1-2. Ki difikultat sirbidónan di Yehova por haña nan kuné?

 DI UN dia pa otro, un suseso teribel por kambia bo bida pa semper. Wak algun ehèmpel. Riba un dia, dòkter a bisa Luis a ku e tin un tipo di kanser hopi agresivo i ku ta un par di luna so e tin. Monika tabata traha duru sirbiendo Yehova huntu ku su kasá, kende tabata ansiano. Pero, un dia Monika a bin haña sa ku su kasá tabata hiba un bida dòbel pa hopi aña. Olivia, kende ta soltero, a hañ’é ta sali fo’i su kas pasó un orkan grandi tabata na kaminda. Ora el a bai bèk, el a haña su kas tur destruí. Den un fregá di wowo, bida di e rumannan akí a kambia drástikamente. Algu asina a yega di pasa ku bo?

² Komo sirbidónan di Yehova, nos ta haña nos ku problema, malesa i difikultat meskos ku tur hende. Banda di esei, nos tin ku soportá oposishon òf persekushon di hende ku ta odia e pueblo di Dios. Aunke Yehova no ta prevení kos malu pasa ku nos, e ta primintí ku semper lo e yuda nos. (Isa. 41:10) Ku su yudansa, nos por mantené nos goso, tuma bon desishon i keda fiel asta durante tempunan hopi duru. Den e artíkulo akí, nos lo analisá kuater kos ku Yehova ta hasi pa yuda nos ora nos haña nos ku gòlpi di bida. Nos lo wak tambe loke nos tin ku hasi pa haña e yudansa ku Yehova ta duna nos.

 YEHOVA LO PROTEHÁ BO

3. Kiko por ta difísil pa nos ora nos ta pasa den situashon difísil?

³ E reto. Kisas ta duru pa nos pensa kla i tuma desishon ora nos haña nos den un situashon difísil. Dikon? Pasó por ta nos kurason ta hasi hopi doló òf ansiedat i preokupashon ta nubla nos mente. Nos por sinti ku nos ta den skuridat sin sa unda pa bai. Asina e dos ruman muhénan menshoná na paragraf 1 a sinti. Olivia a bisa: “Despues ku e orkan a destruí mi kas, m’a sinti mi pèrdí i tur kibrá.” Ora Monika a papia tokante e traishon di su kasá, el a bisa: “Mi no a djis sinti mi desapuntá. M’a sinti kon mi kurason a kibra. Mi no tabata por ni sikiera hasi kosnan di tur dia. Hamas m’a pensa ku e kos akí lo por a pasa ku mi.” Kiko Yehova a primintí di hasi ora nos ta sinti nos pèrdí i kibrá?

4. Kiko Yehova ta primintí nos na Filipensenan 4:6 i 7?

⁴ Yehova ta primintí di duna nos loke Beibel ta yama “e pas di Dios.” (Lesa Filipensenan 4:6, 7.) E pas akí ta un sintimentu di trankilidat ku solamente amigunan di Yehova por sinti. E sintimentu akí “ta surpasá tur komprondementu,” sí, e ta mas maravioso di loke kualke hende por imaginá. B’a yega di hasi orashon intenso na Yehova i despues diripiente b’a kuminsá sinti bo kalmu i trankil? Awèl loke b’a sinti ei, ta “e pas di Dios.”

5. Kon e pas di Dios ta protehá nos mente i kurason?

⁵ Filipensenan 4:7 ta bisa tambe ku e pas di Dios “lo protehá boso kurason i boso mente.” E palabra griego tradusí komo “protehá” tabata un ekspreshon militar ku a deskribí sòldánan ku tabata vigilá un stat pa enemigu no atak’é. Habitantenan dje stat ei por a drumi trankil pasó nan tabata sa ku e sòldánan tabata protehá e stat. Di mes manera, ora e pas di Dios ta protehá nos kurason i nos mente, nos lo sinti nos trankil, kalmu i na pas. (Sal. 4:8) Asta si e situashon no mehorá mesora, nos lo por sinti un grado di trankilidat meskos ku Ana. (1 Sám. 1:16-18) Anto e ora ei, lo bira hopi mas fásil pa nos pensa kla i tuma bon desishon.

