Bo Ta Laga Yehova Moldia Bo?
“Boso ta den mi man, pueblo di Israel, manera klei den man di trahadó di pòchi di klei.”—YER. 18:6, BPK.
KANTIKA: 60, 22
1, 2. Dikon Dios a konsiderá Daniel un “hòmber masha stimá,” i kon nos por imitá Daniel su ehèmpel di obedensia?
ORA e hudiunan a bai den eksilio na Babilonia di antigwedat, nan a bai un stat yenyen di imágen i hende ku tabata venerá spiritu malbado. No opstante, hudiunan fiel na Yehova, manera Daniel i su tres kompañeronan, no a laga e mundu babilóniko moldia nan. (Dan. 1:6, 8, 12; 3:16-18) Daniel i su tres kompañeronan tabata determiná pa duna Yehova, Esun ku tin hende manera klei den su man, nan deboshon eksklusivo. I nan a logra! Aunke Daniel a biba na Babilonia kasi henter su bida, tòg un angel a bisa ku e tabata un “hòmber masha stimá” pa Dios.—Dan. 10:11, 19.
2 Den tempu bíbliko, un trahadó di pòchi di klei por a pone un klòmpi di klei den un malchi pa e haña e forma ku e tabata deseá. Awe, berdadero sirbidónan di Yehova ta rekonosé ku é ta e Soberano di Universo, kende tin e outoridat pa moldia pueblo- i nashonnan. (Lesa Yeremías 18:6. *) Tambe Dios tin e outoridat pa moldia nos individualmente. Ma e ta rekonosé ku nos tin boluntat liber, i e ke pa nos someté nos mes na dje di buena gana. Laga nos enfoká riba kontesta di tres pregunta ku por yuda nos keda manera klei suave den Dios su man: (1) Kon nos por evitá karakterístikanan ku por stroba nos di aseptá Yehova su konsehonan? (2) Kon nos por kultivá kualidatnan ku por yuda nos sigui ser personanan mansu i sumiso? (3) Kon mayornan kristian por someté nan mes na Dios ora nan ta moldia nan yunan?
EVITÁ KARAKTERÍSTIKANAN KU TA HASI NOS KURASON DURU
3. Ki karakterístikanan por hasi nos kurason duru? Duna un ehèmpel.
3 Na Proverbionan 4:23 nos ta lesa: “Warda bo kurason riba tur kos, pasobra e ta e fuente di bida.” Ki karakterístikanan ku por hasi nos kurason duru nos mester tene kuidou kuné? Nan ta, entre otro, demasiado orguyo, e kustumber di hasi piká i falta di fe. Esakinan por pone ku nos ta bira desobediente i rebelde. (Dan. 5:1, 20; Heb. 3:13, 18, 19) Por ehèmpel, Rei Uzías di Huda tabata orguyoso. (Lesa 2 Krónikanan 26:3-5, 16-21.) Na prinsipio di su reinado, el “a hasi bon den bista di SEÑOR” i “a sigui buska Dios.” Ma “ora ku el a bira fuerte, su kurason a bira asina orguyoso” ku el a purba di kima sensia na e tèmpel, un privilegio ku tabata reservá solamente pa saserdote ku tabata desendiente di Aron. Anto ora e saserdotenan a purba di par’é, su orguyo a pon’é rabia masha pisá. Ku ki resultado? El a sufri un “kaida” humiante na man di Dios i a muri komo un leproso.—Pro. 16:18.
4, 5. Kiko por sosodé si nos no tene kuidou ku orguyo? Duna un ehèmpel.
4 Si nos no tene kuidou ku orguyo, nos tambe por kuminsá “pensa mas di [nos] mes di loke ta nesesario,” kisas asta te na e punto ku nos ta nenga di aseptá konseho bíbliko. (Rom. 12:3; Pro. 29:1) Wak kiko a pasa ku un ansiano ku yama Jim. E no tabata di akuerdo ku e otro ansianonan tokante un asuntu di kongregashon. Jim a konta: “M’a bisa e ansianonan ku nan no tabata mustra amor, i m’a sali bai for di e reunion di ansiano.” Mas o ménos seis luna despues, el a bai un otro kongregashon den serkania pero nan no a nombr’é komo ansiano einan. El a atmití: “Mi tabata kibrá. Mi tabata asina sigur ku mi tabatin rason ku mi a bai for di e bèrdat.” Jim a keda inaktivo pa dies aña. El a atmití ku e tabata asina orguyoso ku el a kuminsá kulpa Yehova pa loke tabata pasa. Pa añanan largu, ansianonan tabata bai serka dje pa rasoná kuné, pero e no kier a aseptá nan yudansa.
