1. Kon Pedro a reakshoná ora Hesus a hasi un milager pa yud’é kue hopi piská?

 PEDRO a pasa henter anochi riba laman pero e no a kue nada. Diripiente Hesus a bis’é: “Hala bai afó kaminda ta hundu i tira boso redanan pa kue poko piská.” (Luk. 5:4) Aunke Pedro a duda ku lo e kue algu, el a hasi loke Hesus a pidié. Nan a kue asina tantu piská ku e redanan a kuminsá kibra. Pedro i tur esnan huntu kuné a “keda babuká.” Nan a realisá ku tabata un milager. Pedro a sklama: “Bai for di mi, Señor, pasobra mi ta un hòmber pekadó.” (Luk. 5:​6-9) Parse ku Pedro a sinti ku e no tabata digno pa ta den presensia di Hesus.

2. Dikon ta bale la pena pa nos analisá Pedro su ehèmpel?

² Pedro tabatin rason ora el a bisa ku e tabata “un hòmber pekadó.” Beibel ta indiká ku vários biaha Pedro a bisa i hasi kos ku despues el a lamentá. Esei tambe a yega di pasa ku bo? Bo tin tempu ta lucha ku un debilidat òf pa mehorá algu den bo karakter? Si ta asina, no desanimá. E ehèmpel di Pedro lo ta di gran yudansa pa bo. Pensa riba esaki: Yehova por a keda sin menshoná e erornan di Pedro den Beibel. Pero el a inkluí nan pa siña nos algu. (2 Tim. 3:​16, 17) Ora nos lesa tokante tur e kosnan ku Pedro a lucha kuné, nos ta mira ku Yehova no ta ferwagt  perfekshon for di nos. Mas bien loke e ke ta pa, apesar di nos debilidatnan, nos perseverá i no entregá.

3. Dikon nos mester perseverá?

³ Dikon nos tin ku perseverá? Pensa riba esaki: Mas bo hasi algu, mas mihó bo ta bira den dje. Por ehèmpel: Por tuma un par di aña pa un hende siña toka un instrumènt bon. Klaru, durante e tempu ei, lo e hasi hopi fout. Pero e ta sigui praktiká i ta mehorá. Asta ora e por toka e instrumènt hopi bon, ratu ratu lo e hasi fout. Pero e no ta entregá. E ta keda praktiká pa mehorá. Asina tambe por pasa ora nos ta lucha ku un sierto debilidat. Asta ora nos sinti ku nos a logra domin’é, nos por haña un rekaida. Pero nos lo sigui traha riba nos debilidat. Nos tur ta bisa òf hasi kos ku despues nos ta lamentá; sinembargo si nos no entregá, Yehova lo yuda nos sigui mehorá. (1 Ped. 5:10) Laga nos wak kon Pedro a sigui padilanti i no a entregá. E kompashon ku Hesus a mustra na Pedro por yuda nos sigui sirbi Yehova.

4. Manera nos ta lesa na Lukas 5:​5-10, kiko Pedro a bisa di su mes, i kon Hesus a trankilis’é?

⁴ Beibel no ta bisa dikon Pedro a yama su mes “un hòmber pekadó” ni na ki pikánan e tabata referí. (Lesa Lukas 5:​5-10.) Pero kisas el a hasi algun eror basta grave. Hesus por a sinti ku Pedro tabatin miedu. Kisas Pedro a pensa ku e no tabata bon sufisiente. Pero Hesus tabata konvensí ku Pedro por a keda fiel. P’esei, el a bis’é pa “no tene miedu mas.” Hesus su konfiansa den Pedro tabatin un impakto grandi riba Pedro su bida. Mas despues, Pedro i su ruman Andres a laga e trabou di piskamentu para i a djòin Hesus den e trabou di prediká. Yehova a bendishoná nan masha hopi mes pa nan desishon.—Mar. 1:​16-18.

