1-2. (a) Kon nos ta sinti ora nos meditá riba tur e kosnan ku Hesus a bisa i a hasi? (b) Kiko nos lo trata den e artíkulo akí?

 ORA un hende ku nos stima muri, nos ta sinti su falta masha hopi! Kisas na promé instante, ora ku nos pensa riba e dianan promé ku el a muri, nos ta sinti tristesa, foral si el a sufri hopi. Pero ku tempu, kisas nos ta kòrda sierto kosnan di dje ku ta laga nos smail. Por ehèmpel, algu ku el a siña nos òf algu ku el a bisa òf hasi pa animá nos òf pa pone nos hari.

² Asina tambe nos ta sinti doló, ora nos lesa e relatonan den Beibel ku ta konta di e sufrimentu i morto di Hesus. Durante e temporada di Memorial nos ta dediká mas tempu pa reflekshoná riba e balor di su sakrifisio. (1 Kor. 11:24, 25) Pero, ora nos pensa riba e kosnan ku Hesus a bisa i a hasi tempu ku e tabata aki riba tera, nos ta sinti nos felis. Ta animante tambe pa meditá riba loke e ta hasiendo aworakí i kiko lo e hasi pa nos den futuro. Manera nos lo mira den e artíkulo akí, ora nos meditá riba tur e kosnan ei i riba e amor ku e tin pa nos, nos lo ta motivá pa demostrá nos gratitut na maneranan práktiko.

3. Menshoná algun motibu pakiko nos por ta gradisidu pa e reskate.

³ Ora nos para pensa riba Hesus su bida aki riba tera i su morto, nos ta yena ku gratitut. El a siña hende tokante  e bon kosnan ku e Reino di Dios lo hasi. Nos ta balorá loke Beibel ta bisa tokante e reskate i tur loke e reskate ei lo hasi posibel pa nos. Nos ta gradisidu pa e reskate pasobra el a habri kaminda pa nos por tin un bunita amistat ku Yehova i Hesus. Ademas, hende ku demostrá fe den Hesus lo tin speransa di haña bida eterno i di mira nan sernan kerí ku a muri. (Huan 5:28, 29; Rom. 6:23) Nos niun no meresé e bendishonnan ei ni tampoko nos no por paga Yehova i Kristu pa tur loke nan a hasi pa nos. (Rom. 5:8, 20, 21) Pero loke sí nos por hasi ta di demostrá nan kon gradisidu nos ta. Kon nos por hasi esei?

4. Kon Maria Magdalena a mustra gratitut pa loke Hesus a hasi p’e? (Wak e plachi.)

⁴ Laga nos wak e ehèmpel di un hudiu ku yama Maria Magdalena. El a ser tormentá pa shete demoño i a sufri hopi. Kisas el a pensa ku lo e keda den e situashon ei pa restu di su bida. Pues, bo por imaginá kon gradisidu e tabata ora Hesus a libr’é di e demoñonan. Su gratitut a motiv’é pa bira siguidó di Hesus i pa usa su tempu, energia i pertenensianan pa apoyá Hesus den su sirbishi. (Luk. 8:1-3) Maria tabatin masha apresio pa loke Hesus a hasi, pero probablemente e no tabatin idea ku Hesus su mihó regalo tabata na kaminda. Hesus lo a duna su bida “pa tur ku pone fe den dje no bai pèrdí, ma haña bida eterno.” (Huan 3:16) Aunke Maria no tabata sa esei, el demostrá su gratitut dor di ta leal na Hesus. Maria tabata t’ei ora Hesus tabata sufri na e staka, di manera ku e tabata un konsuelo pa tantu Hesus komo e otro hendenan einan. (Huan 19:25) Despues ku Hesus a muri, Maria huntu ku dos otro muhé a bai na Hesus su graf ku yerba di holó dushi pa hunta su kurpa. (Mar. 16:1, 2) Yehova a bendishoná Maria generosamente pa su lealtat. Despues ku Hesus a resusitá, el a bai serka  Maria i a papia kuné. Esei tabata un privilegio ku masha poko disipel a haña.—Huan 20:11-18.