6. Kiko nos mester hasi pa sinti e pas di Dios? (Wak e plachi.)

⁶ Loke abo tin ku hasi. Ora bo ta pasa den un situashon ku ta preokupá bo i anshá bo, bo tin ku yama e sòldá. Ku otro palabra, pidi Yehova protehá bo i sigui  resa na dje te ora bo sinti su pas. (Luk. 11:9; 1 Tes. 5:17) Ta esei ta loke Luis, menshoná na paragraf 1, ku su kasá, Ana, a hasi ora dòkter a duna nan e mal notisia ku Luis tabatin un par di luna so. Luis a bisa: “Un hende no por imaginá kon difísil ta pa, den e momentonan ei, tuma desishon tokante kuido di salú i otro asuntunan. Pero nos a sinti pas durante henter e proseso pasó nos tabata hasi algu masha importante: resa.” Nan tur dos a bisa ku nan tabata hasi orashon intenso bes tras bes, pidiendo Yehova pa duna nan pas mental, un kurason kalmu i trankil i e sabiduria pa tuma bon desishon. I nan a sinti ku Yehova a yuda nan. Si bo ta pasando den un situashon difísil, no stòp di hasi orashon; sigui. Lo bo sinti kon Yehova ta duna bo su pas i ta protehá bo kurason i bo mente.—Rom. 12:12.

YEHOVA LO DUNA BO STABILIDAT

7. Kon nos por sinti ora nos ta pasa den un situashon difísil?

⁷ E reto. Ora nos ta pasa den un situashon difísil, nos sintimentu-, pensamentu- i reakshonnan no semper ta balansá manera normalmente nan sa ta. Meskos ku olanan brutu ta dal un barku bent’é p’aki i p’aya, nos tambe por sinti ku nos ta ser bentá di un emoshon pa un otro. Asina Ana, menshoná na paragraf 6, a sinti ora su kasá Luis a muri. El a konta: “Tin biaha mi tabata sinti mi asina bashí i deprimí ku e úniko kos ku mi tabata pensa riba dje ta mi mes problemanan. Otro ora mi tabata rabiá ku Luis pasobra el a bai laga mi.” Tabatin dia ku Ana tabata sintié so i frustrá ya ku awor t’e mester a tuma desishon riba kosnan ku normalmente Luis tabata hasi. Ana tabata sintié mané den un tempestat meimei di laman ganchu. Kon Yehova ta yuda nos ora nos emoshonnan ta hoga nos i ta duru pa tene nos kabes riba awa?

8. Kiko Yehova ta primintí nos na Isaías 33:6?

⁸ Yehova ta primintí di stabilisá nos. (Lesa Isaías 33:6.) Ora un barku hañ’é ku mal tempu, e por kuminsá zoya bai bin masha brutu mes. P’esei hopi barku tin stabilizer na kada banda. Ora usa nan, e biahe ta hopi mas safe i konfortabel. Interesante ta ku mayoria di stabilizer ta funshoná mihó si e barku ta moviendo. Asina tambe, si nos ke pa Yehova stabilisá nos, nos tin ku sigui move padilanti, es desir, sigui sirbié fielmente.

