1, 2. Ki evento lo uní hende na un manera úniko durante aña 2018, i dikon e union ei ta ekstraordinario? (Wak e promé plachi.)

DIA 31 di mart 2018, segun ku solo ta baha, miónes di sirbidó di Dios i hopi otro hende lo bini huntu pa selebrá e Sena di Señor. Sí, e Konmemorashon di e Morto di Hesus, òf Memorial, ku ta tuma lugá un bes pa aña, ta uni hende na un manera ekstraordinario. No tin niun otro evento na mundu ku ta uni hende di e manera ei.

² Sin duda, Yehova i Hesus lo keda masha kontentu segun ku nan ta wak kon miónes di hende rònt mundu ora tras di ora ta asistí na e evento spesial akí. Beibel a profetisa ku ‘un multitut grandi ku ningun hende lo no por konta, for di tur nashon, tribu, pueblo i idioma’ lo bisa: “Nos debe nos salbashon na Dios, kende ta sintá riba e trono, i na e Lamchi!” (Rev. 7:9, 10) Ta bunita pa mira kon tur aña asina tantu hende ta onra Yehova i Hesus, asistiendo na Memorial.

3. Ki preguntanan e artíkulo akí lo kontestá?

³ E artíkulo akí ta kontestá e siguiente preguntanan: (1) Kon kada un di nos por prepará pa Memorial i benefisiá di dje?  (2) Den ki manera e Konmemorashon di e Morto di Hesus ta uni e pueblo di Dios? (3) Kon kada un di nos por kontribuí na e union akí? (4) Lo yega un dia ku nos lo selebrá e Konmemorashon pa último bes? Si ta asina, na ki tempu?

4. Dikon ta importante pa nos hasi tur loke ta posibel pa asistí na Memorial?

⁴ Dikon ta importante pa nos asistí na Memorial? Pasobra e selebrashon di Memorial, meskos ku e otro reunionnan, ta parti di nos adorashon na Dios. Nos por tin sigur ku Yehova i Hesus ta mira ken ta hasi esfuerso pa asistí na e reunion di mas importante di aña. I di nos banda, nos ke pa nan mira ku nos ta determiná pa asistí na Memorial, a ménos ku problema físiko òf un ke otro sirkunstansia ta stroba nos. Ora nos ta demostrá pa medio di nos echonan ku e reunionnan ta importante pa nos, nos ta duna Yehova mas motibu pa konserbá nos nòmber den su “buki di memoria,” esta, “e buki di bida.” E buki akí ta kontené nòmber di hende ku Yehova ke duna bida eterno.—Mal. 3:16; Rev. 20:15.

5. Durante e dianan promé ku Memorial, kon nos por ‘saminá nos mes pa sa si nos ta den e fe’?

⁵ Ta bon pa nos apartá tempu durante e dianan promé ku Memorial pa hasi orashon i analisá nos relashon ku Yehova. (Lesa 2 Korintionan 13:5.) Kon nos por hasi esei? Pablo a bisa ku nos mester ‘saminá nos mes pa nos por sa si nos ta den e fe.’ I pa saminá nos mes, ta bon pa nos puntra nos mes: ‘Mi ta kere di bèrdat ku mi ta forma parti di e úniko organisashon ku Yehova a skohe pa kumpli ku su boluntat? Mi ta hasi tur mi esfuerso pa prediká i pa siña hende e bon notisia di e Reino? Mi echonan ta demostrá ku di bèrdat mi ta kere ku nos ta bibando den e último dianan i ku fin di Satanas su gobernashon ta serka? Mi konfiansa den Yehova i Hesus ta mes fuerte ku tempu mi a dediká mi bida na Yehova?’ (Mat. 24:14; 2 Tim. 3:1; Heb. 3:14) Pa nos por sigui demostrá ki tipo di hende nos ta, nos tin ku meditá riba e kontestanan pa e preguntanan ei.

6. (a) Kiko nos tin ku hasi pa nos por haña bida eterno? (b) Kon un ansiano ta prepará tur aña pa e Konmemorashon, i kon bo por imit’é?

