M’a nase na 1934. Mi mayornan tabata di Suisa i a bin biba na Timmins, Ontario, Canada, un stat na ku tabatin mina. Rònt di aña 1939, mi mama a kuminsá lesa e revista E Toren di Vigilansia i a kuminsá bai reunion di Testigunan di Yehova. E tabata bai reunion ku nos tur shete yu. No muchu tempu despues, Mama a bira Testigu di Yehova.

Tata no a keda masha kontentu ku Mama su desishon. Pero, Mama a stima e bèrdat i tabata determiná pa keda leal na Yehova. Na kuminsamentu di añanan 40, gobièrnu na Canada a prohibí obra di Testigunan di Yehova. Asta durante e tempu ei, Mama a keda leal na Yehova. Anto semper el a trata Tata na un manera amabel i ku rèspèt apesar di Tata su abusu verbal. Mama su bon ehèmpel a yuda ami i mi rumannan skohe pa sirbi Yehova. Nos a keda hopi kontentu ora ku Tata su aktitut a kuminsá kambia i ku tempu el a kuminsá trata nos mas mihó.

Den zomer di 1950, tabatin e asamblea Oumento di Teokrasia na New York. M’a bai i despues di a konosé rumannan di rònt mundu i di tende entrevistanan emoshonante di e rumannan ku a bai e Skol di Galaad, m’a haña masha gana di hasi mas pa Yehova. Mi tabata mas determiná ku nunka pa drenta sirbishi di tempu kompleto. Pues, asina m’a yega kas, m’a yena e aplikashon pa pionero regular. Bètel di Canada a manda un karta ku e sugerensia ku kisas lo ta mihó pa mi batisá promé. M’a hasi esei riba 1 di òktober 1950. Un luna despues, m’a bira pionero regular i mi promé asignashon tabata Kapuskasing, un pueblito basta leu for di kaminda mi tabata biba.

Den lènte di 1951, Bètel a pidi e Testigunan ku por papia franses pa pensa si nan lo  ke bai sirbi na Quebek, un provinsia kaminda ta papia franses. Einan tabatin hopi nesesidat. Komo ku m’a lanta ta papia tantu ingles komo franses, m’a disidí di bai. Mi asignashon tabata Rouyn. Mi no tabata konosé niun hende einan. E úniko kos ku mi tabatin ta e adrès manera m’a konta na kuminsamentu. Pero, asina mes tur kos a bai bon. Ami ku Marcel a bira bon amigu. M’a sirbi kuater aña na Quebek, algun di nan komo pionero spesial. M’a disfrutá mashá di mi sirbishi einan.

Miéntras mi tabata na Quebek, m’a haña invitashon pa e di 26 klas di Skol di Galaad na South Lansing, New York. Esei a hasi mi masha kontentu. M’a gradua 12 di febrüari 1956 i mi asignashon tabata na loke awe ta Gana, b Wèst Afrika. Pero promé, mi mester a bai Canada bèk te ora mi papelnan keda kla. M’a kere ku ta un kos di un par di siman.

Pero, m’a haña mi ta warda shete luna na Toronto pa mi papelnan keda kla. Durante e tempu ei, m’a keda na kas di famia Cripps i asina m’a konosé nan yu, Sheila. Nos a kuminsá gusta otro. Ma, nèt ora mi kier a pidié pa kasa ku mi, mi visa a keda kla. Ami ku Sheila a hasi orashon i a disidí ku lo ta mihó pa mi bai mi asignashon. Pero nos lo a keda skirbi otro i wak si den futuro nos lo por kasa. E desishon ei no tabata niun tiki fásil, pero despues nos a realisá ku esei tabata e bon desishon.

M’a biaha un luna largu ku trein, barku di karga i avion pa yega Accra, Gana. Einan m’a haña e asignashon pa sirbi komo superintendente di distrito. Pues, m’a biaha rònt Gana, Kosta di Marfil (konosí awe komo Côte d’Ivoire) i tambe Togoland (konosí awe komo Togo). Mayoria di biaha mi tabata biaha mi so den un jeep di sukursal. M’a ègt disfrutá di biaha pa bishitá e rumannan einan!

 Durante wikènt mi tabatin asignashon na asambleanan di sirkuito. No tabatin Salòn di Asamblea, pues pa skonde for di e solo kayente e rumannan tabata traha un dak di palu di bambu ku rama di palma. Anto komo ku e kafetaria no tabatin frishidèr, e rumannan tabata sòru pa nan tin bestia ei banda mes i tabata mata nan pa tur hende por a kome.