5 E eksperensia di Jim ta mustra kon orguyo por pone un persona hustifiká su akshonnan, loke ta hasié un persona difísil pa moldia. (Yer. 17:9) Jim a bisa: “Mi no por a stòp di pensa ku a parse mi ku e otronan tabata robes.” Un ruman a yega di hùrt bo? Òf bo a yega di sinti bo malu pasobra bo a pèrdè un privilegio? Si ta asina, kon bo a reakshoná? Bo a laga orguyo afektá bo? Òf bo tabata mas interesá pa hasi pas ku bo ruman i keda leal na Yehova?—Lesa Salmo 119:165; Kolosensenan 3:13.
6. Kiko por sosodé si nos kai den e kustumber di hasi piká?
6 Si un hende kai den e kustumber di hasi piká, kisas asta den sekreto, esei por pone ku e no ta skucha konseho divino. Anto lo bira mas fásil pa e peka. Un ruman hòmber a bisa ku despues di tempu, su mal kondukta no tabata molesti’é mas. (Ekl. 8:11) Un otro ruman hòmber, ku tabatin kustumber di wak pornografia, a atmití: “M’a kuminsá desaroyá un aktitut krítiko pa ku e ansianonan.” Su bisio a daña su relashon ku Yehova. Finalmente, tur kos a sali na kla, i el a risibí e yudansa nesesario. Klaru ku nos tur ta imperfekto. Ma si nos kuminsá desaroyá un aktitut krítiko òf buska èksküs pa hustifiká nos mal kondukta en bes di buska Dios su pordon i yudansa, nos kurason por ta birando duru kaba.
7, 8. (a) Kon e ehèmpel di e israelitanan di antigwedat ta demostrá ku falta di fe por hasi un persona su kurason duru? (b) Ki lès nos por saka for di esaki?
7 E ehèmpel di e israelitanan ku Yehova a libra for di Egipto ta mustra kon falta di fe por hasi un persona su kurason duru. E nashon a mira kon Dios a hasi hopi milager na nan fabor. Aunke algun di e milagernan ei tabata masha impreshonante, tòg ora nan tabata serka di yega e Tera Primintí, nan a demostrá un falta di fe. En bes di konfia den Yehova, nan a haña miedu i a murmurá kontra Moises. Nan kier a asta bai bèk Egipto, kaminda nan tabata katibu. E kos ei a hùrt Yehova mashá. P’esei el a puntra: “Kuantu tempu mas e pueblo akí lo despresiá mi?” (Num. 14:1-4, 11; Sal. 78:40, 41) E generashon ei tabatin un kurason duru i tabata falta fe, i p’esei nan a muri den desierto.
8 Awe, segun ku nos ta yega mas serka di e mundu nobo, nos fe ta ser poné na prueba. Nos ta hasi bon di saminá e kalidat di nos fe. Por ehèmpel, puntra bo mes: ‘Kiko mi ta pensa di e palabranan di Hesus na Mateo 6:33? Mi prioridat- i desishonnan ta demostrá ku di bèrdat mi ta kere e palabranan di Hesus? Lo mi falta reunion òf keda sin bai sirbishi djis pa mi gana mas plaka? Kiko lo mi hasi si na trabou nan ta pidi mi pa mi duna mas di mi tempu i energia? Lo mi laga e mundu moldia mi i kisas asta pone mi stòp di sirbi Yehova?’
9. Dikon nos tin ku “sigui saminá” nos mes pa sa si nos ta den e fe, i kon nos por hasi esei?
9 Pensa riba un otro ehèmpel. Imaginá bo ku un sirbidó di Yehova ta vasilá pa sigui normanan di Beibel, kisas esnan relashoná ku asosiashon, ekspulshon òf entretenimentu. Puntra bo mes: ‘Mi tambe ta hasiendo esei?’ Si nos ripará ku nos kurason ta birando duru, nos tin ku saminá nos fe, anto purá! Beibel ta duna nos e siguiente konseho: “Sigui saminá boso mes pa sa si boso ta den e fe, sigui pone boso mes na prueba pa demostrá ki tipo di hende boso ta.” (2 Kor. 13:5) Nos mester ta onesto ku nos mes i regularmente usa e Palabra di Dios pa korigí nos pensamentunan.
