“Yehova Nos Dios Ta Ún Yehova”
“Skucha, o Israel: Yehova nos Dios ta ún Yehova.” —DEU. 6:4, NW.
KANTIKA: 138, 112
1, 2. (a) Dikon e palabranan na Deuteronomio 6:4 ta bon konosí? (b) Dikon Moises a bisa e palabranan ei?
PA HOPI siglo, hende di e religion hudiu ta usando e palabranan di e teksto hebreo na Deuteronomio 6:4 komo parti di un orashon ritual. Nan ta hasi e orashon akí tur dia, mainta i atardi. E orashon akí yama Shema, ku ta e promé palabra di e versíkulo ei. Mediante e orashon akí, hudiunan deboto ta deklará nan deboshon eksklusivo na Dios.
2 Moises a bisa e palabranan akí den su diskurso di despedida ora e nashon di Israel a reuní riba e sabananan di Moab na aña 1473 promé ku Kristu. E nashon tabata a punto di krusa Riu Hordan pa drenta e Tera Primintí. (Deu. 6:1) Moises, nan lider durante e último 40 añanan, tabata ke pa e pueblo enfrentá e retonan nan dilanti ku kurashi. Nan mester a konfia den Yehova i keda fiel na dje komo nan Dios. Pues ta di komprondé ku Moises su palabranan final a hasi un impakto grandi riba e pueblo. Despues ku Moises a ripití e Dies Mandamentu i otro lei ku Yehova a duna nan, Moises a duna e rekordatorio importante ku tin na Deuteronomio 6:4 i 5. * (Les’é.)
3. Ki preguntanan nos lo konsiderá den e artíkulo akí?
3 Akaso e israelitanan ku a reuní ku Moises no tabata sa ku Yehova nan Dios ta “ún Yehova”? Klaru ku nan tabata sa esei. E fiel israelitanan tabata konosé i adorá ún Dios so, esta, e Dios di nan antepasadonan Abraham, Isak i Yakòb. Ta dikon anto Moises a rekordá nan ku Yehova nan Dios ta “ún Yehova”? E echo ku Yehova ta ún tin di haber ku e mandamentu ku nos mester stim’é ku tur nos kurason, ku tur nos alma i ku tur nos forsa, manera versíkulo 5 ta bisa? I kiko e palabranan na Deuteronomio 6:4 i 5 ta nifiká pa nos awe?
NOS DIOS TA “ÚN YEHOVA”
4, 5. (a) Kiko e ekspreshon “ún Yehova” ta nifiká? (b) Kiko ta hasi Yehova diferente for di e diosnan di e nashonnan?
4 Yehova Ta Úniko. E palabra “ún” na hebreo i na hopi otro idioma por referí na mas ku djis un number. E por referí na ser úniko. No ta parse ku akinan Moises tabata refutá e doktrina di tres dios den ún. Yehova ta e Kreador di shelu i tera, e Soberano di universo. No tin niun otro Dios berdadero fuera di dje; no tin niun otro dios manera e. (2 Sam. 7:22) Pues, Moises tabata rekordá e israelitanan ku nan mester a adorá Yehova so. Nan no mester a hasi manera e nashonnan rònt di nan, kendenan tabata venerá vários dios i diosa. E hendenan ei tabata kere ku nan diosnan falsu tabatin parti di naturalesa bou di nan kontrol òf ku e diosnan akí tabata diferente manifestashon di e mesun dios.
5 Por ehèmpel, e egipsionan tabata venerá e dios di solo Ra, e diosa di shelu Nut, e dios di tera Geb, e dios di Riu Nilo Hapi i otro bestia ku pa nan tabata sagrado. Yehova a kaba ku mayoria di e diosnan ei ora el a manda e Dies Plaga. E dios di mas importante di e kananeonan tabata Baal, e dios di fertilidat ku tabata tambe e dios di shelu, áwaseru i tormenta. I na hopi lugá, hende tabata venerá Baal komo nan dios protektor. (Num. 25:3) E israelitanan mester a kòrda ku nan Dios, e “Dios berdadero,” ta “ún Yehova.”—Deu. 4:35, 39, NW.
