1. Dikon hopi hende awe no ta konfia Beibel?

 HOPI hende awe no sa ken pa konfia. Nan ta puntra nan mes si hende ku nan ta atmirá manera polítiko, sientífiko i komersiante di bèrdat tin bon intenshon. Ademas, nan no tin bon opinion di lidernan religioso ku ta bisa di ta kristian. Pues, no ta nada straño ku hende no ta konfia Beibel tampoko, kual ta e buki ku e lidernan ei supuestamente ta sigui.

2. Di kiko nos mester ta konvensí? (Salmo 119:160)

² Komo sirbidónan di Yehova, nos ta konvensí ku ta “imposibel pa Dios gaña” i ku semper e ke lo mihó pa nos. (Heb. 6:18; Isa. 48:17) Nos sa ku nos por konfia loke nos ta lesa den Beibel pasobra “tur [Dios su] palabranan ta bèrdat.” (Lesa Salmo 119:160.) Nos ta di akuerdo ku loke un eksperto riba tereno di Beibel a bisa: “Den tur loke Dios a bisa no tin niun krenchi di mentira ni chèns ku lo e no kumpli. E pueblo di Dios por konfia den loke el a bisa pasobra nan ta konfia e Dios ku a bisa esei.”

3. Kiko nos lo analisá den e artíkulo akí?

³ Kon nos por yuda otro hende haña e mesun konfiansa ku nos tin den Dios su Palabra? Laga nos analisá tres motibu pakiko nos ta konfia Beibel: (1) e mensahe di Beibel no a kambia, (2) profesianan di Beibel semper ta kumpli i (3) Beibel ta kambia bida di hende.

4. Dikon algun hende ta pensa ku a kambia Beibel?

⁴ Yehova a usa mas o ménos 40 hòmber fiel pa skirbi e bukinan di Beibel. Yamer ku niun di e manuskritonan original ei no ta eksistí mas. b Tur loke nos tin ta kopianan di kopianan. P’esei, algun hende ta puntra nan mes si loke nan ta lesa den Beibel realmente ta loke e hòmbernan fiel ei a skirbi. B’a yega di puntra bo mes dikon nos tin sigur ku Beibel su mensahe no a kambia?

5. Kon nan a kopia Skritura Hebreo? (Wak e plachi riba portada.)

⁵ Kiko Yehova a hasi pa protehá su mensahe inspirá? El a laga skirbi kopia di dje. El a duna e reinan di Israel instrukshon pa skirbi nan propio kopia di e Lei i a duna e levitanan e tarea di siña e pueblo e Lei. (Deu. 17:18; 31:24-26; Neh. 8:7) Despues ku e hudiunan a ser librá for di Babilonia, un grupo di kopiadó profeshonal a kuminsá skirbi hopi kopia di Skritura Hebreo. (Èsd. 7:6, nota) E hòmbernan ei tabata tuma nan trabou na serio. Ku tempu, nan a kuminsá konta no solamente e palabranan sino tambe e lèternan pa asina hasi sigur ku loke nan a kopia tabata korekto. Pero debí na imperfekshon, tòg aki aya tabatin algun fout chikitu. Pero komo ku nan a skirbi hopi kopia di e mesun teksto, por a saka afó unda e foutnan tabata. Kon esei a bai?

6. Kon por a deskubrí fout den e kopianan di Beibel?

⁶ Ekspertonan riba tereno di Beibel tin un bon manera pa deskubrí foutnan ku e kopiadónan a hasi. Pa komprondé e método, ban bisa ku a pidi 100 hende pa skirbi kopia di un artíkulo. Pero un di nan ta hasi un fout masha chikitu. Un manera pa haña e fout ta di kompará e kopia ei ku kopianan di e otro hendenan. Asina tambe ekspertonan a hasi ku manuskritonan di Beibel. Dor di kompará nan ku otro, nan por a deskubrí si un kopiadó a hasi un fout òf a laga algu afó.

7. Kon presis e kopiadónan tabata den nan trabou?

⁷ Laga nos wak un ehèmpel ku ta mustra kon presis e kopiadónan tabata den nan trabou. E manuskrito di mas bieu di Skritura Hebreo kompleto yama Kodèks di Leningrad i ta di aña 1008 òf 1009 D.K. Den e último añanan a deskubrí un kantidat di manuskrito i fragmento ku ta rònt di 1.000 aña mas bieu kuné. Kisas nos por pensa ku despues di tantu kopiamentu durante un periodo 1.000 aña, lo mester tin diferensianan hopi grandi entre Kodèks di Leningrad i e manuskritonan mas bieu. Pero, esei no tabata e kaso. Un tim di eksperto a kompará e manuskritonan ku otro i a deskubrí ku aunke tabatin diferensia chikitu den algun palabra, e mensahe mes no a kambia.

