Algun a lanta den un kultura kaminda mayoria di hòmber ta mira i trata hende muhé komo inferior. Por ehèmpel, Hans, un superintendente di sirkuito na Bolivia, a bisa: “Algun hòmber a lanta den un kultura machismo. Esei ta pone ku nan ta sinti nan superior na hende muhé i ta trata nan malu.” b Shengxian, un ansiano na Taiwan, a bisa: “Kaminda mi ta biba, hende hòmber ta haña ku hende muhé no mag di mete den nan asuntunan. Anto si un hende hòmber trese opinion di un hende muhé dilanti, otro hende hòmber por hasi chèrchi di dje.” Tin hende hòmber ta demostrá nan punto di bista robes di hende muhé na maneranan ménos riparabel. Por ehèmpel, kisas nan ta konta chistenan ku ta mustra falta di rèspèt pa hende muhé.

E bon ta ku no ta importá den ki kultura un hòmber a lanta, e por kambia. E por siña ku hòmber i muhé ta igual i asina stòp di pensa ku hòmber ta superior ku muhé. (Efe. 4:22-24) Loke lo yud’é ku esei ta di siña for di Yehova i hasi meskos kuné. P’esei, den e artíkulo akí nos ta bai mira kon Yehova ta trata hende muhé, kon ruman hòmbernan por hasi meskos kuné i kon ansianonan por mustra inisiativa den mustra rèspèt na nos ruman muhénan.

KON YEHOVA TA TRATA HENDE MUHÉ?

Yehova ta e mihó persona pa siña nos komo ruman hòmber, kon pa trata hende muhé. E ta un Tata ku ta yen di kompashon i ta stima tur su yunan. (Huan 3:16) I nos fiel ruman muhénan ta su yu muhénan presioso. Ban wak algun manera ku  Yehova ta mustra ku e ta stima i respetá hende muhé.

E no ta deskriminá nan. Yehova a krea tantu hende hòmber komo hende muhé segun Su imágen. (Gén. 1:27) E no a duna hende hòmber mas inteligensia òf abilidat ku hende muhé. Ni tampoko e no ta preferá hende hòmber mas ku hende muhé. (2 Kró. 19:7) El a krea tur dos ku e mesun kapasidat mental pa komprondé bèrdatnan di Beibel i pa imitá Su bunita kualidatnan. E ta balorá tantu hende hòmber komo hende muhé ku tin fe den dje. Anto el a duna tur dos e speransa pa biba pa semper riba tera òf den shelu. (2 Ped. 1:1) Ta bisto anto ku Yehova no tin prehuisio kontra hende muhé.

E ta skucha nan. Yehova ta interesá den sintimentu i preokupashon di hende muhé. Por ehèmpel, el a skucha orashon di Raquel i Ana i a kontestá nan. (Gén. 30:22; 1 Sám. 1:10, 11, 19, 20) Ademas, Yehova a inkluí den Beibel relatonan di hende hòmber ku a skucha hende muhé. Por ehèmpel, Ábraham a obedesé Yehova i a skucha su kasá, Sara. (Gén. 21:12-14) Rei David a skucha Abigail. De echo, el a sinti ku ta Yehova a manda Abigail bin papia kuné. (1 Sám. 25:32-35) Hesus a imitá su Tata perfektamente i a skucha su mama, Maria. (Huan 2:3-10) E ehèmpelnan ei ta mustra ku un di e maneranan ku Yehova ta respetá hende muhé ta di skucha nan.

E ta konfia nan. Por ehèmpel, el a konfia Eva pa yuda kuida henter e tera. (Gén. 1:28) Di e manera ei, Yehova a mustra ku e no a konsiderá Eva komo inferior na su kasá, mas bien ku el a balorá Eva komo un ayudante pa Ádam. Tambe, Yehova a konfia profetanan Débora i Hulda pa konsehá su pueblo, inkluso un hues i un rei. (Hues. 4:4-9; 2 Rei. 22:14-20) Awe tambe Yehova ta konfia ruman muhénan pa hasi su trabou. Nos ruman muhénan ta sirbi komo publikadó, pionero i misionero. Nan ta yuda ku diseño, konstrukshon i mantenshon di Salòn di Reino i edifisionan di sukursal. Tin ta sirbi na Bètel, i otronan ta traha na ofisina di tradukshon. Nos ruman muhénan ta manera un ehérsito grandi ku Yehova ta usa pa kumpli ku su boluntat. (Sal. 68:11) Ta klaru anto ku Yehova no ta mira hende muhé komo débil i inkapas.

