1, 2. Kon Yehova ta usa su rekursonan material na un manera generoso?

YEHOVA ta un Dios generoso. Ta é a duna nos tur loke nos tin. Yehova ta doño di tur oro, plata i tur otro rekurso natural di nos planeta. I e ta usa esakinan pa sostené bida. (Sal. 104:13-15; Ageo 2:8) Den Beibel, tin diferente relato ku ta mustra kon Yehova a yega di usa su rekursonan na un manera milagroso pa proveé pa su pueblo.

² Por ehèmpel, tempu ku e israelitanan tabata den desierto, durante 40 aña largu Yehova a duna nan mana i awa. (Éks. 16:35) Komo resultado di esei, “nan no tabatin falta di nada.” (Neh. 9:20, 21) Mas despues, Yehova a duna profeta Eliseo poder pa multipliká e poko zeta ku un biuda fiel tabatin. Debí na e milager akí, e biuda por a paga su debenan i asta sobra sèn pa e i su yunan biba for di dje. (2 Rei. 4:1-7) Ademas, ku yudansa di Yehova, Hesus por a proveé kuminda i asta sèn ora esei tabata nesesario.—Mat. 15:35-38; 17:27.

3. Kiko nos lo analisá den e artíkulo akí?

³ Yehova por usa loke e ke pa sostené su kreashon riba tera. Apesar di esei, e ta animá su fiel sirbidónan pa nan usa nan  kosnan material pa apoyá su organisashon. (Éks. 36:3-7; lesa Proverbionan 3:9.) Dikon Yehova ta ferwagt ku nos ta dun’é for di nos rikesa, òf kosnan balioso? Kon fiel sirbidónan di pasado a apoyá adorashon berdadero finansieramente? Kon nos organisashon ta usa sèn di donashon awe? E artíkulo akí lo kontestá e preguntanan ei.

4. Kiko nos ta mustra Yehova ora nos ta apoyá su trabou?

⁴ Dikon nos ta duna Yehova? Pasobra nos ta stim’é i ta gradisidu pa tur loke el a hasi pa nos. Sí, ora nos pensa riba esei, nos ta keda masha emoshoná. Nos tin e mes sintimentunan ku Rei David tabatin ora el a splika kiko tabata nesesario pa kuminsá ku konstrukshon di e tèmpel. El a bisa ku tur loke nos haña ta bini di Yehova i ku tur loke nos duna Yehova ta di loke el a duna nos kaba.—Lesa 1 Krónikanan 29:11-14.

5. Kon Beibel ta mustra ku dunamentu di kurason ta un parti importante di nos adorashon?

⁵ Un otro motibu pakiko nos ta duna Yehova ta pasobra hende ku ta adorá Dios ta hende generoso. Den un vishon, apòstel Huan a tende e angelnan bisa: “Bo ta digno, Yehova, nos Dios, di risibí alabansa pa bo gloria, onor i poder, pasobra ta abo a krea tur kos, i pa motibu di bo boluntat nan ta eksistí i a ser kreá.” (Rev. 4:11) Bo no ta di akuerdo ku Yehova ta meresé tur gloria i onor i ku nos mester dun’é lo mihó di loke nos tin? Pa medio di Moises, Yehova a bisa e israelitanan pa selebrá tres fiesta anual. Segun e Lei, durante e fiestanan akí, e israelitanan no mester a “presentá dilanti di SEÑOR man bashí.” (Deu. 16:16) Pues, dunamentu tabata parti di nan adorashon. Di mes manera, awe tambe, komo parti di nos adorashon, ta importante pa nos duna di kurason na Yehova i asina apoyá e trabou di su organisashon riba tera.

6. Dikon ta bon pa nos ta generoso? (Wak e promé plachi.)

⁶ Ta bon pa nos ta generoso i no hende ku ta tuma so. (Lesa Echonan 20:35.) Por ehèmpel, imaginá bo un mucha ku ta kumpra un regalo pa su mayornan for di e zakgeld ku su mayornan mes a dun’é. Su mayornan lo apresiá e regalo akí mashá, no ta bèrdat? Òf pensa riba un yu hòmber òf un yu muhé ku ta sirbi komo pionero, ku ta biba na kas serka su mayornan i ku ta duna algu pa yuda kubri e gastunan di kas. Aunke e mayornan kisas no a pidi nan yu nada, nan ta aseptá loke nan yu ta duna nan pasobra esei ta un manera ku e yu ta demostrá ku e ta apresiá tur loke nan ta hasi p’e. Di mes manera, Yehova sa ku ta bon pa nos dun’é di nos kosnan balioso.