8. Ki diferensia tin entre e kopianan di Skritura Griego Kristian i esnan di otro bukinan di e mesun periodo?

⁸ Kristiannan di promé siglo a sigui e kustumber di e kopiadónan di Skritura Hebreo. Nan a tuma nan tempu pa skirbi kopia di e 27 bukinan di Skritura Griego bon. Nan tabata usa nan na reunion i den sirbishi. Un eksperto ku a kompará manuskritonan di Skritura Griego ku otro bukinan di e mesun periodo a bisa  lo siguiente: “Por lo general tin [mas kopia di Skritura Griego], . . . i nan ta mas kompleto.” E buki Anatomy of the New Testament ta bisa: “Nos por tin sigur ku loke nos ta lesa den un tradukshon moderno i konfiabel [di Skritura Griego] ta reflehá loke e eskritornan original a skirbi.”

9. Ki siguransa Isaías 40:8 ta duna nos tokante e mensahe di Beibel?

⁹ Durante siglonan, hopi kopiadó a hasi esfuerso pa ta presis ora nan a skirbi kopia di Beibel. P’esei, nos por konfia ku loke nos ta lesa i studia den Beibel ta eksakto. c Sin duda, ta Yehova ta esun ku a hasi sigur pa e mensahe di su Palabra yega serka nos intakto. (Lesa Isaías 40:8.) Pero algun hende por bisa: ‘Ya, djis pasó e mensahe di Beibel no a kambia, no ke men ku e ta bini di Dios.’ Ban wak algun prueba ku ta Dios a inspirá Beibel.

10. Duna ehèmpel di un profesia ku ta konfirmá loke 2 Pedro 1:21 ta bisa. (Wak e plachinan.)

¹⁰ Beibel tin yen di profesia ku a kumpli, i algun di nan tabatin siglonan skirbí kaba. Historia mes ta konfirmá ku nan a kumpli. Esaki no ta straña nos pasobra nos sa ku ta Yehova ta Outor di e profesianan ei. (Lesa 2 Pedro 1:21.) Ban pensa un ratu riba e profesianan tokante kaida di e poderoso stat Babilonia. Entre aña 700 i 732 P.K. Yehova a inspirá Profeta Isaías pa bisa ku Babilonia lo ser konkistá. El a deskribí presis kon e invashon lo bai i asta ku ta un tal Siro lo hasi esei. (Isa. 44:27–45:2) Fuera di esei, Isaías a profetisá tambe ku lo yega e tempu ku Babilonia lo keda kompletamente destruí i bandoná. (Isa. 13:19, 20) Anto tur e kosnan ei a pasa presis asina. Na 539 P.K., Babilonia a kai den man di Media i Pèrsia. Si bo bai aworakí kaminda Babilonia tabata, lo bo haña einan ruinanan kompletamente desolá.—Wak e vidio  Beibel A Profetisá Tokante Kaida di Babilonia den e edishon digital di e buki Bo Por Disfrutá di Bida pa Semper! lès 3 punto 5.

11. Kon Daniel 2:41-43 ta kumpliendo awe?

¹¹ No ta den pasado so profesianan di Beibel a kumpli. Aworakí tambe tin profesia ku ta kumpliendo. Por ehèmpel, pensa riba e profesia di Daniel tokante Potensia Mundial Angloamerikano. (Lesa Daniel 2:41-43.) Segun e profesia, e potensia mundial ei lo ta un parti “fuerte” manera heru i un parti “frágil” manera klei. I nos ta mira ku esei ta klòp presis. Tantu Gran Bretaña komo Merka a demostrá di ta fuerte manera heru. Den tur dos Guera Mundial nan a hunga un ròl importante den e viktoria, i te ainda nan tin un forsa militar grandi. Pero, nan poder ta limitá debí na nan siudadanonan ku ta bringa pa nan derecho pa medio di sindikatonan, kampañanan pa derechonan sivil i movementunan pa independensia. Wak loke un analista riba tereno polítiko a bisa: “Awe no ta eksistí un pais demokrátiko na mundu ku ta mas dividí den sentido polítiko ku Merka.” I na Gran Bretaña, e otro parti di e potensia mundial, kosnan ta meskos. Den e último añanan, hende no por a yega na un akuerdo tokante ki relashon Gran Bretaña mester tin ku Union Europeo. Debí na tur e divishonnan ei, ta kasi imposibel pa Potensia Mundial Angloamerikano aktua na un manera firme.

12. E profesianan di Beibel ta konvensé nos di kiko?

¹² E kantidat di profesianan di Beibel ku ya a kumpli ta fortalesé nos konfiansa ku Dios su promesanan pa futuro tambe lo kumpli. Nos ta sinti meskos ku e salmista ku a resa na Yehova: “Mi ta anhelá pa bo bin salba mi, pasobra mi speransa ta den bo palabranan.” (Sal. 119:81, nota) Pa medio di Beibel Yehova ta duna nos “un futuro i un speransa.” (Yer. 29:11) Nos speransa pa futuro ta basá riba e promesanan di Yehova, no riba loke hende ta hasi. P’esei, laga nos sigui hasi nos bèst pa studia e profesianan di Beibel pa nos konfiansa den e Palabra di Dios bira mas fuerte.

