1. Dikon Memorial ta e dia di mas importante di aña? (Lukas 22:​19, 20)

 PA NOS komo Testigunan di Yehova, konmemorashon di e morto di Kristu, esta, Memorial, ta e dia di mas importante di aña. Esei ta e úniko evento ku Hesus spesífikamente a bisa su siguidónan pa selebrá. (Lesa Lukas 22:​19, 20.) Tin diferente motibu dikon Memorial ta un dia asina spesial pa nos. Ban wak algun di nan.

2. Dikon Memorial ta asina spesial pa nos?

² Memorial ta yuda nos meditá riba e balor di e reskate. Tambe e ta kòrda nos e maneranan ku nos por mustra apresio pa Hesus su sakrifisio. (2 Kor. 5:​14, 15) Ademas, e ta duna nos oportunidat pa tin “un interkambio di estímulo” ku nos rumannan. (Rom. 1:12) Anto hopi ruman ku a stòp di bin reunion lo asistí na Memorial. Debí na e kariño ku e rumannan a mustra nan na Memorial, nan ta disidí di bolbe serka Yehova. I hopi hende ta keda asina impreshoná di loke nan ta mira i skucha na Memorial ku nan haña smak di kuminsá studia. Tur esakinan ta hasi Memorial asina spesial pa nos!

3. Kon Memorial ta uni nos tur komo Testigunan di Yehova? (Wak e plachi.)

³ Pensa tambe kon Memorial ta uni nos tur komo Testigunan di Yehova. Rònt mundu, nos ta reuní segun ku solo ta baha na kada lugá. Nos ta skucha un diskurso ku ta resaltá importansia di e reskate. Nos ta kanta dos kantika,  pasa e pan i biña, anto di kurason nos ta bisa “amèn” na e kuater orashonnan. Den kuestion di 24 ora tur kongregashon lo a hasi mesun kos. Bo por imaginá kon kontentu Yehova i Hesus ta sinti ora nan mira nos tur ta mustra nos apresio i rèspèt pa nan di e manera akí?

4. Kiko nos lo trata den e artíkulo akí?

⁴ Den e artíkulo akí nos lo kontestá e tres siguiente preguntanan: Kon nos por prepará nos kurason pa Memorial? Kon nos por yuda otro hende benefisiá di e okashon? Anto kon nos por yuda rumannan inaktivo? Kontesta pa e preguntanan ei lo yuda nos prepará pa e okashon tan importante akí.

KON NOS POR PREPARÁ NOS KURASON PA MEMORIAL?

5. (a) Dikon nos tin ku meditá riba e balor di e sakrifisio di Hesukristu? (Salmo 49:​7, 8) (b) Kiko bo a siña di e vidio Dikon Hesus A Muri?

⁵ Un di e kosnan di mas importante ku nos por hasi pa prepará nos kurason pa Memorial ta di meditá riba e balor di e sakrifisio di Hesukristu. Humanidat hamas lo por a reskatá su mes di piká i morto. (Lesa Salmo 49:​7, 8; wak tambe e vidio Dikon Hesus A Muri?) a P’esei, Yehova di su mes a ofresé Hesus pa salba nos. Tantu Yehova komo Hesus a hasi un sakrifisio hopi grandi. (Rom. 6:23) Mas nos pensa riba loke Yehova i Hesus a hasi pa nos, mas nos lo balorá e reskate. Laga nos ban wak algun di e kosnan difísil ku Yehova i Hesus tabata dispuesto pa hasi pa nos. Pero promé, ban wak kiko e reskate a enserá.

6. Kiko e reskate a enserá?

⁶ Un reskate ta e preis ku bo ta paga pa rekobrá òf kumpra algu bèk. Ádam, e promé hende, tabata perfekto ora Yehova a kre’é. Pero ora el a peka, el a pèrdè e posibilidat di biba pa semper no p’e so, pero pa su yunan tambe. Pa rekobrá loke Ádam a pèrdè, Hesus a ofresé su bida perfekto komo un sakrifisio. Durante tur e tempu ku Hesus a biba riba tera “e no a kometé piká ni no a haña engaño den su boka.” (1 Ped. 2:22) Ora Hesus a muri, e tabata perfekto, pues su bida tabatin e mesun balor ku e bida ku Ádam a pèrdè.—1 Kor. 15:45; 1 Tim. 2:6.