5. Ki bendishonnan Pedro a haña debí ku el a vense su miedunan i a sigui Hesus?

⁵ Komo siguidó di Kristu, Pedro a pasa den hopi eksperensia maravioso. El a mira Hesus kura hende malu, saka demoño i asta lanta hende for di morto. b (Mat. 8:​14-17; Mar. 5:​37, 41, 42) Tambe e tabata testigu di un vishon tokante e gloria ku Hesus lo tin den Dios su Reino. Nunka mas Pedro lo a lubidá loke el a  mira. (Mar. 9:​1-8; 2 Ped. 1:​16-18) Sí, Pedro a mira kosnan ku nunka lo el a imaginá. Lo e tabata hopi kontentu ku e no a laga su sintimentunan negativo pon’é pèrdè e bendishonnan ei!

6. Ta mesora Pedro a logra vense su debilidatnan? Splika.

⁶ Apesar di tur loke Pedro a mira i tende, tòg ainda e mester a sigui lucha ku su debilidatnan. Laga nos wak algun ehèmpel. Ora Hesus tabata splika su disipelnan ku e tabatin ku sufri i muri manera Skritura a profetisá, Pedro a skuale. (Mar. 8:​31-33) Vários biaha Pedro i e otro apòstelnan tabata diskutí tokante ken ta esun di mas grandi. (Mar. 9:​33, 34) Anto e anochi promé ku Hesus a muri, diripiente asina Pedro a saka su spada kita orea di un hòmber afó. (Huan 18:10) Anto e mesun anochi ei, el a laga miedu poderá di dje i tres biaha el a nenga ku e konosé su amigu Hesus. (Mar. 14:​66-72) Esei a pone ku despues Pedro a yora amargamente.—Mat. 26:75.

7. Despues ku Hesus a resusitá, ki oportunidat el a duna Pedro?

⁷ Pedro a keda hopi desepshoná ku su mes. Pero Hesus sí no a mir’é komo un kaso pèrdí. Despues ku Hesus a resusitá, el a duna Pedro oportunidat pa konfirmá su amor p’e. El a pidi Pedro pa ta un wardadó humilde pa su karnénan. (Huan 21:​15-17) Pedro tabata kontentu pa hasi loke Hesus a pidié. E tabata na Herúsalèm riba Pentekòste i entre e proménan ku a ser ungí ku spiritu santu.

8. Ki eror grave Pedro a hasi na Antiokia?

⁸ Asta despues ku Pedro a ser ungí, e mester a sigui lucha ku su debilidatnan. Na aña 36 D.K., el a mira kon Yehova a ungi Kornelio, kende no tabata hudiu, ku spiritu santu. Esei a mustra bon kla ku “Dios no ta hasi distinshon di persona” i ku hende no-hudiu tambe por a forma parti di e kongregashon kristian. (Echo. 10:​34, 44, 45) For di e momento ei, Pedro no tabatin niun problema pa kome ku hende no-hudiu; algu ku hamas lo el a hasi promé. (Gal. 2:12) Pero, algun kristian hudiu tabata pensa ku hudiunan no tabatin mag di kome ku hende no-hudiu. Anto ora algun di e kristiannan ku tabata pensa asina ei a bini Antiokia, Pedro a stòp di kome ku su rumannan no-hudiu. Probablemente el a hasi esei pasobra e tabatin miedu di ofendé e kristiannan hudiu. Ora Apòstel Pablo a mira Pedro su komportashon, el a korigié dilanti di tur esnan presente. (Gal. 2:​13, 14) Apesar di e eror akí, Pedro no entregá, el a sigui padilanti. Kiko a yud’é?

