1. Ki problemanan nos tin ku trata kuné, i ki motibu Yehova tin pa ta kontentu ku su fiel sirbidónan? (Wak e promé plachi.)

MANERA boso sa, bida den e mundu akí ta yen di problema. Hopi di boso, rumannan stimá, ta lucha ku malesa grave. Algun di boso tin ku kuida miembronan di famia di edat avansá aunke boso mes no ta muchu yòn mas. Ademas, tin otro ruman ku tin ku traha duru pa perkurá loke nan famia tin mester. I nos sa ku hopi di boso tin ku trata ku vários di e problemanan akí na mes momento. Tur esei ta rekerí hopi tempu, energia i plaka. Apesar di tur e kosnan akí, boso ta sigui konfia ku henter boso kurason den Yehova su promesanan tokante un mihó futuro. Siguramente, esaki ta hasi Yehova masha kontentu!

2. Kon Isaías 40:29 ta animá nos, pero ki fayo nos por kometé?

² Pero, bo sa sinti ku e problemanan di bida ta difísil pa trata kuné? Si ta asina, bo no ta e úniko. Beibel ta papia di algun fiel sirbidó di Yehova ku hopi bes a sinti ku nan no por a sigui mas. (1 Rei. 19:4; Yòb 7:7) Pero en bes di entregá, nan a pidi Yehova forsa. I Yehova a yuda nan, pasobra Beibel ta bisa ku “e ta duna forsa na esun kansá.” (Isa. 40:29) Lamentablemente, algun sirbidó di Dios awe ta pensa ku e mihó manera pa  trata ku e problemanan di bida ta di stòp di sirbi Yehova pa un tempu. Pa nan, nos aktividatnan kristian ta un karga i no un bendishon. Pues, nan ta stòp di lesa Beibel, di bai reunion i di sali den sirbishi, nèt loke Satanas ke pa nan hasi.

3. (a) Kon nos por evitá ku Satanas ta debilitá nos fe? (b) Kiko nos lo trata den e artíkulo akí?

³ Diabel sa bon bon ku nos fe ta bira fuerte ora nos ta partisipá plenamente den aktividatnan kristian, pero e no ke pa nos ta fuerte. P’esei, ora bo ta sinti bo físikamente i emoshonalmente kansá, no alehá for di Yehova. Al kontrario, ta e ora ei bo mester hala mas serka dje, pasobra ‘lo e hasi bo firme i lo e hasi bo fuerte.’ (1 Ped. 5:10; Sant. 4:8) Den e artíkulo akí, nos lo trata dos situashon ku por pone nos baha man den nos sirbishi na Dios, i nos lo analisá kon prinsipionan di Beibel por yuda nos perseverá. Pero promé, laga nos wak kon Yehova ta fortalesé nos manera Isaías 40:26-31 ta mustra.

4. Kiko nos por siña for di Isaías 40:26?

⁴ Lesa Isaías 40:26. Niun hende no por konta tur e streanan den universo. Segun algun sientífiko, den nos galaksia, esta, e Via Láktea, so kaba por tin asta 400 mil mion strea. Pero Yehova a duna kada strea un nòmber òf título. Kiko esei ta siña nos tokante Yehova? Si Yehova ta asina interesá den su kreashon sin bida, lo e no ta muchu mas interesá den abo ku ta sirbié, no pasobra bo ta programá pa hasi esei, sino pasobra bo ta stim’é? (Sal. 19:1, 3, 14) Nos Tata stimá konosé bo perfektamente. Beibel ta bisa ku “el a konta asta e drachinan di kabei riba boso kabes.” (Mat. 10:30) I un salmista ta sigurá nos ku Yehova sa kiko su sirbidónan fiel ta pasa aden. (Sal. 37:18) Sí, e ta tuma nota di tur bo pruebanan, i e por duna bo forsa pa bo por soportá kada un di nan.

5. Dikon nos por tin sigur ku Yehova por duna nos forsa?

⁵ Lesa Isaías 40:28. Yehova ta e Fuente di tur energia. Pensa por ehèmpel riba e kantidat di energia ku e ta suministrá na solo. Un eskritor di obranan sientífiko, David Bodanis, a bisa: “E kantidat di energia ku solo ta produsí kada sekònde ta ekivalente na e eksploshon di míles di miónes di bòm atómiko.” Un otro investigadó a kalkulá ku e kantidat di energia ku solo ta produsí den solamente ún sekònde lo por satisfasé e nesesidatnan di tur hende na mundu pa 200.000 aña! Sin duda, Yehova, Esun ku ta suministrá energia na solo, por duna nos forsa pa trata ku tur nos problemanan.