SIGUI LAGA DIOS MOLDIA BO
10. Kiko por yuda nos keda manera klei suave den man di Yehova?
10 Dios ta yuda nos keda manera klei suave mediante su provishonnan ku ta inkluí su Palabra, e kongregashon kristian i sirbishi. Meskos ku awa ta hasi klei moli, asina tambe ora nos ta lesa Beibel tur dia i meditá riba dje, nos por keda manera klei suave den man di Yehova. Yehova a rekerí pa tur rei di Israel skirbi pa su mes un kopia di e Lei di Dios i les’é tur dia. (Deu. 17:18, 19) E apòstelnan tabata sa ku lesa e Skritura i meditá riba dje tabata importante pa nan sirbishi. Ora nan tabata skirbi bukinan di Beibel, nan a sita i referí sientos di biaha na e Skritura Hebreo. I ora nan tabata prediká, nan tabata animá e hendenan pa nan tambe lesa e Skritura i meditá riba dje. (Echo. 17:11) Awe, nos tambe ta mira e importansia di lesa e Palabra di Dios tur dia i meditá riba dje huntu ku orashon. (1 Tim. 4:15) Esei lo yuda nos keda humilde, i lo ta mas fásil pa Yehova moldia nos.
Usa e provishonnan di Dios pa yuda bo keda manera klei suave (wak paragraf 10-13)
11, 12. Kon Yehova por usa e kongregashon kristian pa moldia nos di akuerdo ku nos nesesidatnan personal? Duna un ehèmpel.
11 Yehova por usa e kongregashon kristian pa moldia nos di akuerdo ku nos No Ta Yehova Su Falta’ i ‘Sirbi Yehova Fielmente’ ku a sali den E Toren di Vigilansia (na spañó), di 15 di novèmber 1992.”
nesesidatnan personal. Jim, menshoná anteriormente, a kuminsá kambia su aktitut ora un ansiano a mustra interes personal den dje. Jim a bisa: “Nunka e no a kulpa mi ni kritiká mi pa loke a pasa. El a keda positivo i a bisa mi ku e tin masha gana di yuda mi.” Despues di mas o ménos tres luna, e ansiano a invitá Jim na un reunion kristian. Jim a sigui konta: “E rumannan a duna mi un kaluroso bon biní, i nan amor a motivá mi pa kambia. Mi a bin mira ku mi sintimentunan no ta e kos di mas importante. Pokopoko, ku yudansa di e rumannan i mi kerida esposa, kende semper a keda spiritualmente fuerte, mi a kuminsá sirbi Yehova atrobe. Tambe mi a haña hopi animashon for di e artíkulonan ‘12 Ku tempu, Jim a bolbe ser nombrá komo ansiano. Desde e tempu ei, el a yuda otro rumannan ku tambe a haña nan ku problema similar i a yuda nan kuminsá sirbi Yehova atrobe. Jim di: “M’a kere ku mi tabatin un bon relashon ku Yehova, ma en realidat esei no tabata e kaso. Ta duel mi ku mi a laga orguyo stroba mi di mira e kosnan di mas importante i laga e debilidatnan di otro hende traha riba mi.”—1 Kor. 10:12.
13. Ki kualidatnan sirbishi por yuda nos kultivá, i ku ki resultado?
13 Kon sirbishi por moldia nos i yuda nos bira mihó hende? Ora nos kompartí e bon notisia ku otronan, nos por kultivá humildat i vários otro aspekto di e fruta di spiritu di Dios. (Gal. 5:22, 23) Para ketu i pensa un ratu riba tur e kualidatnan ku sirbishi a yuda bo kultivá. Es mas, segun ku nos ta imitá e personalidat di Kristu, nos ta dòrna nos mensahe, i esei por kambia e punto di bista ku hende tin di nos. Por ehèmpel, dos Testigu na Australia a skucha ku masha rèspèt ora un señora a papia masha malu ku nan den sirbishi. Pero despues su mal aire a duel e asina tantu ku el a manda e sukursal un karta ku a bisa en parte: “Mi ke pidi e dos hendenan humilde i ku hopi pasenshi ei diskulpa pa e manera ku mi a ridikulisá nan. Tabata un bobedat di mi parti pa kore ku hende ku ta kompartí e Palabra di Dios.” E señora ei lo a skirbi esei si e publikadónan a demostrá djis un krenchi di rabia? Probablemente ku nò. Pues, nos sirbishi ta benefisiá tantu nos mes komo otro hende.
