Na 1 Korintionan 15:8 Pablo a bisa: “Por último el a aparesé na mi tambe, manera na un ku a nase promé ku tempu.” Den pasado, nos a yega di splika ku probablemente Pablo tabata referí na loke e mes eksperensiá ora ku el a haña e vishon di Hesus den su gloria selestial. Tabata komo si fuera el a haña e onor di nase, òf resusitá, pa bida spiritual promé ku tempu, esta, siglonan promé ku e tipo di resurekshon ei a tuma lugá. Sinembargo, despues di analisá e versíkulo mas profundo, nos a mira ku mester ahustá splikashon di e versíkulo ei.

Ta bèrdat ku aki Pablo tabata referí na loke a pasa ora ku el a bira kristian, pero kiko e tabata ke men ora el a bisa ku el “a nase promé ku tempu”? Tin diferente posibilidat. Ban wak nan.

E manera ku Pablo a bira kristian tabata diripiente i troumátiko. Un nasementu promé ku tempu mayoria di biaha ta di sorpresa, ònferwagt. Ora Saulo (konosí despues komo Pablo), tabata riba kaminda pa Damasko pa persiguí e kristiannan einan, e no a ferwagt ku lo e mira Hesus den un vishon. E echo ku Pablo a bira un kristian tabata un sorpresa no p’e mes so pero tambe pa e kristiannan ku e tabatin plania di persiguí. E eksperensia ei tabata un trouma p’e. Pablo a asta pèrdè su bista.—Echo. 9:1-9, 17-19.

Pablo a bira kristian “for di tempu.” E palabra griego tradusí komo “nase promé ku tempu” por ser tradusí tambe komo “nase for di tempu.” Beibel Santu ta bis’é asin’akí: “Por último, el a aparesé na mi tambe, manera na un ku a nase for di tempu.” Pa e tempu ku Pablo a bira kristian, ya Hesus a bai shelu kaba. Kontrali na e hendenan ku Pablo a menshoná den e versíkulonan promé, e no a mira Hesus despues ku el a lanta for di morto i promé ku el a subi na shelu. (1 Kor. 15:4-8) Pero, el a haña chèns ora ku Hesus a aparesé ònferwagt na dje, aunke esei a parse di ta “for di tempu.”

Pablo tabata modesto tokante su mes. Segun algun eksperto, e palabranan ku Pablo a usa aki por duna e idea ku e tabata krítiko ku su mes. Si ta esei Pablo tabatin na mente, e tabata rekonosé ku e no meresé e privilegio di ta un apòstel. De echo, el a bisa: “Mi ta esun di mas insignifikante di e apòstelnan, i mi no ta digno di ser yamá apòstel, pasobra mi a persiguí e kongregashon di Dios. Ma pa medio di e bondat inmeresí di Dios, mi ta loke mi ta.”—1 Kor. 15:9, 10.

Ta parse ku Pablo lo tabata referí na: (1) e manera ònferwagt ku Hesus a aparesé na dje, (2) e manera “for di tempu” ku el a bira kristian òf (3) ku e no tabata konsiderá su mes digno di ta un apòstel. Sea kual sea e kaso, el a balorá e vishon ei. El a yud’é keda kompletamente konvensí ku Hesus a ser resusitá. P’esei, no ta nada straño anto ku el a referí na e eksperensia ei vários biaha ora el a prediká tokante e resurekshon di Hesus.—Echo. 22:6-11; 26:13-18.