6. Den ki sentido e yugo di Hesus ta suave, i ki efekto e bèrdat akí mester tin riba nos?

⁶ Lesa Isaías 40:29. Ora nos ta sirbi Yehova, nos ta haña hopi goso. Hesus a bisa su disipelnan: “Tuma mi yugo.” Anto el a agregá: “Boso alma lo keda refreská. Pasobra mi yugo ta suave, i mi karga no ta pisá.” (Mat. 11:28-30) I esei ta bèrdat! Tin biaha, ora nos ta sali pa bai reunion òf den sirbishi, nos por ta morto kansá. Pero kon nos ta sinti nos ora nos yega kas despues? Nos ta sinti nos refreská i mihó prepará pa enfrentá prueba. Di bèrdat e yugo di Hesus ta suave!

7. Konta un eksperensia ku ta mustra ku loke Mateo 11:28-30 ta bisa ta bèrdat.

⁷ Un ruman muhé ku nos lo yama Kayla ta lucha ku e síndrome di kansansio króniko, depreshon i migrèn. Ta di komprondé ku tin biaha tabata difísil pa e bai reunion. Sinembargo, un dia despues ku el a hasi esfuerso pa bai un diskurso públiko, el a skirbi: “E diskurso a papia tokante  desanimashon. E ruman a trese e informashon padilanti ku asina tantu kompashon i amor ku awa a basha for di mi wowo. E diskurso a kòrda mi ku mi mester bai mi reunionnan.” Sí, Kayla a keda masha kontentu ku el a hasi esfuerso pa bai su reunion!

8, 9. Kiko apòstel Pablo tabata ke men ora el a skirbi: “Ora mi ta débil, e ora ei mi ta poderoso”?

⁸ Lesa Isaías 40:30. Maske kon kapasitá nos ta, tin kosnan ku nos no por hasi riba nos mes forsa. Esei ta un lès ku nos tur mester siña. Pensa riba apòstel Pablo. Aunke e tabata un hòmber ábil i kapas, e tabatin limitashonnan ku a strob’é di hasi tur loke e tabata ke. Ora el a papia ku Dios tokante su preokupashonnan, Dios a bis’é: “Mi poder ta bira kompleto pa bo ora bo ta débil.” Pablo a komprondé e punto. P’esei, el a bisa: “Ora mi ta débil, e ora ei mi ta poderoso.” (2 Kor. 12:7-10) Awor, kiko e tabata ke men ku e palabranan ei?

⁹ Pablo a komprondé ku riba su mes e no por a hasi muchu sin un yudansa mas ayá. Sí, pa medio di spiritu santu, Dios por a dun’é e forsa ku e tabata falta. Ma esei no ta tur kos: Mediante spiritu santu, Pablo por a haña forsa pa e hasi kosnan ku hamas lo e por a hasi riba su mes forsa. Esei ta konta pa nos tambe. Pues, ku e forsa ku Yehova ta duna nos, nos tambe lo ta fuerte!

10. Kon Yehova a yuda David trata ku su problemanan?

¹⁰ Hopi biaha, e salmista David a mira kon spiritu santu di Dios a hasié fuerte. El a kanta: “Ku bo mi por kaba ku un ehérsito; i ku mi Dios mi por bula over di un muraya.” (Sal. 18:29) Tin algun problema ku ta manera muraya ku nos no por “bula over” di dje riba nos mes forsa; nos tin mester di yudansa di Yehova.

11. Splika kon spiritu santu ta yuda nos trata ku problema.

¹¹ Lesa Isaías 40:31. Ora un águila ta bula bai haltu i zueif distansianan largu, e no ta dependé únikamente riba su mes forsa. E ta laga kolumnanan di aire kayente mand’é laira pa asina e konserbá su energia. P’esei, ora bo haña bo den un situashon difísil, kòrda riba e águila. Roga Yehova p’e duna bo “e ayudante,” esta, su spiritu santu, pa asina bo haña e forsa ku bo tin mester. (Huan 14:26) Afortunadamente, nos por pidi Yehova duna nos su spiritu santu ki ora ku nos tin mester di esaki—24 ora pa dia. I un momento ku nos tin ègt mester di spiritu santu ta ora nos tin un desakuerdo ku un ruman den kongregashon. Pero kiko por kousa e desakuerdonan ei?