⁶ Un manera ku nos por prepará pa e Konmemorashon di e Morto di Hesus ta di lesa artíkulonan ku ta splika e importansia di e okashon akí i meditá riba loke nos a lesa. (Lesa Huan 3:16; 17:3.) Pa nos por haña bida eterno, nos tin ku “siña konosé” Yehova i “pone fe” den Hesus, Su Yu unigénito; no tin otro manera. Pa prepará pa Memorial, nos por studia tópikonan ku lo yuda nos hala mas serka Yehova i Hesus. Laga nos wak kiko un ruman ku tin hopi aña ta sirbi komo ansiano ta hasi. Atraves di añanan, el a kolekshoná artíkulo di Toren di Vigilansia ku ta papia tokante e Konmemorashon i tokante e amor ku Yehova i Hesus a demostrá na nos. Den e simannan promé ku Memorial, e ta bolbe lesa e artíkulonan ei i ta meditá riba e importansia di e selebrashon akí. Tempu tempu e ta agregá un òf dos artíkulo na su kolekshon. E ansiano ei a ripará ku debí na su kustumber di repasá e artíkulonan akí, di sigui e programa di lesamentu di Beibel pa Memorial i meditá riba loke el a lesa, tur aña e ta siña algu nobo. Mas importante ainda, tur aña su amor pa Yehova i Hesus ta bira mas fuerte. Un programa di estudio asina por yuda bo haña mas amor i apresio pa Yehova i Hesus. Di e manera ei, lo bo por benefisiá mas di e Konmemorashon di e Morto di Hesus.

7. (a) Kiko Hesus a pidi den orashon riba e anochi di e promé Sena di Señor? (b) Kiko ta mustra ku Yehova a kontestá Hesus su orashon?

⁷ Riba e anochi di e promé Sena di Señor, Hesus a hasi un orashon spesial. El a pidi den orashon pa tur su siguidónan ta uní ku otro meskos ku e ku su Tata ta uní. (Lesa Huan 17:20, 21.) Sin duda, Yehova a kontestá e orashon di su Yu stimá. E Konmemorashon di e Morto di Hesus, mas ku tur otro reunion di e pueblo di Dios, ta duna prueba bon kla ku Testigunan di Yehova ta un pueblo uní. Riba e dia ei, hende di hopi nashon i rasa ta reuní rònt mundu pa demostrá ku nan ta kere ku ta Yehova a manda su Yu na tera. Den algun área, no ta usual pa mira hende di diferente rasa huntu na un reunion religioso. Anto si nan ta reuní mes, otro hende ta kritiká nan. Pero pa Yehova i Hesus, nos union ta algu masha bunita.

8. Ki mensahe Yehova a duna Ezekiel?

⁸ E echo ku nos komo e pueblo di Yehova ta uní no ta straña nos. De echo, mediante profeta Ezekiel, Yehova a profetisá ku su pueblo lo ta uní. Sí, Yehova a bisa Ezekiel pa kue dos pida palu, ún “pa Huda” i ún “pa Yosef.” I e mester a pega nan na otro pa nan bira un solo pida palu. (Lesa Ezekiel 37:15-17.) E “Pregunta di Lektor” publiká den E Toren di Vigilansia di yüli 2016 a splika: “Yehova a duna Ezekiel un mensahe di speransa: el a primintí ku lo el a uni e nashon di Israel despues ku nan lo a regresá e Tera Primintí. E mensahe ei tambe a profetisá tokante e unimentu di e pueblo di Dios ku a kuminsá tuma lugá den e último dianan.”

9. Den ki sentido kumplimentu di e profesia di Ezekiel ta bisto tur aña na Memorial?

⁹ For di 1919, gradualmente Yehova a reorganisá i reuní e ungínan, kendenan ta manera e palu “pa Huda.” Ku tempu, mas i mas hende ku tabatin e speransa di biba riba tera, ku den sentido simbóliko ta manera e palu “pa Yosef,” a kuminsá djòin e ungínan, i e dos gruponan akí a bira “ún tou.” (Huan 10:16; Zak. 8:23) Yehova a primintí ku lo el a uni e dos palunan ei i hasi nan ún den su man. (Eze. 37:19) Awor tur dos grupo ta sirbi Yehova komo su pueblo uní bou di ún Rei, Hesukristu glorifiká, kende e profesia ta yama “mi sirbidó David.” (Eze. 37:24, 25) E union presioso akí ku Ezekiel a deskribí ta bisto tur aña ora e restu di kristian ungí i e ‘otro karnénan’ reuní huntu pa konmemorá e morto di Kristu. Pero, kiko kada un di nos por hasi pa protehá i promové union den e pueblo di Yehova?

