1. Ki trabou Yehova a duna Pedro pa hasi promé ku Pedro a muri?

 APÒSTEL PEDRO a sirbi Yehova fielmente pa hopi aña. El a prediká huntu ku Hesus, kuminsá ku e trabou di prediká na hende no-hudiu i forma parti di kuerpo gobernante. Pero, na final di su bida, ora e tabata sa ku no a ked’é muchu tempu, Yehova a dun’é mas trabou pa hasi. Rònt di 62 pa 64 di promé siglo, Yehova a us’é pa skirbi dos karta ku despues a haña e nòmbernan 1 i 2 Pedro. Pedro tabata ke pa e kartanan akí sigui yuda e kristiannan despues di su morto.—2 Ped. 1:​12-15.

2. Dikon e kartanan di Pedro tabata nèt na tempu?

² Pedro a skirbi e kartanan ei den un periodo ku su rumannan tabata “sufri pa motibu di vários prueba.” (1 Ped. 1:6) Hòmbernan malbado tabata purba di trese siñansanan falsu i kondukta inmoral den e kongregashon. (2 Ped. 2:​1, 2, 14) E kristiannan ku tabata biba na Herúsalèm pronto lo a mira “fin di tur kos,” esta, destrukshon di e stat i di su tèmpel na man di e romanonan. (1 Ped. 4:7) Sin duda, Pedro su kartanan a yuda e kristiannan soportá e pruebanan ei i prepará pa esnan ku lo a bini. b

3. Dikon nos mester analisá e kartanan di Pedro?

 ³ Aunke Pedro a skirbi e kartanan akí pa e kristiannan di promé siglo, Yehova a inkluí nan den Beibel. Pues, nan ta di gran yudansa pa nos. (Rom. 15:4) Nos tambe ta biba den un mundu kaminda hopi hende ta komportá nan mes inmoral, i nos tambe tin ku lucha pa sirbi Yehova. Ademas, un djis akí nos lo pasa den un tribulashon hopi mas pió ku esun ku a kaba ku Herúsalèm i su tèmpel. Pedro su dos kartanan tin rekordatorio importante ku lo yuda nos keda warda ku pasenshi riba e fin di e mundu malbado akí, stòp di tin miedu di hende i stima otro intensamente. E rekordatorionan ei tambe lo yuda ansianonan sa kon nan por yuda rumannan den nan kongregashon keda firme.

4. Segun 2 Pedro 3:3 i 4, kiko por pone nos duda?

⁴ Nos ta rondoná di hende ku no ta kere den loke Beibel ta bisa tokante futuro. Otronan ta hasi chèrchi di nos, pasó nos tin añanan ta prediká ku e fin ta serka. Algun ta bisa ku hamas lo e bini. (Lesa 2 Pedro 3:​3, 4.) Si un hende den sirbishi, na trabou òf den nos famia bisa algu asina, nos por kuminsá duda. Pedro a splika loke por yuda nos.

5. Kiko lo yuda nos warda ku pasenshi riba e fin? (2 Pedro 3:​8, 9)

⁵ Kisas algun di nos ta pensa ku Yehova ta tarda pa kaba ku e mundu malbado akí. Pero Pedro a bisa algu ku ta laga nos pensa. El a kòrda nos ku e manera ku Yehova ta mira tempu ta kompletamente diferente for di nos. (Lesa 2 Pedro 3:​8, 9.) Pa Yehova mil aña ta mané un dia. Ademas, e tin pasenshi i no ta deseá pa niun hende ser destruí. Pero, su dia lo yega i e mundu malbado akí lo yega na su fin. Nos tin e gran privilegio di usa e tempu ku a resta ainda pa prediká na hende di tur nashon.

