Despues di 1940, mi mayornan a kuminsá studia Beibel ku Testigunan di Yehova. Aunke nan a stòp di studia, mi mama a sigui haña E Toren di Vigilansia i Spièrta! Na 1950, tabatin un kongreso internashonal na New York i henter mi famia a asistí.

Djis despues di esei, Ruman Lawrence Jeffries a kuminsá bishitá nos. El a hasi esfuerso pa siña mi e bèrdat. Na promé instante mi no por a komprondé dikon Testigunan no tabata mete den kosnan polítiko i no tabata partisipá den guera. Mi tabata rasoná ku si tur hende na Merka nenga di bai guera, e enemigunan por invadí nos pais anto domin’é. Trankil asina Ruman Jeffries a puntra mi: “Si tur hende na Merka tabata sirbi Yehova anto e enemigunan bin ataká nan, kiko bo ta pensa Yehova lo hasi?” E manera ku el a rasoná ku mi tokante e tópiko ei i di otro kosnan a yuda mi mira ku mi tabata robes. Esei a duna mi mas gana di siña tokante e bèrdatnan di Beibel.

Mi tabata pasa oranan ta lesa e edishonnan bieu di E Toren di Vigilansia i Spièrta! ku mi mama a pone den bodega. Ku tempu m’a realisá ku mi tabata siñando e bèrdat. P’esei, m’a aseptá pa studia Beibel ku Ruman Jeffries i a kuminsá bai reunion regularmente. Mi tabata gusta loke mi tabata siña, i m’a bira un publikadó. Ora m’a komprondé ku “e gran dia di SEÑOR ta serka,” mi metanan a kambia. (Sof. 1:14) Mi no tabata ke bai universidat mas. Mas bien, mi kier a yuda otro hende siña tokante e bèrdatnan di Beibel.

Riba 13 di yüni 1956, m’a gradua di skol sekundario, i tres dia despues m’a batisá na un asamblea di sirkuito. Na e momento ei mi no tabatin  niun idea di kuantu bendishon lo m’a risibí dor di dediká mi bida na haña i duna siñansa tokante Yehova.

Seis luna despues ku m’a batisá, m’a bira pionero regular. E Ministerio di Reino di desèmber 1956 (na ingles) tabatin un artíkulo ku a animá e rumannan pa sirbi kaminda tabatin mas nesesidat di publikadó. Esei tabata nèt pa mi. Mi tabata kier a yuda kaminda tabatin tiki hende ta prediká e bon notisia.—Mat. 24:14.

M’a muda bai Edgefield, South Carolina. E kongregashon einan tabatin solamente kuater publikadó, i ku ami nos a bira sinku. Nos tabata tene reunion den sala di un ruman su kas. Mi tabata prediká 100 ora pa luna, guia e rumannan den sirbishi i duna parti na reunion. Pues, mi tabata hopi drùk. Interesante ta ku mas mi tabata hasi den kongregashon, mas mi tabata siña di Yehova.

Un señora ku mi tabata studia Beibel kuné tabatin un agensia funeraria na Johnston, un pueblo ku a keda algun kilometer mas leu. E tabata amabel i a laga mi traha partaim serka dje i tambe el a laga nos usa un lugá chikitu komo nos Salòn di Reino.

Ruman Jeffries, kende a studia ku mi, tabatin un yu hòmber ku yama Jolly. Ku tempu Jolly a muda for di Brooklyn, New York, anto nos dos a traha pionero huntu. Nos tabata biba den un trailer chikitu di un ruman.

Salario tabata hopi abou na e parti zùit di Merka. Bo por a gana dos pa tres dòler pa dia. Tabatin un biaha ku m’a kaba di usa mi lastu sèn pa kumpra kuminda na un tienda, anto nèt ora m’a sali pafó, un mener a aserká mi i a puntra mi: “Bo ta buska trabou? Lo mi paga bo un dòler pa ora.” M’a traha p’e tres dia ta limpia un tereno di konstrukshon. Pa mi, tabata bisto ku ta Yehova tabata yuda mi pa sigui sirbi na Edgefield. Apesar ku mi no tabata gana mashá, na 1958 m’a logra bai e kongreso internashonal na New York.

Riba e di dos dia di kongreso, algu masha spesial a pasa. M’a konosé Ruby Wadlington, un pionero di Gallatin, Tennessee. Nos dos kier a bira misionero, pues nos a bai e reunion pa esnan ku kier a bai Galaad. Ku tempu, nos a kuminsá skirbi karta pa otro. Despues, m’a haña invitashon pa duna diskurso na Gallatin. Ei, m’a probechá pidié su man. M’a muda bai su kongregashon i na 1959 nos a kasa.

