1. Kiko Hesus ta bai hasi un djis aki?

 NOS ta bibando den un tempu hopi fasinante i tin kambionan grandi na kaminda! Un djis aki, Hesus ta bai husga tur hende riba tera. El a laga nos sa kiko ta e kosnan ku ta bai pasa nèt promé ku e kuminsá husga. El a duna su disipelnan un “señal” di su presensia invisibel i “di konklushon di e era akí.” (Mat. 24:3) Nos ta haña e señal ei na Mateo kapítulo 24 i 25, na Marko kapítulo 13 i na Lukas kapítulo 21.

2. Kiko nos lo trata den e artíkulo akí, i kon lo e yuda nos?

² Hesus a usa tres ilustrashon pa yuda nos ta prepará. Nan ta manera spièrtamentu pa nos. E promé ta di karné i kabritu. E di dos ta di e dies bírgennan. Anto e último ta di e talentonan. Kada un di nan ta bai yuda nos komprondé kon e manera ku nos ta hiba nos bida lo dikta e huisio ku nos lo haña serka Hesus. Den e artíkulo akí nos lo trata e ilustrashonnan ei i mira kiko nos por siña for di nan. Ban kuminsá ku esun di karné i kabritu.

KARNÉ I KABRITU

3. Na ki momento Hesus ta bai husga hende?

³ Den e ilustrashon di karné i kabritu, Hesus a bisa ku lo e husga hende a base di e manera ku nan a reakshoná na e bon notisia i na e manera ku nan ta apoyá su rumannan ungí. (Mat. 25:​31-46) Meskos ku un wardadó ta separá karné for di kabritu, Hesus lo separá hende ku lealmente  a apoyá su rumannan ungí for di esnan ku no a hasi esei. Tur esaki lo sosodé durante e “tribulashon grandi,” pero nèt promé ku Armagedon.—Mat. 24:21.

4. Segun Isaías 11:3 i 4, dikon nos por tin sigur ku Hesus lo husga na un manera hustu? (Wak e plachi.)

⁴ Beibel ta bisa ku ora Hesus husga pa Yehova, semper lo e hasi esaki na un manera hustu. (Lesa Isaías 11:​3, 4.) Ya kaba e ta opservá loke hende ta hasi, pensa i bisa, asta kon nan ta trata su rumannan ungí. (Mat. 12:​36, 37; 25:40) Hesus lo sa ken ta esnan ku a apoyá su rumannan ungí i nan trabou. a Un di e maneranan prinsipal pa apoyá Hesus su rumannan ungí ta di prediká. Esnan ku yuda den e trabou akí, Hesus lo deklará hustu i nan lo tin e speransa di “haña bida eterno” riba tera. (Mat. 25:46; Rev. 7:​16, 17) Esta un bunita rekompensa! Dor di keda fiel durante e tribulashon grandi i despues, nan nòmber lo keda skirbí den “e buki di bida.”—Rev. 20:15.

5. Kiko e ilustrashon di karné i kabritu ta animá nos pa hasi, i pa ken mas e ta konta?

⁵ Demostrá ku bo ta leal. Ta bèrdat ku den Hesus su ilustrashon di karné i kabritu, el a focus riba esnan ku tin e speransa di biba pa semper aki riba tera. Nan ta demostrá ku nan tin fe dor di apoyá Kristu su rumannan ungí den e trabou di prediká i dor di sigui fielmente guia di e esklabo fiel i prudente ku Hesus a skohe. (Mat. 24:45) Pero e spièrtamentu ku Hesus a duna ta konta pa esnan ku ta bai shelu tambe. Dikon? Pasó Hesus ta presta atenshon na loke nan ta hasi, pensa i bisa. Nan tambe mester ta fiel. Fuera di esei, Hesus a duna dos otro ilustrashon ku tin spièrtamentu spesífikamente pa e ungínan. Nos ta haña e ilustrashonnan ei tambe na Mateo kapítulo 25. Awor, laga nos trata e ilustrashon di e dies bírgennan.

E DIES BÍRGENNAN

6. Kon sinku di e bírgennan a demostrá di ta prudente? (Mateo 25:​6-10)

⁶ Den su ilustrashon, Hesus a papia di dies bírgen ku a sali pa bai topa ku un brùidehòm. (Mat. 25:​1-4) Nan tur a spera di drenta e fiesta di kasamentu huntu ku e brùidehòm. Hesus a bisa ku sinku di nan lo tabata “prudente” i e otro sinkunan tabata “bobo.” E bírgennan prudente a demostrá di ta prepará i alerta. Nan no tabata sa ki ora e brùidehòm lo a yega. Pero, nan tabata dispuesto pa warda riba dje asta si e yega lat den anochi. P’esei nan a bin ku nan lampinan pa nan tin lus den skuridat. Anto nan a asta bin ku zeta èkstra pa si akaso e brùidehòm tarda. Asin’ei nan a evitá ku nan lampi lo a paga. (Lesa Mateo 25:​6-10.) Ora e brùidehòm a yega, nan a drenta huntu kuné den e fiesta di kasamentu. Algu asina lo pasa ku e rumannan ungí. Esnan ku ta dispuesto pa keda alerta i fiel te ora Hesus, e Brùidehòm, yega lo por drenta kuné den su Reino den shelu. b (Rev. 7:​1-3) Pero kon a para ku e sinku bírgennan bobo?

