1. Ki situashon difísil Yehóas, Uzías i Yosías a haña nan kuné?

 HÓBEN, kiko lo bo hasi si bo bira rei di e pueblo di Dios? Kon lo bo usa bo poder i outoridat? Beibel ta konta nos ku na Huda tabatin algun rei hopi yòn. Por ehèmpel, Yehóas a bira rei ku 7 aña, Uzías ku 16 anto Yosías ku 8. Nan tabatin responsabilidatnan hopi pisá! Pero, nan tur tres a haña e yudansa ku nan tabatin mester pa dil ku desafionan i pa usa nan bida bon.

2. Dikon ta bon pa bo studia tokante Yehóas, Uzías i Yosías?

² Ta bèrdat ku bo no ta un rei ni un reina, pero bo por siña hopi for di e bon i mal desishonnan ku Yehóas, Uzías i Yosías a tuma. Nan relatonan lo siña bo dikon ta bon pa bo skohe bon amigunan, keda humilde i sigui sirbi Yehova.

3. Kon Yehoyada a yuda Yehóas tuma bon desishon?

³ Tuma bon desishon meskos ku Yehóas. Yehóas su tata a muri tempu e tabata chikitu, i Sumo Saserdote Yehoyada a kri’é i siñ’é tokante Yehova. Yehóas tabata sabí pasó el a skucha e konsehonan ku Yehoyada a dun’é. Danki na e bon ehèmpel di Yehoyada, Yehóas a disidí di sirbi Yehova i yuda e pueblo hasi meskos. El a asta hasi sigur di drecha e tèmpel di Yehova.—2 Kró. 24:​1, 2, 4, 13, 14.

4. Dikon ta bon pa bo stima i obedesé Yehova su mandamentunan? (Proverbionan 2:​1, 10-12)

⁴ Si bo mayornan òf un otro hende ta siña bo pa stima Yehova i pa biba segun su normanan, nan ta dunando bo un bunita regalo. (Lesa Proverbionan 2:​1, 10-12.) Bo  mayornan por siña bo na vários manera. Wak kon Katya su tata a yud’é tuma bon desishon. Tur dia su tata tabata hib’é skol, i nan tabata kòmbersá tokante e teksto di dia. Katya a bisa: “E kòmbersashonnan ei a yuda mi trata ku situashonnan difísil ku a presentá durante dia.” Bo mayornan por pone regla ku ta basá riba Beibel. Awor, kiko si abo ta sinti ku e reglanan ei no ta laga bo hasi nada? Kiko por yuda bo obedesé bo mayornan? Anastasia ta kòrda ku su mayornan tabata tuma nan tempu pa splik’é dikon nan ta pone sierto regla. El a bisa: “Esei a yuda mi komprondé ku nan tabata stima mi i ku e reglanan no tabat’ei pa stroba mi sino pa protehá mi.”

5. Ki efekto bo desishonnan tin riba bo mayornan i Yehova? (Proverbionan 22:6; 23:​15, 24, 25)

⁵ Bo mayornan lo sinti nan masha kontentu si bo skucha e konsehonan di Beibel ku nan ta duna bo. Anto mas importante ainda, lo bo hasi Yehova kontentu i bo amistat kuné lo bira mas fuerte. (Lesa Proverbionan 22:6; 23:​15, 24, 25.) Eseinan ta bon motibu pa hasi meskos ku Yehóas tempu ku e tabata yòn.