Den e kongregashon di Gallatin, ora mi tabatin 23 aña, m’a bira sirbidó di kongregashon (awe konosí komo koordinadó di e kuerpo di ansiano). Nos tabata e promé kongregashon ku Ruman Charles Thompson a bishitá ora el a bira superintendente di sirkuito. Aunke e tabatin hopi eksperensia,  el a puntra mi kiko e rumannan tabatin mester i kiko e otro superintendentenan di sirkuito a hasi pa atendé e asuntunan ei. Di dje m’a siña ku promé ku bo tuma un desishon, ta bon pa bo hasi pregunta i komprondé tur loke ta enbolbí den un asuntu.

Na mei di 1964 m’a haña invitashon pa bai e Skol di Ministerio di Reino na South Lansing, New York. E skol tabata dura un luna. E instruktornan di e skol a duna mi gana di siña mas tokante Yehova i sera mas kuné.

Na yanüari di 1965, sukursal a pidi mi pa bira superintendente di sirkuito i bai bishitá e kongregashonnan huntu ku Ruby. E teritorio di nos sirkuito a abarká e área kuminsando di Knoxville, Tennessee, yega te kasi na Richmond, Virginia. Esei a inkluí e kongregashonnan di North Carolina, Kentucky i West Virginia. Mi tabata bishitá solamente e kongregashonnan ku tabatin publikadó koló skur, pasobra e tempu ei na e parti zùit di Merka ainda no tabata permití hende koló skur reuní huntu ku esnan kolo kla. E rumannan no tabatin masha moda di biba. Pues, nos a siña kompartí loke nos tabatin ku esnan den nesesidat. Un biaha, un superintendente di sirkuito di hopi aña a siña mi un lès masha importante. El a bisa mi: “Sea nan ruman. No yega e kongregashon kuminsá ta manda manera bo ta nan hefe. Lo bo logra yuda e rumannan si nan mira bo komo nan ruman.”

Un biaha ku nos tabata di bishita na un kongregashon chikitu, Ruby a kuminsá un estudio ku un señora yòn ku tabatin un yu muhé di un aña. Komo ku niun ruman no por a sigui ku e estudio, Ruby a sigui studia kuné via karta. E siguiente biaha ku nos a bishitá e kongregashon, e señora a bai tur e reunionnan. Despues, dos ruman muhé pionero spesial a muda bai na e kongregashon i nan a sigui ku e estudio, i poko tempu despues el a batisá. Na 1995, un 30 aña despues, na Patterson, un ruman muhé a bin kumindá Ruby. A resultá ku tabata e yu muhé di e señora ku Ruby tabata studia. E ku su kasá tabata studiante den e di 100 klas di Galaad.

Nos di dos asignashon tabata na Florida. Pa e tempu ei nos tabatin mester di un outo i nos a haña un kumpra na un bon preis. Pero den e promé siman e pòmp di awa a kibra i nos no tabatin sèn pa drech’é. M’a kòrda riba un ruman ku por a yuda nos i m’a yam’é. El a manda un di su trahadónan pa drecha e outo i e no tabata ke nos paga nada. El a bisa nos: “Tur kos ta reglá.” Asta el a pusha un kos den nos man. Loke e ruman ei a hasi a mustra mi ku Yehova realmente ta kuida su sirbidónan. E eksperensia ei tambe a kòrda nos pa ta generoso ku otronan.

Tur biaha ku nos a bishitá e kongregashonnan, nos tabata keda na kas di e rumannan i asina nos a sera bon amistatnan. Tabatin un biaha ku m’a kuminsá taip un informe di un kongregashon, anto despues di un ratu m’a lanta bai lag’é den e mashin di taip. Anochi, ora m’a bini bèk pa kab’é, m’a nota ku e yu hòmber di tres aña di e rumannan ku nos tabata keda serka dje, aparentemente a “yuda” mi kaba ku e informe. Pa hopi aña m’a keda tent’é tokante esei.

Na 1971 m’a haña e asignashon pa sirbi komo superintendente di distrito na New York. Esei a sorprendé nos masha tantu mes! Apénas mi tabatin 34 aña ora nos a bai einan. Mi tabata nan promé superintendente di distrito koló skur. Nan a risibí nos brasa habrí.