6, 7. Kiko mas e ekspreshon “ún Yehova” ta nifiká, i kon Yehova a demostrá di ta “ún”?
6 Yehova No Ta Kambia i Ta Leal. E palabra “ún” ta duna e idea tambe ku su propósito ta úniko i ku semper e ta aktua na armonia ku esei. Yehova Dios no ta kontradisí su mes ni e no ta impredisibel. Mas bien, semper e ta fiel, konsistente, leal i berdadero. El a primintí Abraham ku su desendientenan lo a heredá e Tera Primintí, i Yehova a hasi milagernan grandi pa kumpli ku e promesa ei. Aunke Yehova a hasi e promesa ei 430 aña promé, ainda e tabata determiná pa kumpli kuné.—Gén. 12:1, 2, 7; Eks. 12:40, 41.
7 Siglonan despues, ora Yehova a bisa ku e israelitanan tabata su testigunan, el a bisa nan: “Ami ta e Mesun. Promé ku mi ningun Dios a ser formá, i despues di mi lo no tin ningun.” I pa enfatisá ku su propósito no ta kambia, el a agregá: “Semper mi ta e Mesun.” (Isa. 43:10, 13; 44:6; 48:12, NW) E israelitanan tabatin un gran privilegio, i awe, nos tambe tin e mesun privilegio ei di ta sirbidónan di Yehova, e Dios ku nunka no ta kambia i ku semper ta leal den tur loke e ta hasi.—Mal. 3:6; Sant. 1:17.
8, 9. (a) Kiko Yehova ta rekerí di hende ku ta ador’é? (b) Kon Hesus a enfatisá e importansia di e palabranan di Moises?
8 Sí, Moises a rekordá e pueblo ku Yehova semper ta meskos i ku su amor i interes pa nan no ta kambia. Pues, ta lógiko ku nan mester a rindi adorashon eksklusivo na dje i stim’é di henter nan kurason, alma i forsa. Ademas, muchanan tambe mester a duna Yehova deboshon eksklusivo ya ku mayornan mester a probechá di tur oportunidat pa siña nan hasi esei.—Deu. 6:6-9.
9 Komo ku Yehova su boluntat i propósito no ta kambia, ta klaru ku e rekisitonan básiko pa su sirbidónan berdadero tambe ta keda meskos. Pa e aseptá nos adorashon na dje, nos tambe mester dun’é deboshon eksklusivo i stim’é ku tur nos kurason, mente i forsa. De echo, esei ta nèt loke Hesukristu a bisa un eskriba. (Lesa Marko 12:28-31.) P’esei, laga nos ban wak kon nos por demostrá ku di bèrdat nos ta komprondé ku “Yehova nos Dios ta ún Yehova.”
DUNA YEHOVA DEBOSHON EKSKLUSIVO
10, 11. (a) Den ki sentido nos adorashon na Yehova ta eksklusivo? (b) Kon algun hóben hebreo na Babilonia a demostrá deboshon eksklusivo na Yehova?
10 Pa Yehova por ta nos úniko Dios, nos mester dun’é deboshon eksklusivo. Nos no tin mag di adorá otro dios ni mancha nos adorashon na dje ku idea òf práktika di otro forma di adorashon. Nos mester tene na mente ku Yehova no ta djis un dios entre yen di otro dios ni e no ta esun di mas haltu òf esun di mas poderoso den un grupo di dios. E ta e úniko Dios i ta é so nos mester adorá.—Lesa Revelashon 4:11.
11 Den e buki di Daniel nos ta lesa tokante e hóbennan hebreo Daniel, Ananías, Misael i Azarias. Nan a demostrá nan deboshon eksklusivo na Yehova no solamente ora nan a apstené nan mes di kuminda impuru, sino tambe ora nan a nenga di bùig pa e imágen di oro di Nabukodonosor. Pa nan, Yehova tabata na promé lugá; nan tabata leal na é so.—Dan. 1:1–3:30.