7. Ki pruebanan Hesus a hañ’é kuné riba tera?

⁷ Ora Hesus tabata riba tera, el a obedesé Yehova den tur kos apesar di vários prueba ku el a hañ’é kuné. Por ehèmpel, Hesus tabata un mucha perfekto, pero su mayornan sí nò. Asina mes, el a obedesé nan. (Luk. 2:51) Ademas, ora e tabata tiner, lo e mester a resistí kualke preshon pa desobedesé su mayornan òf Yehova. Anto ora Hesus a bira adulto, Satanas a purba di pon’é peka i asta a purba di un manera direkto pa pon’é kibra su lealtat na Yehova. (Mat. 4:​1-11) Satanas tabata desididu di stroba Hesus di paga e reskate.

8. Kua prueba mas Hesus a hañ’é kuné?

⁸ Durante Hesus su sirbishi riba tera el a hañ’é ku vários prueba mas. Su enemigunan a persiguié i a purba di mat’é. (Luk. 4:​28, 29; 13:31) E mester a trata ku imperfekshon di su siguidónan. (Mar. 9:​33, 34) Durante su huisio, nan a tortur’é i a hasi chèrchi di dje. Despues, nan a ehekut’é mané ta un kriminal e tabata, i el a sufri hopi. (Heb. 12:​1-3) Anto e mester  a soportá e parti final di su huisio riba su mes, sin Yehova su protekshon. b—Mat. 27:46.

9. Kon abo ta sinti ora bo pensa riba Hesus su sakrifisio? (1 Pedro 1:8)

⁹ Ta bisto anto ku Hesus a sufri hopi pa pèrkurá e reskate. Ora nos pensa riba tur loke Hesus tabata dispuesto pa sakrifiká pa nos, nos ta haña un gran amor p’e.—Lesa 1 Pedro 1:8.

10. Kiko Yehova tabata dispuesto pa sakrifiká pa asina Hesus por a paga e reskate?

¹⁰ Pero awor, kiko Yehova tabata dispuesto pa sakrifiká pa asina Hesus por a paga e reskate? No tin un tata i yu ku ta mas será ku otro mané Yehova i Hesus. (Pro. 8:30) Ku esei na mente, imaginá kon Yehova mester a sinti ora el a mira Hesus ta pasa den tur su pruebanan aki riba tera. Sin duda Yehova a sinti un doló enorme pa mira kon hende a maltratá, rechasá i pon’é su Yu sufri.

11. Ki ehèmpel bo por usa pa komprondé kon Yehova a sinti ora Hesus a ser ehekutá?

¹¹ Kualke mayor ku a pèrdè un yu sa bon kuantu doló esei ta hasi. Aunke nos sa sigur ku lo tin resurekshon, esei no ta kita e doló ku nos ta sinti ora un hende ku nos ta stima muri. E ehèmpel ei ta yuda nos komprondé kon Yehova lo a sintié ora el a mira su yu sufri i muri riba 14 di nisan di aña 33 di promé siglo. c—Mat. 3:17.

12. Kon nos por probechá di e tempu ku falta promé ku Memorial?

¹² Kiko si for di awor bo purba di hasi estudio personal tokante e reskate? Kisas bo por asta hasié parti di bo Adorashon Komo Famia tambe. Pa haña mas informashon tokante e reskate, usa Guia pa Buska Informashon den Publikashonnan di Testigunan di Yehova òf nos otro publikashonnan. d Ademas, hasi sigur di sigui e programa di lesamentu di Beibel pa Memorial ku tin den Material i Tarea pa Reunion Nos Bida i Sirbishi Kristian. Anto riba dia di Memorial, no lubidá di wak e programa spesial di Adorashon di Mainta. Ora nos prepará nos kurason pa Memorial, nos lo por yuda otro hende benefisiá di dje tambe.—Èsd. 7:10.

 YUDA OTRO HENDE BENEFISIÁ

13. Kiko ta e promé kos nos tin ku hasi pa yuda otro hende benefisiá di Memorial?

¹³ Kon nos por yuda otro hende benefisiá di Memorial? Klaru ku e promé kos ku nos tin ku hasi ta di invitá nan. Fuera di invitá hende ku nos topa den sirbishi, nos por pensa tambe di invitá nos famia, kolega, mucha di skol i otro hende. Anto asta si nos no tin sufisiente invitashon imprimí, semper nos por manda e vershon elektróniko. Lo bo keda babuká di mira kuantu hende lo disidí di asistí!—Ekl. 11:6.

14. Splika dikon ta importante pa invitá hende personalmente.

¹⁴ Nunka balotá loke bo por logra ku un invitashon. Un dia, un ruman muhé a keda sorprendí ora su kasá, ku no ta Testigu di Yehova, a bis’é ku e ta bai Memorial kuné. Dikon e tabata sorprendí? Pasobra vários biaha el a yega di pidi su kasá bai kuné, pero nunka el a hasié. Kiko a pone e kasá kambia di idea? E esposo a splika ku un ansiano ku e tabata konosé a dun’é un invitashon personal. For di e aña ei e esposo a kuminsá bai Memorial.