6. Na ken Yehóas a kuminsá skucha, i esei a hiba na kiko? (2 Krónikanan 24:​17, 18)

⁶ Siña for di Yehóas su mal desishonnan. Despues ku Yehoyada a muri, Yehóas a skohe mal amigu. (Lesa 2 Krónikanan 24:​17, 18.) El a skucha konseho di e kabesantenan di Huda ku no tabata stima Yehova. Probablemente bo ta pensa ku lo tabata mihó pa Yehóas keda leu for di e hendenan ei. (Pro. 1:10) Pero, el a bai tras di nan mal konseho. Pa hasi e kos pió, ora ku su primu Zakarías a purba di rasoná kuné, Yehóas a laga mat’é. (2 Kró. 24:​20, 21; Mat. 23:35) Esta kruel i bobo! Yehóas su bida a kuminsá bon, pero lamentablemente el a bira un apóstata i un asesino. Despues, su mes sirbidónan a mat’é. (2 Kró. 24:​22-25) Yehóas su bida lo tabata hopi diferente si el a sigui skucha Yehova i esnan ku tabata stim’É! Ki bo ta siña for di Yehóas su mal desishon?

7. Ken bo mester skohe komo amigu? (Wak e plachi.)

⁷ Un lès importante ku bo por siña for di Yehóas su mal desishon ta ku bo tin ku skohe amigunan ku tin bon influensia riba bo, esta, amigunan ku ta stima  Yehova i ku ke hasi su kurason kontentu. Bo por tin amigu di tur edat. Kòrda ku Yehóas tabata hopi mas yòn ku Yehoyada. Awor, pensa riba bo amigunan i puntra bo mes: ‘Nan ta yuda mi haña mas fe den Yehova? Nan ta animá mi pa sigui Dios su normanan? Nan ta gusta papia tokante Yehova i di loke nan a studia den Beibel? Nan tin kurashi pa korigí mi òf nan ta bisa mi loke mi ke tende so?’ (Pro. 27:​5, 6, 17) Pa ta onesto, si bo amigunan no ta stima Yehova, bo no mester di nan den bo bida. Pero si bo tin amigunan ku ta stima Yehova, e ora ei bo tin algu masha presioso!—Pro. 13:20.

8. Ki bo tin ku tene kuenta kuné si bo ta usa ret sosial?

⁸ Awendia tin vários manera pa keda den kontakto ku famia- i amigunan via Internet. Pero, hopi hende ta post potrèt i vidio pa mustra tur hende loke nan a kumpra òf a hasi. Si bo ta hasi uso di ret sosial, puntra bo mes: ‘Dikon mi ke post e kos akí? Mi ke impreshoná otro hende? Mi ke animá otro hende kuné òf mi ke hasié pa hende elogiá mi? Mi ta laga ku opinion di hende tin influensia negativo riba mi manera di pensa, papia i hasi kos?’ Ruman Nathan Knorr, kende a sirbi komo miembro di Kuerpo Gobernante, a duna e konseho akí: “No purba di agradá hende. Na final di kuenta, lo bo no agradá niun. Agradá Yehova, i lo bo agradá tur esnan ku ta stima Yehova.”

9. Kiko Yehova a yuda Uzías logra? (2 Krónikanan 26:​1-5)

⁹ Tuma bon desishon meskos ku Uzías. Rei Uzías tabata humilde tempu ku e tabata hóben. El a siña kon pa mustra “rèspèt profundo pa e Dios berdadero.” El a biba 68 aña, i pa gran parti di su bida Yehova a bendishon’é. (Lesa 2 Krónikanan 26:​1-5.) El a derotá hopi nashon enemigu i a hasi sigur ku Herúsalèm tabata bon protehá. (2 Kró. 26:​6-15) No tin duda ku Uzías tabata felis ku tur loke Dios a yud’é logra.—Ekl. 3:​12, 13.

10. Kiko a pasa ku Uzías?

¹⁰ Siña for di Uzías su mal desishonnan. Rei Uzías a kustumbrá di duna òrdu. I kisas esei a lag’é pensa ku e por hasi loke ku e tabata ke. Un dia, el a drenta tèmpel di Yehova pa bai kima sensia riba e altar. Esei tabata algu ku e reinan no tabatin mag di hasi. (2 Kró. 26:​16-18) Sumo Saserdote Azarías a korigié, pero Uzías a rabia masha pisá. Lamentablemente, Uzías no a keda fiel i Yehova a kastig’é ku lepra. (2 Kró. 26:​19-21) Su bida lo tabata hopi diferente si el a keda humilde!