5. Kon nos por mustra nos gratitut pa tur loke Yehova i Hesus a hasi pa nos?

⁵ Nos tambe por demostrá nos gratitut pa tur loke Yehova i Hesus a hasi pa nos. Kon? Ora nos usa nos tempu, energia i plaka pa sirbi Yehova. Por ehèmpel, nos por pone nos mes disponibel pa yuda den konstrukshon i mantenshon di nos lugánan di adorashon.

6. Dikon nos por bisa ku e reskate ta un regalo pa kada un di nos?

⁶ Ora nos pensa riba kuantu Yehova i Hesus ta stima nos, esei ta motivá nos pa stima nan tambe. (1 Huan 4:10, 19) Nos ta stima nan asta mas ora nos realisá ku Hesus a muri pa kada un di nos. Apòstel Pablo a rekonosé esei i a ekspresá su gratitut ora el a skirbi e rumannan na Galasia, bisando: “E Yu di Dios . . . a stima mi i a entregá su mes pa mi.” (Gal. 2:20) Pensa riba esaki: Danki na e reskate, Yehova a hala bo pa bo bira su amigu. (Huan 6:44) El a mira algu bon den bo i a paga e preis di mas haltu pa bo ta su amigu. Esei no ta hasi bo kontentu? No ta asina ku bo ta haña mas amor pa Yehova i Hesus? Ta bon pa nos puntra nos mes: ‘Kiko e amor ei ta motivá mi pa hasi?’

7. Manera nos ta mira riba e plachi, kon nos por demostrá nos amor pa Yehova i Hesus? (2 Korintionan 5:14, 15; 6:1, 2)

⁷ Nos amor pa Yehova i Hesus ta motivá nos pa stima otro hende. (Lesa 2 Korintionan 5:14, 15; 6:1, 2.) Un manera ku nos ta demostrá esei ta di hasi esfuerso pa prediká ku smak. Nos ta papia ku  tur hende sin importá nan rasa, di kua famia nan a bini, kuantu plaka nan tin òf kua skol nan a bai. Di e manera ei nos ta kooperá ku Yehova, kende ke “pa tur sorto di hende ser salbá i yega na un konosementu eksakto di e bèrdat.”—1 Tim. 2:4.

8. Kon nos por demostrá ku nos ta stima nos rumannan?

⁸ Nos ta demostrá nos amor pa Dios i Kristu ora nos ta stima nos rumannan. (1 Huan 4:21) Ora nan ta pasando den prueba, nos ta buska nan drechi i ta yuda nan. Ora nan pèrdè un ser kerí, nos ta konsolá nan. Ora nan ta malu, nos ta bishitá nan i ora nan ta desanimá, nos ta hasi nos bèst pa duna nan animashon. (2 Kor. 1:3-7; 1 Tes. 5:11, 14) Nos ta keda hasi orashon pa nan pasobra nos sa ku “súplika di un hende hustu tin hopi poder.”—Sant. 5:16.

9. Kua ta un otro manera ku nos por demostrá ku nos ta stima nos rumannan?

⁹ Un otro manera ku nos ta demostrá ku nos ta stima nos rumannan ta dor di hasi tur loke nos por pa keda na pas ku nan. Nos ke hasi nos esfuerso pa imitá Yehova su manera di pordoná. Pensa riba esaki: ‘Si Yehova tabata dispuesto pa laga su Yu muri pa nos pikánan, nos tambe no mester ta dispuesto pa pordoná nos rumannan ora nan peka kontra nos?’ Hamas nos lo ke ta manera e esklabo malbado ku Hesus a menshoná den un di su ilustrashonnan. Asta ora su doño a anulá e debe grandi ku e tabatin, e esklabo malbado no kier a anulá e debe chikitu di un otro esklabo. (Mat. 18:23-35) Si abo ku un ruman tin un problema, lo bo por tuma e promé paso pa hasi pas kuné promé ku Memorial? (Mat. 5:23, 24) Esei lo demostrá ku bo ta stima Yehova i Hesus masha hopi mes.

