1-2. Dikon sirbidónan di Yehova ta felis? (Santiago 1:​22-25)

 TANTU Yehova komo su Yu stimá ke pa nos ta felis. E eskritor di Salmo 119:2 a bisa: “Felis ta hende ku ta hasi kaso di e rekordatorionan di Dios, sí, ku ta buska Dios ku henter nan kurason.” Anto Hesus a bisa: “Felis ta esnan ku ta tende e palabra di Dios i ta kumpli kuné!”—Luk. 11:28.

² Sirbidónan di Yehova ta felis. Dikon? Tin hopi motibu ku ta laga nos sinti nos asina, pero un motibu importante ta ku nos ta lesa Beibel tur dia i ta purba di apliká loke nos a siña.—Lesa Santiago 1:​22-25.

3. Ki benefisio nos ta haña ora nos apliká loke nos lesa den Beibel?

³ Ora nos “bira hende ku ta kumpli ku e palabra,” nos ta haña hopi benefisio. Por ehèmpel, nos ta hasi Yehova kontentu anto esei ta hasi nos felis. (Ekl. 12:13) Ademas, ora nos sigui e konsehonan di Beibel, nos bida di famia ta mehorá i nos lo sera mas ku nos rumannan den kongregashon. Kasi sigur esei ta e kaso den bo mes bida. Tambe, nos lo spar nos mes di hopi problema ku hende ku no ta obedesé Yehova su normanan ta haña nan kuné. Ta manera Rei David a bisa kasi na final di un kantika ku a menshoná Yehova su lei- , òrdu- i desishonnan: “Hende ku obedesé nan ta haña gran rekompensa.”—Sal. 19:​7-11.

4. Dikon no semper ta fásil pa apliká loke nos lesa den Beibel?

⁴ Pa ta sinsero, no semper ta fásil pa apliká loke nos  ta lesa den Beibel. Pero pa kon drùk ku nos por ta, nos tin ku saka tempu pa lesa i studia Beibel pa asina komprondé loke Yehova ke pa nos hasi. P’esei, nos lo pasa den algun sugerensia ku por yuda nos lesa Beibel tur dia. Tambe, nos lo wak kiko lo yuda nos pensa riba loke nos a lesa i wak maneranan pa usa loke nos a siña den nos bida.

APARTÁ TEMPU PA LESA BEIBEL

5. Kiko ta algun di e kosnan ku ta hasi nos bida basta drùk?

⁵ Mayoria di Yehova su sirbidónan tin un bida basta drùk. Gran parti di nos tempu ta bai na vários kos ku Beibel ta bisa ku ta importante. Por ehèmpel, mayoria di nos tin ku traha pa mantené nos mes i nos famia. (1 Tim. 5:8) Hopi ruman ta kuida nan famia ku ta malu òf di edat. Anto nos tur tin ku kuida nos mes salú, algu ku tambe ta tuma tempu. Ademas, nos tin asignashon den kongregashon. Un di e kosnan di mas importante ku nos tin ku hasi ta di prediká. Ku tur e kosnan ei di hasi, kisas bo ta puntra bo mes: ‘Ta kon mi ta kuminsá apartá tempu pa lesa Beibel tur dia, meditá riba loke m’a lesa i aplik’é?’

6. Kon bo por hasi sigur di lesa Beibel? (Wak e plachi.)

⁶ Pa nos komo kristian, lesamentu di Beibel ta un di “e kosnan mas importante.” P’esei, nos mester hasi sigur di les’é. (Flp. 1:10) E promé salmo ta kuminsá bisa ku un hende felis “ta stima lei di Yehova mashá, i e ta les’é i meditá riba dje di dia i anochi.” (Sal. 1:​1, 2) Pues, ta bisto ku esei ke men ku nos mester apartá tempu pa lesa Beibel. Ki ora di dia ta e mihó momento pa lesa Beibel? Esei ta dependé di kada persona. Pero loke ta importante ta pa nos skohe un ora ku lo yuda nos lesa Beibel tur dia. Un ruman ku yama Victor a bisa: “Mi gusta lesa Beibel mainta.  Aunke mi no ta un hende ku gusta lanta mardugá, durante e oranan ei tin ménos kos pa distraí mi. Mi mente ta fresku i mi por focus mihó.” Abo tambe ta meskos ku Victor? Puntra bo mes: ‘Ki ora ta e mihó momento pa ami lesa Beibel?’