11. Kiko lo yuda nos keda humilde? (Wak e plachi.)

¹¹ Ora Uzías a bira un rei poderoso, el a lubidá ku tur loke el a logra tabata ku yudansa di Yehova. Kiko bo ta siña? No lubidá ku tur bo bendishon- i privilegionan ta bini di Yehova. Na lugá di kana broma ku loke bo a logra, bo mester duna tur onor i gloria na Yehova. b (1 Kor. 4:7) Bo mester ta humilde i semper kòrda ku bo ta imperfekto i mester di korekshon. Un ruman ku tin mas ku 60 aña a bisa: “M’a siña pa no desanimá ni bira ofendí, ora otro hende mira mi foutnan. Ora mi haña korekshon pa e foutnan kèns ku  mi ta hasi, mi ta purba di mehorá i sigui duna Yehova lo mihó di mi.” Kos lo bai bon ku bo den bida, si bo tin rèspèt profundo pa Yehova i si bo keda humilde.—Pro. 22:4.

12. Kon Yosías a sirbi Yehova ora e tabata hóben? (2 Krónikanan 34:​1-3)

¹² Tuma bon desishon meskos ku Yosías. Yosías tabatin 16 aña ora el a kuminsá sirbi Yehova. E tabata ke siña mas tokante Yehova i hasi Su boluntat. Pero, bida di e rei yòn ei no tabata fásil. E tempu ei, mayoria di hende tabata adorá dios falsu. Pues, Yosías mester tabatin kurashi pa defendé adorashon berdadero. Anto el a hasi esei hopi bon! Promé ku e tabatin 20 aña, el a kuminsá kita adorashon falsu for di e pais.—Lesa 2 Krónikanan 34:​1-3.

13. Kiko dedikashon na Yehova ta nifiká pa bo?

¹³ Asta si bo ta hopi yòn, bo tambe por hasi meskos ku Yosías dor di siña mas tokante Yehova i Su bunita kualidatnan. E ora ei lo bo haña e deseo di dediká bo mes na Yehova. Kon esei lo influensiá bo bida? Luke, kende a batisá ku 14 aña, a bisa e dia ku el a dediká su mes na Yehova: “Di awor padilanti, sirbi Yehova lo bini na promé lugá den mi bida i lo mi hasi mi bèst pa hasi su kurason kontentu.” (Mar. 12:30) Lo bo tin un bida hopi dushi si bo hasi meskos kuné!

14. Duna ehèmpel di algun hóben ku a hasi meskos ku Rei Yosías.

¹⁴ Ki reto hóbennan ku ta sirbi Yehova por haña nan kuné? Johan, kende a batisá ku 12 aña, a konta ku muchanan di su klas a purba di preshon’é pa usa sigaria elektróniko, esta, vape. Kiko e ta hasi pa resistí e preshon? E ta kòrda su mes ku vape por daña su salú i su amistat ku Yehova. Rachel, kende a batisá ku 14 aña, a splika loke e ta hasi pa trata ku e retonan ku e ta haña na skol. El a bisa: “Semper mi ta purba di konektá loke mi ta mira ku algu spiritual. Por ehèmpel, un lès di historia ta laga mi kòrda riba un relato òf un profesia di Beibel. Òf un kòmbersashon ta laga mi kòrda riba un  teksto ku mi por kompartí ku un hende.” Ta bèrdat ku bo retonan no ta meskos ku esnan di Rei Yosías, pero bo por ta mesun sabí i fiel kuné. Si for di awor bo siña dil ku pruebanan, esei lo prepará bo pa retonan den futuro.