12. Pa nos por duna Yehova deboshon eksklusivo, kiko nos mester tene kuidou kuné?
12 Pa nos por duna Yehova deboshon eksklusivo, nos mester tene kuidou pa no laga nada otro haña, ni sikiera kompartí, e lugá ku Yehova so meresé den nos bida. Kiko eseinan por ta? Den e Dies Mandamentu, Yehova a mustra bon kla ku su pueblo no tabatin mag di tin otro diosnan fuera di dje ni práktika niun forma di idolatria. (Deu. 5:6-10) Awe tin vários forma di idolatria, i tin di nan no ta fásil pa rekonosé. Pero Yehova su rekisitonan no a kambia; ainda e ta “ún Yehova.” Ban wak kiko esei mester nifiká pa nos.
13. Kiko nos por kuminsá stima mas ku Yehova?
13 Na Kolosensenan 3:5 (les’é), nos ta haña konseho fuerte tokante loke por daña nos amistat spesial ku Yehova. Tuma nota ku golosidat ta konektá ku idolatria. Esei ta pasobra nos deseo pa haña por ehèmpel rikesa òf kosnan di luho por bira asina fuerte ku e por bira manera un dios poderoso pa nos. Pero ora nos wak henter e versíkulo, no ta difísil pa mira ku tur e otro práktikanan pekaminoso ku ta ser menshoná di un manera òf otro ta konektá ku golosidat, i pues ku idolatria. E deseo fuerte pa e kosnan ei fásilmente por pone nos stima nan mas ku Dios. Nos ke kore e rísiko di laga e kosnan akí haña un gara asina fuerte riba nos ku Yehova no ta “ún Yehova” mas pa nos? Klaru ku nò.
14. Ki spièrtamentu apòstel Huan a duna?
14 Apòstel Huan tambe a enfatisá e mesun punto. El a spièrta nos pa no stima e kosnan ku tin den mundu, esta, “deseo di karni, deseo di wowo i kana broma ku loke [nos] tin,” pasobra e ora ei nos lo “no tin amor pa e Tata.” (1 Huan 2:15, 16) Esaki ta nifiká ku nos tin ku saminá nos kurason konstantemente pa wak si e entretenimentu, e asosiashon i e forma di bisti di e mundu akí ta atrayendo nos. Òf kisas nos tin ku puntra nos mes si amor pa e mundu akí no a duna nos gana di “buska kosnan grandi pa [nos] mes,” kisas via enseñansa superior. (Yer. 45:4, 5) E mundu nobo ta den porta! Pues ta importante pa nos tene e palabranan impaktante di Moises bon na mente. Si nos ta komprondé i ta kere firmemente ku “Yehova nos Dios ta ún Yehova,” nos lo hasi tur loke nos por pa dun’é deboshon eksklusivo i sirbié na e manera ku e ta aprobá.—Heb. 12:28, 29.
MANTENÉ UNION KRISTIAN
15. Dikon Pablo a rekordá kristiannan ku Dios ta “ún Yehova”?
15 E echo ku Yehova ta “ún Yehova” ta duna e idea tambe ku e ke pa su sirbidónan ta uní i pa nan tin e mesun propósito den bida. E kongregashon kristian di promé siglo tabata konsistí di hudiu, griego, romano i hende di otro nashon. Nan a bini di diferente religion i tabatin kustumber i gustu diferente. Esei a pone ku algun di nan tabatin difikultat pa aseptá un forma nobo di adorá Dios òf pa bandoná nan estilo di bida 1 Korintionan 8:5, 6.
di ántes. P’esei apòstel Pablo a haña ku tabata apropiá pa e kòrda nan ku kristiannan tin ún Dios, esta, Yehova.—Lesa16, 17. (a) Ki profesia ta kumpliendo den nos tempu, i ku ki resultado? (b) Kiko por kibra nos union?