KON RUMAN HÒMBERNAN POR IMITÁ YEHOVA?

Pa nos sa si nos ta trata ruman muhénan manera Yehova ta hasi, analisá di kurason nos pensamentu- i echonan. Pa hasi esei, nos mester di yudansa. Meskos ku un dòkter ta laga un persona saka potrèt pa mira kondishon di su kurason, asina tambe un bon amigu i Beibel por yuda nos mira si e manera ku nos ta sinti tokante hende muhé ta agradá Yehova òf nò. Ban wak kon nos por hasi esei.

Puntra un bon amigu. (Pro. 18:17) Papia ku un amigu ku ta konosí pa ta amabel, rasonabel i balansá. Nos por puntr’é: ‘Kon abo ta haña ku mi ta trata ruman muhé? Nan ta sinti ku mi ta respetá nan? Tin algu ku mi por hasi pa trata nan mihó?’ Anto si nos amigu menshoná algun kos ku nos por mehorá, no rabia kuné. Na lugá di esei, hasi esfuerso pa sigui su konseho.

Studia Beibel. E mihó manera pa haña sa si nos ta trata nos ruman muhénan bon ta di kompará nos aktitut i echonan ku loke tin pará den e Palabra di Dios. (Heb. 4:12) Beibel tin diferente relato di hende hòmber ku a trata hende muhé bon i di otronan ku no a hasi esei. Nos por usa e ehèmpelnan ei pa mira si nos tin ku hasi kualke ahuste. Ademas, nos ke analisá, no djis un teksto, pero diferente teksto di Beibel pa haña e punto di bista korekto di hende muhé. Por ehèmpel, 1 Pedro 3:7 ta bisa ku mester duna un esposa “onor manera na un poron mas frágil.” c Akaso esei ke men ku un esposa ta inferior, esta, ménos inteligente òf ménos kapasitá? Niun ora so! Kompará loke Pedro a bisa na Galationan 3:26-29. Ei nos ta komprondé ku Yehova a skohe tantu hende muhé komo hende hòmber pa goberná huntu ku Hesus den shelu. Ora nos studia e Palabra di Dios i pidi un bon amigu bisa nos kon nos ta trata hende  muhé, nos por siña trata nos ruman muhénan na e manera korekto.

KON ANSIANONAN TA MUSTRA KU NAN TA RESPETÁ RUMAN MUHÉ?

Un otro manera ku ruman hòmbernan por siña kon pa trata ruman muhé ku rèspèt ta di imitá e ansianonan. Nan ta stima e kongregashon i ta pone un bon ehèmpel den mustra rèspèt na ruman muhé. Ban wak kon nan ta hasi esei.

Nan ta elogiá ruman muhé. Apòstel Pablo a pone un bon ehèmpel pa tur ansiano imitá. Ora el a skirbi su karta pa e kongregashon na Roma, el a elogiá vários ruman muhé. (Rom. 16:12) Bo por imaginá kon e ruman muhénan ei a sinti ora ku a lesa e karta ei pa e kongregashon? Super kontentu. Asina tambe, ansianonan mester elogiá ruman muhénan regularmente pa nan bunita kualidatnan i pa tur loke nan ta hasi pa Yehova. Ta asina ei ruman muhénan ta haña sa ku e kongregashon ta balorá i respetá nan mashá. Kisas ta nèt e tipo di animashon ei nan mester for di e ansianonan pa nan sigui sirbi Yehova fielmente.—Pro. 15:23.

Ora un ansiano elogiá un ruman muhé, loke e bisa mester ta spesífiko i di kurason. Dikon? Wak loke un ruman ku yama Jessica a bisa: “Nos ta keda kontentu ora ku un ansiano bisa nos ‘bon trabou.’ Pero nos ta apresiá mas ainda ora e ta spesífiko i bisa nos pakiko. Por ehèmpel, pasobra nos ta siña nos yunan pa sinta ketu durante reunion òf pasobra nos ta hasi hopi esfuerso pa trese nos studiante reunion.” Ora ku ansiano ta elogiá ruman muhénan pa algu spesífiko, nan ta laga e ruman muhénan sinti útil i balorá den kongregashon.