10-11. Kon ansianonan por mustra ku nan ta stima Yehova i Hesus?

¹⁰ Kon ansianonan por demostrá ku nan ta stima Yehova i Hesus? Un manera importante ku nan por hasi esei ta di kuida Hesus su karnénan. (Lesa 1 Pedro 5:1, 2.) Hesus a hasi sigur ku Pedro a komprondé e punto ei. Despues ku el a nenga Hesus tres biaha, muy probablemente Pedro tabata anshá i kier a hasi tur loke e tabata por pa proba Hesus ku e tabata stim’é. Despues di Hesus su resurekshon, el a puntra Pedro: “Simon, yu di Huan, bo stima mi?” Sigur Pedro lo a hasi kualke kos pa mustra Hesus ku e tabata stim’é. Hesus a bisa Pedro: “Kuida mi lamchinan.” (Huan 21:15-17) Pa restu di Pedro su bida, ku kariño, el a kuida Hesus su karnénan i asina el a demostrá kuantu e tabata stima Hesus.

¹¹ Ansianonan, durante e temporada di Memorial, kon boso por mustra ku boso ta tuma loke Hesus a bisa Pedro na serio? Boso por mustra kuantu boso ta stima Yehova i Hesus dor di pastoriá e rumannan i hasi boso esfuerso pa yuda esnan inaktivo bolbe serka Yehova. (Eze. 34:11, 12) Ademas, boso por animá e studiantenan di Beibel i kualke otro hende ku asistí na Memorial. Boso ta hasi tur esei pa laga nan sinti nan bon biní pasobra boso tin e speransa ku nan tambe lo bira un disipel di Hesus.

12. Dikon loke Hesus a bisa e anochi promé ku el a muri ta duna nos kurashi? (Huan 16:32, 33)

¹² E anochi promé ku Hesus a muri, el  a bisa su disipelnan: “Den mundu boso ta pasa tribulashon, ma tene kurashi! Mi a vense mundu.” (Lesa Huan 16:32, 33.) Kiko a yuda Hesus demostrá kurashi ora su enemigunan a menas’é i kiko a yud’é keda fiel te na morto? El a konfia riba Yehova. E tabata sa ku su siguidónan lo enfrentá pruebanan similar, p’esei el a pidi Yehova pa protehá nan. (Huan 17:11) Dikon esei ta duna nos kurashi? Pasobra Yehova ta mas fuerte ku kualke un di nos enemigunan. (1 Huan 4:4) Yehova ta mira tur kos. Nos tin sigur ku si nos dependé riba Yehova, lo e yuda nos dominá nos miedu i demostrá kurashi.

13. Kon Hose di Arimatea a mustra kurashi?

¹³ Wak e kaso di Hose di Arimatea. Den e komunidat hudiu, e tabata un hende masha respetá. E tabata miembro di Sanedrin, e korte supremo hudiu. Pero, promé ku Hesus a muri, Hose no tabatin niun tiki kurashi. Huan a bisa ku e “tabata un disipel di Hesus, ma na skondí pa motibu ku e tabatin miedu di e hudiunan.” (Huan 19:38) Aunke ku Hose tabatin fe den e mensahe di Reino, e no tabata ke pa otro hende sa esei. Probablemente e tabatin miedu ku hende lo no a respet’é mas si nan a haña sa ku e tabata un disipel di Hesus. Sinembargo, Beibel ta bisa ku despues ku Hesus a muri, Hose a “tuma un kurashi i a bai serka Pilato i a pidié e kurpa di Hesus.” (Mar. 15:42, 43) Awor tur hende tabata sa ku e tabata un disipel di Hesus.

