Haykanush, un publikadó no batisá ku ta biba na Armenia, a haña un pasport banda di su kas. Den e pasport tabatin algun tarheta di krédito i un suma grandi di plaka. El a konta su esposo, kende tambe tabata un publikadó no batisá.

Nan tabatin debe i basta problema finansiero, ma nan a disidí di hiba e plaka na e adrès ku tabatin den e pasport. E hòmber, ku a pèrdè su pasport, i tambe su famia a keda boka habrí. Haykanush ku su kasá a bisa e famia ku nan tabata hende onesto debí na loke nan tabata siña for di Beibel. Tambe nan a probechá di e oportunidat ei pa papia tokante Testigunan di Yehova i laga algun literatura ku e famia.

E famia kier a duna Haykanush sèn komo rekompensa, pero el a nenga esei. E siguiente dia, e esposa a bishitá Haykanush ku su kasá, i komo muestra di apresio, el a insistí pa Haykanush aseptá un renchi di djamanta.

Meskos ku e famia ei, hopi hende lo keda sorprendí pa e onestidat di Haykanush ku su kasá. Pero Yehova tambe lo keda sorprendí? Kon e ta mira nan onestidat? Nan onestidat tabata bale la pena?

No ta difísil pa kontestá e preguntanan ei. Esei ta pasobra sirbidónan di Dios ta kere ku pa Yehova e esfuerso pa desplegá su kualidatnan tin mas balor ku djamanta, oro òf otro kosnan material. Sí, Yehova su punto di bista di loke ta presioso i loke no ta presioso ta diferente for di esun di mayoria di hende. (Isa. 55:8, 9) I su sirbidónan ta sinti ku nan esfuerso pa imitá su kualidatnan ta masha presioso.

Nos por mira esaki na loke Beibel ta bisa tokante disernimentu, òf komprondementu, i sabiduria. Proverbionan 3:13-15 ta bisa: “Bendishoná ta e hende ku haña sabiduria, e hende ku haña komprondementu, pasobra probecho di esaki ta mihó ku probecho di plata, i su ganashi mas ku oro fini. E ta mas presioso ku rubí, i tur loke bo por deseá no ta di kompará kuné.” Pues no tin duda ku Yehova ta balorá e kualidatnan ei mas ku kualke otro tesoro material.

Awor, kiko di onestidat?

Wèl, Yehova mes ta onesto; e “no por gaña.” (Tito 1:2) El a inspirá apòstel Pablo pa skirbi lo siguiente pa e kristiannan hebreo di promé siglo: “Sigui hasi orashon pa nos, pasobra nos tin e konfiansa ku nos tin un konsenshi limpi, i nos ke komportá nos mes na un manera onesto den tur kos.”—Heb. 13:18.

Hesukristu a pone un bon ehèmpel di onestidat. Por ehèmpel, Sumo Saserdote Kaifas a bisa Hesus: “Mi ke pa bo hura den nòmber di e Dios bibu ku lo bo papia bèrdat i bisa nos si bo ta Kristu, e Yu di Dios!” Hesus tabata onesto i a identifiká su mes komo e Mesías, maske esei por a pone e Sanedrin akus’é di ta un blasfemadó i por a hiba na su ehekushon.—Mat. 26:63-67.

Kiko di nos? Nos lo keda onesto den situashonnan kaminda nos por haña benefisionan material si nos trose e bèrdat òf keda sin duna tur informashon?

Nos tin ku atmití sí ku no ta fásil pa keda onesto den e último dianan akí ora hopi hende ta ‘stima nan mes i ta stima plaka.’ (2 Tim. 3:2) Ora hende ta pasa den krísis finansiero òf tin problema pa haña trabou,  nan por kere ku e ora ei sí nan tin mag di hòrta, gaña òf hasi otro práktikanan desonesto. E idea akí ta asina komun ku ora ta trata di ganashi, hopi hende ta pensa ku ta imposibel pa keda onesto. Asta algun kristian a tuma mal desishon, i djis pa “ganashi desonesto” a pèrdè nan bon nòmber den e kongregashon.—1 Tim. 3:8; Tito 1:7.