15. Kiko nos lo ke tene kuenta kuné ora nos ta invitá hende na Memorial?

¹⁵ Tene kuenta ku hende ku nos invitá kisas lo tin pregunta, foral si ta pa promé biaha nan ta bin nos reunion. P’esei, pensa kua ta e preguntanan ku nan por bini kuné. (Kol. 4:6) Por ehèmpel, kisas algun di nan por puntra: ‘Ta kon e reunion ta bai?’ ‘Kon largu lo e dura?’ ‘Kon mi mester bisti?’ ‘Mester paga pa entrada?’ ‘Ta pasa kolèkt?’ P’esei, pa sa kiko un hende ku nos invitá ke haña sa, nos por djis puntr’é: “Bo tin pregunta?” I djei kontest’é loke e ke sa. Tambe nos por usa e vidionan Laga Nos Rekordá Hesus Su Morto i Kiko Ta Sosodé na un Salòn di Reino? Ademas, nos por usa lès 28 di e buki Bo Por  Disfrutá di Bida pa Semper! Den e lès ei tin vários punto ku bo por kompartí.

16. Ki pregunta mas un persona ku bin Memorial por tin?

¹⁶ Despues ku e persona a bin Memorial, kisas lo e tin mas pregunta. Manera, dikon niun hende (òf kasi niun hende) no a kome di e pan ni bebe di e biña. Òf, kisas lo e puntra ta kuantu biaha pa aña nos ta tene Memorial. I tambe kisas lo e ke sa si ta tur nos reunionnan ta asina. Aunke den e diskurso e puntonan akí a bini dilanti, chèns ta grandi ku e persona mester di mas splikashon. E artíkulo riba jw.org “Dikon Testigunan di Yehova Ta Selebrá e Sena di Señor Diferente for di Otro Religion?” por yuda nos kontestá algun di su preguntanan. Nos ke hasi tur loke ta na nos alkanse promé, durante i despues di Memorial pa yuda hende ku ta “dispuesto pa aseptá e bèrdat” benefisiá di e okashon.—Echo. 13:48.

YUDA RUMANNAN INAKTIVO

17. Kiko ansianonan por hasi pa yuda rumannan inaktivo? (Ezekiel 34:​12, 16)

¹⁷ Si bo ta un ansiano, kon bo por yuda rumannan inaktivo durante e temporada di Memorial? Esei ta di mustra nan ku bo ta stima nan. (Lesa Ezekiel 34:​12, 16.) Promé ku Memorial hasi sigur di tene kontakto ku mas tantu di nan posibel. Bisa nan ku bo t’ei pa yuda nan i ku bo ta stima i apresiá nan. Duna nan un invitashon pa Memorial. Anto si nan asistí, risibí nan ku brasa habrí. Despues di Memorial keda den kontakto ku nan i duna nan kualke yudansa ku nan tin mester pa bolbe serka Yehova.—1 Ped. 2:25.

18. Kon nos tur por yuda rumannan inaktivo? (Romanonan 12:10)

¹⁸ Tur hende den kongregashon por yuda rumannan inaktivo ku bin Memorial. Kon asina? Esei ta di trata nan ku amor, bondat i rèspèt. (Lesa  Romanonan 12:10.) Kòrda ku kisas no tabata niun tiki fásil pa e rumannan stimá akí bin un reunion. Kisas nan tabata preokupá tokante kon e rumannan lo risibí nan. e Pues, no hasi nan pregunta ku lo laga nan sinti inkómodo ni tampoko bisa kos ku lo hùrt nan. (1 Tes. 5:11) Kòrda ku nan ta nos ruman. Nos ta felis di por adorá Yehova huntu ku nan atrobe!—Sal. 119:176; Echo. 20:35.

19. Dikon ta bon pa konmemorá Hesus su morto?

¹⁹ Di tur loke nos a trata, ta hopi bisto dikon Hesus a manda nos pa konmemorá su morto tur aña. Ora nos asistí na Memorial nos ta benefisiá nos mes i otro hende na vários manera. (Isa. 48:​17, 18) Nos ta haña mas amor pa Yehova i Hesus. Nos ta haña chèns pa mustra nan kon kontentu nos ta pa tur loke nan a hasi pa nos. Nos ta bira mas será ku nos rumannan. Anto, nos por yuda otro hende haña sa kon nan tambe por disfrutá di e bendishonnan ku e reskate ta hasi posibel. P’esei, laga nos hasi tur loke nos por e aña akí pa ta prepará pa e dia mas importante di aña!