14. Kiko bo tin ku hasi si bo tin miedu di hende?

¹⁴ Abo tin miedu di hende meskos ku Hose? Bo tin bèrgwensa pa bisa na trabou òf na skol ku bo ta un Testigu di Yehova? Bo ta keda tarda pa bira un publikadó òf pa batisá pasobra bo tin miedu di loke otro hende lo pensa di bo? No laga bèrgwensa ni miedu stroba bo di hasi loke bo sa ku ta korekto. Papia ku Yehova di kurason. Pidié duna bo kurashi pa hasi su boluntat. Ora bo mira kon Yehova ta kontestá bo orashonnan, lo bo haña mas forsa i mas kurashi.—Isa. 41:10, 13.

15. Despues ku Hesus a aparesé na su disipelnan, kiko nan goso a motivá nan pa hasi? (Lukas 24:52, 53)

¹⁵ Hesus su disipelnan tabata hopi tristu ora el a muri. Djis pone bo mes na nan lugá. Nan no a djis pèrdè un bon amigu,  pero nan a sinti ku nan a pèrdè nan speransa tambe. (Luk. 24:17-21) Pero, ora Hesus a aparesé na nan, el tuma tempu pa yuda nan komprondé kon el a kumpli ku e profesianan di Beibel. Ademas, el a duna nan un trabou importante pa hasi. (Luk. 24:26, 27, 45-48) Pa ora ku Hesus a bai shelu 40 dia despues, e tristesa di su disipelnan a kambia pa goso. Nan tabata masha kontentu pasobra nan tabata sa ku Hesus tabata bibu i ku lo e yuda nan kumpli ku e trabou ku el a duna nan. Nan goso a motivá nan pa alabá Yehova sin entregá.—Lesa Lukas 24:52, 53; Echo. 5:42.

16. Kon nos por hasi meskos ku Hesus su disipelnan?

¹⁶ Kon nos por hasi meskos ku Hesus su disipelnan? Esei ta dor di sirbi Yehova ku goso tur dia, no solamente durante e temporada di Memorial. Pa logra esei, nos tin ku pone e Reino di Dios na promé lugá den nos bida. Algun publikadó a ahustá nan dia i ora di trabou pa asina nan por traha mas den sirbishi, bai nan reunionnan i tene nan adorashon di famia mas regular. Tin asta a skohe pa biba sin sierto kosnan ku otronan ta sinti ta nesesario. Dikon? Pasobra nan ke ta mas útil den kongregashon òf ke sirbi kaminda no tin hopi ruman ta prediká. Aunke nos mester di perseveransia pa sirbi Yehova, e ta primintí nos ku lo e bendishoná nos si nos pone interesnan di Reino na promé lugá.—Pro. 10:22; Mat. 6:32, 33.

17. Kiko bo ta determiná pa hasi durante e temporada di Memorial akí? (Wak e plachi.)

¹⁷ E aña akí Memorial lo ta riba djamars 4 di aprel. Nos ta anhelá pa e dia ei yega. Pero, nos no tin ku warda te ora e fecha ei yega pa nos pensa riba Hesus su bida i morto i riba e amor ku e ku Yehova a mustra na nos. Probechá di kada oportunidat ku bo haña durante e simannan promé i despues di Memorial pa meditá riba tur e kosnan ei. Por ehèmpel, apartá tempu pa lesa i meditá tokante e eventonan ku tin riba e kuadro den nos Material i Tarea pa Reunion di aprel 2019, página 4. Segun ku bo ta hasi esei, focus riba e tekstonan ku ta duna bo mas gratitut, amor, kurashi i goso. Djei, pensa riba maneranan spesífiko ku bo por demostrá bo gratitut. Bo por tin sigur ku Hesus lo apresiá tur loke bo ta hasi pa kòrda riba dje durante e temporada di Memorial akí.—Rev. 2:19.