9. Kon Huan 6:68 i 69 ta mustra ku Pedro tabata leal?

⁹ Pedro tabata leal i no a laga nada strob’é di sigui Hesus. Un di e okashonnan ku el a mustra su lealtat tabata ora Hesus a bisa algu ku su disipelnan no a komprondé. (Lesa Huan 6:​68, 69.) Sin buska pa komprondé òf warda splikashon, nan a stòp di sigui Hesus. Pero Pedro sí no a bai. El a bisa dilanti di tur hende ku ta Hesus so “tin e palabranan ku ta hiba na bida eterno.”

10. Kon Hesus a mustra ku el a keda ku konfiansa den Pedro? (Wak e plachi.)

¹⁰ Hesus nunka a pensa ‘te akí m’a yega ku Pedro.’ E último anochi di Hesus su  bida aki riba tera, e tabata sa ku Pedro i e otro apòstelnan lo a bandon’é. Asina mes, Hesus a mustra konfiansa ku despues Pedro lo bolbe i lo keda fiel. (Luk. 22:​31, 32) Hesus tabata sa ku “e spiritu tin e boluntat, ma e karni ta débil.” (Mar. 14:38) P’esei, asta ora Pedro a nenga ku e konos’é, Hesus no a legumai e. Despues ku Hesus a resusitá, el a aparesé na Pedro, probablemente ora no tabatin niun otro hende. (Mar. 16:7; Luk. 24:34; 1 Kor. 15:5) Imaginá ki un animashon esei lo tabata pa Pedro, kende tabata hopi kibrá.

11. Kon Hesus a sigurá Pedro ku Yehova lo sòru p’e?

¹¹ Hesus a sigurá Pedro ku Yehova lo sòru pa su nesesidatnan. Despues ku Hesus a resusitá, un biaha mas el a laga Pedro i e otro apòstelnan kue un kantidat grandi di piská. (Huan 21:​4-6) Sin duda, e milager ei a sigurá Pedro ku Yehova fásilmente por kubri tur su nesesidatnan básiko. Kisas na e momento ei Pedro lo a kòrda Hesus su palabranan ku Yehova lo sòru pa esnan ku “sigui buska . . . promé e Reino.” (Mat. 6:33) Tur esei a yuda Pedro pone e trabou di prediká na promé lugá den su bida i no su negoshi di piskamentu. Riba Pentekòste di aña 33, el a yuda míles di hende aseptá e bon notisia. (Echo. 2:​14, 37-41) Despues, el a yuda tantu samaritano komo hende no-hudiu bira kristian. (Echo. 8:​14-17; 10:​44-48) Ta bisto ku Yehova a usa Pedro pa yuda tur sorto di hende forma parti di e kongregashon.

12. Kon e ehèmpel di Pedro ta yuda nos si nos tin añanan ta lucha ku e mesun debilidat?

¹² Yehova por yuda nos perseverá. Pero, no semper ta fásil pa perseverá, foral si nos tin añanan ta lucha ku e mesun debilidat. Tin biaha, por parse ku nos debilidatnan ta mas kompliká ku esnan di Pedro. Pero Yehova por duna nos e forsa pa no entregá i sigui padilanti. (Sal. 94:​17-19) Por ehèmpel, tabatin un ruman ku hopi aña promé ku el a haña e bèrdat, tabata homoseksual. El a bandoná e bida inmoral ei kompletamente. Pero tin biaha, e ta lucha ku mal deseo. Kiko ta yud’é sigui lucha? El a konta:  “Yehova ta duna mi forsa. Danki na su spiritu santu . . . , m’a siña ku un hende por biba na e manera ku Yehova ke pa nos biba . . . Apesar di mi imperfekshonnan, Yehova ta permití mi sirbié i ta sigui duna mi forsa.”