12, 13. (a) Kiko por kousa desakuerdo entre kristiannan? (b) Kiko e relato di Yosef ta siña nos tokante Yehova?

¹² Komo ku nos tur ta imperfekto, nos por haña nos ku desakuerdo. P’esei, por sosodé ku loke un ruman bisa òf hasi ta molestiá nos, òf ku nos ta iritá un ruman ku loke nos bisa òf hasi. Esei por ta un prueba difísil. Meskos ku ta e kaso ku otro pruebanan, Yehova ta duna nos e chèns di demostrá nos lealtat. Kon asina? Wèl, e ta duna nos oportunidat pa siña traha den union ku nos rumannan ku e ta stima apesar di nan imperfekshonnan.

¹³ E relato di Yosef ta siña nos ku Yehova no nesesariamente ta protehá su sirbidónan kontra prueba. Tempu ku Yosef tabata yòn, su ruman hòmbernan parti di tata tabata yalurs riba dje, i nan a bend’é komo katibu, i el a ser hibá Egipto. (Gén. 37:28) Yehova a mira kiko a sosodé, i sin duda, lo el a sintié masha tristu ora el a mira kon nan a trata su amigu i fiel sirbidó, Yosef. Pero, E no a intervení. Mas  despues, ora Yosef a ser akusá falsamente di a violá e kasá di Potifar i a ser será den prizòn, tampoko Yehova no a intervení. Akaso Dios a bandoná Yosef? Al kontrario! Beibel ta bisa: “Kiko ku [Yosef] tabata hasi, SEÑOR tabata hasi prosperá.”—Gén. 39:21-23.

14. Ki benefisionan nos ta saka ora nos “laga furia” òf rabia?

¹⁴ Ata un otro ehèmpel akí. Masha poko hende a ser tratá asina malu manera David, e amigu di Dios, a ser tratá. Pero, David no a keda karga renkor. Mas bien, el a skirbi: “Stòp di rabia i laga furia para; no kunsumí—esei ta kondusí na maldat so.” (Sal. 37:8) E motibu prinsipal pakiko nos tin ku “laga furia” ta pa nos por imitá Yehova, kende ‘no ta trata ku nos segun nos pikánan.’ (Sal. 103:10) Nos ta benefisiá físikamente tambe ora nos laga furia òf rabia. Kon asina? Wèl, ora nos ta keda rabiá, nos por haña problema di salú manera preshon haltu i problema ku halamentu di rosea. Ademas, rabia por daña nos higra, nos pánkreas i duna nos problema ku digestion. I ora nos ta rabiá, no ta semper nos ta pensa kla. Tin biaha, despues di un atake di rabia, nos por sinti nos deprimí pa hopi tempu. Di otro banda, Beibel ta bisa ku “un kurason trankil ta bida pa e kurpa.” (Pro. 14:30) Awor, kiko si un ruman hùrt nos? Kiko por yuda nos hasi pas ku nos ruman? Pa nos gana nos ruman, nos tin ku apliká konseho sabí ku nos ta haña den Beibel.

15, 16. Kiko nos mester hasi si un ruman hùrt nos?

¹⁵ Lesa Efesionan 4:26. Si un hende ku no ta sirbi Yehova trata nos malu, nos no ta keda sorprendí. Pero, nos por sinti nos hopi kibrá ora un ruman òf un miembro di nos famia bisa òf hasi algu ku ta hùrt nos. Suponé ku bo no por lubidá loke a pasa. Lo bo keda karga renkor kontra e persona ei pa añanan largu? Òf lo bo sigui konseho sabí di Beibel i resolvé e desakuerdo rápidamente? Mas nos tarda pa resolvé e desakuerdo, mas difísil ta bira pa nos hasi pas ku nos ruman.