7. Kiko a pasa ku e sinku bírgennan bobo, i dikon?

 ⁷ E sinku bírgennan bobo no tabata kla ora e brùidehòm a yega. Nan lampinan tabata den paga, anto nan no a bin ku zeta èkstra. Ora nan a tende ku e brùidehòm tabata na kaminda, nan a kore bai kumpra zeta. Ora e brùidehòm a yega, ainda nan no a bolbe. Pero, “e bírgennan ku tabata kla a drenta huntu kuné den e fiesta di kasamentu, i porta a sera.” (Mat. 25:10) Mas despues, e bírgennan bobo a yega i kier a drenta e fiesta, pero e brùidehòm a bisa nan: “Mi no konosé boso.” (Mat. 25:​11, 12) E bírgennan ei no a demostrá di ta prepará pa warda te ora e brùidehòm a yega. Kiko ta e lès pa e ungínan?

8-9. Ki lès e ungínan por siña di e ilustrashon di e dies bírgennan? (Wak e plachi.)

⁸ Demostrá ku bo ta prepará i alerta. Hesus no tabata ke men ku lo tin dos grupo di kristian ungí: un grupo ku lo tabata prepará pa warda te ora fin di e mundu malbado akí yega anto un grupo ku lo no ta prepará. Mas bien, loke e tabata splika e ungínan ta ku, si nan no ta prepará pa perseverá fielmente te na fin, nan lo no haña nan rekompensa. (Huan 14:​3, 4) Esei ta algu basta serio! Sea ku nos ta ungí òf nò, nos tur tin ku presta atenshon na e spièrtamentu di e ilustrashon di e dies bírgennan. Kada un di nos mester sigui vigilá i ta prepará pa perseverá te na fin.—Mat. 24:13.

⁹ Despues ku Hesus a usa e ilustrashon di e dies bírgennan pa mustra e importansia di ta prepará i alerta, el a usa un otro ilustrashon pa resaltá e importansia di traha duru.

E TALENTONAN

10. Kon dos esklabo a demostrá ku nan tabata fiel? (Mateo 25:​19-23)

¹⁰ Den e ilustrashon di e talentonan Hesus a papia di dos esklabo ku tabata fiel na nan doño i di unu ku no tabata  fiel. (Mat. 25:​14-18) Promé ku e doño a bai afó el a konfia e tres esklabonan ku algun talento, ku tabata hopi plaka. Dos di e esklabonan a demostrá di ta fiel pasó nan a traha duru pa oumentá plaka di nan doño. Ku ki resultado? Wèl, pa ora nan doño a bin bèk, ya nan a gana dòbel di e kantidat di talento ku el a duna nan. E doño a elogiá nan i nan a “drenta i kompartí e alegria di [nan] doño.” (Lesa Mateo 25:​19-23.) Pero kon a para ku e di tres esklabo? Kiko el a hasi ku e plaka ku su doño a dun’é?

11. Kon a para ku e esklabo “floho,” i dikon?

¹¹ E di tres esklabo a haña ún talento pero e tabata “floho.” Su doño a spera pa e usa e talento na un manera sabí. Pero na lugá di esei, el a bai dera e talento den tera. Pues ora e doño a bolbe, e esklabo no tabatin ni un èkstra talento pa dun’é. Anto riba dje e esklabo ei tabatin un mal aktitut. En bes di pidi despensa ku e no a traha niun sèn èkstra pa e doño, el a yama e doño “un hòmber eksigente.” Pues, e esklabo ei no a haña e doño su aprobashon òf elogio. Es mas, a kita e talento for di dje i a bentá e esklabo pafó di e doño su kas.—Mat. 25:​24, 26-30.

12. Ken e dos esklabonan fiel ta representá awe?

¹² E dos esklabonan fiel ta representá e fiel kristiannan ungí. E doño, Hesus, ta invitá nan pa “drenta i kompartí e alegria di [nan] doño” i risibí nan rekompensa selestial pa medio di e promé resurekshon. (Mat. 25:​21, 23; Rev. 20:5b) Di e otro banda, e mal ehèmpel di e esklabo floho ta sirbi komo un spièrtamentu pa e rumannan ungí. Kon asina?

13-14. Ki lès e ungínan ta siña for di e ilustrashon di e talentonan? (Wak e plachi.)

¹³ Demostrá ku bo ta traha duru i ta hasi bo esfuerso. Tantu den e ilustrashon di e talentonan komo esun di e dies bírgennan, Hesus no tabata bisa  ku e ungínan lo bira floho. Mas bien, e tabata splika loke lo sosodé si nan pèrdè nan zelo. Nan lo no por hasi “sigur di [nan] yamamentu i skohementu” i lo no por drenta den e Reino selestial.—2 Ped. 1:10.