13. Kon nos por imitá Pedro? (Echonan 4:​13, 29, 31) (Wak e plachi.)

¹³ Manera nos a mira, e miedu ku Pedro tabatin di hende a lag’é faya mas ku un bes. Pero el a pidi Yehova yudansa i a logra aktua ku kurashi. (Lesa Echo. 4:​13, 29, 31.) Nos tambe por vense nos miedunan. Wak kon Horst, un hóben ku a biba na Alemania den tempu di nazi, a logra esei. Mas ku un biaha, el a sede na preshon na skol i a bisa “Heil Hitler!” Ora el a konta su mayornan, nan no a skuale. Mas bien, nan a resa kuné pa pidi Yehova dun’é kurashi. Ku yudansa di su mayornan i konfiando den Yehova, ku tempu Horst tabatin e forsa nesesario pa para firme. Despues el a konta: “Yehova nunka a bandoná mi.” c

14. Kon ansianonan por animá rumannan ku ta desanimá?

¹⁴ Yehova i Hesus nunka lo no fada ku nos. Despues ku Pedro a nenga Hesus, el a hañ’é ku un desishon krusial den su bida. Lo e legumai di ta un disipel di Kristu? Òf lo e perseverá? Hesus a supliká Yehova pa Pedro su fe no debilitá. Hesus a bisa Pedro ku el a resa p’e i ku e tabatin sigur ku mas despues Pedro lo fortalesé su rumannan. (Luk. 22:​31, 32) E palabranan di Hesus lo a animá Pedro kada biaha ku el a kòrda riba nan! Nos tambe lo haña nos ku desishonnan krusial den nos bida. Na e momentonan  ei Yehova kisas lo usa wardadónan, esta, ansianonan, kende ku kariño lo duna nos e animashon ku nos mester pa keda fiel. (Efe. 4:​8, 11) Esei ta loke Paul ta purba di hasi. E tin hopi aña komo ansiano. Ora un ruman ta sinti ku ta mihó e legumai sirbi Yehova, Paul ta pidié pa kont’é kon el a haña e bèrdat. Djei e ta sigurá e ruman ku Yehova nunka lo no fada kuné pasó Yehova stim’é i ta leal. Paul a bisa: “M’a mira hopi ruman desanimá perseverá ku yudansa di Yehova.”

15. Kon e ehèmpel di Pedro i di Horst ta mustra ku e palabranan di Mateo 6:33 ta sierto?

¹⁵ Si nos pone Yehova su sirbishi na promé lugá den nos bida, Yehova lo kubri nos nesesidatnan básiko, meskos ku el a hasi pa Pedro i e otro apòstelnan. (Mat. 6:33) Despues di Segundo Guera Mundial, Horst, menshoná na paragraf 13, a plania pa kuminsá traha pionero. Pero e tabata masha pober i no tabatin sigur ku lo e por gana sufisiente pa mantené su mes komo pionero. Kiko lo e hasi? Wèl, el a disidí di pone Yehova na prueba. Su kongregashon tabatin bishita di sirkuito, pues el a sali tur dia den sirbishi. Ora e siman a kaba, Horst a keda boka habrí ora sirkuito a dun’é un ènvelòp di un ruman ku kier a keda anónimo. E sèn den e ènvelòp tabata sufisiente pa Horst traha pionero pa vários luna. Horst a mira e regalo akí komo konfirmashon ku Yehova lo sòru p’e. Anto for di e tempu ei Horst a pone Reino na promé lugá den su bida.—Mal. 3:10.

16. Dikon ta bale la pena pa analisá e ehèmpel i kartanan di Pedro?

¹⁶ Pedro a bisa Hesus: “Bai for di mi.” Nos por imaginá ku Pedro lo a keda hopi kontentu ku Hesus no a hasi esei. Kristu a sigui train Pedro pa asina e bira un apòstel fiel i un ehèmpel pa kristiannan. I nos por siña hopi lès balioso for di e entrenamentu ku Pedro a haña. Pedro a menshoná algun di e lèsnan ei i otro kosnan den e dos kartanan den Beibel ku el a manda pa e kongregashonnan di promé siglo. E siguiente artíkulo lo trata algun di e puntonan mas importante di e kartanan ei i kon nos por apliká nan awe.