N’e asambleanan tabata pasa algun kos hopi prèt. Un biaha Herb Jennings, c un ruman ku tambe tabata misionero, tabata meimei di su diskurso ora un toro a kore sali fo’i dje kafetaria. El a kore pasa meimei di e plataforma i e públiko. Herb a stòp di papia i e pober bestia a keda tur konfundí. Pero kuater ruman hòmber balente a logra domin’é, gar’é i hib’é bèk kafetaria segun ku e públiko tabata aploudí.

Den siman, mi tabata pasa nos pelíkula E Sosiedat di Mundu Nobo den Akshon den e pueblitonan den serkania. Pa por pasa e pelíkula, mi tabata kologá pañ’i bela meimei dos pipa òf palu. E hendenan tabata gusta esei mashá! Pa hopi di nan, esei tabata e promé biaha den nan bida ku nan a yeg’i mira un pelíkula. Ora nan tabata mira e partinan di boutismo, nan tabata bati man ku masha smak. E pelíkula ei a yuda hopi hende realisá ku nos ta un famia uní rònt mundu.

Despues di mas o ménos dos aña na Afrika, mi tabata masha kontentu pa bai e kongreso internashonal di 1958 na New York. Mi tabata masha felis mes pa mira Sheila ku a bini fo’i Quebek, kaminda e tabata sirbi komo pionero spesial. Tur e tempu nos a skirbi otro, pero awor ku nos tabata pará dilanti otro atrobe, m’a pidié pa kasa ku mi, i el a bisa sí. M’a skirbi Ruman Knorr d i pidié si Sheila por a bai Galaad i djòin mi na Afrika. El a bai di akuerdo. Ora ku finalmente Sheila a yega Gana, nos a kasa riba 3 di òktober 1959 na Accra. Nos a sinti ku Yehova di bèrdat a bendishoná nos debí ku nos a pon’é na promé lugá den nos bida.

Na 1961 nos asignashon a bira Kamerun. E rumannan a pidi mi pa yuda kuminsá ku un  ofisina di sukursal nobo, pues mi tabata hopi drùk. Debí ku mi mester a supervisá nos obra na Kamerun, mi tabatin hopi kos di siña. Na 1965 Sheila a sali na estado. Mi tin ku atmití ku tabata masha difísil pa imaginá nos mes komo mayor. Pero e echo ku nos tabata sa ku nos tabatin e responsabilidat nobo akí a hasi nos hopi kontentu. Pero nèt ora nos tabata plania pa bai Canada bèk, algu hopi tristu a pasa.

Sheila a pèrdè barika. Dòkter a bisa nos ku e yu tabata mucha hòmber. Maske esei a pasa mas ku 50 aña pasá, e ta algu ku nunka nos a lubidá. Nos a keda masha tristu pa loke a pasa, pero komo ku nos tabata stima nos asignashon masha hopi nos a disidí di keda.

Na Kamerun, hopi biaha nos rumannan tabata haña nan ku persekushon debí ku nan no tabata mete den asuntunan polítiko. Esei tabata mas pió den tempu di elekshon. Dia 13 di mei 1970, nos temor di mas grandi a tuma lugá ora ku gobièrnu a prohibí obra di Testigunan di Yehova. Nan a konfiská nos bunita sukursal ku nos a kuminsá usa apénas sinku luna promé. Denter di un siman, tur misionero, inkluso ami ku Sheila, a ser deportá. Tabata duru pa bai laga e rumannan pasó nos tabata stima nan mashá i tabata preokupá kon lo a para ku nan despues.

Nos a keda seis luna na Bètel di Fransia. Miéntras nos tabata einan m’a sigui hasi tur loke mi tabata por pa yuda e rumannan na Kamerun. Na desèmber di e aña ei, nos asignashon a bira Bètel di Nigeria. E Bètel ei a kuminsá sòru pa e obra na Kamerun. E rumannan na Nigeria a risibí nos ku brasa habrí i nos a disfrutá di sirbi einan pa vários aña.

Na 1973 nos a haña nos konfrontá ku un desishon masha difísil. Sheila tabatin un tempu ta lucha ku problema serio di salú. Nos a bai un kongreso na New York anto ora nos tabata einan, el a basha na yoramentu i bisa mi: “Mi n’ por mas! Tur ora bai mi ta malu i kansá.” Nos a sirbi na Wèst Afrika huntu pa mas ku 14 aña i mi tabata masha orguyoso di su sirbishi fiel. Pero, nos mester a hasi algun kambio. Despues di a papia tokante e situashon i hasi hopi orashon, nos a disidí ku nos lo regresá Canada. Einan Sheila lo por a haña mihó kuido pa su salú. E desishon di mas difísil den nos bida tabata di bandoná nos asignashon di misionero i sirbishi di tempu kompleto.