13. Ki motibu mas nos tin pa konfia Beibel? (Salmo 119:66, 138)

¹³ Un motibu mas pa konfia Beibel ta ku e ta yuda hende ku sigui su konseho. (Lesa Salmo 119:66, 138.) Por ehèmpel, danki na e konsehonan ei algun pareha ku tabata a punto di divorsiá, awor ta felis i uní. Anto nan yunan ta lanta den un famia felis kaminda nan ta sinti nan safe i stimá.—Efe. 5:22-29.

14. Konta un eksperensia ku ta mustra ku apliká konsehonan di Beibel ta kambia bida di hende.

¹⁴ Asta kriminalnan peligroso a kambia despues ku nan a sigui konsehonan di Beibel. Wak e kaso di un prizonero ku yama Jack. d E tabata un kriminal masha violento i, entre e detenidonan sentensiá na morto, e tabata konosí komo un di esnan mas peligroso. Un dia, Jack a bai skucha durante un estudio di Beibel. E rumannan ku tabata dirigí e estudio tabata asina amabel ku e tambe a kuminsá studia. Segun ku e tabata apliká konsehonan di Beibel den su bida, su komportashon a kambia i el a bira un mihó hende. Ku tempu, el a bira un publikadó no  batisá anto despues a batisá. Ku smak e tabata papia tokante Dios su Reino ku e otro prizoneronan i a studia Beibel ku por lo ménos kuater di nan. Dia ku Jack mester a ser ehekutá, Jack no tabata e mesun hende mas. Un di su abogadonan a bisa: “E Jack akí no ta e mesun Jack ku m’a topa 20 aña pasá. Loke el a siña for di Testigunan di Yehova a kambia su bida.” Aunke Jack a ser ehekutá, su ehèmpel ta mustra ku nos por konfia Beibel i ku e tin poder pa kambia bida di hende.—Isa. 11:6-9.

15. Kiko ta hasi nos komo sirbidó di Yehova diferente? (Wak e plachi.)

¹⁵ Yehova su sirbidónan ta uní i na pas ku otro pasobra nan ta sigui Beibel su konseho. (Huan 13:35; 1 Kor. 1:10) Esei ta algu notabel, foral ora nos mira kon dividí mundu ta den asuntunan polítiko, rasial i sosial. Jean, un hóben afrikano, a keda masha impreshoná ora el a mira kon uní i na pas Yehova su sirbidónan ta. Ora guera sivil a kuminsá na su pais, el a djòin ehérsito. Pero, despues el a hui pa un pais bisiña anto ei el a topa Testigunan di Yehova. Jean a bisa: “M’a siña ku siguidónan di e religion berdadero no ta mete ku polítika ni no ta dividí. Al kontrario, nan ta stima otro.” El a sigui bisa: “M’a dediká gran parti di mi bida ta lucha pa un pais. Pero, ora m’a siña loke Beibel ta bisa, m’a disidí di usa mi bida pa sirbi Yehova.” Jean a kambia kompletamente. Awor en bes di bringa ku hende ku no tin e mesun background kuné, e ta siña tur hende ku e topa e mensahe di Beibel. E bon resultado ku Beibel su konseho tin riba hende di diferente nashonalidat, ta prueba konvinsente ku nos por konfia Dios su Palabra.

16. Dikon ta importante pa nos fortalesé nos konfiansa den Dios su Palabra?

¹⁶ Segun ku mundu ta bai di malu pa  pió, nos konfiansa den Dios su Palabra lo ser poné na prueba. Hende lo purba di pone nos duda: ‘Loke Beibel ta bisa ta bèrdat? Di bèrdat Yehova a nombra e esklabo fiel i prudente pa guia su sirbidónan awe?’ Si nos ta konvensí ku Yehova su Palabra semper ta bèrdat, e atakenan ei lo no kibra nos fe. Kada un di nos lo bisa: “Mi ta determiná pa obedesé [Yehova su] normanan henter mi bida, sí, te na mi morto.” (Sal. 119:112) Nos lo “no tin bèrgwensa” pa papia ku otro hende tokante e bèrdat i pa animá nan pa apliká Beibel su konseho den nan bida. (Sal. 119:46) Ademas, nos lo por soportá e situashonnan di mas difísil, inkluso persekushon, “ku pasenshi i goso.”—Kol. 1:11; Sal. 119:143, 157.

17. Kiko nos teksto di aña lo kòrda nos?

¹⁷ Nos ta asina gradisidu ku Yehova a permití nos konosé e bèrdat. E bèrdat ei ta yuda nos keda trankil i ta siña nos kon pa biba den un mundu ku ta mas konfundí i kaótiko ku nunka. Ademas, e ta duna nos un bunita speransa di un mihó futuro bou di e Reino di Dios. Nos teksto di aña pa 2023 lo yuda ta mas konvensí ku “tur [Dios su] palabranan,” sí, delaster un di nan, “ta bèrdat.”—Sal. 119:160.