Ma mayoria di kristian ta imitá Hesus. Nan ta realisá ku ta mas importante pa desplegá e kualidatnan di Dios ku haña kualke kos material òf benefisio. Pues, hóbennan kristian no ta spik pa nan haña bon punto na skol. (Pro. 20:23) Ta bèrdat ku no ta semper onestidat ta trese rekompensa, manera den kaso di Haykanush. Pero pa Dios, ser onesto ta e kos korekto pa hasi, i esei ta yuda nos mantené un konsenshi limpi, ku ta algu masha balioso.

E ehèmpel di Gagik ta mustra esei bon kla. El a bisa: “Promé ku mi a bira un kristian, mi tabata traha pa un kompania grandi kaminda e doño tabata ontduik belasting i tabata raportá solamente un parti chikitu di e ganashi di e kompania. Komo direktor di e kompania, nan a ferwagt ku lo mi ‘kumbiní’ ku e ámtenar di inspekshon di belasting pa e sera wowo pa e práktikanan froudulento di e empresa a kambio di un soborno. Komo resultado, mi tabatin e reputashon di ta un hende desonesto. Ora mi a haña e bèrdat, mi a nenga di sigui hasi esei, maske mi trabou tabata paga bon. M’a preferá di habri mi mes kompania, i for di e promé dia, mi a registrá mi kompania legalmente i a paga tur belasting.”—2 Kor. 8:21.

Gagik a sigui konta: “Awor mi tabata gana mitar di loke mi tabata gana ántes, i no tabata fásil pa proveé pa mi famia. Apesar di esei, mi ta mas felis awor. Mi tin un konsenshi limpi dilanti di Yehova. Mi ta un bon ehèmpel pa mi dos yu hòmbernan, i mi a kualifiká pa haña privilegio den kongregashon. Awor e kontroladónan di belasting i hende ku mi ta hasi negoshi kuné ta mira mi komo un hende onesto.”

Yehova ta stima tur hende ku ta hasi esfuerso pa kumpli ku su siñansanan i ku ta desplegá su kualidatnan sobresaliente, inkluso onestidat. (Tito 2:10) El a inspirá Rei David pa duna e siguransa akí: “Mi tabata yòn, i awor mi ta bieu; ma nunka mi no a mira e hustu desampará, ni su desendientenan ta pidi pan.”—Sal. 37:25.

E eksperensia di Rut ta duna prueba di esei. E mucha muhé fiel akí a keda na lado di su suegra, Noemí, en bes di bandon’é den su behes. Rut a muda bai Israel, kaminda e por a adorá e Dios berdadero. (Rut 1:16, 17) Tempu Rut tabata na Israel, el a demostrá di ta onesto i diligente. El a traha duru pa piki sobrá di kosecha i loke e kosechadónan a laga atras, manera e Lei a indiká. Yehova no a laga Rut i Noemí pasa hamber, nèt manera David a eksperensiá despues. (Rut 2:2-18) Yehova a hasi muchu mas ku djis proveé materialmente pa Rut. Yehova a skoh’é pa e bira un antepasado di Rei David i asta di e Mesías primintí.—Rut 4:13-17; Mat. 1:5, 16.

Algun sirbidó di Yehova por haña nan den un situashon kaminda por parse difísil pa gana sufisiente sèn pa kubri nan nesesidatnan básiko. En bes di buska un manera fásil pero desonesto pa solushoná e problema, nan ta hasi esfuerso pa traha duru i ser diligente. Asina nan ta demostrá ku nan ta  balorá Dios su kualidatnan sobresaliente, inkluso onestidat, mas ku kualke kos material.—Pro. 12:24; Efe. 4:28.

Meskos ku Rut di pasado, kristiannan rònt mundu ta demostrá ku nan tin fe den Yehova su poder pa yuda nan. Nan a pone tur nan konfiansa den Esun ku a duna e siguiente promesa den su Palabra: “Hamas lo mi bandoná bo, i hamas lo mi laga bo desampará.” (Heb. 13:5) Bes tras bes Yehova a demostrá ku e por i lo yuda hende ku semper ta onesto. El a kumpli ku su promesa di proveé pa e nesesidatnan básiko di su sirbidónan.—Mat. 6:33.

Sí, hende por duna djamanta i otro kos material hopi balor. Pero nos por ta sigur ku pa nos Tata selestial, nos esfuersonan pa desplegá onestidat i Su otro kualidatnan ta di muchu mas balor ku kualke piedra presioso.