Despues ku nos a yega Canada, m’a haña trabou serka un amigu di hopi tempu. E tabatin un agensia di outo den un stat nort di Toronto. Nos a hür un apartamento i kumpra muebelnan segunda mano. Asina ei nos a logra kuminsá nos bida nobo sin hasi debe. Nos kier a tene nos bida simpel i a spera ku un dia nos lo por a bolbe sirbi Yehova fultaim. Pa nos sorpresa, e speransa a bira realidat mas lihé ku nos a spera.

M’a kuminsá traha komo boluntario riba djasabra na e konstrukshon di un Salòn di  Asamblea nobo na Norval, Ontario. Ku tempu, m’a haña e asignashon di sirbi komo superintendente di Salòn di Asamblea. Sheila su salú tabata mehorando i nos a sinti ku e por a kumpli ku e asignashon nobo ei. Pues pa yüni 1974 nos a bai biba den e apartamento na e Salòn di Asamblea. Nos tabata masha kontentu pa ta den sirbishi di tempu kompleto atrobe!

Sheila su salú a sigui mehorá anto dos aña despues nos por a aseptá un asignashon den e trabou di sirkuito. Nos tabatin ku bishitá kongregashonnan na Manitoba, un provinsia di Canada konosí pa wenternan hopi friu. Pero, nos a disfrutá mashá di e kaluroso amistat di e rumannan. Nos a siña ku no ta importá unda bo sirbi Yehova, basta bo sigui sirbié unda ku bo ta.

Na 1978, despues di vários aña den e trabou di sirkuito, nos a haña invitashon pa sirbi na Bètel di Canada. No muchu despues di esei, m’a siña un lès doloroso pero importante. Na un reunion spesial na Montreal, m’a haña asignashon pa duna un diskurso di un ora i 30 minüt na franses. Lamentablemente, mi no tabatin atenshon di e públiko durante mi diskurso i un ruman di Departamento di Sirbishi a duna mi konseho tokante esei. Pa ta franko, na e momento ei mi mester a realisá, loke ku awor sí mi ta rekonosé, ku mi no ta e mihó diskursante. E konseho di e ruman no a kai den bon tera. Nos kòmbersashon no a bai niun tiki bon i m’a kunsumí pasó m’a sinti ku e ruman tabata blo piki pieu i no a bisa mi e kosnan ku m’a hasi bon. Pero mi fout tabata ku na lugá di focus riba e konseho, m’a focus riba e manera ku a dun’é i loke mi tabata pensa di e hende ku tabata duna mi e konseho.

Un par di dia despues, un miembro di Komité di Sukursal a papia ku mi tokante e asuntu. M’a atmití ku e manera ku m’a reakshoná na konseho no tabata bon i m’a bis’é ku mi tabata lamentá esei. Despues, m’a bai papia ku e ruman ku a duna mi e konseho i amablemente el a pordoná mi. E eksperensia ei a siña mi ku ta importante pa ta humilde, i nunka mas lo mi lubidá esei. (Pro. 16:18) M’a hasi hopi orashon tokante esei i mi ta determiná pa semper tuma konseho na un manera positivo.

Awor mi tin mas ku 40 aña ta sirbi na Bètel di Canada i for di 1985 mi tin e privilegio di forma parti di Komité di Sukursal. Na febrüari 2021, mi Sheila stimá a fayesé. Aparte di sinti su falta, mi ta lucha tambe ku mi problemanan di salú. Pero, mi sirbishi na Yehova ta tené mi okupá i mi ta kontentu ku mi “no ta ripará mes ku e dianan di [mi] bida ta pasa bai.” (Ekl. 5:20) Maske ku m’a topa vários difikultat den bida, m’a pasa den hopi mas kos bunita ku ta yena mi ku goso. Mi ta sinti mi satisfecho pasobra m’a pone Yehova na promé lugá den mi bida i mi tin 70 aña ta disfrutá di sirbi Yehova fultaim. Mi ta pidi Yehova pa yuda rumannan yòn pa sigui pone Yehova na promé lugá den nan bida. Dikon? Pasobra mi ta konvensí ku nan tambe lo disfrutá di un bida emoshonante i yen di satisfakshon ku solamente ta posibel ora nos sirbi Yehova.