6. Kon nos por “kòrda semper” riba e dia di Yehova? (2 Pedro 3:​11, 12)

⁶ Pedro ta konsehá nos pa “kòrda semper riba” e dia di Yehova. (Lesa 2 Pedro 3:​11, 12.) Kon nos por hasi esei? Si ta posibel, meditá tur dia riba kon maravioso bida lo ta den e mundu nobo. Imaginá ku bo ta hala aire limpi, saboriá kuminda saludabel, yama bo sernan kerí resusitá bon biní i siña hende ku a biba siglonan pasá tokante profesianan den Beibel. Si bo pensa riba e kosnan ei, esei lo yuda bo keda warda ku pasenshi i lo sigurá bo ku bo ta bibando den e último dianan. Debí ku nos “sa esaki di antemano” tokante nos futuro, nos lo no laga ningun maestro falsu desviá nos.—2 Ped. 3:17.

7. Kiko miedu di hende por hasi ku nos?

⁷ Komo ku nos sa ku e dia di Yehova ta serka, nos ke hasi esfuerso pa tur hende skucha e bon notisia. Pero tin biaha nos ta duda pa hasi esei. Dikon? Pasó kisas nos tin miedu di loke hende por hasi òf pensa di nos. Ta esei ta loke a pasa ku Pedro. Riba e anochi ku a husga Hesus, Pedro tabatin miedu pa bisa ku e ta un di Hesus su disipelnan, i vários biaha el a asta nenga ku e konos’é. (Mat. 26:​69-75) Pero Pedro a stòp di tin miedu di hende i mas despues, el a skirbi: “No tene miedu di loke otro hende tin miedu di dje, ni preokupá.” (1 Ped. 3:14) E palabranan ei ta konfirmá nos ku nos por stòp di tin miedu di hende.

8. Kon nos por stòp di tin miedu di hende? (1 Pedro 3:15)

 ⁸ Kiko lo yuda nos stòp di tin miedu di hende? Pedro ta bisa nos: “Santifiká Kristu komo Señor den boso kurason.” (Lesa 1 Pedro 3:15.) Esaki ta inkluí kòrda nos mes ku Hesukristu ta nos Rei i ku e tin masha hopi poder mes. Pues si bo ta bira nèrvioso ora un oportunidat presentá pa prediká e bon notisia, pensa riba nos Rei. Imaginá kon e ta goberná den shelu, rondoná pa miónes di angel. Kòrda tambe ku e tin “tur outoridat den shelu i riba tera” i ku lo e ta ku bo “tur e dianan, te na konklushon di e era akí.” (Mat. 28:​18-20) Pedro ta bisa nos ku semper nos mester ta “kla pa defendé” nos fe. Lo bo tin gana di prediká informal na skol, na trabou òf na un otro lugá? Wèl, si ta asina, pensa ki ta e mihó momento pa hasi esei. Despues, prepará loke bo ke bisa i pidi Yehova kurashi. Bo por konfia ku Yehova lo yuda bo stòp di tin miedu di hende.—Echo. 4:29.

9. Na ki okashon Pedro no a mustra amor? (Wak e plachi.)

⁹ Pedro a siña loke ke men mustra amor. E tabata t’ei ora ku Hesus a bisa: “Mi ta duna boso un mandamentu nobo: stima otro; meskos ku ami a stima boso,  boso tambe stima otro.” (Huan 13:34) Apesar di esei, algun tempu despues, Pedro a nenga di kome ku algun kristian no-hudiu. Apòstel Pablo a bisa ku Pedro a “fingi.” Ku otro palabra, loke Pedro a hasi tabata un hipokresia. (Gal. 2:​11-14) Pedro a aseptá e korekshon i a kambia. Den tur dos su kartanan, el a enfatisá ku nos no mester djis sinti amor pa nos rumannan pero nos mester demostrá esei tambe.