7, 8. Kon e pueblo di Dios a pone bon ehèmpel den pasado ora nan a kontribuí (a) pa proyektonan spesífiko? (b) pa sostené sirbidónan di Yehova ku tabatin puesto di responsabilidat?

⁷ Beibel ta mustra bon kla ku e pueblo di Dios a duna di nan kosnan material. Na algun okashon, nan a kontribuí pa proyektonan spesífiko. Por ehèmpel, Moises a animá e israelitanan pa kontribuí pa konstrukshon di e tabernakel. Mas despues, Rei David a animá e israelitanan pa hasi meskos pa por a konstruí e tèmpel. (Éks. 35:5; 1 Kró. 29:5-9) Durante e reinado di Rei Joas, e saserdotenan a usa e sèn ku e israelitanan a duna pa drecha e kas di Yehova. (2 Rei. 12:4, 5) Den promé siglo, ora e kristiannan a haña sa ku tabatin un hamber na Hudea, nan a ‘disidí di manda yudansa pa nan rumannan;  kada un a kontribuí segun su forsa.’—Echo. 11:27-30.

⁸ Den otro kasonan, e pueblo di Yehova a hasi donashon pa sostené esnan ku tabatin puesto di responsabilidat. Segun e Lei di Moises, e levitanan no a haña un herensia manera e otro tribunan. Mas bien, e israelitanan tabata duna e levitanan un diesmo, òf un désimo parti, pa asina e levitanan por a keda enfoká riba nan trabou na e tabernakel. (Num. 18:21) Añanan despues, Hesus i su apòstelnan a benefisiá na un manera similar di e generosidat di e hende muhénan, “kendenan tabata usa nan pertenensianan pa sirbi Hesus i e apòstelnan.”—Luk. 8:1-3.

9. Di unda e donashonnan ku e pueblo di Dios tabata hasi den pasado tabata bini?

⁹ Di unda e donashonnan ku e pueblo di Dios tabata hasi tabata bini? E donashonnan tabata bini di diferente fuente. Por ehèmpel, ora e israelitanan a kontribuí pa konstrukshon di e tabernakel den desierto, probablemente nan a duna di e kosnan ku nan a bin kuné for di Egipto. (Éks. 3:21, 22; 35:22-24) Den promé siglo, algun kristian ku tabatin kunuku òf kas a bende eseinan i a hiba e plaka pa e apòstelnan. Anto e apòstelnan tabata parti e plaka entre e kristiannan ku tabatin mester di yudansa. (Echo. 4:34, 35) Otro kristiannan tabata pone sèn un banda i tabata hasi donashon regularmente pa apoyá adorashon na Dios. (1 Kor. 16:2) Pues, tantu hende hopi riku komo hende hopi pober por a kontribuí.—Luk. 21:1-4.

10, 11. (a) Kon nos por imitá e generosidat ku e sirbidónan di Yehova a demostrá den pasado? (b) Kiko bo ta pensa di bo privilegio di por apoyá e aktividatnan di Reino?

¹⁰ Awe, kisas nos tambe ta haña animashon pa hasi donashon pa algu spesífiko. Por ehèmpel, kisas bo kongregashon tin plan pa renobá boso Salòn di Reino òf pa traha un nobo. Podisé nos ta haña sa ku tin mester di fondo pa renobá nos sukursal, fondo pa kubri gastu di un kongreso ku nos lo asistí na dje òf pa yuda rumannan ku a pasa den un desaster natural. Ademas, nos ta hasi donashon pa apoyá e trabou na e sede mundial i na e sukursalnan rònt mundu. Nos donashonnan ta sostené misioneronan, pioneronan spesial i e superintendentenan di sirkuito. Sin duda, bo kongregashon a bai di akuerdo pa tur luna kontribuí ku un montante fiho na e programa mundial di konstrukshon di Salòn di Reino i Salòn di Asamblea. E donashonnan akí ta benefisiá nos rumannan rònt mundu.