10. Kon nos por kontribuí na union den e pueblo di Dios?

¹⁰ Un manera ku nos por kontribuí na union den e pueblo di Dios ta di kultivá humildat. Tempu ku Hesus tabata riba tera, el a animá su disipelnan pa ta humilde. (Mat. 23:12) Den mundu, mayoria di hende ta pensa ku nan ta mas ku otronan. Ma si nos ta humilde, nos no ta sinti nos mas ku otro hende. Mas bien, nos ta respetá e rumannan ku ta dirigí i ta sigui nan guia. Ta di e manera ei so e kongregashon por ta uní. Riba tur kos, ora nos ta humilde, nos ta hasi Yehova kontentu, pasobra e ta “oponé hende orguyoso, ma e ta duna bondat inmeresí na hende humilde.”—1 Ped. 5:5.

11. Dikon nos por bisa ku meditashon riba e nifikashon di e pan i e biña ku nos ta usa na Memorial ta yuda nos kontribuí na union den e pueblo di Dios?

¹¹ Un di dos manera ku nos por kontribuí na union ta di meditá riba e nifikashon  di e pan sin zürdeg i e biña kòrá ku nos ta usa na Memorial. Nos tin ku saka tempu pa meditá promé ku Memorial i spesialmente riba e anochi ei mes. (1 Kor. 11:23-25) E pan ta representá e kurpa sin piká ku Hesus a duna komo sakrifisio, i e biña ta representá e sanger ku Hesus a drama. Pero e solo echo ku nos sa òf ta komprondé kiko e pan i e biña ta representá no ta sufisiente. Nos tin ku kòrda tambe ku e sakrifisio di reskate di Kristu ta un muestra di e dos ekspreshonnan di amor di mas grandi: e amor ku Yehova a demostrá ora el a manda su Yu pa salba nos i e amor ku Hesus a demostrá ora ku boluntariamente el a duna su bida pa nos. Si nos meditá riba nan amor, nos lo sinti nos motivá pa nos tambe stima nan. I e amor ku nos i nos rumannan tin pa Yehova ta manera un kabuya ku ta mara nos na otro i fortalesé nos lasonan di union.

12. Kon Hesus a mustra bon kla den su ilustrashon tokante e rei i su esklabonan ku Yehova ta ferwagt ku nos ta pordoná otro?

¹² Un di tres manera ku nos por kontribuí na union den e pueblo di Dios ta di pordoná otro libremente. Ora nos ta pordoná nos rumannan, nos ta mustra ku nos ta gradisidu ku Yehova ta pordoná nos nos pikánan a base di e sakrifisio di reskate di Kristu. Pensa un ratu riba Hesus su ilustrashon registrá na Mateo 18:23-34. Anto puntra bo mes: ‘Mi ta sinti mi motivá pa apliká loke Hesus a siña nos den e ilustrashon akí? Mi ta trata mi rumannan ku pasenshi i ku komprenshon? Mi ta kla pa pordoná esnan ku hùrt mi?’ Klaru, tin piká ta mas serio ku otro. I komo ku nos ta imperfekto, tin biaha ta masha difísil pa nos pordoná algun di nan. Pero, e ilustrashon di Hesus ta siña nos loke Yehova ta ferwagt di nos. (Lesa Mateo 18:35.) Hesus a mustra bon kla ku si nos no pordoná nos rumannan ora nan arepentí di kurason, Yehova tampoko lo no pordoná nos. Esei ta algu serio pa pensa ariba! Nos ta protehá i kontribuí na nos union presioso ora nos ta pordoná otro manera Hesus a siña nos.