PENSA RIBA LOKE BO A LESA

7-8. Kiko por stroba nos di saka e máksimo benefisio for di loke nos lesa? Duna un ilustrashon.

⁷ Despues ku nos a kaba di skohe un momento pa lesa Beibel tur dia, nos tin ku tene kuidou pa nos no lesa djis pa lesa. Nos tur a yega di lesa algu i despues lubidá loke nos a lesa. Esei por pasa tambe ora nos ta lesa Beibel. Kisas nos meta ta pa tur dia lesa un sierto kantidat di kapítulo. Esei ta un bon meta. Ta masha importante pa pone meta i hasi esfuerso pa kumpli kuné. (1 Kor. 9:26) Pero, si nos ke saka máksimo benefisio for di loke nos a lesa, nos tin ku hasi mas ku djis lesa Beibel.

⁸ Pensa riba e siguiente ilustrashon: Mata mester di áwaseru pa krese i bona. Pero si áwaseru kai demasiado den un periodo kòrtiku, e tera ta bira muchu saturá. Den e situashon ei, mas áwaseru lo no ta di niun benefisio. Ta mihó pa awa kai pokopoko ya asina e tera tin tempu pa apsorbá e awa ku a kai i e matanan por benefisiá di e awa. Asina tambe nos tin ku evitá di lesa Beibel asina lihé ku nos no tin tempu pa apsorbá loke nos a lesa te pa nos kòrd’é i us’é den nos bida.—Sant. 1:24.

9. Kiko nos tin ku hasi si nos ripará ku nos spit di lesa ta muchu haltu?

⁹ Ban bisa bo ta lesando Beibel anto bo ta ripará ku bo spit di lesa ta muchu haltu. Ki bo tin ku hasi? Baha bo spit. Hasi esfuerso pa pensa riba loke bo ta lesando òf a kaba di lesa. Esei no ta dje kompliká ei. Bo por sea rèk e tempu ku bo a apartá pa studia pa asina inkluí tempu pa pensa riba loke bo a lesa, òf bo por lesa ménos versíkulo i usa e  tempu ku a sobra pa pensa riba loke bo a lesa. Victor, menshoná na paragraf 6, a bisa: “Mi no ta lesa hopi versíkulo, kisas mi ta yega un kapítulo. Komo ku mi ta hasi mi lesamentu mainta trempan, henter dia mi por pensa riba loke m’a lesa.” No ta importá kuantu versíkulo òf kapítulo nos skohe pa lesa. Loke ta importante ta pa nos lesa di un manera ku ta permití nos pensa riba loke nos ta lesando.—Sal. 119:97; wak e kuadro “ Pregunta pa Pensa Riba.”

10. Duna un ehèmpel kon pa apliká loke bo ta lesa. (1 Tesalonisensenan 5:​17, 18)

¹⁰ Sin importá na ki momento bo ta lesa Beibel i kuantu tempu bo ta tuma, hasi sigur di buska maneranan ku bo por apliká loke bo ta lesa. Segun ku bo ta lesa un pida di Beibel puntra bo mes: ‘Kon mi por usa e informashon akí awe òf den futuro?’ Por ehèmpel, laga nos bisa ku den bo lesamentu tin 1 Tesalonisensenan 5:17 i 18. (Les’é.) Despues di a lesa e dos versíkulonan ei, stòp i pensa riba bo orashonnan. Puntra bo mes: ‘Mi ta hasi orashon na tur momento? Mi ta konta Yehova tur kos? Mi ta bisa Yehova e kosnan ku mi ta gradisidu p’e?’ Por ta, na e momento ei bo ta kòrda riba tres kos spesífiko ku bo ke yama Yehova danki p’e. E ratu ei ku bo a tuma pa pensa riba loke bo a lesa, lo yuda bo skucha loke Yehova ke bisa bo i kuminsá usa esei den bo bida. Anto si tur dia bo usa loke bo a lesa den Beibel den bo bida, ku tempu lo bo bira un mihó sirbidó di Yehova. Pero, kiko awor si bo mira ku bo tin yen ko’i traha riba dje?

