan na serio. Por ehèmpel, ora nos bai reunion di den siman, nos tin sigur ku tur e partinan di e reunion a ser asigná. Ansianonan ta apresiá masha tantu ora e rumannan ku haña parti prepará bon i kumpli ku nan asignashon. Tambe ora nos invitá nos studiantenan p’e reunion di den wikènt, nos tin sigur ku tin un diskursante. I nos ta konfia ku nos lo tin tur e publikashonnan ku nos tin mester pa prediká. Sin duda, e rumannan fiel ei ta perkurá bon pa nos, i nos ta gradisí Yehova pa esei. Pero, kiko kada un di nos por hasi pa demostrá ku nos ta konfiabel?

8. Kiko nos tin ku tene kuenta kuné ora nos ta mustra interes den otro hende? (Proverbionan 11:13)

⁸ Nos stima nos rumannan i ta di komprondé ku nos ta preokupá pa nan. Pero, nos mester tene kuidou pa nos no mete den nan bida. Den e kongregashon kristian di promé siglo tabatin algun hende ku tabata “kana hasi redu i . . . mete den asuntu di otro hende, papiando di kosnan ku nan no mester papia.” (1 Tim. 5:13) Niun di nos no ke ta asina. Laga nos bisa ku un hende a konta nos algu personal i ta pidi nos pa tene e asuntu pa nos mes. Por ehèmpel, kisas un ruman muhé ta konta bo ku e tin problema ku salú òf ku e ta pasando den un prueba i ta pidi bo pa no konta otro hende. Bo mester respetá su deseo. b (Lesa Proverbionan 11:13.) Laga nos wak algun otro situashon den kua ta importante pa nos tene un asuntu konfidensial.

9. Kon tur hende den e famia por demostrá ku nan ta konfiabel?

⁹ Den nos famia. Algun asuntu di famia mester keda den famia. Por ehèmpel, kisas un esposo ta haña un mania ku su kasá tin masha prèt. Pero, lo e bai konta otro hende tokante esei? Klaru ku nò! E stima su kasá i nunka lo e ke lag’é pasa bèrgwensa. (Efe. 5:33) Mayornan mester  kòrda ku nan yu tiner ke pa nan trat’é ku rèspèt. Mayornan lo evitá di humiá nan yu dor di konta otro hende tokante e erornan ku nan yu ta hasi. (Kol. 3:21) I nan mester siña nan yunan mas chikitu tambe pa ta diskreto i pa no konta kosnan ku por pone kara di un hende den e famia na bèrgwensa. (Deu. 5:16) Ora tur hende den e famia ta hasi nan parti pa no konta sierto informashon di kas na otro hende, e famia lo bira mas uní.

10. Kon nos por ta un berdadero amigu? (Proverbionan 17:17)

¹⁰ Den nos amistat. Tardi òf trempan, tur hende ta sinti e nesesidat di deshogá nan mes ku un bon amigu. Tin biaha esei no ta fásil. Kisas nos no tin kustumber di konta otro hende nos sintimentunan. Si nos hasi esei anto despues haña sa ku loke nos a konta un amigu ta riba kaya, nos lo sinti nos hopi malu i kibrá. Di otro un banda, nos ta apresiá mashá si nos tin un amigu ku por tene kos konfidensial. Esei ta ‘un berdadero amigu.’—Lesa Proverbionan 17:17.

11. (a) Kon un ansiano i su kasá por demostrá ku nan ta konfiabel? (b) Kiko nos ta siña di un ansiano ku a trata un asuntu konfidensial i mas despues ta huntu ku su famia? (Wak e plachi.)

¹¹ Den nos kongregashon. Ansiano ku ta tene asuntunan konfidensial “ta manera un refugio kontra bientu, i un protekshon” pa nan rumannan. (Isa. 32:2) Nos sa ku nos por papia habrí ku nan sin tin miedu ku nan lo konta otro hende. Di otro un banda, nos no ta preshoná nan pa konta nos kosnan konfidensial. Ademas, nos ta balorá ora kasá di un ansiano no ta purba di piska informashon konfidensial for di su esposo. Eigenlijk, ta pa su mes benefisio su esposo no ta kont’é asuntunan personal di e rumannan. Kasá di un ansiano a bisa: “Mi ta kontentu ku mi esposo no ta konta mi nada di e rumannan ku e ta bai pastoriá òf di esnan  ku tin mester di yudansa spiritual. E no ta menshoná ni nan nòmber. Mi ta gradisidu ku e no ta pone karga riba mi bisando mi kosnan ku mi no por hasi nada tokante dje. Debí na esei, mi por papia trankil ku mi rumannan. Anto mi sa ku ora mi konta mi esposo kon mi ta sinti mi òf kont’é tokante un problema, lo e no bai konta otro hende.” Klaru ku nos tur ke ta konosí komo hende konfiabel. Ban wak sinku kualidat ku lo yuda nos logra esei.