13. Dikon ta importante pa nos pordoná nos rumannan?

¹³ Si nos ke keda na pas ku nos rumannan, nos mester ta kla pa pordoná nan. Kòrda ku apòstel Pablo a konsehá nos  pa hasi “esfuerso sinsero pa mantené e union di spiritu den e vínkulo di pas.” (Efe. 4:3) Den e temporada di Memorial, i spesialmente riba e anochi di Memorial, pensa profundamente riba e manera ku bo ta trata otro hende. Puntra bo mes: ‘Otro hende por mira bon kla ku mi no ta un persona ku ta karga renkor? Nan konosé mi komo un persona ku ta hasi esfuerso pa hasi pas i kontribuí na union?’ Esakinan ta preguntanan importante ku nos mester meditá riba dje durante e periodo akí di aña.

14. Kon nos ta demostrá ku nos ta ‘soportá otro den amor’?

¹⁴ Un di kuater manera ku nos por kontribuí na union di e pueblo di Dios ta di demostrá amor i sigui e ehèmpel di Yehova, e Dios di amor. (1 Huan 4:8) Nunka nos ke bisa di nos rumannan: “Mi tin ku soportá nan, pero esei no ta nifiká ku mi tin ku stima nan.” Si nos ta pensa asina, nos no ta siguiendo e konseho di Pablo ku ta bisa ku nos mester ‘soportá otro den amor.’ (Efe. 4:2) Tuma nota ku Pablo no a djis bisa ku nos mester ‘soportá otro.’ Mas bien, el a bisa ku nos mester hasi esei “den amor.” Tin un diferensia entre djis soportá i soportá den amor, no ta bèrdat? Den nos kongregashonnan, tin tur tipo di hende ku Yehova a hala serka dje. (Huan 6:44) Esei ta indiká ku e tin bon motibu pa stima nan. Awor, si Yehova tin motibu pa stima nos rumannan, ken nos ta pa bisa ku nan no meresé nos amor? Nos mester ta kla pa stima nos rumannan manera Yehova ke pa nos stima nan.—1 Huan 4:20, 21.

15. Kon nos por sa ku lo tin un último Konmemorashon?

¹⁵ Un dia nos lo tene e Konmemorashon di e Morto di Hesus pa último biaha. Kon nos por sa esei? Den Pablo su promé karta inspirá na e korintionan, el a bisa e kristiannan ungí ku kada aña ku nan konmemorá e morto di Hesus, nan ta “sigui proklamá e morto di Señor, te ora e yega.” (1 Kor. 11:26) E palabra “yega” den e versíkulo akí ta referí na e mesun suseso ku Hesus a referí na dje ora el a usa e palabra “bini” den su profesia tokante e tempu di fin. Relashoná ku e tribulashon grandi ku ta serka, Hesus a bisa: “E señal di e Yu di hende lo aparesé den shelu, i tur e tribunan di tera lo bati nan pechu di tristesa, i nan lo mira e Yu di hende bini riba e nubianan di shelu ku poder i gran gloria. I lo e manda su angelnan ku un zonido duru di tròmpèt, i nan lo reuní su skohínan for di e kuater skinanan di mundu, for di e punta di mas leu di shelu te na e otro punta di mas leu.” (Mat. 24:29-31) Hesus lo “reuní su skohínan” ora e hiba shelu tur e kristiannan ungí ku ainda ta riba tera. Esei lo sosodé despues ku e tribulashon grandi kuminsá pero promé ku e guera di Armagedon kuminsá. Den e guera ei, Hesus huntu ku tur e 144.000 skohínan lo bringa kontra e reinan di tera i vense nan. (Rev. 17:12-14) E último Konmemorashon ku nos lo selebrá lo ta esun promé ku Hesus “bini,” òf “yega,” pa hiba e ungínan shelu.

16. Dikon abo ta determiná pa ta presente na Memorial e aña akí?

¹⁶ Laga nos ta determiná pa asistí na e Konmemorashon di e Morto di Kristu dia 31 di mart 2018. Nos tin ku pidi Yehova yuda nos sigui kontribuí na union den e pueblo di Dios. (Lesa Salmo 133:1.) Kòrda, un dia nos lo selebrá e último Konmemorashon. Mientrastantu, laga nos hasi tur nos esfuerso pa ta presente, i laga nos demostrá ku nos ta balorá e union ku nos ta disfrutá di dje na e Konmemorashon di e Morto di Hesus.