Bo a tuma tempu pa lesa e último edishonnan di E Toren di Vigilansia? Wèl, wak si bo por kontestá e siguiente preguntanan:

Dikon Yehova a aprobá e gueranan di Israel den antigwedat?

Yehova ta un Dios di amor. Pero, na algun okashon, el a manda su pueblo bringa kontra nan enemigunan pa por a protehá nan mes. Ta Dios so tabata disidí ken lo a bai guera i na ki momento.—w15 1/11, pág. 4-5.

Kiko ta algun kos importante ku mayornan por hasi pa entrená nan yu tiner pa sirbi Yehova?

Ta importante pa mayornan stima nan yu tiner i mustra humildat mediante nan mes ehèmpel. Tambe ta importante pa nan mustra disernimentu i hasi esfuerso pa komprondé nan yu tiner.—w15 15/11, pág. 9-11.

Dikon no mester mira papa komo susesor di Pedro?

Mateo 16:17 i 18 no ta bisa ku apòstel Pedro lo tabata kabes di e kongregashon kristian. Beibel no ta mustra ku Pedro lo a haña máksimo outoridat, sino ku mas bien Hesus lo mester a bira e piedra prinsipal di e kongregashon. (1 Ped. 2:4-8)—w15 1/12, pág. 12-14.

Kiko nos tin ku tene kuenta kuné promé ku nos papia?

Promé ku nos bisa algu, nos tin ku tene na mente (1) ki ora nos tin ku papia (Ekl. 3:7), (2) kiko nos lo papia (Pro. 12:18) i (3) kon nos lo papia (Pro. 25:15).—w15 15/12, pág. 19-22.

Kiko ta algun forma di desonestidat ku kristiannan ta evitá?

Kristiannan berdadero ta evitá gañamentu i kalumnia. Nan no ta lansa akusashon falsu ku ta difamá i daña reputashon di otro hende. Tampoko nan no ta hòrta ni estafá otro hende.—wp16.1, pág. 5.

Ken tabata e “saserdotenan prinsipal” ku Beibel ta menshoná?

Aparentemente, e ekspreshon “saserdotenan prinsipal” ta referí na miembronan destaká di e saserdosio, inkluso eks sumo saserdotenan ku a ser bahá for di nan puesto.—wp16.1, pág. 10.

Kon nos mester trata un hende ku ta tuma di e pan i e biña na Konmemorashon?

Kristiannan no ta pone e personanan ei riba un pedestal. Un persona ku di bèrdat ta ungí lo no deseá un trato spesial ni lo no kana bisa tur hende ku e tin un relashon spesial ku Dios. (Mat. 23:8-12)—w16.01, pág. 23-24.

Kon Abraham a bira amigu di Dios, i kiko nos por siña for di esei?

Kisas ta Sèm a konta Abraham tokante Dios, i asina Abraham a siña konos’é. E manera ku Dios a trata kuné i su famia a fortalesé su fe. Nos tambe por purba di hasi esei.—w16.02, pág. 9-10.

Ken a parti Beibel den kapítulo i versíkulo?

Stephen Langton, un klero di siglo 13, a parti Beibel den kapítulo. Pa e tempu ei ya kaba kopistanan hudiu a parti e Beibel Hebreo den versíkulo, i den siglo 16, un eksperto ku yama Robert Estienne a hasi esei pa e Skritura Griego Kristian.—wp16.2, pág. 14-15.

Ta físikamente Satanas a hiba Hesus na e tèmpel ora el a purba di hink’é den tentashon?

Nos no sa sigur. Segun e relato na Mateo 4:5 i Lukas 4:9, Satanas por a hiba Hesus den un vishon òf lag’é para na un lugá haltu di e tèmpel.—w16.03, pág. 31-32.

Den ki sentido nos sirbishi por ta manera serena?

Serena ta forma gradualmente. Ademas, e ta refreskante i ta sostené bida. Serena ta un bendishon di Yehova. (Deu. 33:13) Ora henter e pueblo di Dios ta traha den sirbishi, nan tambe lo ta un bendishon pa otronan.—w16.04, pág. 4.