10. Kon nos por mustra “amor sin hipokresia”? Splika. (1 Pedro 1:22)

¹⁰ Pedro a bisa ku nos mester tin ‘amor sin hipokresia pa nos rumannan.’ (Lesa 1 Pedro 1:22.) Nos lo haña e amor ei ora nos “obedesé e bèrdat.” Den e bèrdat ei tin e siñansa ku “Dios no ta hasi distinshon di persona.” (Echo. 10:​34, 35) Pues si ta un par di ruman só nos ta stima den kongregashon, nos no ta obedesé loke Hesus a bisa tokante amor. Klaru, kisas meskos ku Hesus nos ta mas será ku algun ruman. (Huan 13:23; 20:2) Pero, Pedro ta kòrda nos ku nos mester stima tur nos rumannan pasó nan tur ta parti di nos famia.—1 Ped. 2:17.

11. Kiko ta nifiká “stima otro intensamente di kurason”?

¹¹ Pedro a bisa: “Stima otro intensamente di kurason.” Aki, stima “intentsamente” ta nifiká hancha nos amor pa inkluí hende ku, di nos mes, nos lo no a stima. Por ehèmpel, kiko nos lo hasi si un ruman ofendé òf hùrt nos? Nos tendensia lo ta pa lag’é sinti loke el a hasi ku nos; nada di mustra amor. Pero, Yehova lo no keda niun tiki kontentu ku e manera ku nos reakshoná ei, anto Hesus a siña Pedro esei. (Huan 18:​10, 11) Pedro a skirbi: “No paga malu ku malu òf insulto ku insulto. Pasobra Dios a skohe boso pa bendishoná otro hende.” (1 Ped. 3:9) Si bo ta stima intensamente, lo bo ta amabel ku tur hende i ta purba di komprondé nan, asta ora nan hùrt bo.

12. (a) Kiko mas nos lo hasi si nos ta stima otro intensamente? (b) Despues di a wak e vidio Laga Nos Keda Uní ku Otro, kiko abo ke hasi?

¹² Den Pedro su promé karta, el a bisa ku stima intensamente lo yuda nos pordoná no djis un par di piká, sino “un multitut di piká.” (1 Ped. 4:8) Kisas ora Pedro tabata skirbi e palabranan akí, el a kòrda loke Hesus a siñ’é tokante pordon den un kòmbersashon ku nan tabatin algun aña promé. E tempu ei, por ta Pedro a pensa ku e tabata masha generoso ora el a bisa ku lo e ta dispuesto pa pordoná su ruman “te ku shete biaha.” Pero Hesus a siñ’é ku e tin ku pordoná “te ku 77 biaha.” Ku otro palabra, sin pone límite, i esei ta konta pa nos tambe. (Mat. 18:​21, 22) Si tin biaha tabata difísil pa bo sigui e konseho akí, no desanimá! Nos tur tin biaha tin difikultat pa pordoná. Loke ta importante ta pa bo hasi tur loke ta posibel pa pordoná bo ruman i hasi pas kuné. c

13. Dikon kisas ta difísil pa ansianonan pastoriá nan rumannan?

¹³ Hamas Pedro lo a lubidá loke Hesus a bis’é despues ku Hesus a resusitá: “Kuida mi lamchinan.” (Huan 21:16) Si bo ta un ansiano, bo sa ku e instrukshon ei ta konta pa bo tambe. Pero kisas no ta fásil pa saka tempu pa kumpli ku e asignashon  asina importante ei. Na promé lugá, ansiano tin ku atendé ku nesesidatnan físiko, emoshonal i spiritual di nan famia. Ademas, nan mester ta un ehèmpel den sirbishi i prepará bon pa nan parti- i diskursonan na reunion, asamblea i kongreso. Algun ansiano ta yuda tambe den Komité di Kontakto ku Hospital òf den Departamento Lokal di Diseño i Konstrukshon. Ta bisto anto ku ansianonan tin hopi kos di hasi!