9. Kon nos hèrmèntnan di investigashon por yuda nos haña stabilidat? (Wak e plachi.)

 ⁹ Loke abo tin ku hasi. Ora bo ta meimei di un tempestat di emoshon, hasi tur loke bo por pa sigui resa, asistí na reunion i prediká. Klaru ku, kisas bo no por hasi mes tantu ku ántes, pero no lubidá ku Yehova ta rasonabel. (Kompará ku Lukas 21:1-4.) Fuera di eseinan, kòrda saka tempu pa estudio personal i meditashon. Dikon? Pasobra Yehova a pèrkurá bunita artíkulo i vidio pa yuda stabilisá bo. Pa bo haña loke bo mester, usa e hèrmèntnan di investigashon ku ta disponibel manera JW Library^® app i Guia pa Buska Informashon den Publikashonnan di Testigunan di Yehova. Monika, menshoná anteriormente, a bisa ku asina e sinti ku su emoshonnan ta kuminsá bira instabil, mesora e ta usa e hèrmèntnan ei. Por ehèmpel, tin biaha e tabata buska palabranan manera rabia, traishon òf lealtat i despues e tabata lesa e informashonnan te ora ku e kuminsá sintié mihó. El a bisa: “Na kuminsamentu mi ta tur anshá segun mi ta taip pa buska informashon, pero al final ora mi kaba di pasa den e informashon ta mané Yehova ta duna mi un brasa. Segun ku mi ta lesa, mi ta realisá ku Yehova ta komprondé delaster un di mi sintimentunan i ta yuda mi.” Yehova por yuda abo tambe haña stabilidat te ora bo yega laman kalmu.—Sal. 119:143, 144.

YEHOVA LO SOSTENÉ BO

10. Kon nos por sinti nos despues di un suseso troumátiko?

¹⁰ E reto. Despues di un suseso troumátiko, lo tin dianan ku kisas lo bo sinti bo físikamente i emoshonalmente kansá. Por ta bo ta sinti bo mané un atleta ku tabatin kustumber di kore duru pero ku awor ta leshoná i kasi no por kana. Kosnan ku ántes bo tabata hasi wowo será awor ta parse difísil, i aktividatnan ku bo tabata gusta awor bo no tin smak den nan. Ta un lucha pa lanta for di kama, i meskos ku Elías, e úniko kos ku bo ke hasi ta drumi. (1 Rei. 19:5-7) Kiko Yehova ta primintí di hasi ora nos ta sinti nos débil?

11. Kiko mas Yehova ta hasi pa yuda nos? (Salmo 94:18)

¹¹ Yehova ta primintí di sostené nos. (Lesa Salmo 94:18.) Meskos ku un atleta leshoná mester di un hende òf  algu pa lèn riba dje p’e por move, nos tambe mester di sosten pa por keda move, esta, pa keda aktivo den Yehova su sirbishi. Ta na e momentonan ei Yehova ta sigurá nos: “Ami, Yehova bo Dios, ta kohe bo man drechi tene; ami ta e Persona ku ta bisa bo: ‘No tene miedu. Lo mi yuda bo.’” (Isa. 41:13) Rei David a biba esei ora el a hañ’é ku diferente enemigu i prueba. Ta p’esei el a bisa Yehova: “Bo man drechi ta sostené mi.” (Sal. 18:35, nota) Pero kon Yehova ta hasi esei?

12. Si nos ta sinti nos deprimí, ken Yehova por usa pa yuda nos?

¹² Hopi biaha Yehova ta usa otro hende pa duna nos e yudansa i apoyo ku nos tin mester. Por ehèmpel, un biaha ora David tabata sintié desanimá, su amigu Yónatan a bai bishit’é pa fortales’é i anim’é. (1 Sám. 23:16, 17) Asina tambe, Yehova a usa Eliseo pa yuda Elías. (1 Rei. 19:16, 21; 2 Rei. 2:2) Den nos kaso, Yehova por usa nos famia, nos amigunan òf e ansianonan pa sostené nos. Pero e kos ta ku ora nos ta sinti nos deprimí kisas e úniko kos ku nos ke ta, pa hende laga nos na pas. I esei ta normal. Pero e ora ei ki nos por hasi pa haña sosten for di Yehova?