Komo superintendente di distrito, mi tabata gusta siña hende tur siman tokante Yehova na e asambleanan di sirkuito. Hopi di e superintendentenan di sirkuito tabatin mas eksperensia ku mi. Un di nan a duna mi diskurso di boutismo. Un otro tabata Theodore Jaracz, kende despues a bira miembro di Kuerpo Gobernante. Tambe, tabatin hopi ruman ku hopi eksperensia ku tabata sirbi na Bètel na Brooklyn. Pero tantu e superintendentenan di sirkuito komo e bètelitanan a laga mi sinti mi kómodo. Mi ta apresiá kon e rumannan ei a trata mi. Mi por a mira ku e rumannan ei ta wardadónan ku ta stima e karnénan. Nan tabata konfia Beibel i tabata apoyá e organisashon.  Nan humildat a pone ku tabata fásil pa mi sirbi komo un superintendente di distrito.

Na 1974, Kuerpo Gobernante a asigná un otro grupo di ruman pa sirbi komo superintendente di distrito. Anto esei a pone ku mi por a sirbi atrobe komo superintendente di sirkuito, pero e biaha akí na South Carolina. Ma awor, no tabatin e leinan di apartheid i e rumannan koló skur i kolo kla por a sirbi huntu den e mesun kongregashon. Esei tabata un gran alegria pa nos tur.

Na fin di 1976, m’a haña e asignashon pa sirbi komo sirkuito den e área di Georgia, entre e statnan di Atlanta i Columbus. Te dia djawe, mi ta kòrda ku m’a duna diskurso na entiero di sinku mucha koló skur ku a muri ora ku algun hende pa malu a sende nan kas na kandela. Nan mama a haña kemadura i mester a bai hospital. Masha tantu ruman mes, tantu koló skur komo koló kla, a basha bai hospital pa konsolá e mayornan. Mi por a mira ku e amor ku tabatin entre rumannan tabata masha masha fuerte. E amor ei ta yuda hopi sirbidónan di Yehova trata ku situashonnan hopi difísil.

Na 1977 nan a invitá nos pa bin yuda na Bètel pa un par di luna. Ora e proyekto tabata den kaba, dos miembro di Kuerpo Gobernante a pidi mi si ami ku Ruby lo kier a keda na Bètel. Nos a aseptá e invitashon.

Pa 24 aña m’a traha den e Departamento di Sirbishi. Einan, mayoria di biaha e rumannan tin ku kontestá preguntanan difísil. Atraves di añanan, Kuerpo Gobernante a duna nos bon guia di akuerdo ku prinsipio di Beibel. Nos ta usa e guia ei komo base pa kontestá preguntanan i komo base pa entrená e sirbidónan di sirkuito, ansianonan i pioneronan. E entrenamentu ei a yuda hopi ruman mehorá nan amistat ku Yehova. Anto esei a yuda fortalesé Yehova su organisashon.

Di 1995 pa 2018 m’a bishitá diferente sukursal komo representante di sede mundial, anteriormente konosí komo superintendente di zona. Mi tabata reuní ku e rumannan di e Komité di Sukursal, e bètelitanan i e misioneronan pa animá nan i pa yuda nan ku kualke preokupashon ku nan por tin. Pero ora e rumannan tabata konta nos nan eksperensia, esei tabata animá ami ku Ruby. Por ehèmpel, na 2000 nos a bishitá Ruanda. Nos a keda mashá konmoví ora nos a tende kiko e rumannan i e bètelitanan a pasa aden durante e genosidio ku a tuma lugá na 1994. Hopi di nan a pèrdè amigu i famia. Apesar di esei, nos por a mira nan fe, speransa i alegria.

Awor nos tin mas ku 80 aña. I pa e último 20 añanan, m’a forma parti di e Komité di Sukursal di Merka. Mi no a bai universidat, pero m’a haña e edukashon di mas haltu ku tin: Esun di Yehova i su organisashon. Esei a prepará mi pa siña otronan e bèrdatnan for di Beibel ku lo benefisiá nan pa semper. (2 Kor. 3:5; 2 Tim. 2:2) M’a mira kon Beibel a yuda hende mehorá nan bida i bira amigu di nan Kreador. (Sant. 4:8) Tur chèns ku ami ku Ruby haña, nos ta animá otro ruman pa balorá e privilegio ku nan tin di siña tokante Yehova i di siña otronan tokante e bèrdatnan di Beibel. No tin un mihó privilegio ku esei!