12. Dikon nos por bisa ku amor ta e base di konfiansa? Duna un ehèmpel.

¹² Amor ta e base di konfiansa. Hesus a bisa ku e dos mandamentunan di mas grandi ta di stima Yehova i di stima nos próhimo. (Mat. 22:37-39) Nos stima Yehova i ta p’esei nos ke ta manera e, kende ta e Persona di mas konfiabel ku ta eksistí. Por ehèmpel, si nos ta stima nos rumannan, nos lo no konta otro hende nan asuntunan personal. Nunka nos lo no ke hasi esei pasobra nos sa ku esei por kousa nan hopi daño, bèrgwensa òf doló.—Huan 15:12.

13. Kon humildat lo yuda nos pa ta konfiabel?

¹³ Humildat tambe lo yuda nos pa ta konfiabel. Un ruman ku ta humilde lo no purba di impreshoná otronan dor di ta e promé pa duna un notisia. (Flp. 2:3) Tampoko lo e no laga parse di ta masha importante lagando otronan pensa ku e sa di kosnan ku e no por konta. Si nos ta humilde, nos lo no spekulá riba kosnan ku ni Beibel ni nos publikashonnan no ta papia di dje.

14. Kon disernimentu ta yuda nos pa ta konfiabel?

¹⁴ Disernimentu lo yuda un ruman sa ku tin “un tempu pa keda ketu i un tempu pa papia.” (Ekl. 3:7) Algun kultura tin un dicho ku ta bisa: “Papia ta plata, pero keda ketu ta oro.” Esei ke men ku tin biaha ta mihó pa keda ketu. Ku rason Proverbionan 11:12 ta bisa: ‘Hende ku perspikasia ta keda ketu.’ Wak e ehèmpel di un ruman. E tin hopi aña komo ansiano anto debí na su eksperensia, otro kongregashonnan ta pidié pa yuda nan atendé asuntunan difísil. Un ansiano den su kongregashon a bisa: “Nunka e ta konta nos informashon konfidensial di e otro kongregashonnan.” Debí ku e ansiano akí ta usa disernimentu, el a gana rèspèt di su kuerpo di ansiano. Nan sa ku nan por konfi’é.

15. Duna un ehèmpel ku ta mustra kon onestidat ta yuda nos pa ta konfiabel.

¹⁵ Onestidat ta un otro kualidat ku nos mester pa ta konfiabel. Nos ta konfia un hende onesto pasobra nos sa ku semper lo e papia e bèrdat. (Efe. 4:25; Heb. 13:18) Por ehèmpel, imaginá ku bo ke mehorá bo abilidat di siña otro hende tokante Beibel. Den e kaso ei, lo bo tin ku laga un ruman skucha bo parti i bisa bo unda pa mehorá. Ken lo bo pidi? Un ruman ku lo bisa bo loke bo ke skucha òf un ruman ku amablemente lo bisa bo e bèrdat? Si di bèrdat bo ke mehorá, e kontesta ta opvio. Beibel ta bisa: ‘Mihó bo korigí un hende den su kara ku bo keda sin demostr’é ku bo ta stim’é. Mihó bo haña konseho franko serka un bon amigu, maske e konsehonan por ta doloroso.’ (Pro. 27:5, 6) Konseho onesto di un amigu, asta ora e  no ta dushi pa skucha, lo benefisiá nos pa largu plaso.

16. Segun Proverbionan 10:19, dikon ta importante pa nos tin dominio propio?

¹⁶ Dominio propio ta masha importante si nos ke pa otro hende konfia nos. E kualidat ei lo yuda nos morde nos lenga ora nos haña gana di bisa algu konfidensial. (Lesa Proverbionan 10:19.) Esei por ta difísil foral ora nos ta usa retnan sosial. Si nos no paga tinu, sin ku nos ke, nos por plama informashon konfidensial na masha hopi hende. I unabes e informashon plama, nos no tin kontrol kon lo us’é ni ki daño ku lo e kousa. Dominio propio tambe lo yuda nos keda ketu ora nos enemigunan purba di pone nos divulgá informashon ku por hinka nos rumannan den peliger. Esei por pasa si polis interogá nos na pais unda nos obra ta restringí òf prohibí. Den e situashonnan ei i otronan, nos por apliká e prinsipio na Salmo 39:1, ku ta bisa: ‘Lo mi tene kuidou pa mi no peka ku mi lenga.’ Nos mester demostrá di ta konfiabel na tur hende, sea ta nos famia, nos amistatnan, nos rumannan òf kualke otro persona. I pa nos logra esei, nos mester di dominio propio.

17. Kiko nos tur por hasi pa kontribuí na un ambiente di konfiansa den e kongregashon?

¹⁷ Nos ta gradisí Yehova ku nos ta forma parti di un famia mundial di ruman ku ta stima i konfia otro. Nos tur tin e responsabilidat di demostrá ku nos ta konfiabel. Si kada un di nos sigui hasi esfuerso pa demostrá amor, humildat, disernimentu, onestidat i dominio propio, un ambiente di konfiansa lo reina den henter e kongregashon. Pues, laga nos sigui imitá nos Dios Yehova i sigui demostrá ku nos ta konfiabel.