¹⁴ E ilustrashonnan di Hesus tokante e bírgennan i e talentonan ta splika bon kla ku e ungínan mester ta prepará, alerta i traha duru tambe. Pero, Hesus a duna e ungínan mas spièrtamentu. Nos por haña un di nan na Mateo 24:40 i 41.

“LO BAI KU ÚN”

15-16. Kon Mateo 24:40 i 41 ta mustra ku ta importante pa e ungínan keda vigilá?

¹⁵ Promé ku Hesus a konta e tres ilustrashonnan, el a papia di dos hòmber ku ta trahando den kunuku i dos muhé ku ta mulando na un mulina di man. Den tur dos kaso ta parse ku e dos personanan tabata hasiendo e mesun trabou. Pero Hesus a bisa ku “lo bai ku ún i lo laga e otro atras.” (Lesa Mateo 24:​40, 41.) Den e siguiente versíkulo, el a urgi su siguidónan: “Keda vigilá, pasobra boso no sa ki dia boso Señor ta bini.” (Mat. 24:42) Hesus a bisa algu similar na final di e ilustrashon di e dies bírgennan. (Mat. 25:13) E dos frasenan ei tin di haber ku otro? Ta parse ku sí. Hesus tabata splika ku ora di husga e ungínan, ta solamente esnan ku di bèrdat ta ungí i ku ta keda fiel lo haña aprobashon pa bai den e Reino selestial.—Huan 14:3.

¹⁶ Demostrá ku bo ta keda vigilá. Si un ungí no keda vigilá den sentido spiritual lo e no ser reuní ku e “skohínan.” (Mat. 24:31) Anto tur sirbidó di Yehova ku tin speransa di biba pa semper riba tera mester keda vigilá i keda fiel.

17. Dikon nos no ta kuestioná Yehova si el a skohe pa ungi un persona den nos tempu?

¹⁷ Nos konosé Yehova bon, pues nos ta konfia ku tur su desishonnan ta hustu. P’esei, si el a disidí di ungi algun sirbidó fiel den nos tempu, nos no ta kuestioná esei. c Nos ta kòrda loke Hesus a bisa tokante e trahadónan ku a traha un ora so den e kunuku di wendrùif. (Mat. 20:​1-16) Esnan ku a kuminsá traha mas lat den dia a haña e mesun pago ku esnan ku a kuminsá traha fo’i mainta trempan. Asina tambe, no ta importá na ki momento e ungínan a ser skohí, nan tur lo haña nan rekompensa di bai shelu si nan keda fiel.

PRESTA ATENSHON NA E SPIÈRTAMENTU

18-19. Kiko nos a siña den e ilustrashonnan ku nos a trata?

¹⁸ Kiko nos a trata den e artíkulo akí? Pa esnan ku tin e speransa di biba riba tera, e ilustrashon di karné i kabritu a mustra ku ta importante pa keda fiel i leal na Yehova. Esei ta konta tantu pa awor komo durante tribulashon grandi. Nèt promé ku Armagedon, Hesus lo disidí ken ta fiel i eseinan “lo haña bida eterno.”—Mat. 25:46.

¹⁹ Tambe nos a analisá dos ilustrashon ku ta tin spièrtamentu pa e ungínan. Den e ilustrashon di e dies bírgennan, sinku di nan tabata sabí. Nan tabata prepará i alerta, kla pa warda e brùidehòm te ora e yega. Pero esnan bobo no tabata prepará i p’esei e brùidehòm no  a laga nan drenta den su fiesta di kasamentu. Nos tambe mester ta prepará pa warda te ora ku Hesus trese e fin. Ademas, den Hesus su ilustrashon di e talentonan, nos a papia tokante e dos esklabonan fiel ku a traha duru i hasi esfuerso. Nan a traha duru pa nan doño i a haña su aprobashon. Ma e esklabo floho a ser rechasá. Kiko nos por siña for di esei? Nos mester keda okupá den nos sirbishi pa Yehova te na e fin. Anto por último, nos a mira ku e ungínan tin ku keda vigilá pa asina Hesus por bai ku nan den shelu. Nan ta ansioso pa “ser reuní huntu kuné.” Despues di Armagedon, nan lo ta Hesus su brùit den e kasamentu di e Lamchi.—2 Tes. 2:1; Rev. 19:9.

20. Kiko Yehova lo hasi pa esnan ku presta atenshon na spièrtamentu?

²⁰ No falta hopi pa Hesus husga tur hende, pero no tin pakiko sinti miedu. Si nos keda fiel, nos Tata den shelu ku stima nos lo duna nos “e poder ku ta surpasá esun di hende” pa nos “por para dilanti di e Yu di hende.” (2 Kor. 4:7; Luk. 21:36) Sea ku nos tin e speransa di biba riba tera òf den shelu, nos lo hasi Yehova su kurason kontentu si nos presta atenshon na e spièrtamentunan ku Hesus a duna den su ilustrashonnan. Anto danki na Yehova su bondat inmeresí, nos nòmber lo “ta skirbí den e buki” di bida.—Dán. 12:1; Rev. 3:5.