PONE METANAN RASONABEL

11. Dikon kisas bo por sinti bo desanimá? Duna un ehèmpel.

¹¹ Ora bo lesa Beibel, tin biaha bo por sinti bo desanimá ora bo ripará ku tin masha hopi kos ku bo tin ku traha riba dje. Por ehèmpel, imaginá ku riba e promé dia bo a lesa ku ta malu pa mustra faboritismo. (Sant. 2:​1-8) Bo ta mira ku bo por mehorá e manera ku bo ta trata otro hende, pues bo ta disidí di hasi kambio. Anto esei ta masha bon! E siguiente dia bo ta lesa algun versíkulo ku ta mustra ku ta importante pa dominá nos lenga. (Sant. 3:​1-12) E ora ei bo ta realisá ku tin biaha bo a bisa kos ku no tabata masha positivo. Pues, bo ta pone meta pa bisa kosnan mas positivo i animante. Awor e di tres  dia bo lesamentu ta bai tokante no ta amigu di mundu. (Sant. 4:​4-12) Bo ta komprondé ku bo mester paga mas tinu na loke bo ta lesa, wak i skucha. Pa e di kuater dia kisas bo ta sinti ku ta hopi difísil pa bo traha riba tur e kosnan ei.

12. Dikon bo no mester desanimá si bo lesamentu di Beibel ta laga bo mira ku bo tin kos di drecha? (Wak e nota.)

¹² Si bo ta mira ku bo tin ku traha riba vários kualidat kristian, no desanimá. Bo konsenshi ta proba ku bo ta humilde i ku bo ta lesa Beibel ku e aktitut korekto i ta sinsero ku bo mes. a Kòrda tambe ku bistimentu di “e personalidat nobo” ta un proseso kontinuo. (Kol. 3:10) Kiko lo yuda bo sigui kumpli ku e Palabra di Dios?

13. Kon bo por traha riba kualidatnan ku bo tin ku drecha? (Wak e plachi.)

¹³ Na lugá di purba di traha riba tur e kosnan ku bo tin ku drecha pareu, purba di traha riba un òf dos. (Pro. 11:2) Purba esaki: Traha un lista di e kualidatnan kristian ku bo tin ku traha ariba, skohe un òf dos di nan, traha riba nan promé anto laga sobrá pa mas despues. Pero awor e pregunta ta: Unda pa kuminsá?

14. Unda bo por kuminsá?

¹⁴ Bo por skohe pa kuminsá ku un kualidat kristian ku bo no tin ku traha asina hopi riba dje òf bo por skohe un ku bo tin ku hinka mas tempu i esfuerso den dje. Unabes bo a disidí riba ki kualidat bo ta bai traha, hasi investigashon tokante dje den nos publikashonnan. Kisas bo por usa Watchtower  BIBLIOTEKA ONLINE òf Guia pa Buska Informashon den e Publikashonnan di Testigunan di Yehova. Pidi Yehova pa “tantu e deseo komo e poder pa hasi tur loke ta agrad’é.” (Flp. 2:13) Despues purba di apliká loke bo a siña. Ora bo nota ku bo ta hasiendo progreso, lo bo haña mas gana ainda pa traha riba un otro kualidat. Anto probablemente lo bira mas fásil pa traha riba tur loke tin riba bo lista.

LAGA E PALABRA DI DIOS OBRA DEN BO

15. Ki diferensia tin entre Yehova su sirbidónan i hopi otro hende ku ta lesa Beibel? (1 Tesalonisensenan 2:13)

¹⁵ Tin hende a lesa Beibel hopi biaha. Pero, nan ta kere realmente loke tin den Beibel? Nan ta purba di biba mané Beibel ta bisa i kambia nan bida? Ta tristu pa bisa ku nò. Pero Yehova su sirbidónan ta mira Beibel diferente. Meskos ku e kristiannan di promé siglo, nos ta aseptá Beibel “manera loke e ta di bèrdat, komo e palabra di Dios.” Es mas, nos ta hasi tur nos esfuerso pa apliká e konsehonan di Beibel den nos bida.—Lesa 1 Tesalonisensenan 2:13.

16. Kiko mester ta nos determinashon?

¹⁶ No ta semper fásil pa lesa i apliká Dios su Palabra. Kisas nos ta lucha pa saka tempu pa les’é. Òf kisas nos ta les’é muchu lihé i no ta apsorbá loke nos a lesa. Òf tin biaha nos por sinti nos desanimá pa tur e kosnan ku nos tin ku traha riba dje. Sea kual sea e desafio, bo por super’é ku yudansa di Yehova. Pero pa logra esei, bo mester ta dispuesto pa aseptá Yehova su yudansa i no bira un hende ku ta tende i lubidá, sino un hende ku ta kumpli ku e Palabra. Sin duda, mas bo lesa Beibel i apliká su konsehonan, mas felis lo bo ta.—Sant. 1:25.