15. Kiko a yuda Yosías sirbi Yehova fielmente? (2 Krónikanan 34:​14, 18-21)

¹⁵ Ora Rei Yosías tabatin 26 aña, el a kuminsá renobá e tèmpel. Durante renobashon, nan a haña e “buki ku tabata kontené Lei ku Yehova a duna su pueblo pa medio di Moises.” Ora Rei a skucha loke e buki tabata bisa, mesora el a hasi kambionan pa obedesé loke Lei di Yehova a bisa. (Lesa 2 Krónikanan 34:​14, 18-21.) Abo tin gana di lesa Beibel tur dia? Si ya kaba bo ta hasiendo esei, kon ta bayendo? Ki bo ta hasi pa no lubidá tekstonan ku por yuda bo? Luke, menshoná na paragraf 13, ta skirbi tur punto interesante ku e haña. Bo ta kere ku algu asina lo yuda bo kòrda teksto- i puntonan ku bo a gusta? Mas bo komprondé i stima Beibel, mas lo bo ke sirbi Yehova. I meskos ku Rei Yosías, Palabra di Dios lo yuda bo hasi loke ta korekto.

16. Dikon Yosías a kometé un eror grave, i kiko nos ta siña for di esei?

¹⁶ Siña for di Yosías su mal desishon. Ora Yosías tabatin rònt di 39 aña, el a hasi un eror ku a kost’é su bida. Na lugá di pidi Yehova pa guia, el a konfia den su mes. (2 Kró. 35:​20-25) Kiko bo ta siña? No ta importá kuantu aña bo tin ni kuantu tempu bo tin ta studia Beibel, bo tin ku sigui hasi esfuerso pa sirbi Yehova. Esei ta enserá pidié semper pa su guia, studia su Palabra i skucha konseho di rumannan ku tin un amistat fuerte kuné. Asina ei lo bo tin ménos chèns di hasi un eror grave i mas chèns di tin un bida felis.—Sant. 1:25.

17. Ki lès importante nos a siña for di tres rei di Huda?

¹⁷ Bo tin bunita oportunidat bo dilanti. E relatonan di Yehóas, Uzías i Yosías ta mustra ku bo por tuma bon desishon i hiba un bida ku ta agradá Yehova. Ta bèrdat ku nan a hasi eror i a sufri e konsekuensianan. Pero, si bo hasi e bon kosnan ku nan a hasi i evitá e erornan ku nan a hasi, lo bai bon ku bo den bida.

18. Ehèmpel di ken den Beibel ta mustra ku bo por tin un bida felis? (Wak e plachi.)

¹⁸ Beibel tin mas relato di hóbennan ku a bira amigu di Yehova, ku a hasi su kurason kontentu i ku tabatin un bida felis. David tabata un di nan. For di yòn, el a skohe pa bira amigu di Yehova i ku tempu el a bira un rei fiel. Ta bèrdat ku el a hasi algun eror, pero den Yehova su bista e tabata un persona fiel. (1 Rei. 3:6; 9:​4, 5; 14:8) Si bo studia David su bida, sigur lo e motivá bo pa sirbi Yehova fielmente. Òf, algu otro ku bo por hasi ta un proyekto di estudio tokante Marko òf Timoteo. Nan a kuminsá sirbi Yehova na yòn i a sigui sirbié fielmente. Nan a hasi Yehova su kurason kontentu i kos a bai bon ku nan den bida.

19. Kon bo bida por ta?

¹⁹ Kon bo bida lo ta den futuro, ta dependé di loke bo ta hasi kuné awor. Si bo konfia den Yehova i no bai tras di bo manera di mira kosnan, lo e yuda bo tuma bon desishon. (Pro. 20:24) Bo por tin un bida felis i maravioso. Anto no lubidá ku Yehova ta balorá tur loke bo ta hasi p’e. Ta bale la pena pa sirbi bo Tata den shelu, ku stima bo mashá. Esei ta e mihó manera pa usa bo bida!