1. Ki situashon nos por haña nos kuné na trabou òf na skol?

 KON bo ta sinti ora un kolega òf un mucha na skol puntra bo algu tokante bo kreensianan? Bo ta bira un tiki nèrvioso? Mayoria di nos ta sinti asina. E pregunta di e kolega òf e mucha na skol ta permití bo sa loke e ta pensa òf kere aden, anto asina ei bo ta haña oportunidat pa prediká. Pero, tin biaha un persona por hasi pregunta djis pa diskutí, i esei no mester straña nos. Kisas e ta mal informá tokante nos kreensianan. (Echo. 28:22) Ademas, nos ta bibando den “e último dianan,” un periodo ku mayoria di hende “no ta dispuesto pa sera ningun akuerdo” i ta asta “feros.”—2 Tim. 3:​1, 3.

2. Dikon ta bon pa nos mustra suavedat?

² Kisas bo ta puntra bo mes: ‘Kon mi por keda amabel i trankil ora un hende kuestioná òf kritiká mi kreensianan?’ Bo ke sa kiko por yuda bo? Suavedat. Un hende ku ta mustra suavedat no ta rabia fásil. E ta keda kalmu ora provok’é òf ora e no sa kiko pa kontestá. (Pro. 16:32) Klaru ku no ta fásil pa semper mustra suavedat. P’esei, laga nos wak (1) kon pa mustra suavedat, (2) kon pa kontestá na un manera suave ora hende kuestioná nos kreensianan i (3) si nos ta un mayor, kon pa yuda nos yunan defendé nan fe na un manera suave.

3. Dikon nos por bisa ku suavedat ta un punto fuerte i no un debilidat? (2 Timoteo 2:​24, 25)

³ Un hende ku ta mustra suavedat no ta débil, mas bien e ta un hende fuerte. Pa keda kalmu den un situashon difísil, ta eksigí hopi forsa. Suavedat ta un aspekto di e “fruta” di Dios su spiritu santu. (Gal. 5:​22, 23) Tin biaha tabata usa e palabra griego pa “suavedat” pa deskribí un kabai salbahe ku hende a mansa. E kabai a kambia di un kabai salbahe pa un kabai mansu. Mansu, pero fuerte. Kiko awor di nos? Kon nos por mustra suavedat i na mes momento ta fuerte? Nos no por logra esei riba nos mes. Nos tin ku pidi Yehova yudansa di su spiritu santu pa asina nos por siña mustra e bunita kualidat akí. Hopi di nos rumannan a hasi esei. Por ehèmpel, nan a mustra suavedat ora hende kier a diskutí ku nan, i esei a laga otro hende haña bon impreshon di Testigunan di Yehova. (Lesa 2 Timoteo 2:​24, 25.) Kiko bo por hasi pa suavedat bira un di bo puntonan fuerte?

4. Kiko nos ta siña di Ísak?

⁴ Hopi relato den Beibel ta mustra ku suavedat ta masha importante. Por ehèmpel, ora ku Ísak a bai biba na Gérar, e filisteonan ku tabata biba einan a kuminsá envidi’é i a dèmpel e posnan ku e sirbidónan di su tata a koba. Na lugá di pleita tokante su posnan, Ísak a muda bai otro kaminda i koba otro pos. (Gén. 26:​12-18) Pero e filisteonan a bisa ku e awa ei tambe tabata di nan. Apesar di tur esei, Ísak a keda kalmu. (Gén. 26:​19-25) Kon bin e por a reakshoná asina asta ora ku e filisteonan tabata purba di busk’é problema? Sin duda el a siña esei for di su tata Ábraham, kende semper tabata buska pas, i tambe for di su mama Sara, kende tabatin “un spiritu suave i trankil.”—1 Ped. 3:​4-6; Gén. 21:​22-34.

5. Kiko ta mustra ku mayornan por siña nan yunan e importansia di mustra suavedat?

⁵ Mayornan, boso tambe por siña boso yunan e importansia di mustra suavedat. Esei ta loke mayornan di Maxence, di 17 aña, a hasi. Tantu na skol komo den sirbishi Maxence mester a trata ku hende basta ofensivo. Ku pasenshi, su mayornan a yud’é siña mustra suavedat. Nan a bisa: “Nos yu a komprondé awor ku ta fásil pa reakshoná na un manera violento òf rabiá. Pero un hende ku realmente ta fuerte ta keda kalmu.” Suavedat a bira un di Maxence su puntonan fuerte, anto esei ta di elogiá.

6. Kon orashon por yuda nos mustra suavedat?

⁶ Kiko nos por hasi ora hende papia malu di Yehova òf hasi chèrchi di Beibel? Lo ta bon pa nos pidi Yehova su spiritu santu i sabiduria pa kontestá na un manera suave. Pero, kiko si despues nos realisá ku nos no a reakshoná na e mihó manera? Den e kaso ei, nos por bolbe hasi orashon i pensa kon nos lo por reakshoná mihó e siguiente biaha. Yehova lo duna nos su spiritu santu pa dominá nos mes i mustra suavedat.