¹⁶ Suponé ku un ruman a hùrt bo i bo no por lubidá e asuntu. Kiko lo yuda bo hasi pas ku bo ruman? Di promé, hasi orashon ferviente na Yehova i pidié yuda bo pa bo por kòmbersá ku e ruman na un manera positivo. Kòrda ku e ruman tambe ta amigu di Yehova i ku Yehova stim’é meskos ku bo. (Sal. 25:14, NW) Yehova ta trata su sirbidónan ku bondat, i e ta  ferwagt ku nos ta hasi meskos. (Pro. 15:23; Mat. 7:12; Kol. 4:6) Di dos, pensa kiko bo ta bai bisa i no pensa ku ta pa malu e ruman a hùrt bo. Duna e ruman e benefisio di duda. Anto sea dispuesto pa atmití ku kisas abo tambe a faya. Podisé bo por kuminsá boso kòmbersashon asin’akí: “Kisas mi ta un poko krepchi, pero ora bo a papia ku mi ayera, mi a sinti . . . ” Si boso kòmbersashon no duna e resultado deseá, buska un otro oportunidat pa boso hasi pas. Mientrastantu, hasi orashon pa e ruman i pidi Yehova bendishon’é. Pidi Dios yuda bo enfoká riba e bon kualidatnan di bo ruman. Sea kual sea e resultado, bo por tin sigur ku Yehova ta keda kontentu ku bo esfuerso sinsero pa hasi pas ku bo ruman ku ta a la bes amigu di Dios.

17. Ken Yehova por usa pa yuda nos ora nos kometé un piká, i dikon nos mester aseptá nan yudansa?

¹⁷ Algun ruman ta sinti ku nan no ta digno di sirbi Yehova debí ku nan a kometé un piká grave. Sintimentu di kulpa por kaba ku nos energia, nos pas i nos goso. Rei David, kende tambe a lucha ku sintimentu di kulpa, a bisa: “Miéntras ku mi a keda ketu, mi kurpa a para kaba na nada dor di mi kehamentu henter dia. Pasobra di dia i anochi bo man tabata pisá riba mi.” Afortunadamente, David tabatin kurashi pa hasi loke Yehova ke pa su sirbidónan hasi. David a skirbi: “Mi a atmití mi piká na bo, . . . i bo a pordoná e kulpa di mi piká.” (Sal. 32:3-5) Pues, si bo a kometé un piká serio, Yehova ta kla pa pordoná bo i yuda bo drecha bo amistat kuné. Pero bo mester aseptá e yudansa ku e ta duna mediante e ansianonan. (Pro. 24:16; Sant. 5:13-15) No tarda! Esei lo determiná si lo bo biba pa semper òf nò. Pero, kiko si despues di hopi tempu ku Yehova a pordoná bo ainda bo konsenshi ta molestiá bo?

18. Kon e ehèmpel di Pablo por yuda rumannan ku ta sinti ku nan no ta digno di sirbi Yehova?

¹⁸ Tabatin biaha ku apòstel Pablo tabata sintié hopi kibrá pa motibu di fayonan ku el a kometé den pasado. El a atmití: “Mi ta esun di mas insignifikante di e apòstelnan, i mi no ta digno di ser yamá apòstel, pasobra mi a persiguí e kongregashon di Dios.” Apesar di esei, Pablo a bisa tambe: “Ma pa medio di e bondat inmeresí di Dios, mi ta loke mi ta.” (1 Kor. 15:9, 10) Yehova tabata sa ku Pablo tabata imperfekto, i el a aseptá Pablo apesar di e fayonan ku Pablo a kometé anteriormente. I E tabata ke pa Pablo komprondé i aseptá esei. P’esei anto, si bo a arepentí di kurason di e pikánan ku bo a kometé den pasado, a konfesá na Yehova i a papia ku e ansianonan, si esei tabata nesesario, bo por tin sigur ku Yehova lo tene miserikòrdia di bo. Pues, konfia ku Yehova a pordoná bo i aseptá su pordon!—Isa. 55:6, 7.

19. Kiko ta e teksto di aña pa 2018, i dikon e ta na su lugá?

¹⁹ Segun ku e sistema akí ta yega na su fin, nos por spera ku nos lo haña nos ku mas i mas problema di bida. Pero, nos mester keda kòrda ku Yehova, kende ‘ta duna forsa na esun kansá i ta oumentá poder pa esun ku ta falta poder,’ por duna bo tur loke bo tin mester pa sigui sirbié fielmente. (Isa. 40:29; Sal. 55:22; 68:19) Durante henter aña 2018, kada biaha ku nos asistí na reunion na Salòn di Reino, nos lo kòrda e bèrdat importante ei, pasobra nos teksto di aña ta bisa: Esnan ku ta spera riba Yehova lo bolbe haña forsa.—Isa. 40:31.