14. Kiko por yuda ansianonan pastoriá e tou? (1 Pedro 5:​1-4)

¹⁴ Pedro a bisa su rumannan ansiano: “Pastoriá e tou di Dios.” (Lesa 1 Pedro 5:​1-4.) Nos sa ku ansianonan ta stima nan rumannan i ke pastoriá nan. Pero kisas tin biaha komo ansiano bo ta asina drùk òf kansá ku bo ta sinti ku bo no por pastoriá bo rumannan. Kiko bo por hasi? Papia ku Yehova; kont’é presis kon bo ta sinti. Pedro a skirbi: “Si un hende ta sirbi, lag’é sirbi dependiendo di e forsa ku Dios ta suministrá.” (1 Ped. 4:11) Kisas solushon pa algun di e problemanan ku bo rumannan ta pasando aden lo bini te den e mundu nobo. Pero kòrda ku Hesukristu, “e wardadó prinsipal,” por hasi mas pa nan tantu awor komo den e mundu nobo. P’esei loke Dios ta ferwagt di ansianonan ta pa nan stima nan rumannan, pastoriá nan i “bira ehèmpel pa e tou.”

15. Kon un ansiano ta pastoriá e rumannan? (Wak e plachi.)

¹⁵ William tin hopi aña komo ansiano i sa ku ta masha importante pa pastoriá e tou. Ora ku e pandemia di COVID-19 a kuminsá, e huntu ku e otro ansianonan di su kongregashon a pone komo prioridat pa tur siman tuma kontakto ku e publikadónan den nan grupo di sirbishi. Dikon? El a splika: “Hopi ruman tabata nan so na kas i masha lihé mes nan por a kuminsá pensa kosnan negativo.” Ora un ruman ta pasa den un problema, William ta skuch’é ku atenshon pa purba di saka’fó kiko presis e ruman mester i loke ta preokup’é. Djei, e ta buska algun publikashon òf vidio, hopi biaha for di nos website, ku e por usa pa animá e ruman. El a bisa: “Nos tin ku pastoriá nos  rumannan awor mas ku nunka. Nos ta hasi hopi esfuerso pa yuda hende konosé Yehova; nos tin ku hasi mes tantu esfuerso pa pastoriá e tou i yuda Yehova su karnénan keda den e bèrdat.”

16. Kon nos por apliká e lèsnan ku nos ta haña for di Pedro su kartanan?

¹⁶ Den e artíkulo akí, nos a trata djis un par di e lèsnan for di Pedro su dos kartanan. Kisas bo a ripará kaminda bo por mehorá. Por ehèmpel, kisas bo ke meditá mas riba e maravioso bida ku nos lo tin den e mundu nobo. Òf kisas b’a pone meta pa prediká informalmente na trabou, na skol òf un otro kaminda. Bo a pensa algun manera ku bo por mustra bo rumannan ku bo ta stima nan intensamente di kurason? I si bo ta ansiano, bo ta mas determiná awor pa pastoriá bo rumannan? Sea onesto ku bo mes i mira unda bo tin ku mehorá, pero no bira desanimá. Kòrda ku “Señor [Hesus] ta bondadoso,” i lo e yuda bo mehorá. (1 Ped. 2:3) Pedro ta sigurá nos: “Dios . . . mes lo terminá boso formashon; lo e hasi boso firme, lo e hasi boso fuerte.”—1 Ped. 5:10.

17. Kiko nos lo haña si nos no entregá i laga Yehova entrená nos?

¹⁷ Tabatin un biaha ku Pedro a sinti ku e no tabata digno di ta den presensia di e Yu di Dios. (Luk. 5:8) Pero ku yudansa i amor di Yehova i di Hesus, Pedro a sigui Hesus fielmente. Komo resultado, el a “risibí un entrada glorioso den e Reino eterno di nos Señor i Salbador Hesukristu.” (2 Ped. 1:11) Esei sí ta un bunita rekompensa! Si meskos ku Pedro bo no entregá i laga Yehova entrená bo, bo tambe lo haña e rekompensa di bida eterno. Lo bo ‘alkansá e meta di bo fe, esta, e salbashon di bo alma.’—1 Ped. 1:9.