7. Dikon nos ta bisa ku kòrda sierto teksto di Beibel for di kabes por yuda nos frena nos lenga den situashonnan difísil? (Proverbionan 15:​1, 18)

⁷ Tin hopi teksto di Beibel ku por yuda nos frena nos lenga ora esei ta nesesario, i Dios su spiritu santu por yuda nos kòrda nan. (Huan 14:26) Por ehèmpel, e prinsipionan ku tin den e buki di  Proverbionan por animá nos pa mustra suavedat. (Lesa Proverbionan 15:​1, 18.) Tambe e ta mustra nos dikon ta bon pa keda kalmu den situashonnan tenso.—Pro. 10:19; 17:27; 21:23; 25:15.

8. Kiko nos tin ku tene na mente ora un hende kuestioná nos kreensianan?

⁸ Perspikasia ta ora nos purba di komprondé un situashon. (Pro. 19:11) Perspikasia lo yuda nos dominá nos mes ora hende kuestioná nos kreensianan. Algun pregunta òf remarke ku hende ta hasi ta manera eisberg, e parti mas grandi ta bou di awa i bo no ta mir’é. P’esei promé ku nos kontestá, ta bon pa kòrda ku mayoria di biaha nos no sa dikon e hende a hasi e pregunta òf remarke ei.—Pro. 16:23.

9. Kon Gídeòn a mustra perspikasia i suavedat ora el a trata ku e hòmbernan di e tribu di Efraím?

⁹ Ban wak kon Gídeòn a reakshoná ora ku e hòmbernan di e tribu di Efraím a kuestion’é. Nan a bini bon rabiá riba Gídeòn i a puntr’é dikon e no a manda yama nan mas promé pa bringa kontra Israel su enemigunan. Kiko eigenlijk tabatin tras di tur e rabiamentu ei? Kisas nan a sinti nan ofendí? Sea kual sea e  kaso, Gídeòn a purba di komprondé pakiko nan tabata asina rabiá i a kontestá nan ku suavedat. Beibel ta bisa ku “ora ku el a papia asina ku nan, nan a kalma.”—Hues. 8:​1-3.

10. Kiko lo yuda nos reakshoná bon ora un hende kuestioná nos kreensianan? (1 Pedro 3:15)

¹⁰ Kiko lo bo hasi su un mucha na skol òf un kolega puntra bo dikon bo ta obedesé e normanan di Beibel? Klaru ku, lo bo hasi bo bèst pa defendé bo kreensianan, i na mes momento respetá e hende su opinion. (Lesa 1 Pedro 3:15.) Pues na lugá di mira e pregunta komo un krítika òf atake, mir’é komo un chèns pa haña sa loke realmente ta preokupá e hende. Sin importá e motibu pakiko el a hasi e pregunta, nos tin ku kontestá na un manera suave i amabel. Kisas esei lo pon’é pensa mas tokante su opinion. Nos meta semper mester ta pa reakshoná na un manera amabel, asta si e hende papia brutu òf hasi chèrchi.—Rom. 12:17.

11-12. Kiko nos mester tene kuenta kuné promé ku nos kontestá un pregunta difísil? Duna un ehèmpel. (Wak e plachi.)

¹¹ Por ehèmpel, kisas un kolega ta puntra nos, dikon nos no ta selebrá hasimentu di aña. Promé ku nos kontestá, puntra nos mes: ‘E ta pensa ku nos no tin mag di hasi kos leuk? Òf e ta preokupá ku nos ta daña e ambiente na trabou?’ Kisas nos por kuminsá bis’é ku nos ta apresiá ku e ta interesá den su koleganan i sigur’é ku nos tambe gusta pa tin un bon ambiente na trabou. Esei kisas por habri kaminda pa un kòmbersashon agradabel tokante loke Beibel ta indiká tokante hasimentu di aña.

¹² Nos por hasi algu paresido ora nos haña otro preguntanan difísil. Por ehèmpel, un mucha na skol por bisa ku Testigunan di Yehova mester kambia nan punto di bista tokante homoseksualidat. E ta bisa esei pasobra e tin un idea robes di loke Testigunan di Yehova ta kere? Òf, lo e tin un amigu òf famia homoseksual? E ta pensa ku nos ta odia hende homoseksual? Kisas nos por bis’é ku nos ta amabel ku tur hende i ku nos ta respetá e derecho ku kada hende tin di tuma nan mes desishon. b (1 Ped. 2:17) Podisé despues di esei, nos lo haña chèns di splik’é loke Beibel ta bisa i kon e guianan ku e ta duna ta yuda nos tin un bida felis.

13. Kon lo bo por yuda un hende ku ta bisa ku ta ridíkulo pa kere den Dios?

¹³ Kiko awor si un hende tin un punto di bista fuerte tokante un asuntu? Nos no mester bula asumí ku nos sa kaba kiko e ta kere. (Tito 3:2) Por ehèmpel, kiko si un mucha na skol bisa ku ta ridíkulo pa kere den Dios. Lo bo konkluí mesora ku e ta kere den evolushon i sa hopi tokante dje? Kisas ta ripití e ta ripití kosnan ku el a skucha. P’esei na lugá di diskutí tokante evolushon, lo ta mihó pa dun’é algu ku lo lag’é pensa. Kiko asina? Kisas bo por mand’é link di un artíkulo òf vidio riba jw.org ku ta papia tokante kreashon. Anto ken sa, kisas despues lo e ta dispuesto pa papia tokante loke bo a mand’é. Ora nos trata hende ku rèspèt, esei por habri kaminda ku nan lo haña gana di ke sa mas tokante loke Beibel ta bisa.