13. Kiko nos tin ku hasi pa haña sosten di Yehova? (Wak e plachi.)

¹³ Loke abo tin ku hasi. Bringa e gana di ke ta bo so. Ora bo isolá bo mes, bo tin tendensia di focus demasiado riba bo mes i bo problemanan. Anto esei ta hiba ku bo ta tuma mal desishon. (Pro. 18:1) Ta klaru ku, de bes en kuando, nos tur mester di tempu pa ta nos so, foral ora nos ta pasa den momentonan difísil. Pero si bo isolá bo mes pa periodonan largu, kisas bo ta rechasá nèt loke ku Yehova ta usa pa sostené bo. Pues pa kon duru kos por ta, aseptá e yudansa di bo famia, bo amigunan i e ansianonan. Bo tin ku realisá ku Yehova ta usando nan pa sostené bo.—Pro. 17:17; Isa. 32:1, 2.

YEHOVA LO KONSOLÁ BO

14. Kiko por duna nos miedu?

¹⁴ E reto. Sierto situashon por duna nos miedu. Den pasado, sirbidónan fiel di Yehova a konta kon nan tabata tembla di miedu debí na nan enemigunan òf otro problema. (Sal. 18:4; 55:1, 5) Nos  awe por haña nos ku oposishon na skol òf na trabou. Preshon por bini tambe di nos famia òf di gobièrnu. Kisas nos tin miedu di muri debí na un problema di salú. Na momentonan asina, nos por sinti nos mes indefenso ku un mucha chikitu. Kon Yehova ta primintí di yuda nos?

15. Ki siguransa Salmo 94:19 ta duna nos?

¹⁵ Yehova ta primintí di konsolá nos i trankilisá nos. (Lesa Salmo 94:19.) Imaginá ku ta anochi i un mucha chikitu ta den su kama. Awa ta kuminsá kai, bos ta klap i welek ta kòrta. E mucha ta yen di miedu i no por drumí. Awor su tata ta bin serka dje i ta bras’é te ora e pega soño. Aunke e mal wer no a pasa, e mucha ta sintié safe den brasa di su tata. Ora nos haña nos konfrontá ku situashon ku ta duna nos hopi miedu, kisas nos tambe ke pa nos Tata den shelu, den un sentido, brasa nos te ora nos sinti nos trankil. Kiko nos tin ku hasi pa haña konsuelo for di Yehova?

16. Kiko nos tin ku hasi pa haña konsuelo for di Yehova? (Wak e plachi.)

¹⁶ Loke bo tin ku hasi. Krea e kustumber di pasa tempu regularmente ku Yehova, kòmbersá kuné i lesa su Palabra. (Sal. 77:1, 12-14) Asina ei, ora bo haña bo ku un situashon ku ta duna bo strès, bo promé reakshon lo ta di pidi bo Tata den shelu yuda bo. Kont’é loke bo tin miedu di dje i loke ta preokupá bo. Djei, lesa Beibel pa Yehova papia ku bo i konsolá bo. (Sal. 119:28) Por ehèmpel, bo por lesa Yòb, Salmo i Proverbionan i Hesus su palabranan na Mateo 6. Nan tur por animá bo ora bo tin miedu. Ora bo resa na Yehova i lesa Beibel, lo bo sinti kon Yehova ta konsolá bo.

17. Di kiko nos por ta konvensí?

¹⁷ Nos por ta konvensí ku Yehova lo t’ei pa nos durante e tempunan di mas duru di nos bida. Hamas nos lo ta nos so. (Sal. 23:4; 94:14) Yehova ta primintí di protehá nos, stabilisá nos, sostené nos i konsolá nos. Papiando di Yehova, Isaías 26:3 ta bisa: “Dios, abo lo protehá hende ku ta konfia kompletamente den bo. Lo bo duna nan pas kontinuo, pasobra nan ta konfia den bo.” Pues konfia den Yehova i hasi tur loke bo por pa haña su yudansa. Si bo hasi esei, lo bo tin forsa pa wanta asta e gòlpinan mas duru di bida.