¹¹ Nos tur por duna algu pa apoyá e trabou ku Yehova ta hasiendo den e último dianan akí. Mayoria di e donashonnan ku nos ta hasi ta anónimo. Sí, na un manera diskreto nos ta tira sèn den e kahanan di kontribushon na Salòn di Reino òf nos ta hasi donashon online via jw.org. Podisé nos ta pensa ku e donashonnan chikitu ku nos ta hasi no ta yuda mashá. Sinembargo, mayoria di e donashonnan awe ta konsistí di hopi kontribushon chikitu i no di algun kontribushon grandi. Nos rumannan, asta esnan ku ta pober, ta manera e kristiannan di Masedonia. Aunke e kristiannan akí “tabata masha pober,” nan a keda roga pa nan tambe kontribuí, i nan a kontribuí generosamente.—2 Kor. 8:1-4.

12. Ki esfuerso nos organisashon ta hasi pa usa sèn di donashon na e mihó manera?

¹² E rumannan di Kuerpo Gobernante ta hasi nan máksimo esfuerso pa usa e donashonnan ku e organisashon ta haña na un manera fiel i prudente. (Mat. 24:45) Nan ta plania kuidadosamente pa por usa  e fondonan na e manera korekto. (Luk. 14:28) Den tempu bíbliko, hòmbernan fiel ku tabata enkargá ku e donashonnan tabata hasi sigur ku esakinan tabata ser usá solamente pa e adorashon na Yehova. Por ehèmpel, Èsdras a biaha bai Herúsalèm ku e donashonnan, manera oro, plata i otro materialnan ku el a haña di e rei di Persia; awe tur e kosnan akí lo a kosta mas ku 100 mion dòler merikano. Èsdras tabata sa ku e donashonnan akí tabata ofrendanan boluntario pa Yehova. P’esei, el a duna instrukshon spesífiko pa protehá e donashonnan akí durante e biahe peligroso ei. (Èsd. 8:24-34) Hopi aña despues, apòstel Pablo a kolektá sèn pa yuda e rumannan na Hudea. El a hasi sigur ku e kristiannan ku tabata bai hiba e plaka lo a “atendé tur kos onestamente, no solamente den bista di Yehova, sino tambe den bista di hende.” (Lesa 2 Korintionan 8:18-21.) Awe, nos organisashon ta imitá Èsdras i Pablo i ta sigui proseduranan spesífiko ora di usa e donashonnan.

13. Kon bini nos organisashon a hasi algun kambio resientemente?

¹³ Tin biaha, si un famia no ke gasta mas di loke nan ta gana òf nan ke simplifiká nan bida pa nan por hasi mas pa Yehova, nan tin ku hasi kambio. Esaki ta konta pa e organisashon di Yehova tambe. Den e último añanan, e organisashon a kuminsá ku hopi proyekto nobo i emoshonante. Tabatin biaha ku e gastunan tabata mas ku e donashonnan ku nos organisashon tabata haña. Pues, meskos ku un famia lo hasi, nos organisashon ta buska diferente manera pa baha gastu i pa simplifiká e trabou pa asina por hasi mihó uso di nos donashonnan generoso.

14-16. (a) Kon nos organisashon ta usa nos donashonnan? (b) Den ki manera abo ta benefisiá di e provishonnan di nos organisashon?

¹⁴ Hopi ruman ku tin añanan ta sirbi Yehova ta bisa ku nunka promé nos no a yega di haña asina tantu provishon spiritual. Awor, djis pensa un ratu! Den e último añanan, nos a haña jw.org i JW Broadcasting. Ademas, e Tradukshon di Mundu Nobo di e Santu Skritura ta disponibel den hopi mas idioma. Durante aña 2014 i 2015, a tene e kongreso internashonal di tres dia “Sigui Buska Promé e Reino di Dios!” den algun di e stadionnan di mas grandi den 14 stat rònt mundu. Tur e hendenan ku a asistí na e kongreso akí a disfrutá mashá.