16 Kiko di e kongregashon kristian awe? Isaías a profetisá ku “den e último dianan” hende di tur nashon lo subi bai na e lugá di adorashon berdadero di Yehova. Nan lo bisa: “[Yehova lo] siña nos tokante di su kamindanan.” (Isa. 2:2, 3) Nos ta masha kontentu pa mira e profesia akí kumpli den nos tempu. Komo resultado, hopi kongregashon tin hende di tur rasa, kultura i idioma ku ta duna alabansa na Yehova. Ma e diversidat ei mes tambe por trese algun problema ku mester di nos debido atenshon.
Abo ta yuda mantené union den e kongregashon? (wak paragraf 16-19)
17 Por ehèmpel, kiko bo ta pensa di rumannan ku ta di un kultura ku ta hopi diferente for di esun di bo? Kisas nan idioma, forma di bisti, tradishonnan i kuminda ta diferente for di loke bo a kustumbrá kuné. Bo tin tendensia di evitá e rumannan akí i asosiá mas ku rumannan ku tin mesun background ku bo? Òf kiko si un ansiano di bo kongregashon, di bo sirkuito òf di sukursal ta mas yòn ku bo òf ta di un otro rasa òf kultura? Lo bo laga e kosnan ei kibra e union ku mester tin entre nos ku ta sirbi Yehova?
18, 19. (a) Ki konseho Efesionan 4:1-3 ta duna nos? (b) Kiko nos por hasi pa yuda mantené union den e kongregashon?
18 Kiko por yuda nos evitá e trampanan ei? Pablo a duna e kristiannan na Efeso, un stat próspero i ku hende di diferente background, algun konseho práktiko. (Lesa Efesionan 4:1-3.) Tuma nota ku e promé kualidatnan ku Pablo a menshoná ta humildat, suavedat, pasenshi i amor. Nos por kompará e kualidatnan akí ku pilá ku ta wanta un kas. Pero, banda di tin pilánan fuerte, mester mantené un kas regularmente p’e no bai atras. Pablo a urgi e kristiannan na Efeso pa nan hasi esfuerso sinsero pa “mantené e union di spiritu.”
19 Kada un di nos mester aseptá nos responsabilidat pa yuda mantené e union den kongregashon. Kiko nos por hasi? Di promé, nos tin ku kultivá i desplegá e kualidatnan ku Pablo a menshoná, esta, humildat, suavedat, pasenshi i amor. Anto nos tin ku hasi tur nos esfuerso pa promové “e vínkulo di pas” ku ta uni nos. Nos mester trata na drecha kualke “krak,” òf debilidat, ku nos por tin. Asina nos ta yuda mantené nos pas i union, ku ta asina balioso, den e kongregashon.
20. Kon nos por demostrá ku nos ta komprondé ku “Yehova nos Dios ta ún Yehova”?
20 “Yehova nos Dios ta ún Yehova.” Ki un rekordatorio poderoso! El a fortalesé e israelitanan pa enfrentá e retonan nan dilanti ku kurashi ora nan tabata a punto di drenta e Tera Primintí. Si nos tuma e palabranan ei na pechu, nos tambe lo haña e kurashi pa enfrentá e tribulashon grandi ku ta den porta i kontribuí na e pas i union den Paradeis. Laga nos sigui rindi deboshon eksklusivo na Yehova, stim’é i sirbié ku henter nos alma i hasi esfuerso pa mantené e union den nos hermandat kristian. Si nos sigui hasi esaki, nos lo por mira futuro ku e konfiansa ku loke Hesus a bisa tokante esnan ku lo e husga komo karné lo kumpli: “Bini, boso ku mi Tata a bendishoná, risibí e Reino ku ta prepará pa boso desde ku a funda mundu.”—Mat. 25:34.
^ par. 2 Deuteronomio 6:4 i 5 (NW): “Skucha, o Israel: Yehova nos Dios ta ún Yehova. I bo tin ku stima Yehova bo Dios ku tur bo kurason i ku tur bo alma i ku tur bo forsa.”