14. Kon Niall a hasi bon uso di nos website pa yuda un mucha den su klas ku tabatin idea robes tokante Testigunan di Yehova?

 ¹⁴ Un hóben ku yama Niall a usa nos website pa mustra ku loke hende ta bisa tokante Testigunan di Yehova, no ta bèrdat. El a bisa: “Tabatin un mucha den mi klas ku semper tabata bisa mi ku mi no ta kere den siensia pasó mi ta bai tras di un buki ku ta yen di kuenta na lugá di sigui e pruebanan.” Ora ku e no tabata laga Niall splika su kreensianan, Niall tabata bis’é pa subi riba nos website jw.org i bai na e sekshon “Siensia i Beibel.” Mas despues, Niall a ripará ku e mucha muy probablemente a lesa e informashon i esei a hasié mas fásil pa Niall papia kuné tokante e orígen di bida. Nos tambe por tin e mesun éksito.

15. Kiko mayornan por hasi pa yuda nan yunan kontestá na un manera suave?

¹⁵ Mayornan por siña nan yunan kon pa kontestá na un manera suave ora hende kuestioná nan kreensianan. (Sant. 3:13) Tin mayornan ta usa nan Adorashon Komo Famia pa tene seshon pa train nan yunan kon pa hasi esei. Nan ta pensa ki tema e yunan por haña nan kuné na skol, ta trat’é ku e yunan i huntu nan ta buska loke e yunan lo por bisa. Nan meta ta pa siña nan yunan kon pa papia na un manera kalmu i trankil.—Wak e kuadro “ Train ku Bo Famia.”

16-17. Dikon train promé ku kontestá un hende por yuda hóbennan?

¹⁶ Ora boso train komo famia, bo yunan lo no djis sa kon pa splika otro hende tokante nan kreensianan pero tambe lo e yuda nan konvensé nan mes ku loke  Beibel ta bisa ta e bèrdat. E seri “Loke Hóben Sa Puntra” riba jw.org tin blachi di tarea pa tiner, ku ta diseñá pa fortalesé fe di hóbennan i yuda nan splika nan kreensianan ku nan mes palabranan. Si inkluí e seri akí den boso Adorashon Komo Famia, boso tur lo por siña kon pa defendé boso fe na un manera suave i ku ta lanta interes.

¹⁷ Un hóben ku yama Matthew a bisa ku durante Adorashon Komo Famia su mayornan tabata tene seshon di train huntu kuné. El a konta ku su mayornan tabata skohe temanan ku por bin dilanti den klas. El a bisa: “Nos tabata sinta pensa ki situashonnan por presentá, djei nos tabata hasi investigashon i despues nos tabata train. Ora mi tin e motibunan pa mi kreensianan bon na mi mente, mi ta sinti mi sigur i ta mas fásil pa mi mustra suavedat.”

18. Kiko Kolosensenan 4:6 ta siña nos?

¹⁸ Asta ora nos splika kosnan na un manera kla i konvinsente, no ta tur hende lo ke aseptá loke nos bisa. Pero si nos papia ku takto i na un manera suave, esei por yuda. (Lesa Kolosensenan 4:6.) Papia tokante nos kreensianan ta un tiki manera ora dos hende ta tira bala pa otro. Nos por tira e bala na un manera suave òf ku tur nos forsa. Ora nos tir’é na un manera suave, ta mas fásil pa e otro persona fang’é i sigui hunga. Asina tambe, si nos papia ku takto i na un manera suave, chèns ta grandi ku e hende lo tin mas gana di skucha i sigui ku e kòmbersashon. Klaru ku si e úniko kos ku un hende ke hasi ta diskutí i hasi chèrchi di nos kreensianan, nos no tin ku sigui ku e kòmbersashon. (Pro. 26:4) Pero mayoria di hende no ta asina. Hopi di nan kisas lo skucha nos.

19. Kiko mester motivá nos pa mustra suavedat ora nos ta defendé nos fe?

¹⁹ Ta bisto ku ta bale la pena pa nos mustra suavedat. Pidi Yehova duna bo forsa pa bo keda kalmu ora bo tin ku kontestá un hende ku kuestioná òf krítika bo kreensianan. Kòrda ku bo kontesta suave lo evitá ku un diferensia di opinion ta kaba den diskushon. Anto ora bo kontestá na un manera amabel i ku rèspèt, esei por pone ku algun hende por kambia nan opinion tokante nos i tokante Beibel. P’esei, sea “semper kla pa defendé” bo kreensianan “na un manera suave i ku rèspèt profundo.” (1 Ped. 3:15) I laga suavedat bira bo punto fuerte!