Nan ta skucha ruman muhé. Humildemente ansianonan ta rekonosé ku no ta nan so por bin ku bon idea. P’esei nan ta pidi ruman muhénan pa duna nan sugerensia. Ora ansianonan hasi  esei, nan ta animá ruman muhénan, i ta yuda nan mes tambe. Kon asina? Gerardo, un ansiano na Bètel, a bisa: “M’a ripará ku ora mi pidi ruman muhénan pa nan opinion, mi ta logra hasi mi trabou mas mihó. Hopi biaha nan tin mas eksperensia hasiendo e trabou ku mayoria di ruman hòmber.” Den kongregashon, mayoria di pionero ta ruman muhé. P’esei nan konosé hende den teritorio mas mihó. Bryan, un ansiano, a bisa: “Nos ruman muhénan tin hopi bon kualidatnan i por hasi hopi pa e organisashon. Realmente nos por benefisiá di nan eksperensia!”

Lo no ta sabí pa un ansiano ignorá sugerensia di ruman muhé. Dikon nò? Edward, un ansiano, a bisa: “Ora un ruman muhé kompartí su opinion i eksperensia ku bo, e ta yuda bo komprondé e asuntu mas mihó, i su opinion por yuda bo mustra mas empatia.” (Pro. 1:5) Asta si un ansiano no por usa un ruman muhé su sugerensia, tòg e por yam’é danki i bis’é kuantu e ta apresiá ku el a kompartí su idea kuné.

Nan ta entrená ruman muhé. Ta bon pa ansianonan buska oportunidat pa entrená ruman muhé. Por ehèmpel, nan por train nan kon pa saka grupo di sirbishi si un ruman hòmber batisá no t’ei. Tambe nan por train ruman muhénan pa traha ku diferente hèrmènt i mashin. Asina ei, ruman muhénan lo por yuda durante un proyekto di mantenshon òf konstrukshon. Na Bètel, e superintendentenan ta entrená ruman muhénan pa kumpli ku diferente asignashon. Por ehèmpel, nan ta entrená ruman muhé pa traha den mantenshon, hasi kompra, hasi trabou di akountent, traha programa di kòmpiuter i hopi otro kos mas. Ora ansianonan ta train e ruman muhénan, nan ta demostrá ku realmente nan ta konfia ruman muhé i ta rekonosé nan kapasidat.

Hopi ruman muhé ta usa e entrenamentu ku nan ta haña for di e ansianonan pa yuda otronan. Por ehèmpel, nan ta usa e training ku nan a haña den konstrukshon pa yuda drecha kas di nan rumannan despues di un desaster natural. Òf nan ta usa e entrenamentu ku nan a haña pa prediká den lugánan públiko pa train mas ruman muhénan pa hasi meskos. Kon e ruman muhénan ta sinti ora nan haña training for di e ansianonan? Jennifer a bisa: “Ora m’a bai yuda na un proyekto di konstrukshon di Salòn di Reino, un di e superintendentenan a tuma tempu pa entrená mi. El a elogiá mi tambe pa e trabou ku m’a hasi. M’a gusta traha kuné pasobra el a laga mi sinti ku mi ta konfiabel i balorá.”

TRATA RUMAN MUHÉ MANERA NAN TA PARTI DI BO MES FAMIA

Meskos ku Yehova, nos komo ruman hòmber stima nos ruman muhénan fiel. Kada un di nos ta trata nan manera nan ta parti di nos mes famia. (1 Tim. 5:1, 2) Nos ta hopi kontentu ku nos tin e onor di sirbi Yehova huntu ku nan. Anto nos ta felis ora nan sinti ku nos stimá nan i t’ei pa nan. Un ruman ku yama Vanessa a bisa: “Mi ta gradisí Yehova ku mi por forma parti di su organisashon ku ta yen di ruman hòmber ku ta animá mi.” Un ruman muhé na Taiwan a bisa: “Mi ta asina kontentu ku Yehova i su organisashon ta balorá ruman muhénan i ta tene kuenta ku nos sintimentunan. Esaki ta fortalesé mi fe i ta hasi mi aun mas gradisidu di mi privilegio di forma parti di su organisashon.”

Bo por imaginá bo kon kontentu Yehova ta keda ora e mira ruman hòmbernan den kongregashon ta balorá i trata ruman muhénan manera e ta trata nan? (Pro. 27:11) Benjamin, un ansiano na Eskosia, a bisa: “Mundu ta rebahá hende muhé. P’esei, ora ku un hende muhé drenta Salòn, nos ke p’e sinti e diferensia.” Laga nos tur hasi esfuerso pa imitá Yehova i trata nos ruman muhénan ku e amor i rèspèt ku nan meresé.—Rom. 12:10.