¹⁵ Hopi ruman ta ekspresá nan apresio pa tur e bon kosnan ku nan ta haña di e  organisashon di Yehova. Por ehèmpel, relashoná ku e JW Broadcasting, un pareha kasá ku ta sirbi na un pais na Asia, a skirbi: “Nos asignashon ta den un stat chikitu. P’esei, tin biaha nos ta sinti nos isolá i ta fásil pa nos lubidá ku e trabou di Yehova ta tumando lugá rònt mundu. Pero asina nos wak e diferente programanan riba JW Broadcasting, nos ta kòrda ku nos ta parti di un hermandat internashonal. Nos rumannan stimá den e stat akí ta masha kontentu ku e JW Broadcasting. Hopi biaha nos ta tende nan bisa ku despues di a wak e programanan mensual, nan ta sinti nan mas serka di e miembronan di Kuerpo Gobernante. Awor mas ku nunka nan ta sinti nan orguyoso di ta parti di e organisashon di Dios.”

¹⁶ Aktualmente, tin kasi 2.500 Salòn di Reino rònt mundu ku ta ser renobá òf konstruí. Despues ku e rumannan di un kongregashon na Honduras a kuminsá usa nan salòn nobo, nan a skirbi: “Nos ta masha kontentu ku nos por ta parti di Yehova su famia universal i di por gosa di nos maravioso hermandat mundial. Danki na nan, nos a haña un Salòn di Reino den nos pueblo; nos soño a bira realidat.” Hopi ruman ta ekspresá nan apresio ku palabranan similar ora nan haña Beibel òf otro publikashonnan tradusí na nan idioma, ora nan haña yudansa despues di un desaster natural òf ora nan mira e resultadonan di predikashon den statnan grandi i den áreanan públiko den nan teritorio.

17. Kon nos por sa ku Yehova ta sostené su organisashon awe?

¹⁷ Hopi hende ku no ta Testigu di Yehova no por komprondé kon nos por hasi tur e trabou akí pa medio di solamente donashonnan boluntario. Despues ku e gerente di un empresa grandi a haña un tour den un di nos fasilidatnan di imprenta, el a keda asombrá ku tur e rumannan ta traha boluntariamente i ku nos no ta organisá eventonan pa rekoudá fondo. El a bisa ku loke nos ta logrando ta algu ku normalmente lo no ta posibel. Anto nos ta di akuerdo kuné! Pasobra nos sa ku ta ku e sosten di Yehova so e trabou akí ta posibel.—Yòb 42:2.

18. (a) Ki bendishon nos ta haña ora nos ta apoyá e Reino? (b) Kon nos por yuda nos yunan i publikadónan nobo apoyá e Reino?

¹⁸ Yehova ta duna nos e onor i e oportunidat pa apoyá e gran trabou di Reino ku ta tuma lugá awe. E ta sigurá nos ku lo e bendishoná nos ora nos ta apoyá e Reino. (Mal. 3:10) Yehova ta primintí ku hende generoso lo prosperá. (Lesa Proverbionan 11:24, 25.) Ademas, ora nos ta generoso, nos lo ta felis, pasobra “tin mas felisidat den duna ku den risibí.” (Echo. 20:35) Mediante nos ehèmpel i palabranan, nos tin e privilegio di yuda nos yunan i publikadónan nobo komprondé kon nan tambe por duna Yehova, apoyando e Reino i, komo resultado di esei, haña hopi bendishon.

19. Kon e artíkulo akí a animá bo?

¹⁹ Ta Yehova a duna nos tur loke nos tin. Ora nos duna Yehova bèk, nos ta mustra ku nos ta stim’é i ta balorá tur loke el a hasi pa nos. (1 Kró. 29:17) Ora e israelitanan a kontribuí pa konstrukshon di e tèmpel, nan “a regosihá, pasobra nan a duna ofrenda boluntariamente, pasobra di henter nan kurason nan a duna SEÑOR nan ofrenda.” (1 Kró. 29:9) Di mes manera, laga nos sigui duna Yehova for di loke e mes ta duna nos. Asina nos lo sigui haña goso i satisfakshon!