SOMETÉ BO MES NA DIOS ORA BO TA MOLDIA BO YUNAN
14. Kiko mayornan mester hasi pa nan por tin éksito den moldia nan yunan?
14 Mayoria di mucha ta humilde i ta gusta siña kos nobo. (Mat. 18:1-4) P’esei mayornan sabí ta hasi nan bèst pa inkulká konosementu eksakto i amor pa e bèrdat den mente i kurason di nan chikitinnan. (2 Tim. 3:14, 15) Klaru, si mayornan ke tin éksito, nan mester inkulká e bèrdat den nan mes kurason promé i biba na armonia ku e bèrdat. Ora nan hasi esaki, nan yunan lo no djis skucha e bèrdat ma lo bib’é tambe. Ademas, e yunan lo mira ku e disiplina di nan mayornan ta un muestra di amor di tantu nan mayornan komo di Yehova.
15, 16. Kon mayornan por demostrá nan konfiansa den Yehova si nan yu ser ekspulsá?
15 Maske tin mucha ta lanta den e bèrdat, tòg algun di nan ta bai lag’é òf ta ser ekspulsá despues, i esei ta kousa nan famia hopi doló. Un ruman muhé na Suráfrika a bisa: “Dia mi ruman hòmber a ser ekspulsá, ta komo si fuera ta muri el a muri. Esei a kibra nos kurason.” Kiko e i su mayornan a hasi? Nan a obedesé e instrukshonnan ku tin den e Palabra di Dios. (Lesa 1 Korintionan 5:11, 13.) E mayornan a bisa: “Nos tabata determiná pa hasi loke Beibel ta bisa, pasobra nos sa ku ora nos hasi loke Dios ke, nos lo haña e mihó resultado. Nos a mira ekspulshon komo disiplina di Yehova i tabata konvensí ku e ta disipliná hende ku amor i nunka di mas òf di ménos. Pues nos tabata papia ku nos yu solamente ora nos tabatin asuntu di famia importante pa atendé.”
16 Kon nan yu a sinti su mes? El a bisa despues: “Mi tabata sa ku no ta odio mi famia tabatin kontra mi, pero nan tabata obedesé Yehova i su organisashon.” El a bisa tambe: “Ora bo haña bo obligá ta roga Yehova pa su yudansa i pordon, bo ta ripará kuantu bo tin mester di dje.” Imaginá kon kontentu e famia akí a keda ora e yònkuman ei a ser restorá! Sí, ora nos ta dependé riba Yehova den tur aspekto di nos bida, nos lo haña e mihó resultado.—Pro. 3:5, 6; 28:26.
17. Dikon semper nos tin ku someté nos mes na Yehova, i kon esaki lo benefisiá nos?
17 Isaías a profetisá ku na final di e hudiunan su eksilio na Babilonia, esnan ku a arepentí lo a rekonosé: “T’Abo ta nos Tata, SEÑOR. Nos ta e klei, Abo Esun ku ta traha kuné; nos tur ta obra di bo man.” Despues nan lo a rog’é: “No keda kòrda nos pikánan pa semper. Wak nos ku kariño. N’ ta bo pueblo nos tur ta?” (Isa. 64:8, 9, BPK) Si nos tambe someté nos mes humildemente na Yehova i semper obedes’é, nos lo ta masha presioso den su bista, meskos ku profeta Daniel. Es mas, Yehova lo sigui moldia nos mediante su Palabra, su spiritu i su organisashon pa asina den futuro nos lo por bira su ‘yunan perfekto.’—Rom. 8:21.
^ par. 2 Yeremías 18:6 (BPK): “‘Akaso Ami no por hasi meskos ku boso, pueblo di Israel?’, SEÑOR ta puntra. ‘Boso ta den mi man, pueblo di Israel, manera klei den man di trahadó di pòchi.’”