KON bo por tin sigur ku e palabranan akí ta bèrdat i ku Yehova ta realmente interesá den bo? Un motibu ta ku Beibel ta bisa esei spesífikamente. Promé Pedro 5:7 ta bisa: “Tira tur boso inkietut riba dje, pasobra e ta interesá den boso.” Kiko ta konvensé bo ku Yehova Dios ta interesá den bo?

Pa kuminsá, Dios tin kualidatnan ku nos lo ke mira den nos bon amigunan. Hende ku ta generoso i ku ta trata otro ku bondat hopi biaha ta bira bon amigu.Ta fásil pa mira e karakterístikanan ei den Yehova su trato tur dia ku hende. Por ehèmpel, Beibel ta bisa: “E ta laga su solo sali riba mal hende i bon hende i ta laga awa kai riba hende hustu i inhustu.” (Mat. 5:45) Kon solo i áwaseru ta benefisiá nos? Entre otro, pa medio di nan Dios ta ‘laga hende haña kuminda na abundansia i ta yena nan kurason ku alegria.’ (Echo. 14:17) Sí, Yehova ta sòru pa e tera produsí kuminda na abundansia. Anto ken no ta bira kontentu ora nan haña un plato delisioso?

Pero, pakiko anto tin asina tantu hende ta pasa hamber? Pasobra hopi biaha gobièrnunan humano ta mas interesá den haña poder polítiko i saka plaka di pueblo ku drecha e situashon pa hende por hiba un mihó bida. Ma pronto Yehova lo resolvé e problema ei i remplasá e sistema polítiko aktual golos ku su Reino selestial den man di su Yu komo Rei. Den e tempu ei, hende lo no pasa hamber mas. For di aworakí, Dios ta perkurá pa  su fiel sirbidónan. (Sal. 37:25) Esaki sigur ta mustra ku e ta interesá den nos, no ta bèrdat?

Un bon amigu ta pasa tempu ku bo. E por pasa oranan largu ta papia ku bo tokante kosnan ku boso gusta. I un bon amigu lo skucha ku atenshon ora bo ta kont’é tokante bo problema- i preokupashonnan. Yehova tambe ta asina? Sigur ku sí! E ta habrí pa skucha nos orashonnan. Pa e motibu ei, Beibel ta animá nos pa “perseverá den orashon,” i pa asta “hasi orashon konstantemente.”—Rom. 12:12; 1 Tes. 5:17.

Pa kuantu ora Yehova ta dispuesto pa skucha nos orashonnan? Un ehèmpel den Beibel ta duna nos e kontesta. Promé ku Hesus a skohe su apòstelnan, el “a pasa henter anochi ta hasi orashon na Dios.” (Luk. 6:12) Den e orashon ei, Hesus lo a repasá nòmber di hopi di su disipelnan, a analisá kiko ta nan kualidat- i debilidatnan i a pidi su Tata pa yud’é skohe e apòstelnan. Anto pa ora ku di dia a habri, Hesus tabata sa ku el a skohe esnan ku tabata mihó kualifiká pa sirbi komo su apòstelnan. Yehova ta esun “ku ta skucha orashon,” i e ta gusta skucha tur orashon hasí di kurason. (Sal. 65:2) Pues asta ora un persona hasi orashon pa oranan largu tokante un asuntu ku ta preokup’é hopi, Yehova lo no, na moda di papia, keda wak oloshi pa wak kuantu tempu a pasa.

Tin biaha asta bon amigu tin problema pa pordoná otro. Amistatnan di hopi aña a yega di kibra pa e motibu ei. Ma Yehova sí no ta asina! Beibel ta invitá tur hende di kurason sinsero pa pidié su pordon “pasobra e lo pordoná abundantemente.” (Isa. 55:6, 7) Kiko ta motivá Dios pa pordoná nos libremente?

Esei ta Dios su amor inkomparabel. E ta stima mundu asina tantu ku el a duna su Yu, Hesus, komo reskate pa libra humanidat for  di piká i e efektonan ku piká ta trese kuné. (Huan 3:16) De echo, e reskate ta logra asta mas ku esei. Mediante Kristu su sakrifisio, Dios ta pordoná hende ku e ta stima libremente. Apòstel Huan a skirbi: “Si nos konfesá nos pikánan, Dios lo pordoná nos nos pikánan i limpia nos di tur inhustisia, pasobra e ta fiel i hustu.” (1 Huan 1:9) Komo ku Yehova ta kla pa pordoná, hende por sigui disfrutá di un amistat kuné, i esei sigur ta konmové nos mashá.

Un amigu berdadero ta yuda bo ora bo tin mester di esei. Yehova ta hasi meskos? Su Palabra ta bisa: “Maske [un sirbidó di Dios] trompeká, e lo no kai; pasobra SEÑOR ta sosten’é ku su man.” (Sal. 37:24) Yehova ta ‘sostené su sirbidónan’ den vários manera. Tuma nota di un eksperensia di un mucha muhé na St. Croix, un isla karibense.

Su kompañeronan di klas tabata pone preshon riba dje pasobra pa motibunan religioso e no tabata saludá bandera. Despues di a pidi Yehova pa yudansa, el a tuma un kurashi. El a disidí di trata e tema akí den un spreekbeurt. El a hasi su siguiente spreekbeurt tokante saludamentu di bandera. El a usa Mi Buki di Relato Bíbliko pa splika kon Sadrak, Mesak i Abed-nego tabata bon ehèmpel p’e i a yud’é tuma su desishon. El a bisa: “Yehova a protehá e tres hóbennan ei pasobra nan a nenga di adorá un imágen.” Kaba el a ofresé su kompañeronan e buki. Diesun di nan tabata ke un. E mucha muhé a keda masha kontentu ora el a realisá ku Yehova a dun’é brio i sabiduria pa e papia tokante un tema delikado asina.

Si akaso bo ta duda ku Yehova ta interesá den bo, meditá riba pasashinan di Beibel manera Salmo 34:17-19; 55:22 i 145:18 i 19. Puntra rumannan ku tin hopi aña den e bèrdat kon Yehova a perkurá pa nan. I ora bo tin mester di Dios su yudansa, hasi orashon tokante e asuntu. I lo bo mira kon Yehova ‘ta interesá den bo.’